Maatiyoos 8
8
Ebɔdɛ Yeese Iɗit Sinɔ Goru Dɔɔɓɔyk
(Mar. 1:40-45; Luk. 5:12-16)
1Saaɓa ɓurɓuɗiikiɗ Yeese kurkumk nɛɛkik, nɛɓa nomɛrɗi joop sigɔ ɓɔɔkaaŋɔŋk. 2Nɛɓa saadi iɗit omaay sinɔ goru dɔɔɓɔyk#8:2 See kɛ dɔɔɓɔyk, goriɗak waan ɛɛkoŋk sigɔ ɓɛɛlɛr kundiyaakɛk. wideer ɛɛk son lak Yeeseek, nɛ ɛtɛ korontunɛ sɛɛne taamɛkɛ, nɛ tongeeɗ kɛ, "Suumi naakɛ, ɔkɔn ɗɛyin, oolun ati ebɔdun."
3Nɛɓa Yeese keri ari nɛɛk nɛ ɗaaɗapɛ, nɛ tongeeɗ kɛ, "Ɗɛyaaŋ, bɔduk." Nɛɓa iɗit sinɛ bɔduku dɔɔɓɔy nɛɛkɛ sisa. 4Nɛɓa Yeese tongeeɗ kɛ, "Kat lakɛ iɗit sinɔ tonguɗun any sinik, mayakana mak nɔ kɛɛɗin yaaŋin ɛɛk nook tapaɗa ŋaadiyɛɛkoŋk, nɔ widikin tigi sinɛɓa tonu Muuse agut bɔdɛ nookuk kɛnɔkoy dakɛ a misikiri joopa baŋɛ."
Ebɔdɛ Yeese Ijaagen Ɔɗɔwen Amaasiniyɛ Sigɔ Ɗibɛk
(Luk. 7:1-10)
5Saaɓa mɛlɛɛɗ Yeese Kipirnahoomak, nɛɓa wideer ɛɛk iɗit omaay Roomuk son lak sɛɛnik sinɔ ɔɗɔwen amaasiniyɛ sigɔ ɗibɛk nɛ kalɛyi sɛɛn. 6Nɛɓa tongeeɗ kɛ, "Suumi naakɛ, dakɛɓa ijaagen naakɛ a nyɔŋtan nɛ ɗuɗuŋɗe godeey a rakatɛŋ jɛt." 7Nɛɓa Yeese jumurgeeɗ kɛ, "Kɔrakɔɔ nɛ kɛɛɗa ebɔdaaŋ." 8Nɛɓa ɔɗɔwen sinɛ amaasiniyɛ sigɔ ɗibɛk jumurgeeɗ kɛ, "Suumi naakɛ, moko eet iɗit sinɔ ɗegeera a guugunyun godeya naakaaŋɔŋk. Tonu pɛɛni a omoŋ dakɛɗa, bɔdɛkɔɔ ijaagen naakɛŋ. 9Tiiɗika ɓɔra ɔɗɔweera gaanaaŋ, laka amaasiniyɛ eete ɗɛɛgaaŋ. Ɔkɔn tona omalta kɛ, 'Makiŋ,' nɛ kɛɛŋ, ma ɔkɔn tonguɗa kɛ, 'Waɗiŋ,' nɛ kusuŋ. Ɔkɔn tona ijaagenta naaka kɛ ijaag any siniŋ, nɛ ijaagiŋ."
