Luca 5
5
Jesupa to bat'apataɨrã t'ɨ̃na
Mateo 4:18-22; Marco 1:16-20
1Ewariaba Jesú senia choma Genesare apataɨ ik'idá basima.#5:1 Genesare senia ichiaba Galilea apatama. Mãɨne Tachi Ak'õre pedea ũrinai k'orea ẽpẽrarã chok'ará ichimá cheepɨrɨsidama. 2Arí to ik'idá p'ãp'orro ume ũu p'anasidama. Mãɨ p'ãp'orro chiparirã edá batoodak'ari, ãchi t'ɨri sɨɨmaa p'anasidama. 3Mãɨne Jesú Simón Pedro p'ãp'orrode batook'ari jarasima to ik'idaɨpa ãpia eda waa ateewãmẽrá. Maapae p'ãp'orrode suak'abari beek'ari jõma arí p'anɨrã́ jaratea beesima. 4Jarateak'ari Jesupa Simonoa jarasima:
—Jãapae pɨ p'ãp'orro to estarik'a ateewãk'ari to bat'at'ɨ.
5Maamina Simonpa p'anoosima:
—Jarateaparí, tai teamasi to bat'a p'anɨ ewarisidama. Maamina mi ãpia pida peadaé pasima. Maamina pɨa mãɨya jara bɨẽra ooipɨ.
6Ara mãɨne ãchi to bat'a p'aneesidama. Minachia peauta pẽra chi t'ɨri k'õachoasima. 7Mãɨ k'orea waapẽarã p'ãp'orrode berã juadepa t'ɨ̃sidama k'aripade chedamẽrá. Chedak'ari p'ãp'orro umea betapa ipirusidama. Mãɨpa edá t'aawãnai jĩra nɨp'aneesidama. 8-10Simón Pedropa ichi ome p'anɨ pida beta chok'ará peadada unusidaɨde k'awa k'ɨ̃risiadaé pasima. Santiago mãɨnepa Juan ichi ome basima. Ãchi Zebedeo warrarã pasima. Mãɨne Simón Jesú taade wãk'ari sĩraporode k'obeek'ari jarasima:
—Mɨ Chipari, pia bɨma pɨ mɨk'aapema ãyá wãit'a, mɨ nemietá oopari pẽra.
Jesupa Simonoa jarasima:
—P'erarãse, idiipa waa pɨ mɨ pae ẽpẽerã jɨrɨparí paipɨ.
11Ãchia p'ãp'orro ipudea ateewãnak'ari ãarea ameesidama. Maapae Jesú ome wãsidama.
Jesupa aidapa k'ɨdade bɨ jɨpa beepida
Mateo 8:1-4; Marco 1:40-44
12Ewariaba Jesú p'uurude nine ẽpẽra aida pará bɨ chesima.#5:12 Aida. Jesú ewaride piarã sãmaasã́ basit'a tachia k'awadawẽa p'anɨma. Maamina judiorãmá aba Tachi Ak'õrepuru p'ue jɨpa beepii basima Número 12:9-12; 2 Reye 5:7. Mãɨ awara aba aidapa jitasira ãyá bade wãi basima Levítico 13:45-46. Mãɨ ẽpẽrapa Jesú unuside ichi k'ĩrari sĩraporode bedabari k'obeek'ari nãɨya chichupuria idisima:
—Mɨ Chipari, pɨa k'ɨ̃ria bɨpɨra, mɨ p'ue jɨpai bɨma.
13Mãɨne Jesupa jua ɨ̃rɨ bɨrude jarasima:
—Mãɨya oo k'ɨ̃ria bɨma. ¡Jɨpa beese!
Ara mãɨne chi aida wẽpa wãsima. 14Mãɨne Jesupa ichiá jarasima:
—Pɨ jɨpa beeda mi ãpia pida abaɨa jararãse. Mãɨpari p'aaremá wãse pɨ jɨpa beesit'a unumẽrá. Jãapae Tachi Ak'õre k'ĩrari pia beei k'orea Moisepa jarada jĩra ne tease.#Levítico 14:1-32. Mãɨya ẽpẽrarãpa k'awadaipɨ pɨ piarã jɨpa beesit'a.
