Matiyə̈ 25
25
Ndoka pâ pö ndə̂ abechë-ɛ̈chë lə̂ könô gbɛ̂
1«Käko pö ndə̂ Gbölö gö-gbïɛ̈ ndə̂ tchêlafô wä batə̂ abechë-ɛ̈chë#25.1 Abechë lâme wûn-âbo sə̂ aköchë dämba-a. lə̂ könô gbɛ̂ ndə̂ andjë kʉ̂ lâmba ndə̂ andjê kə̈ wûtu lə̂ köbo köchë ndə̂ tche ê ndə̂kə̂ to ɛ̈chë. 2Lə̂ gbâtə̂ andjê, angbɨ̈lə̈ wä mïndûu, azü ndə̂ tchə̂lə̂ la andjê krâ wâ ndjë mïndûu. 3Angbɨ̈lə̈ nə̈ kʉ̂ lâmba ndə̂ andjê, praâbalë kə̈ zâbo kâdâ-lâmba nə̈ potə̂ andjê-a. 4Azü ndə̂ tchə̂lə̂ la andjê krâ kʉ̂ angä la kâdâ-lâmba lə̂nə̈, ëndrotə̂ lâmba ndə̂ andjê. 5Ndə̂ köchë nə̈ kâbô ngbâ yê kâ gasa, andjë mômo gbɛ̂, kə̈ lô-ê. 6Lə̂ agrʉ̂mi, a djê ngâ wârə̂ päkëdə̂: ‹Täfo köchë nə̈ âka âtə-o! Nyë wütu kə̈ ê lə̂ köbo yê!› 7Käko abechë-ɛ̈chë nə̈ jô gbɛ̂, kə̈ sə̂ lakə̂ nyikrə lâmba ndə̂ andjê. 8Angbɨ̈lə̈ nə̈ tô rə̂ sə̈ andjanə̈ ndə̂ tchə̂lə̂ la andjê krâ lâme päkëdə̂: ‹Nyë sü ngâ kâdâ-lâmba ndə̂ nyê kpîɛ̂kpîɛ̂ rə̂ sə̈ ârâ, bëte lâmba ndə̂ ârâ kä lakə̂ wrʉ.› 9Andjanə̈ ndə̂ tchə̂lə̂ la andjê krâ lâme tô rə̂ päkëdə̂: ‹Âdə̂âbo käko-a, bëte kâdâ-lâmba ndə̂ ârâ gêâbo ndə̂kə̂ pa azə̈ ngbotâ la nyê-a, nyë ë kə̂ yô andə̂ nye nə̈ bhândə̂ a-earə̂ kə̂ ka rə̂.› 10Ndə̂ angbɨ̈lə̈ abechë-ɛ̈chë nə̈ rô ndə̂kə̂ yo kâdâ-lâmba nə̈, täfo köchë nə̈ kângbâ yê. Abechë-ɛ̈chë ndə̂ andjë krʉ̂ bëte tchë lî la tchë atə̂ tchâalê ndə̂ kpülü nə̈ wâ tâ, ânyë andjë tchû manda nə̈ ëtâ. 11La tchêngbâ nə̈, angbɨ̈lə̈ abechë-ɛ̈chë nə̈ kâ, kə̈ tô rə̂ päkëdə̂: ‹Gbölö akrə, gbölö akrə! Amö kro manda tə̂ ârâ.› 12Praâbalë tche tô rə̂ ndə̂nə̈ päkëdə̂: ‹Ɛn-ɛn, tə̂ lëge nə̈ më tö rə̂ sə̈ nyê, më wûn-âbo sə̂ nyê-a.› 13La nyê gbö-ê, nyë löäbô lô-ê, bëte nyë wûn-âbo sə̂ lö nə̈ âdəndjë dalo nə̈-a.»
