Yohane NHYƐNMU
NHYƐNMU
Yohane Asɛmpa no yi Yesu kyerɛ sɛ Onyankopɔn Asɛm a ɔyɛ nkwa farebae a ɔbɛtenaa yɛn mu (1.14). Sɛnea nhoma no ara ka no, wɔakyerɛw saa Asɛmpa yi sɛnea ɛbɛyɛ na n’akenkanfo bɛgye Yesu adi sɛ Agyenkwa no, Onyankopɔn ba no, nea wɔahyɛ ne ho bɔ no, a wɔnam ne mu gyidi so bɛnya nkwa (20.31).
Oyi Yesu adi sɛ Nyankopɔn Asɛm a ɔyɛ nkwa farebae no wie wɔ mfiase nkyerɛkyerɛmu no a, Asɛmpa no fa a edi kan ka Yesu nsɛnkyerɛnne ahorow a ɔyɛe de kyerɛɛ sɛ ɔno ne Agyenkwa a wɔahyɛ ne ho bɔ no, Onyankopɔn ba no. Nkɔmmɔbɔ a ɛtoa so no kyerɛkyerɛ nea nsɛnkyerɛnne no ma no da adi. Nhoma no fa yi ma no da adi sɛnea ebinom gyee Yesu dii, maa wɔbɛdanee n’akyidifo, bere a ebinom nso yɛɛ no dɔm, na wɔannye no anni.
Ti 13-17 kyerɛ ayɔnkofa kɛse a ɛbɛdaa Yesu ne n’asuafo no ntam wɔ anadwo a wɔakyere no no, ne awerɛkyekye ne ahosiesie nsɛm a ɔde gyaa wɔn anadwo a ade rebɛkye ama no awu no. Ti a edi akyiri no ka Yesu kyere, wɔde no kɔgyinaa asenii, ne wu ne ne wusɔre, ne n’ahoyi a oyii kyerɛɛ n’asuafo bere a ɔsɔre fii awufo mu no ho asɛm.
Yohane si daa nkwa a ɛwɔ Kristo mu no so dua, akyɛde a ɔde ma seisei ara ma wɔn a wɔgye Yesu di sɛ ɔno ne ɔkwan, nokware ne nkwa no. Nea ɛda adi pefee wɔ Yohane ho ne sɛnea ɔde nneɛma a yɛtaa hu wɔ yɛn asetena mu toto honhom mu nneɛma a ɛwɔ hɔ no ho. Nneɛma bi te sɛ nsu, abodoo, hann, oguanhwɛfo no ne ne nguan, bobe ne n’aduaba.
EMU NSƐM
Mfiase ne Nkyerɛkyerɛmu 1.1-18
Osuboni Yohane ne asuafo a wodi kan no 1.19-51
Yesu abɔnten so som adwuma 2.1—12.50
Yesu bɛn Yerusalem, ne ne nnawɔtwe a edi akyi a odii wɔ hɔ no 13.1—19.42
Awurade wusɔre ne n’ahoyi no 20.1-31
Awiei nsɛm, oyii ne ho adi bio wɔ Galilea. 21.1-25
Currently Selected:
Yohane NHYƐNMU: ATWDB
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Revised Akuapem Twi DC Bible © Bible Society of Ghana, 2017.