15Maamina Jesupa ooda k'orea mãɨ atepe t'ɨ̃ p'oa wãsima. Mãɨpuru ẽpẽrarã chok'ará chepachidama ichia jaratea bɨ ũrinai k'orea. K'ak'ua piawẽa be chepachidama jɨpa beepik'oamẽrá. 16Maamina Jesú edaɨde ẽpẽra newẽmá wãpachima Tachi Ak'õrea pedeai k'orea.
Jesupa sorek'ea bada jɨpapida
Mateo 9:1-8; Marco 2:1-12
17Ewariaba Jesupa jaratea bɨde p'ariseorã mãɨnepa Moisepa bɨda jarateapataɨrã arí suak'abari p'anasidama. Ãchi Galilea tuadepa, Judea tuadepa mãɨnepa Jerusalén p'uurudepa che p'anasidama. Mãɨne Tachi Chipari jua chaareadepa Jesupa k'ɨdade be jɨpa beepipachima. 18Mãɨya bɨde waapẽarãpa ẽpẽra sorek'ea bɨ ẽpẽra uapataɨde enemeenak'ari, eda ateewã k'ɨ̃ria p'anasidama Jesú k'ĩrari bɨdai k'orea. 19Maamina ẽpẽerã minachia nɨbɨ pẽra Jesumá p'ue chepidaé pasima. Mãɨpuru ãchia chi sorek'ea bɨ te ɨ̃rɨ enemeesidama. Maapae te ɨ̃rɨpema ãrinak'ari chi sorek'ea bɨ chi ẽpẽra uapataɨde edá t'aa peesidama. Ẽpẽrarã t'ãena Jesú k'ĩrari bɨsidama. 20Jesupa unusima ãchia piarã ĩjãa p'anɨ ichia sorek'ea bɨ p'ue jɨpa beepiit'a. Mãɨ k'orea chi sorek'ea bɨa nãɨya jarasima:
—K'õp'ãero, pɨa nemietá ooda mɨa k'ɨ̃risia atuasima.
21Mãɨ ũrisidaɨde chi arí p'anɨ p'ariseorãpa mãɨnepa Moisepa bɨda jarateapataɨrãpa nãɨya jarasidama: «Ichi ¿k'ai k'ɨ̃risia bɨma? ¿K'ãre k'orea mãɨya Tachi Ak'õre k'ĩrari piawẽa pedea bɨma? Aba Tachi Ak'õrepuru ẽpẽrapa nemietá ooda p'ue k'ɨ̃risia atuaipɨ».
22Maamina Jesupa ãchia k'ɨ̃risia p'anɨ k'awada pẽra nãɨya idisima:
—¿K'ãre k'orea mãra sõne jãɨya k'ɨ̃risia p'anɨma? 23Mãramá ¿chi sãɨ jarait'a chaarea bɨma: “Pɨa nemietá ooda k'ɨ̃risia atuayade” ait'a wa “P'irabarik'ari nipapade” ait'a? 24Tachi Ak'õrepa mɨ, chi Ẽpẽra Warra bɨsima nãɨ ĩjũane p'anɨpa nemietá oopataɨ k'ɨ̃risia atuamẽrá. Mãɨ mãrá unupiipɨ.
Ara mãɨne chi sorek'ea bɨa nãɨya jarasima:
—P'irabarise. Pɨchi ne ẽpẽra uapataɨ atak'ari tiidá wãse.
25Ara mãɨya jararude sorek'ea bada p'irabarik'ari ichi ẽpẽra uapataɨ atak'ari jõmãɨrã k'ĩrari wãsima. Maapae Tachi Ak'õre k'orea pia jara bɨmisa tedea wãsima. 26Mãɨ unusidaɨde ãareaɨrãpa k'awa k'ɨ̃risiadaé pasima. Mãɨpuru Tachi Ak'õre k'orea minachia pia jarasidama. Tachi Ak'õre wap'eadepa jarasidama:
—¡Idi piarã ẽpẽrarãpa ne p'ue oodak'apɨ́ ne waibɨa unusidama!
Jesupa Leví t'ɨ̃na
Mateo 9:9-13; Marco 2:13-17
27Mãɨya bak'ari Jesú wãrune ẽpẽra Romanepema pae erreara jɨrɨp'eparí unusima. Chi t'ɨ̃ Leví pasima. Mãɨ ẽpẽra erreara jɨrɨp'eparí tede suak'abari basima. Jesupa unuk'ari jarasima:
—Mɨ ome chese.
28Ara mãɨne Leví p'irabarik'ari ichia oo bada ameek'ari Jesú ome wãsima.
29Maapae Jesú k'orea Levipa ichi tede chik'o waibɨa oopisima. Chok'ará Romanepema pae erreara jɨrɨp'epataɨrã mãɨnepa waapẽarã ẽpẽrarã ãchi ome nek'o p'anasidama. 30Mãɨ unusidaɨde Moisepa bɨda jarateapataɨrãpa mãɨnepa p'ariseorãpa Jesú ome p'ɨrrɨapataɨrã́ nãɨya k'achia pedeasidama:
—¿K'ãre k'orea Romanepema pae erreara jɨrɨp'epataɨrã ome mãɨnepa waapẽarã nemietá oopataɨrã ome ará nek'oparima?
31Jesupa ãchiá jarasima:
—Chi k'ak'ua pia bepa nẽará teaparí jɨrɨdak'ama. Mãɨpari chi k'ak'ua piawẽa bepa ichi jɨrɨpatama. 32Mɨ chi jĩp'a berã t'ɨ̃i k'orea chewẽa bɨma, mãɨpari nemietá oopataɨrãt'u t'ɨ̃ bɨma Tachi Ak'õremá chedamẽrá.
Tachi Ak'õrene k'ɨ̃risiadayá nek'odak'apɨ́ ewari k'orea jarada
Mateo 9:14-17; Marco 2:18-22
33Waapẽarãpa Jesua jarasidama:
—Juan chi Porochoaparí ome p'ɨrrɨapataɨrãpa Tachi Ak'õrea ɨt'aa chiidiutade minachia Tachi Ak'õrene k'ɨ̃risiadayá nek'odak'apɨ́ ewari oopatama. Ara mãɨ jĩra p'ariseorã ome p'ɨrrɨapataɨrã pida oopatama. Maamina chi pɨ ome p'ɨrrɨapataɨrãpa ¿k'ãre k'orea mãɨya oodak'ama?
34Jesupa ãchiá jarasima:
—Ɨmɨk'ĩrapa wẽra atarupa arapaapataɨ ewari oo bɨde ¿ichia t'ɨ̃narã́ Tachi Ak'õrene k'ɨ̃risiadayá nek'odak'apɨ́ ewari oopiik'ãra? 35Maamina chi ewari ará parude waapẽarã ẽpẽerãpa ichi ãyá ateewãnaipɨ. Mãɨ ewaridepuru ichia t'ɨ̃narãpa Tachi Ak'õrene k'ɨ̃risiadayá nek'odak'apɨ́ ewari oodaipɨ.
36Mãɨ awara Jesupa ãchiá nãɨya nepɨrɨsima jarateai k'orea:
—Ẽpẽra abaɨ pida p'aru chiwidi k'õak'ari p'aru sorede wãak'ama. Mãɨya ooipɨra p'aru chiwidi ãriipɨ. Mãɨ awara chi p'aru chiwidi t'ɨɨda chi sore ome pia beeiwẽma. 37Ichiaba abaɨ pida uvaba chiwidi ãnimara e ooda chi sorede t'ɨɨdak'ama. Mãɨya oodaipɨra baak'ak'ari mãɨ ãnimara e ooda chota jĩawãipɨ. Maapae uvaba weawãipɨ mãɨnepa chi ãnimara e ooda ãriipɨ. 38Mãɨpuru uvaba chiwidi ãnimara e ooda chiwidide t'ɨɨdai p'anɨma. Mãɨya umea tãaraa choadaipɨ. 39Mãɨnepa uvaba asia chi naa oodada torupa chiwidi to k'ɨ̃riak'ama. Mãɨpari jaraparima: “Uvaba chi naa oodada chiwidi k'aepẽra atepe warrá bɨma”.
Currently Selected:
Luca 5: tdc
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© (Active), Wycliffe Bible Translators, Inc. All rights reserved.