YOHANES 9
9
Yesus petagéh laké' aleng buta' men aring kanak na'
1 #
HST 3:2; 14:8 Alem Iha' panau Iha' nyineng ji laké' aleng buta' men aring kanak na'. 2#Us 20:5; Lk 13:2 Pelalau dalo' anak sekulah Na' meteng Iha', “U Guru, hi aleng na sala anih, laké' anih iah, hinan na' taman na' iah, ja iha' buta' men aring ha' musang?” ken dalo'. 3#Yoh 11:4 Iha' nah Yesus nyu'ei, “Nusi' kelunan anih na sala, nusi' pah hinan na' taman na' aleng na sala lahuh. Té' pah anih ja hadui Allah tula té' iha' anih. 4#Yoh 5:17,20; 11:19 Sayu telo' na hadui Allah aleng nyihu Akui anih alem ha' malah loh, avin tegu lidem nei, ji la'ung pah em deng na nun-nun. 5#Yoh 8:12; 12:35 Alem Akui té' ha' usun tana anih, Akui nah alah usun tana,” ken Na'.
6 #
Mk 8:23
Hu'uh Iha' kuma' nunan, pelalau Iha' lemura té' tana, na tana lema té' lura Na', iha' nah Iha' musut tana lema atih té' matan laké' aleng buta' atih, 7dahin kuma' men iha', “Tei nah im mayau na' ha' bawang Siloam,” ken Na'. (Aran Siloam atih, “Ngavan nyihu”.) Tei nah iha' mayau, pelalau uli nah iha' nekulah beka' jam nah iha' nyineng.
8Daha' uma na' dahin daha' ha' béh pah lahuh aleng jam iha' men'a kelunan aleng murip kahi tua, ken daha', “Iha' anih nah aleng melo' kahi tua di keta'?” ken daha'. 9Té' pah daha' aleng kuma', “Iha' nah anih.” Té' pah aleng kuma', “Nusi'. Bi jam na' tua kah aleng awi iha',” ken daha'. Bi iha' kuma', “Akui nah anih,” ken na'. 10Iha' daha' kuma' men iha', “Nuno' tuk matam nei peting?” ken daha'. 11Iha' nyu'ei, “Laké' aleng aran Na' Yesus, Iha' aleng na tana lema dahin musut na' té' matak, dahin nyihu akui, ‘Tei nah im mayau na' ha' bawang Siloam,’ ken Na' men akui, iha' nah akui tei mayau tinan, pelalau kui jam nyineng,” ken na'. 12Pelalau daha' meteng iha', “Hino' laké' anan té'? ken daha'. “Nusi' kui jam,” ken na'.
13Iha' nah daha' geri laké' aleng buta' menuna' atih pala daha' Farisi. 14#Yoh 5:9 Tegu Yesus na tana lema atih dahin meting matan laké' anan, atih nah tegu Dau Kelarah. 15Daha' Farisi pah meteng iha' la'an marung nuno' tuk iha' jam nyineng anan. Iha' ha' kuma' men daha'. “Tana lema en Na' tei té' matak, tei nah akui mayau na' ké', pelalau kui jam nyineng,” ken na'. 16#Yoh 3:2; 7:43; 9:31,33 Iha' nah daha' balei Farisi kuma', “Nusi' kelunan atih men Allah, avin Iha' em hituk té' Dau Kelarah.” Té' pah daha' aleng kuma', “Seng nuno' tuk kelunan aleng sala deng na tada' nunan du?” ken daha'. Iha' nah daha' tei sekdep kenep.
17 #
Yoh 4:19
Avin ha' nunan daha' meteng laké' aleng buta' atih la'an, ken daha', “Seng nun dahum marung Iha' avin Iha' uh meting matam anan?” “Nabi Iha',” ken na' nyu'ei daha'. 18Nusi' loh kah daha' Yahudi nginah iha' buta' men'a dahin jam nyineng la'an, ateng daha' muvui hinan na' dahin taman na'. 19Pelalau daha' meteng dawa', “Lan anih anak kua' aleng buta' men aring kanak na' iah? Nuno' tuk iha' nyineng kerei inih?” ken daha'. 20Hinan na' dahin taman na' nyu'ei dahin kuma', “Jam kah kawa' iha' anih anak awa', iha' pah uh buta' men aring kanak na', 21bi nuno' tuk iha' jam nyineng kerei inih lo, nusi' kawa' jam. Hi aleng meting matan na' anih, nusi' pah kawa' jam lahuh. Meteng batung na' ké, iha' pah uh dekaya', batung na' kah deng bara marung iha',” ken dawa'. 22#Yoh 7:13; 12:42; 16:2 Té' pah hinan na' taman na' kuma' nunan avin dawa' takut daha' Yahudi, avin daha' Yahudi uh piah kenep, iha' té' ji la'ung meng'i Iha' Kristus, kelunan atih seng en daha' bet men alem uma sebayang. 23Atih nah tavit hinan na' taman na' kuma', “Iha' uh dekaya', meteng batung na'.”