10Saaɓa Yeese tiyɛɛɗ sinik, nɛɓa reemɗi ɓayɛ nɛɛkɛkiŋ, nɛ tonu joopa sigaagaɓa nomɛrɗik kɛ, "Eekeer tona kɔnaaŋ, kiikaaɓa laŋiiɗ Israeele iɗit sinɔ omoŋɔŋk sinɔ lak ŋaadiyɛ sigɔ ɓaŋkaawar oko sinikik. 11Tona kɔnaaŋ, joop sigɔ ɓɔɔkaaŋɔŋk kurakkoy goyse mɛlkiɗ waawuyk a goyse ɗiirirgeeɗ waawuyk, nɛkoy beeɗir nyon ɗamatoŋk agut omoŋ a Abraham a Isiyaak a Yaykoob burɛɛ dariyoŋk. 12Joop sigɛ gunkoy laŋir burɛ Waakoyotoŋkuk, oriirɛkoy sɛɛg nyuugura sinaana ar walasik. Nɛkoy saadi lakɛ duri a ɗama ŋedakoŋk." 13Nɛɓa Yeese tonu ɔɗɔwenta sinaana kɛ, "Mak, inna ɓɛɛlɛ oko ŋaadiyɛ gooŋk." Nɛɓa ijaagen nɛɛkɛ bɔdɛ sisa.
Ebɔdɛ Yeese Joop A Ɓɔɔkaaŋ Goriɗakɛ Gɛŋk
(Mar. 1:29-34; Luk. 4:38-41)
14Guugunyɓa Yeese waa Petrosuk, nɛ dɛnɛ keerɛɛk Petrosuk a goru moɗɛ ɛɛkoŋk a ɗuɗuŋɗe. 15Nɛɓa kume ari nɛɛk, nɛ sɛɛn ŋɔr moɗɛ sinɛ ɛɛkoŋk sisa, nɛ ŋaar raŋana nɛ wɔɔrɛ sɛɛniŋ.
16Saaɓa ɗiirirkiɗ waawuyk, nɛɓa joop ɗɔkarki gortaanak sigɔɓa gaamur sɛɛg wɛɛŋa sigɔ somkaanakik sigɔ ɓɔɔkaaŋɔŋk son lak Yeeseek, nɛɓa Yeese ɔɔyɛ wɛɛŋa sigɔ somkaanakik pɛɛnii sinɔɔnɛ omoŋɔŋk, nɛ ebɔdɛ gortaanak baŋɛ. 17Dusanɛɛ sineene sinɛɓa tonu iɗit pɛrkaakoŋk Isaayas kɛ, "Boŋu sɛŋk tine meetanak gaŋk, ɓataki goriɗak gaŋk."
Nomɛɛ Yeeseek
(Luk. 9:57-62)
18Saaɓa dɛnɛɛɗ Yeese joop sigɔ ɓɔɔkaaŋɔŋk a tolɗi sɛɛne tookɛɛtak, nɛɓa tonu nomtaanaka gɛɛna kɛnɔ ekaŋɛr ɗɛɛgasɔ gɔrɔ sinɛ obiiŋɔŋk. 19Saaɓak kusɓa rɔɔriytan higi Muuseek om son lak Yeeseek nɛ tongeeɗ kɛ, "Rɔɔriytaano, noma kɔɔne gopɛ sinaanɛ kɛɛɗink baŋɛ."
20Nɛɓa Yeese jumurgeeɗ kɛ, "Latu waŋgoya utulakiŋ, maɓɔrɛ latu teetɔɔk wɛykɔkuŋ, ma Tɔɔn Etoŋk kiiɗɛ aasi nyon sinɔ imiinyeeɗik."
21Nɛɓa nomtaanakɛ gɛɛnɛ omaay tongeeɗ kɛ, "Suumi naakɛ, pɛgɛdita kɛnɔ tɛɛnan kɛɛɗa kɔɔwa baabɛɛ."
22Nɛɓa Yeese tongeeɗ kɛ, "Noma seŋk eete, ma toŋoɗu reteer nɔ sɛɛg kɔwar reter gɛŋk."