Ndoka pâ pö ndə̂ a-earə̂ kua vötaâ
(Luk 19.11-27)
14«Pö ndə̂ Gbölö gö-gbïɛ̈ ndə̂ tchêlafô wä batə̂ ngâ köchë ndə̂ tche ê tʉ̂rʉ bhâlə̂ ngâ gö ngbî. Tche ê a-earə̂ kua ndə̂ yê, kə̈ kʉ̂ arə ndə̂ yê sə̈ andjê. 15Tche kʉ̈ mîɛ̈-makətche ndə̂ lôlo ngbangbo mïndûu sə̈ dokʉ̈ nə̈, kə̈ kʉ̂ mîɛ̈-makətche ndə̂ lôlo ngbangbo bïchuû sə̈ ngânə̈, kə̈ kʉ̂ mîɛ̈-makətche ndə̂ lôlo ngbangbo balë sə̈ balë nə̈ gundə̂sə̂ gbôgbô ndə̂ andjê balë balë. La tchêngbâ nə̈ tche rô etə̂. 16Akrə ndə̂ tche wâ la mîɛ̈-makətche ndə̂ lôlo ngbangbo mïndûu ê kə̈ bhî küma yê pânə̈, kə̈ gbô ngânə̈ ngbangbo mïndûu ëpânə̈. 17Tchanə̈ ndə̂ tche wâ la mîɛ̈-makətche ndə̂ lôlo ngbangbo bïchuû ê, kə̈ mbô ndjë tâ käko, kə̈ gbô ngânə̈ ngbangbo bïchuû ëpânə̈. 18Praâbalë tchanə̈ ndə̂ tche gbô mîɛ̈-makətche ndə̂ lôlo ngbangbo balë ê, kə̈ djî kudû kə̈ chî makətche ndə̂ gbölö akrə ndə̂ yê wü bhâlə̂ nə̈.
19«La tchêngbâ angbängbä alö, gbölö akrə ndə̂ a-earə̂ kua nə̈ kângbâ yê ndə̂kə̂ pa andjë mbo kônde ndə̂ makətche ndə̂ yê la andjê. 20Tchanə̈ ndə̂ tche gbô mîɛ̈-makətche ndə̂ lôlo ngbangbo mïndûu lâme nə̂, kə̈ tô rə̂ päkëdə̂: ‹Gbölö akrə, mîɛ̈-makətche ndə̂ lôlo ngbangbo mïdûu ndə̂ mo kʉ̂ rə̂ sə̈ mê alême, më gbö ngânə̈ ëpânə̈ ngbangbo mïndûu, ârə̂ kä âtə.› 21Gbölö akrə ndə̂ yê nə̈ tô rə̂ sə̈ tchë päkëdə̂: ‹Sə̂nə̈ kä, âdâka nə̂, mo wätə̂ djîrə̂ earə̂ kua. Âbatə̂ mo mbô tchôtchô kua la kpîɛ̂kpîɛ̂ rə ndə̂ më kʉ̂ rə̂ sə̈ mö, më âza mö ndə̂kə̂ wun tchô pâ angbängbä arə ndə̂ mê. Amö nə kə̂ sə la mômô la mê.› 22Tchanə̈ ndə̂ tche gbô mîɛ̈-makətche ndə̂ lôlo ngbangbo bïchuû lâme nə̂ ndjë, kə̈ tô rə̂ päkëdə̂: ‹Gbölö akrə, mo kʉ̈ mîɛ̈-makətche ndə̂ lôlo ngbangbo bïchuû alême sə̈ mê, më gbö ngânə̈ ngbangbo bïchuû ëpânə̈, ârə̂ kä âtə.› 23Gbölö akrə ndə̂ yê nə̈ tô rə̂ sə̈ tchë päkëdə̂: ‹Sə̂nə̈ kä, âdâka nə̂, mo wätə̂ djîrə̂ earə̂ kua. Âbatə̂ mo mbô tchôtchô kua la kpîɛ̂kpîɛ̂ rə ndə̂ më kʉ̂ rə̂ sə̈ mö, më âza mö ndə̂kə̂ wun tchô pâ angbängbä arə ndə̂ mê. Amö nə kə̂ sə la mômô la mê.