संत.मत्ती 28
28
जिवीःड-बिरिडोः आउर सिरमादूत आला संदेस
(संत.मरकुस 16:1–8; संत.लुकास 24:1–12; संत.जोहन 20:1–10)
1सथाअ हिला तरअः तयोम, रअः सुरू हिला आँगा-पोटाअ मरियम मगदलिनी आउर एटाअ मरियम मरघटा नेनेल सेन नेनाकिन। 2हिमीन बेरा अचाका मुरुक जोड़ से भुईंडोल हुयाव नेना, एता लःअय ची परभु आली सिरमादूत सिरमा तरअः अड़गु नेनाय, काबुर दुबाःड़े हीःग नेनाय, आउर टुकू के गुंड़राव केते होना रे दुड़ूः नेनाय। 3हुनी आला मेःड-मुहांड़ बिजली लकान लवकाः-केना, आउर हुनी आला गेन्दरअ ताय रातांग लकान पुँड़ी ताहिना। 4दूत के नेल केते प-पहराकु बोरते थरथराः तनाकु आउर गोएःग उनकु लकान नाकु।
5सिरमादूत हुंकू आउराईतकु के बेता लिकुआय, “आलपे बोर, ईङ पाड़ी तानिङ ची आपे ईसु के नाम दियापे, जेके कुरूस रे रकाःब ताही लियाकु। 6हुनी नोआँड़े कनियाँ, जाईसन हुनी कंहड़ी ताही लःअय, हुनी गोजोः तयोम फिन जिवीःड-बिरिःड तनाय। एला आउर जे एड़े हुनी के दोहो ताही लियाकु होना ठाँव के नेलेपे। 7नहाअः तुरते हुनी आलकु चेलाकु दुबाःड़े सेन केते बेता कुपे, ‘हुनी गोएःग केते जिवीःड-बिरिःड तनाय, हुनी आपे तरअः पहिल रे गलील सेन कोआय, होनाःड़े आपे हुनी के नेल कियापे’ निआँ आपे लःअय ईङ आला खभाईर हेके।”
8हुंकू आउराईत तुरते गी मरघटा दुबाःड़े तरअः सेनोः नाकु आउर हुंकू बोरोः नाकु, आउर रिझते हुनी आलकु चेलाकु के नोःआँ खभाईर के उउदूः लःअय नीर सेन नेनाकु।
आउराईतकु लोः ईसु दिसतार नेनाय
9ईसु अचाका हुंकू लोः हीःग जुमाव नाय, आउर “आपे के सानती भेटाअः बेता लिकुआय।” हुंकू हुनी दुबाःड़े सोदोर नेनाकु, आउर हुनी आला जांगा रे इकड़ुम केते, आराधना लियाकु 10ईसु हुंकू के बेता लिकुआय, “आलपे बोर, जु आउर ईङ आलकु बोकोकु के नोःआँ खभाईर के उदूः कुपे ची हुंकू गलील सेनाकु, होनाःड़े हुंकू ईङ लोः भेंटोआकु।”
पहरा एमोअ कु आला खभाईर
11बनहोंड़ आउराईत सेनोः केन गीआकिन ची थोड़ेक प-पहराकु सहर हीःग नाकु, हुंकू महापुरोहितकु के जे घटना हुयाव ताहिना होना जामा खभाईर के उदूः लिकुअकिन। 12महापुरोहितकु अगुवाकु लोः मिलाव केते विचार लअकु, आउर सिपाहीकु के ढेर ढिबुवा एमा केते, 13नोकान समझाव लिकुआकु, “आपे नोकान कंहड़ी पे ची निदा आले निन्दोः केनाले, हिमीन रे ईसु आलकु चेलाकु हीःग केते आउर हुनी आला गोएःग होड़ो के चोर इदी लअकु। 14जदि नोःआँ बात राज्यपाल दुबाःड़े सोदोरोआ, दो आले हुंकू के समझाव केते आपे के बंचाव पेआले।”
15सिपाहीकु ढिबुवा इदी लअकु आउर हिकान लअकु, जाईसन हुंकू के सिखाव ताहील कुआकु। निआँ बात गी नहाअः जगुत जाहुदीकु रे फैलाव ताना।
ईसु आनेःग आलकु चेलाकु लोः कंहड़ी-गथा
(संत.मरकुस 16:14–18; संत.लुकास 24:36–49; संत.जोहन 20:19–23; प्रेरित.कामी 1:6–8)
16 #
सं.मत्ती 26:32; सं.मर 14:28 तब जे दुबाःड़े ईसु हुंकू के राअः ताही लिकुआय, होनाःड़े गारा चेलाकु गलील रअः बुरु दुबाःड़े सेन नेनाकु। 17हुंकू ईसु के नेल केते, आदर से जोहार लियाकु, बकिर आधाकु आला मन रे संका लअकु। 18तब ईसु हुंकू दुबाःड़े सेन केते बेता लिकुआय, “ईङ के सिरमा आउर ओत रे पुरा हक भेटाव ताना। 19#प्रे.कामी 1:8हिना लःअय आपे जामा जाईतकु दुबाःड़े सेन केते चेला बनाव कुपे, आउर हुंकू के बाबा, होपोन आउर पबितर आतमा आला नुमू रे, बतिस्मा एमा कुपे, 20ईङ आपे के जे-जे हुकूम एमा तदपेईंग, आपे होना रे चलाअ लःअय हुंकू के सिखाव कुपे। आउर याईद दोहोय पेईङ दुनिया रअः आखरी जगुत जामा बेरा ईङ आपे लोः एदानिङा।”
Ekhethiweyo ngoku:
संत.मत्ती 28: ASR
Qaqambisa
Yabelana
Thelekisa
Kopa
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2023 NLCI CC BY-NC-ND 4.0