Marco 15
15
Jesú Pilato k'ĩrari ateewãnana
Mateo 27:1-2; 27:11-14; Luca 23:1-5; Juan 18:28-38
1Ara mãɨ ãsã paẽra p'aarerã chi mãɨrã chaarearã, judiorã chi mãɨrã chaarearã, Moisepa bɨda jarateapataɨrã, mãɨrã ãareaɨrãpa,#15:1 Mãɨrã ãareaɨrãpa. Griego pedeade nãɨya bɨ bɨma: Sanedrín. pedea ausidama Jesú Pilatomá ateewãnai k'orea.#15:1 Pilato. Romanepemarã minachia k'awa bɨ Tiberio apataɨpa Pilato Judea tuadepema minachia k'awa bɨt'a bɨsima ãyo 26—36. Chi judiorã chaarearãpa Jesú Pilatomá ateewãsidama ãchia chi eda jɨ̃a nɨberã p'ue peadak'apachi pẽra. Aba romanepemarãpa mãɨya ɨtɨa p'anapachidama. Ara mãɨne Jesú jua bɨradak'ari ateewãsidama. 2Pilatopa Jesua idisima:
—¿Pɨ piarã judiorã poro jũra jɨ̃parí jɨ̃ bɨk'ãra?
Jesupa p'anoosima:
—Ãjã, pɨa mãɨya jara bɨma.
3Mãɨne p'aarerã chi mãɨrã chaarearãpa ichia ne minachia k'achia oo bɨade a jarasidama. 4Mãɨpuru Pilatopa mãicha Jesua idisima:
—Pɨa ne minachia k'achia oo bɨade a jara p'anɨma. ¿P'anooiwẽk'ãra?
5Maamina Jesupa mãɨ sida p'anooé pasima. Mãɨpuru Pilatopa k'awa k'ɨ̃risiawẽa beesima.
Jesú peadai k'orea jaradada
Mateo 27:15-31; Luca 23:13-25; Juan 18:38—19:16
6Ãyocha judiorãpa mãɨ arapaapataɨ ewari oo p'anɨne Pilatopa ẽpẽra aba eda jɨ̃a nɨbɨ ewa peepachima, mãɨ chi p'uurudepema ẽpẽerãpa idiutat'a. 7Mãɨne ẽpẽra aba Barrabá apataɨ basima. Mãɨ Barrabá chi ichidirã paara mãɨ k'ĩruupik'asidaɨde mĩa pea p'anasidama. Mãɨ k'orea eda jɨ̃a nɨbɨsidama chi ẽpẽerã ichidirã paara. 8Mãɨne judiorã minachia p'anɨpa Pilatomá chedak'ari idi p'aneesidama chi ichia ãyocha ooparit'a oomẽrá. 9-10Pilatopa k'awa basima p'aarerã chi mãɨrã chaarearãpa Jesú jitapi p'anana ichi unuemaa uru p'anananeepuru. Mãɨ k'orea chi ẽpẽerã minachia cheepɨrɨ nɨbɨa idisima:
—¿Mãrapa k'ɨ̃ria p'anɨk'ãra mɨa nãɨ judiorã poro jũra jɨ̃parí jɨ̃ bɨ k'ẽet'ait'a?
11Mãɨne p'aarerã chi mãɨrã chaarearãpa chi minachia cheepɨrɨ nɨbɨa nãɨya jarasidama: “Pilatoa jarat'ɨ Barrabá k'ẽet'aapimẽrá”. 12Mãɨ k'orea Pilatopa mãicha ãchiá idisima:
—Mãɨyara mãrapa judiorã poro jũra jɨ̃parí jɨ̃ bɨade apataɨ ¿mɨa mãɨ k'ãre ooima?
13Mãɨne ãchia jĩk'ua bia p'aneesidama:
—¡K'urusude barijira bɨk'ari peapise!
14Pilatopa idisima:
—¿K'ãre k'orea? ¿Ichia k'ãre nemietá oosima?
Mãɨya pedea bɨde ãchia ara mãɨ wariara ɨbɨa bia para beesima:
—¡K'urusude barijira bɨk'ari peapise!
15Pilato ẽpẽerã ome piawẽa beémaapa Barrabat'a k'ẽet'aasima. Maamina ichi papaká berã́ jarasima Jesú soapa p'edak'ari k'urusude barijira bɨdak'ari peadamẽrá.
