Mataayo 7
7
Ameeyigisyo inguru ya okuramura abhaanu abhandi
(Maariko 4:24; Ruuka 6:37‑38, 6:41‑42)
1“Mwasiga okuramura abhandi, korereki emwe wone Nyamuwanga atarija okubharamura. 2Okubha indamu inu omuramura abhaanu abhandi, niyo Nyamuwanga aribharamura. Indengo inu omurengera abhandi, niyo emwe wone Nyamuwanga aribharengera.
3“Mbawo owuringira nekeneke akabhambo kanu kari mu‑riiso rya oweejaanyu, nawe utakurora echuura chinu chiri mu‑riiso ryawo? 4Angu owutura kutiki okubhwira oweejaanyu ati, ‘Siga nikusoosye akabhambo mu‑riiso ryawo,’ keenu awe omwene uri na echuura mu‑riiso ryawo? 5Omwirimaanya awe! Nuusoosye okwamba echuura chinu chiri mu‑riiso ryawo. Niwo owutura okurora kisi na okusoosya akabhambo kanu kari mu‑riiso rya oweejaanyu.
6“Mwasiga okuyaana jimbwa ebhiinu bhinu bhiri bhya Nyamuwanga, kwa okubha ejija okuyinduka na okubhakaabhura. Ka wone, mwasiga okwesera jimbiiji ebhiinu bhya obhugusi obhurambu, kwa okubha ejija okubhitajiirira.
Ameeyigisyo inguru ya okwirembeeresya Nyamuwanga
(Ruuka 11:9‑13)
7“Musabhwega Nyamuwanga, kaja okubhayaana chinu omumusabhwa. Muyenjega ku‑Nyamuwanga, kaja okubhayaana chinu omuyenja. Mwibhuurega ku‑Nyamuwanga, kaja okubheegurira orwigi. 8Omuunu woonewoone unu kaasabhwa, kaja okuyaanwa. Omuunu woonewoone unu kaayenja, kaja okubhona, na omuunu woonewoone unu keebhuura, kaja okwigurirwa.
9“Angu, ni mwibhusi ki mw‑imwe, unu omwana waaye akamusabhwa omukaate, kaamuyaana ribhuyi? 10Amwi akamusabhwa iiswi, kaamuyaana injoka? 11Chimari, emwe muri abha ebhibhiibhi, nawe mumenyere okuyaana abhaana bheemwe ebhiinu bhya ekisi. Esomwana unu ari mu‑rwire aribhakunyiirira ebhiinu bhya ekisi abhaanu bhoone bhanu abhamusabhwa!
12“Mbe emwe, mukorerega abhaanu abhandi rwa kutyo omwenda abheene wone bhabhakorere. Obhwo nibhwo obhugajuro bhwa ebhiraagiro bhya Muusa na ameeyigisyo ga abharagi.
Ameeyigisyo inguru ya obhukama bhwa Nyamuwanga
(Ruuka 13:24)
13“Muture mw‑irango rifunde mwingire. Okubha rirango rigari rirya, erirosya mu‑kusingaarika, na injira ya okurosya eyo, ni ngari. Abhaanu bhanu abhatura okwo, ni bhaafu. 14Nawe rirango rinu erirosya mu‑bhuwanga ni funde, na injira ya okurosya eyo, ni funde. Abhaanu bhanu abhayisombookerwa, ni bhatyari.
Ameeyigisyo inguru ya abharagi abhabheeyi
(Ruuka 6:43‑44)
15“Mwikengega abharagi abhabheeyi. Omwanya gunu abhabhaaja‑ko, abheekora okubha abhoorooro rwa jinaama, nawe echimari ni bharuru rwa emisege. 16Muribhasombookerwa okuruubhana na ebhikorwa bhyebhwe. Abhaanu bhatakunogora emijabhiibhu okusooka ku‑mati ga amawa, noorwo bhatakunogora jitiini okusooka ku‑matobhooro. 17Riiti rya ekisi eritwasya amatwasyo ga ekisi, nawe riiti ribhiibhi eritwasya amatwasyo amabhiibhi. 18Riiti rya ekisi ritakutura okutwasya amatwasyo amabhiibhi, na riiti ribhiibhi ritakutura okutwasya amatwasyo ga ekisi. 19Bhuri riiti rinu ritakutwasya amatwasyo ga ekisi, eritemwa na okweswa mu‑muriro. 20Kutyokutyo na abharagi abhabheeyi, muribhasombookerwa ku‑bhikorwa bhyebhwe.
Ameeyigisyo inguru ya echimari na orubheeyi
(Ruuka 13:25‑27)
21“Itari ati, bhuri muunu unu kaatogora ati, ‘Raatabhugenyi, Raatabhugenyi,’ ariingira mu‑bhukama bhwa mu‑rwire. Nawe omuunu unu kaakora okwenda kwa Raata waani unu ari mu‑rwire, oyo niwe aribhwingira. 22Orusuku rwa indamu oruuja, na abhaanu bhaafu bharimbwira ati, ‘Raatabhugenyi, Raatabhugenyi! Owichuka ati, ꞉chaasoosiisye obhuragi kw‑isiina ryawo? Ka wone, ꞉chaasoosiisye amasambwa okusooka ku‑bhaanu kw‑isiina ryawo? Nichikora wone ebhiruguusyo bhyafu kw‑isiina ryawo?’ 23Awo niwo niribhabhwira abhwerubhweru ati, ‘Nitakubhamenya emwe noorwo na akatyari! Musooke anu, emwe abhakosi bha ebhibhiibhi!’
Ameeyigisyo inguru ya abhoombaki bhabhiri
(Ruuka 6:47‑49)
24“Mbe, omuunu woonewoone unu kaategeresya emisango jaani na okujigayuka, kaasusana na omuumbaki wa inju unu ꞉oombakire inju yaaye ku‑rutare. 25Rusuku rumwi, ingʼubha inyafu ꞉yaaguuye, emisima nijiijura, amanji nigawurura bhuyagayaga, omuyaga omururu niguyemba na okukuura inju yaaye, nawe inju eyo, ꞉itaasingaarikire, kwa okubha orufuka rwayo, rwariga ruumbakirwe ku‑rutare. 26Nawe omuunu unu kaategeresya emisango jaani, ˆnaarema okujigayuka, oyo ari rwa omuunu omumuumu unu ꞉oombakire inju yaaye ku‑musenyi. 27Ingʼubha inyafu ꞉yaaguuye, emisima nijiijura, amanji nigawurura bhuyagayaga, omuyaga omururu niguyemba, nigukuura inju yaaye, niifuma, niisingaarika yoone.”
28Yeesu ejire aamara okwiyigisya, ebhise bhya abhaanu nibhiruguusibhwa muno na ameeyigisyo gaaye. 29Abhaanu ꞉bhaaruguurire, kwa okubha ameeyigisyo gaaye gaariga gatari rwa ga abheeyigisya bheebhwe bha ebhiraagiro bhya Muusa, tari eeyigisyaga rwa omuunu unu ari na obhuturo.
Currently Selected:
Mataayo 7: jit
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2023, Wycliffe Bible Translators, Inc. All rights reserved.