24 #
Yos 7:19
Iha' nah daha' duan laké' aleng buta' atih dih la'an dahin kuma' men iha', “Sayu im meju Allah. Itam jam kelunan atih kelunan aleng sala,” ken daha'. 25Pelalau iha' nyu'ei, “Marung Iha' kelunan aleng sala, nusi' kui jam anan. Anih tua jam kui, menuna' akui buta', kerei inih akui jam nyineng,” ken na'. 26Pelalau daha' kuma' men iha', “Ket nun Na' na men ika'? Nuno' tuk Iha' meting matam?” ken daha'. 27Iha' nah iha' nyu'ei daha', “Uh kah akui bara dih, bi nusi' kam kelenghi. Nun kaséh kam kelenghi la'an? Kaséh kam jadi' anak sekulah Na' lahuh iah?” ken na'. 28Pelalau daha' bunget na iha' dahin kuma', “Ika' kah aleng anak sekulah Na'. Kamé' anih anak sekulah Musa kamé'. 29Itam jam Allah uh bara men Musa, bi laké' anih, nusi' kamé' jam men ino' Iha' nei,” ken daha'.
30Nyu'ei nah laké' anan, “Pah kenep kui ikam em jam men ino' Iha' nei, bi Iha' uh meting matak. 31#Ivun 15:29; Yes 1:15; HST 10:35 Itam jam Allah em kelenghi dahun kelunan aleng na sala. Kelunan aleng sebayang té' Allah dahin ngioh kenep Na', iha' nah aleng en Na' kelenghi. 32Men aring usun tana anih, nusi' payan ta' jam dengah kelunan meting matan kelunan aleng buta' men aring kanak na'. 33#Yoh 9:16 Awi kelunan anih em nei men Allah, nusi' Ha' deng na nun-nun,” ken na'. 34#NDI 51:5; Yoh 9:2 Nyu'ei nah daha' dahin kuma' men iha', “Alem sala telesen kanak ka' anih pa. Beka' senghau ika' nah aleng katuk kamé' iah?” ken daha'. En daha' bet nah iha' hawang.
35Yesus kelenghi marung daha' uh mebet iha'. Tegu Iha' pesuk iha', Iha' kuma' men iha', “Nginah ka' té' Anak Allah iah?” ken Na'. 36Iha' nyu'ei dahin kuma', “Hi Iha', Amei, ja si' ita' ji'ek nginah té' Iha',” ken na'. 37#Yoh 4:26; 10:25 Iha' nah Yesus kuma' men iha' “hu'uh nah ika' nyineng Iha', Iha' pah aleng tengaran dahim anih,” ken Na'. 38“U Tuhan, nginah nah akui,” ken na'. Pelalau ha' nyepukun sebayang té' Iha'.
39 #
Mat 13:11-15
Ken Yesus, “Té' pah Akui nei ha' usun tana anih ja kelunan nei telesen Kenak, ja daha' aleng em nyineng balui nyineng, daha' aleng nyineng pah balui buta',” ken Yesus. 40#Mat 15:14; 23:26 Té' daha' Farisi aleng dahin Yesus kelenghi daho' anan, pelalau daha' kuma' men Iha', “Kamé' pah buta' lahuh iah?” 41#Ivun 26:12 Iha' nah Yesus kuma' men daha', “Iha' ikam buta', nusi' kam hipun sala, bi ikam kuma', ‘Kamé' nyineng,’ avin atih pa'en tua sala kam,” ken Na'.
Currently Selected:
YOHANES 9: TDK1990
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Bible in Today's Dahun Kayan Version © Bible Society of Malaysia, 1990.