Koykoyɛ Yeese Yoŋgoy A Dakɛ Kɛ Many
(Mar. 4:35-41; Luk. 8:22-25)
23Saadi baŋiya teeŋɛɓa Yeese emɗa, nɛɓa nomtaana gɛɛnɛ nomɛrɗiŋ. 24Nɛɓa ŋaarki yoŋgoy sinɔ ɓaŋkawuŋɔŋk goroo sinaanɛ obiiŋɔŋk a yike apani nɛɛkɛ emɗ nɛɛk a enya maawu emɗ nɛɛkɛ, maɓa Yeese ɗeegarŋ. 25Nɛɓa nomtaanak gɛɛnɛ wideetar ɛɛk son lak sɛɛnik nɛ ibeɗir kɛ, "Suumi naŋk, ebɔdu tin. A badiireŋ."
26Nɛɓa Yeese tonu sɛɛga kɛ, "Iinak sigi kɔne bitak ŋaadiyɛɛkik, ɓuriikari agut jikon? Nɛ ŋaar raŋana nɛ koykoyɛ gɔrɔ sinɛ obiik a yoŋgoy nɛɛk. Nɛɓa lakɛ ɓɛɛl kɛ manyk sinɔ obiiŋɔŋk.
27Nɛɓa joop reemɗi ɓayɛtun gɛŋk, nɛ tonur kɛ, "Ege sini wooɗ aasi tiiɗigeeɗ yoŋgoy a gɔrɔk?"
Ebɔdɛ Yeese Joop Sigɔ Pɛɛyk
(Mar. 5:1-20; Luk. 8:26-39)
28Kɛɛɓa Yeese ɗɛɛgasɔ gɔrɔ sinɔ obiiŋɔŋk ɗooka Gerasenoonuk, nɛɓa saadi ŋaarark joop sigɔ pɛɛyk piyakɔkɛ sigɔɓa gaamur sɛɛg wɛɛŋa sigɔ somkaanakik nɛɓa pepetiiŋ. Ŋɛɛwɛɓa sɛɛg jɛt aɓa kɛɛ iɗit sinɔ oolɛ a ɗeyi sinaanɛk. 29Nɛɓa sɛɛk ooyɛr kɛ, "Iin Tɔɔn Waakoyotoŋk, ooɗun tin agut jikon? A in ki gayɛ ɔɔtɛ nɛɛkɛ kusunkɔ seena kɛnɔ tin goopun a ɓaŋkawuŋ?"
30Nɛɓa lakɛ pony kuturɛ sigɔ ɓɔɔkaaŋɔŋk ɗaaɗamiŋɔŋk saadi atukuɗuk a yowɛɛɗ a tɛm. 31Nɛɓa ɔɗɔwer wɛɛŋa sigɔ somkaanakik kalɛyir Yeesee kɛ, "Ɔkɔn tin ɔɔyun, wosɛyi tin nɔ guugunyii ponya sinaana kuturɛɛkoŋk."
32Nɛɓa Yeese tonu sɛɛga kɛ, "In kɛɛɗɛɛ." Nɛɓa wɛɛŋa sigɛ somkaanakik ŋaararki joope sigaagɛ nɛ guugunyar kuturɛɛka gɛɛnaak. Nɛɓa kuturɛ gɛɛnɛ baŋɛ reerir a gorgorŋ sirpɛya, nɛ ɗam sɛɛg gɔrɔ sinɛ obiiŋɔŋk. 33Nɛɓa irtaana sigɛ kuturɛɛkoŋk gonar nɛ mɛlɛr katamɛya. Nɛ kaar waasɛr any sinɛkan ɓɛɛlɛk baŋɛ. Waasɛrɓa any sinɛkan ɓɛɛlɛ joope sigaagɛkan gaamur sɛɛg wɛɛŋa sigɔ somkaanakik baŋɛ. 34Ŋaararkiɓa joop sigɛ katamɛ nɛɛkik baŋɛ kɛnɔ pepeti a Yeesee. Nɛɓa dɛnɛr, nɛ kalɛyir kɛnɔ ŋaar ɗook nɛŋk.
Currently Selected:
Maatiyoos 8: KSTM
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena