मती 20
20
अंगुर ने वाड़ी मा काम करवा वालअ ने काणी
1“हरग ने राज वणा खेतर ने मालिक हरकू हे जी वेलो वेलो आपड़े अंगुर ने वाड़ी ने हारू मजूर लिवा गियो। 2वणाय रूपा ने एक सिक्को मजूरी ठेहरावीनी वणय काम करवा ने हारू वाड़ी मा मुकली दिदा।
3“नोव वजे ने आहे पाहे खेतर ने मालिक पासो आपड़े घेर हू निकलजो नी वणाय जुजू के, थुड़क मनक बजार मा अणी हाड़े पीली हाड़े इमुस बेकार ऊबा ता। 4तेरे वणाय वणहू आग्या आलजी नी केजू, ‘तमो बी मारे अंगुर ने वाड़ी मा जो, जी सई मजूरी हे वे मुँ तमय आली, तणी वा बी गिया।’ 5पसे वणाय बारा नी तीन वजे वालअ ने हाते बी इमुस किदू। 6पास वजे ने आहे पाहे वी फेर घेर हू बान्णे गियो नी थुड़क मनका बजार मा अणी नी पीली हाड़े ऊबअ डिटा। वणाय वणहू केजू, ‘तमो निय पुरो दाड़ो इमुस हय ऊबअ हो?’ 7वणय वणा हू केजू, ‘अमअ तणी ऊबअ ह के, कणाय अमय मजूरी माते नीं लगाड़जअ।’ वणाय वणअ हू केजू, ‘तमो बी मारे अंगुर ने वाड़ी मा जाता रो।’
8“जेरे अतमजू पड़जू ते अंगुर ने वाड़ी ने मालिके आपड़े मुनीम हू केजू, ‘मजूरे हादिनी वाहलअ मजूर हू पेलकअ मजूर लगाड़जअ त वणे हेते मजूरी आली दे।’ 9पसे व आजअ नी जिय पास वजे लगाड़जअ थकण त वणय एक रूपा ने सिक्को आलजो। 10नी जी पेले आजअ त वणे यू हुसीयू के, अमय वदार मलहीं पण वणय हेतय बी एक एक रूपा ने सिक्को मलजो 11वणय सिक्को ते लिदो पण वा खेतर ने मालिक माते कुड़ कुडाता थकण केवा लागा, 12‘जी वाहे आजा ता वणय बस एक कलाक काम किदू नी तय वणय अमय आलजू वतरूस वणय बी आलजू। पण अमय ते पुरो दाड़ो तेज ताप विटीनी मेणत किदी।’
13“खेतर ने मालिके उतर मा वणअ माहू कणायेक एक जणाहू केजू, ‘हे दोस्त, मय तारे हाते कई अन्याय नीं किदो हे। हूं आपड़े यू तय नीं किदू तु के, मुँ तमय रूपा ने एक सिक्को आली? 14जी तारे हे ली नी जातो रे। हेता हू वाहे लगाड़जो वणाय बी मुँ वतरीस मजूरी आलवा साहूँ हूँ जतरी तय आली रेजो हूँ। 15हूं मुँ आपड़े धन ने जी साहूँ हूँ वु करवा ने हक नीं राकू? मुँ हाऊ हूँ अणा हू तु रीहे बले हे?’ ”
16 #
मती 19:30; मर 10:31; लूका 13:30 पसे ईसुई वणहू केजू, “अणी तरह हू जी वाहे हे वा मोरी नी जी मोरी हे वा वाहे थाई जाहीं।”
ईसुई पोताय आपड़े मोत ने बारामा तीसरे फेरे केवू
(मरकुस 10:32–34; लूका 18:31–34)
17जेरे ईसु आपड़े बारा सेलो ने हाते यरूसलेम जाई रेजो तो, ते वी वणय एकहाड़े लई गियो नी हिड़तो जाईनी वणहू केवा लागो, 18“हबलो, आपड़ा यरूसलेम जाई रेजा ह नी मय मनक ने सुराय विय मुटायाजक नी मुसा ने नियम हिकाड़वा वालअ ने आत मा हुपजो जाई, नी वा मय मोत ने लायक ठेरावहीं। 19पसे वा वणाय परमेसवर ने नीं जाणवा वालो ने आत मा हुपहीं, नी वा विने मजाक बणावहीं, नी कोड़ा वाहीं, नी करूस माते सडावी दिहीं, पण तीसरे दाड़े वी पासो जीवतो थाई जाहीं।”
एक आई ने आपड़े सुरअ ने हारू विनती
(मरकुस 10:35–45)
20पसे जबदी ने सुरअ ने आई आपड़े सुरअ ने हाते ईसु कनी आजी नी वे नमीनी विनती करती थकी वणा हू कईक मांगजू।
21ईसुई वणी हू केजू, “तु हूं साहे हे?”