› 24Vötaâ earə̂ kua ndə̂ tche gbô mîɛ̈-makətche ndə̂ lôlo ngbangbo balë lâme nə̂ ndjë kə̈ tô rə̂ päkëdə̂: ‹Gbölö akrə, më wûnsə̂ nə̂ alême nə̂ pä mo də̈ akrə ndə̂ könô zə̈ kpô tə̂ gbölösə̂nə̈, mo sôâbo ndjî rəgʉ sə̂nə̈ ndə̂ mo lûâbô rə lû tâ-a. Mo pâlabô rəgʉ sə̂nə̈ ndə̂ mo teke ndjî rəgʉ tâ-a. 25Wawa mbô mê, më ê kə̈ zâ rə̂ wü bhâlə̂ cho. Ârə̂ kä âtə, amö za adjê zə nə̈-ê.› 26Praâbalë gbölö akrə ndə̂ yê nə̈ tô rə̂ ndə̂nə̈ sə̈ tchë päkëdə̂: ‹Mo də̈ ngbongbo earə̂ kua! Mo wätə̂ earə̂ dö, mo wûnsə̂ nə̈ alême nə̂ pä, sə̂nə̈ ndə̂ mê soa rəgʉ tâ më lûâbo rə tâ-a, ânyë më pâlabô rəgʉ sə̂nə̈ ndə̂ mê teke ndjî rəgʉ tâ-a. 27Käko mo wä alême ndə̂kə̂ kʉ makətche ndə̂ mê bhâlə̂ gro-makətche ndə̂kə̂ pa kə̂ ka ndə̂ mê, mê gbo ngânə̈ ëpânə̈. 28Nyë krʉ̈a mîɛ̈-makətche ndə̂ lôlo ngbangbo balë ndə̂ yê lâme, kə̈ kʉ̂ rə̂ sə̈ tchânə̂ ndə̂ tche wâ la rə̂ sâke balë lâme. 29Bëte akrə ndə̂ tche wâ la rə, a âkʉadje ngânə̈ ëpânə̈ sə̈ tchë, ânyë tche wa la rə tə̂ gbölösə̂nə̈; praâbalë akrə ndə̂ tche wâbô wâ la rə-ê, a âji ndjë kpîɛ̂kpîɛ̂ nə̈ ndə̂ tche wâ la rə̂. 30Andə̂ ngbongbo earə̂ kua ndə̂ tche wûn-âbô wûnsə̂ kə̂ mbo kua lâme, nyë yï tchë bhâ sûwu lə̂ bübü tchô, bhâye kütû kɨ̈ lakə̂ zɨ tchə̂lə̂ da jï kä tâ.›»
Kə̂ wa ngbanga ndə̂ ânə
31«Lo nə̈ ndə̂ Modô ndə̂ Akrə ka lə̂ gbôgbô ndə̂ yê la aânje ndə̂ yê gbɛ̂, tchê səadje ëpâ gbölö ngendë-gbïɛ̈ ndə̂ yê. 32A âpaladje azü pâ cho gbɛ̂ ëtchâtchu yê. Tchê krʉadje tchə̂lə̂ andjê ngbî ngbî batə̂ earə̂ kə̂ bata agia krʉ tchə̂lə̂ aɛ̈bro-ngbaga ndə̂ yê la aɛ̈bro. 33Tchê kʉadje aɛ̈bro-ngbaga də ndôkö, ânyë kə̂ kʉ aɛ̈bro də gele. 34Käko gbïɛ̈ âtoadje rə̂ sə̈ andjanə̈ ndə̂ andjë sə̂ də ndôkö päkëdə̂: ‹Nyë nə̈ atâ, nyënyê ndə̂ tchôtchô pö ndə̂ Bha mê wâ pâ nyê, nyë də̈ azü gö ndə̂ Gbölö gö-gbïɛ̈ ndə̂ tchêlafô, ndə̂ tche nyîkrə rə̂ alême bëte nyê dokʉ̈tchê ndə̂kə̂ pa a nyikrə tchîsûwu. 35Bëte sə̂nə̈ ndə̂ më wâ la gʉ, nyë zä kɨ̈zɨ̂ sə̈ mê, gʉ ngû nyü mê, nyë zâ ngû sə̈ mê, më də̈ akrə ndə̂ ngâ gö ngbî, nyë mbô rə̂ la mê. 36Më sə̈ la wünwün tə̂ mê, nyë zâ lə̂ba sə̈ mê, më wä la tə̂kömbô, nyë nə̂ kə̈ wûn mê, më sə̈ bhâlə̂ nda kânga nyë nə̂ kə̈ wûn mê.