16Ara mãɨne papaká berãpa Jesú ãchi te choma Pretorio apataɨde eda ateewãsidama. Mãma waapẽarã papaká berã sida t'ɨ̃sidama. 17Maapae ichi k'ak'ua ɨ̃rɨ anamari jɨ̃parí arena k'ĩra bɨt'a jɨ̃pisidama. Poro jũra jɨ̃parí ɨɨrɨ k'adak'ari, ichi porode jɨ̃pisidama. 18Maapae jĩk'ua jara p'aneesidama:
—¡Minachia pia bɨma, chi judiorã poro jũra jɨ̃parí jɨ̃ bɨt'a!
19Ichi poromá pak'urupa upachidama mãɨnepa taba idupachidama. Sĩraporode k'op'aneesidama ichi piarã minachia wap'ea p'anɨ jĩra. 20Ichi oo uru p'ananak'ari ãchia chi anamari jɨ̃parí arena k'ĩra bɨt'a jɨ̃pidada wẽasidama. Maapae ichia jɨ̃ bada mãicha jɨ̃pidak'ari k'urusude barijira bɨde ateewãsidama peadai k'orea.
Jesú k'urusude barijira bɨdada
Mateo 27:32-44; Luca 23:26-43; Juan 19:17-27
21Jesú p'uuru awara ateewãsidaɨde ẽpẽra Simón apataɨ Jerusalenea cheru pasima. Alejandro mãɨnepa Rup'o ak'õre pasima.#Romano 16:13. Ichi Cirene p'uurudepema pasima. Chi papaká berãpa mãɨ ẽpẽrá Jesú k'urusu uapisidama.
22Mãɨya Jesú ĩjũa Gólgota apataɨmá ateewãsidama. Gólgota jara k'ɨ̃ria bɨma «Tachi Poro Bɨɨrɨ». 23Mãma uvaba asia mirradea p'oerada Jesua teasidama mãɨ p'ua choamẽrá. Maamina toé pasima. 24Maapae k'urusude barijira bɨsidama. Mãɨya nak'ari ne jemenasidama Jesupa neet'á jɨ̃ bada sãmaasã́ ara ãchi k'ak'awá jitadai k'awadayá.
25Jesú k'urusude barijira bɨsidaɨde tap'ededa la nueve pa basima. 26Chi pak'uru p'ep'edeade ichi k'ãre k'orea piui bɨ k'orea nãɨya bɨ basima: «Judiorã Poro Jũra Jɨ̃parí Jɨ̃ bɨ». 27Ichiaba nechɨapataɨ mietá be ume Jesuk'á k'urusude barijira bɨsidama, aba ichi juaraari, aba ichi juawieri. 28[Mãɨyasima Tachi Ak'õre pedeade jara bɨ jĩra. Nãɨya jara bɨma:
«Ichi ẽpẽra mietá jĩra peasidama».]#15:28 Griego pedeade chi eda waapẽarã k'art'ade versículo 28 newẽma. Isaía 53:12
29Mãɨne waapẽarã ichi k'ait'a wãnak'ari ãchi poro p'ɨp'ɨrɨadak'ari Jesua nãɨya piawẽa pedeapachidama:
—Pɨa Tachi Ak'õre te minachia bɨ ãrik'ari ewari ũpeaɨde mãicha p'ue ooipɨra, 30¡jãɨ k'urusudepa edá chek'ari, ara pɨchi tuaba k'aripase!
31Ara mãɨya p'aarerã chi mãɨrã chaarearãpa mãɨnepa chi Moisepa bɨda jarateapataɨrã pida Jesú oo uru p'anɨpa nãɨya jarapachidama:
—Ichia waapẽarã k'aripasima, maamina ara ichi tuaba p'ue k'aripawẽma. 32Mãɨyara ¿ichi Tachi Ak'õrepa Tachi K'aripaparí teai jaradak'ãra? Ichi Israeldepema poro jũra jɨ̃parí jɨ̃ bɨpɨra, nãɨena jãɨ k'urusudepa edá chese. Mãɨyara taipa k'awadak'ari, ĩjãanaipɨ.
Mãɨne chi Jesuk'á k'urusude barijira bɨdada pida abarik'a k'achia pedeapachidama.