वे के हे, “मय वसन आल के, मारे या बे सुरा तारे राज मा एक ते जमणी हाड़े नी एक डावी हाड़े बेहीं।”
22ईसुई उतर आलजू, “तमो नीं जाणता के तमो हूं मागी रेजअ हो। जी दुक ने कटोरो मुँ पीवा वालो हूँ, वणाय तमो पई हको हो?”
व वणा हू केई हे, “हा, अमअ पई हकअ ह।”
23ईसुई वणहू केजू, “तमो मारे कटोरो ते पीहो, पण मारे जमणी हाड़े नी डावी हाड़े कणाय बेहाड़वान अदिकार मय कनी नीं हे। निय बेवा ने अदिकार ते वणनेस हे, जणने हारू मारे बापे तयार किदो हे।”
24यू हबलीनी विने दस सेला वणअ बे पाई माते कईक री हू बळवा लागा। 25#लूका 22:25,26तेरे ईसुई वणे बे पाई कनी हादिनी केजू, “तमो जाणो हो के परमेसवर ने नीं जाणवा वाला ने हरदार आपड़े मनका माते राज करवा साहे हे नी जी मुटा हे वा नाना मनका माते जबरजसती गलत अदिकार सलावे हे। 26#मती 23:11; मर 9:35; लूका 22:26पण तमारे वेसमा एवू नीं थावू जुजे। पण तमय मा जी मुटो बणवा साहे, वी तमारे सेवक बणे। 27नी जी तमय मा हू पेलो बणवा साहे हे वणाय तमारे सेवक बणवू पड़हीं। 28तमय मय मनक ने सुरा जेवू बणवू जुजे जी सेवा करावणा नीं, पण पोते सेवा साकरी करवा नी कईक मनका ने तारण ने हारू मारे जीवन ने बलिदान करवा ने हारू आजो हूँ।”
ईसुई बे आन्दा होज किदा
(मरकुस 10:46–52; लूका 18:35–43)
29जेरे वा यरीहो नगर हू जाई रेजा ता ते एक मुटी पीढ़ ईसु वाहे थाई गई। 30विय वाट ने कानी मा बे आदा बेटा ता। जेरे वणय यू हबलजू के, ईसु जाई रेजो हे, ते वा डाडी करवा लागा, “हे परबू, दाऊद ने सन्तान, अमय माते दया कर।”
31अणी वात हू मनका ने पीढ़ वणे वलगीनी सानू रेवान केजू, पण वा फेर वदार डाडी करवा लागा, “हे परबू, दाऊद ने सन्तान, अमय माते दया कर।”
32पसे ईसुई ऊबू रेईनी वणहू केजू, “तमो हूं साहो हो, मुँ तमारे हारू हूं करू?”
33वा वणा हू कय हे, “हे परबू, अमअ यू साहअ ह के, अमअ जुवा लागअ।”
34ईसुई वणअ माते तरस आवी गई नी वी वणने आकजी अड़जो नी वा तरत जुवा लागी गिया नी वा ईसु वाहे हिड़वा लागा।
Ekhethiweyo ngoku:
मती 20: WBR
Qaqambisa
Kopa
Thelekisa
Yabelana
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2023 NLCI
CC BY-NC-ND 4.0