› 37Käko adjîrə̂ azü nə̈ tô rə̂ ndə̂nə̈ sə̈ tchë päkëdə̂: ‹Gbölö Gbïɛ̈, dalatchêbâ kä ndə̂ ârâ wûn mö la gʉ ânyë kə̈ zâ kɨ̈zɨ̂ sə̈ mö? Dalatchêbâ kä ndə̂ ârâ wûn mö la gʉ ngû ânyë kə̈ tû ngû sə̈ mö? 38Dalatchêbâ kä ndə̂ ârâ wûn mö ndə̂ mo wâtə̂ akrə ndə̂ ngâ gö ngbî, ânyë ârâ mbô rə̂ la mö? Dalatchêbâ kä ndə̂ ârâ wûn mö la wünwün tə̂ zə̈, ânyë kə̈ zâ lə̂ba sə̈ mö? 39Dalatchêbâ kä ndə̂ ârâ wûn mö la tə̂kömbô âdəndjë bhâlə̂ nda kânga, ânyë kə̈ mbô rə̂ la mö?› 40Gbïɛ̈ nə̈ âtoadje rə̂ ndə̂nə̈ sə̈ andjê päkëdə̂: ‹Ɛn-ɛn, tə̂ lëge nə̈ më tö rə̂ sə̈ nyê, logbɛ̂ ndə̂ nyê mbo rə lâme tə̂ ngâ mbämbä akrə lə̂ gbâtə̂ arə̂mâ ndə̂ mê, dëkë nyë mbö rə̂ tə̂ mê.›
41«Pânə̈ gbïɛ̈ nə̈ toadje rə̂ sə̈ andjanə̈ də gele päkëdə̂: ‹Nyë gïtə̂ nyê bhâchï, nyënyê ndə̂ ngbongbo pö ndə̂ Bha mê wâ pâ nyê, nyë ë âtə̂lə̂ wo ndə̂ âju pïï etə̂, ndə̂ a nyîkrə rə̂ bëte Jâbolo la aânje ndə̂ yê! 42Bëte sə̂nə̈ ndə̂ më sə̂ la gʉ, nyë zâbo kɨ̈zɨ̂ sə̈ mê-a, më wä la gʉ ngû nyë tûâbo ngû sə̈ mê-a. 43Më də̈ akrə ndə̂ ngâ gö ngbî, nyë mbôâbo rə̂ la mê-a. Më sə̈ la wünwün tə̂ mê, nyë kʉ̂âbo lə̂ba sə̈ mê ndə̂kə̂ pa më yu rə̂-a, tə̂kömbô mbö mê, a kä zâ mê bhâlə̂ nda kânga, nyë mbôâbo rə̂ la mê-a.› 44Käko andjê toadje ndjë rə̂ ndə̂nə̈ sə̈ tchë päkëdə̂: ‹Gbölö gbïɛ̈, dalatchêbâ kä ndə̂ ârâ wûn mö la gʉ, ndjë la gʉ ngû, ndjë tə̂ ngâ akrə gö ngbî, ndjë la wünwün tə̂ zə̈, ndjë la tə̂kömbô, ndjë bhâlə̂ nda kanga, ânyë ârâ nə̂âbo nə̂ ndə̂kə̂ mbo rə̂ la mö-ê?› 45Gbïɛ̈ nə̈ toadje rə̂ ndə̂nə̈ sə̈ andjê päkëdə̂: ‹Ɛn-ɛn, tə̂ lëge nə̈ më tö rə̂ sə̈ nyê, logbɛ̂ ndə̂ nyë mbôâbo rə̂ mbô tə̂ ngâ mbämbä akrə lə̂ gbâtə̂ arə̂mâ ndə̂ mê, dëkë nyë mbôâbo ndjë rə̂ tə̂ mê-a.› 46Andjê eadje ndə̂kə̂ wun yûkü ndə̂ âwâ logbɛ̂. Andə̂ adjîrə̂ azü nə̈, andjê eadje ndə̂kə̂ sə bhâlə̂ tchîsûwu ndə̂ logbɛ̂ logbɛ̂#25.46 Nyë dɨ̈ Dan 12.2..»
Currently Selected:
Matiyə̈ 25: lnl
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc.