Marco 16
16
Jesú chok'ae p'irabarida
Mateo 28:1-10; Luca 24:1-12; Juan 20:1-10
1Mimianak'apɨ́ ewari jõk'ari María Magdalenapa, Santiago nae Mariapa mãɨnepa Salomepa k'era atasidama Jesú k'ak'ua p'ɨrɨdai k'orea. 2Tomione#16:2 Tomione. K'ãp'ũra pedeade bɨ bɨma: El primer día de la semana. tap'ededa, ɨmata ochiarude, Jesú t'ɨbaridaadamá wãsidama. 3Mãɨne nãɨya jara nipasidama: «¿Jãɨ mawara waibɨa bɨpa uria jõat'ɨ bɨt'a k'aipa tachiá ãyá pɨra teaima?»
4Maamina arí padak'ari, ak'ɨutade chi mawara nepalá bɨt'a ãyá pɨra k'obɨt'a unusidama. 5Ara mãɨne chi uriade eda wãnak'ari k'ũtã́ aba ãchi juaraari suak'abari bɨt'a unusidama. Ichi anamari jɨ̃ bɨ t'orroa basima. Mãɨ k'orea chi wẽrarã p'erasidama. 6Mãɨ k'ũtãpa ãchiá jarasima:
—P'erarãt'ɨ. Mãrapa Jesú Nazaredepema k'urusude barijira bɨdada jɨrɨ p'anɨma. Ichi chok'ae p'irabarisima. Ichi t'ɨbaridaadamá ak'ɨt'ɨ. Nãma bɨwẽma. 7Naapae jarade wãt'ɨ chi ichi ome p'ɨrrɨapataɨrãmá mãɨnepa Pedroa, Jesú ãchi naa Galilea tuadea wãrut'a. Mãma ichi ununaipɨ ara ichia naena jarada jĩra.#Marco 14:28.
8Mãɨne p'era p'anɨpa k'ak'ua wɨwɨrrɨadak'ari, chi wẽrarã Jesú k'ak'ua t'ɨbaridaadamãɨpa mĩruwãsidama. Ne wap'ea p'anɨ pẽra mi ãpia pida abaɨa jaradaé pasima.#16:8 Griego pedeade chi eda waapẽarã k'art'ade versículo 9—20 newẽma.
Jesupa María Magdalená unupida
Juan 20:11-18
9Tomione tap'ededa Jesú chok'ae p'irabarik'ari naa María Magdalená unupisima. Mãɨ wẽranepema Jesupa naena jaore mietaarã siete ãyá jeret'aa basima. 10Maapae María chi Jesú ome p'ɨrrɨapataɨrãmá chi Tachi Ak'õrepa ɨt'aripa peedapa jara peeda jarade wãside, mãɨ ãchi sõp'uapa jẽa p'anasidama. 11Maamina Mariapa ãchiá Jesú chok'ae bɨt'a unusiade aside, mãɨ ĩjãanaé pasima.
Jesupa waapẽarã ume p'anɨa ichi unupida
Luca 24:13-35
12Mãɨya nak'ari Jesú ome p'ɨrrɨapataɨrã ume p'uurudepa wãuta pasima. Mãɨrã́ Jesupa ara ichi k'ĩra awara unupisima. 13Ãchi jĩitea wãnak'ari chi waapẽarã́ jarasidama. Maamina ĩjãanaé pasima.
Chi Jesú ome p'ɨrrɨapataɨrã́ ichi unupida
Mateo 28:16-20; Luca 24:36-44; Juan 20:19-23
14Mãɨya nak'ari chi Jesú ome p'ɨrrɨapataɨrã once p'anɨ nek'omaa p'anasidaɨde ara ichi unupisima. Ãchi sõ chaareadepa ĩjãanawẽa p'anana pẽra mãɨnepa chi ichi chok'ae p'irabarida ununaanapa ãchiá jarada ĩjãanawẽa p'anana pẽra, ãchi ɨtɨasima.
15Maapae Jesupa ãchiá jarasima: «Tuacha wãnak'ari chi pedea pia mɨ k'orea ãareaɨrã́ jarat'ɨ. 16Mãɨ pedea ĩjãasidara mãɨnepa porochoasidara Tachi Ak'õrepa mãɨ k'aripaipɨ. Maamina chi mãɨ pedea ĩjãawẽ bɨt'a ichia mãɨ ɨtɨaipɨ. 17Chi mɨne ĩjãa p'anɨrãpa nãɨ ẽpẽerãpa ne p'ue oodak'apɨ́ oodaipɨ: mɨ t'ɨ̃nepa jaore mietaarã ãyá jeret'aadaipɨ mãɨnepa pedea chiwidi pedeadaipɨ. 18Taama ara ãchi juapa jitadaipɨ. Nearã́ mietá todaipɨra mãɨpa ãchi jitaiwẽma. Mãɨnepa chi k'ɨdade berã ãchi jua ɨ̃rɨ bɨutade mãɨ jɨpa p'aneenaipɨ».
Jesú pajãnea wãna
Luca 24:50-53
19Mãɨya jarak'ari Tachi Ak'õrepa Tachi Chipari Jesú ɨt'aa pajãnea ateewãsima. Mãma ichi juaraari suak'abari beesima. 20Maapae chi Jesú ome p'ɨrrɨapataɨrãpa ichi pedea ãchi wãutacha jarasidama. Tachi Chiparipa ãchi k'aripapachima. Ẽpẽerãpa ne p'ue oodak'apɨɨrã oopi bɨdepa k'awapipachima ãchia jara p'anɨ piarãt'a.
Currently Selected:
Marco 16: tdc
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© (Active), Wycliffe Bible Translators, Inc. All rights reserved.