Jesú k'urusude piuda
Mateo 27:45-56; Luca 23:44-49; Juan 19:28-30
33Ɨmat'iip'aɨdepa waa ɨmata baarea ĩjũa ãarea p'ãrio nɨbeesima. 34Hora ũpea pak'ari Jesupa jĩk'ua jarasima: «Eloí, Eloí, ¿lama sabactani?»
Mãɨ arameo pedeade jara k'ɨ̃ria bɨma: «Mɨ Ak'õre, mɨ Ak'õre, ¿k'ãre k'orea mɨ tuaba ameesima?»
35Mãɨ pedea ũrisidaɨde chi eda waapẽarã mãma k'ait'a p'anɨpa jarasidama:
—Ũrit'ɨ, ichia Elía t'ɨ̃maa bɨma.
36Mãɨne ẽpẽra aba p'ira wãk'ari, uvaba jɨjɨyá motá bɨde bek'eak'ari pak'urude ook'ari Jesua teasima tomẽrá. Maapae chi ẽpẽrapa jarasima:
—Itu bɨt'ɨ; ak'ɨdaipɨ Elía chek'ari chi k'urusudepema ĩjũanea bɨi k'awadayá.
37Mãɨne Jesú ɨbɨa biak'ari, piusima. 38Ara mãɨne chi Tachi Ak'õre te minachia bɨde eda p'aru eatɨa jira bɨ esa ɨt'ɨpa edá k'õawãsima.#Éxodo 26:31-33; Hebreo 9:1-15. 39Romanepema papaká berã chi mãɨrã chaarea bɨ Jesú k'ĩrari basima. Ichia Jesú mãɨya piuru unuside jarasima:
—Piarã nãɨ ẽpẽra Tachi Ak'õre Warra pasima.
40Mãɨne chi eda waapẽarã wẽrarãpa t'ɨmɨɨpa ak'ɨ p'anasidama. Ãchi t'ãena María Magdalena, Salomé mãɨnepa chi abaɨ María basima. Mãɨ María, Santiago chi k'ũtã́ apataɨ mãɨnepa José nae pasima. 41Jesú Galileade baside mãɨ wẽrarã ichi ome p'ɨrrɨasidama mãɨnepa k'aripa p'anasidama. Mãɨ awara mãma wẽerã awaraɨrã minachia nɨbasima, chi Jesú ome Jerusalenea wã p'ananat'a.
Jesú t'ɨbaridada
Mateo 27:57-61; Luca 23:50-56; Juan 19:38-42
42Norema mimianak'apɨ́ ewari pasima. Mãɨ ewari k'orea judiorã ne oo p'anasidama. K'iupodode, 43José Arimatea p'uurudepema Pilatomá wãk'ari Jesú k'ak'ua idisima t'ɨbarii k'orea. Mãɨ José judiorã chi mãɨrã chaarearãnepema aba chi atepe bɨ pasima mãɨnepa k'ɨ̃ria basima Tachi Ak'õrepa ichidirã ichi juade ua bamẽrá. 44Mãɨne Pilatopa Jesú isapea piusit'a p'ue ĩjãaé pasi pẽra, papaká berã chi mãɨrã chaarea bɨ t'ɨ̃k'ari mãɨa idisima Jesú piarã piusi k'awai k'orea. 45Maapae Jesú piusiade ada pẽra Pilatopa Josea chi k'ak'ua k'urusudepema edá atapade a jarasima. 46Josepa poroba t'oorro atak'ari Jesú k'ak'ua k'urusudepema edá jirak'ari mãɨ porobapa pɨrasima. Maapae p'ẽya uria k'orodade eda bɨk'ari mawara waibɨa bɨt'a chi uriadea pɨrabari ateewãk'ari jɨ̃ap'et'a nɨbɨsima. 47María Magdalenapa mãɨnepa José nae Mariapa Jesú k'ak'ua mãma bɨutat'a unu p'anasidama.#15:47 José. Mãɨ José chi Jesú k'ak'ua Pilatomá wãk'ari ididawẽpɨ. Mãɨyawẽapuru Santiago ũpẽapɨ. Marco 15:40; 16:1.
Currently Selected:
Marco 15: tdc
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© (Active), Wycliffe Bible Translators, Inc. All rights reserved.