MAT 4
4
येशुनदी परीक्षा
1इदी आयनेंका शैतान तीकेल येशुनदी परीक्षा कावाला आंका पवित्र आत्मा वान मरु भुमीलोंग येका फोया. 2चाळीस दिनमुल इंगा चाळीस मोब्बुल येमीच तिनांदे इंगा तागांदे उपवास शेशीनेंका येशुनकी आकाल आय्या.#निर्गम 34:28. 3आप्पुड शैतान येशुनदी परीक्षा तिस्कुना वान देगार वच्या इंगा आन्या, “जर नु परमेश्वर कोडकु उंडाव तर इ रायकी रोट्या आय्येद आज्ञा इ.”
4पण येशुड उत्तर इच्या, “पवित्र शास्त्रला इल्ला राशीनेद उंडाद की,
‘मनशी फक्त रोट्याताने लेद, तर
याद परमेश्वर नोटल्योन्केल यलताद आ प्रत्येक वचनता जगाशी.’”
5मंग शैतान वान यरुशलेम इ पवित्र शहरलोंग येका फोया इंगा परमेश्वर भवन टोक मिंदा नीला फडामत्या.
6इंगा वान आन्या, “जर नु परमेश्वर कोडकु उंडाव तर किंदा दुंक, येनटीक की पवित्र शास्त्रला इल्ला राशीनेद उंडाद की;
‘परमेश्वर वान दुतलाक नी इचांग आज्ञा इच्ची इंगा
नी काळलु राय मिंदा आपटायाराद आंका
वार निन्नु मना शेतला मिंदा झेलास कुन्यार.’”
7पण येशुड वान आन्या, “पवित्र शास्त्रला इदी पण राशीनेद उंडाद की, ‘नी परमेश्वर, यवाड नी प्रभुड, वानदी परीक्षा सुडाक.’” 8मंग शैतान वान वगा शेंगेम लोत कोंडा मिंदीक येका फोया इंगा वाड वानकी जगलोनी आन्नी राज्यल, दांटल्योनदी आंता श्रीमंती सुपीच्या. 9इंगा वाड वान आन्या, “जर नु नाय काळ मोकती इंगा नाद आराधना शेस्ती तर इदी आंताच निन नीक इच्यान.”#योहान 12:31. 10येशुड वान आन्या, “हे शैतान, ना देगाटेल धुराम फो! येनटीक की पवित्र शास्त्रला इल्ला राशीनेद उंडाद की,
‘परमेश्वर यवाड नी प्रभुड वानदे आराधना शेय
इंगा फक्त वाने मोक्कु.’”#अनुवाद 6:13.
11मंग शैतान येशुन इडशी फो इंगा परमेश्वर दुतलु वच्ची येशुनदी सेवा शेशेदेंक आंटीर.
येशुड वानदी सेवा सुरु शेशा
12योहाननी तुरुंगला येशीनार इदी यप्पुड येशुड इन्या आप्पुड वाड यहुदिया प्रांत इडशी गालील प्रांतलोंग वापस यल्ली फोया. 13नासरेथ इडशी जबुलून इंगा नफताली प्रांतलोन, गालील सरोवर देगार कफर्णहुम नगरला वाड फोई निलच्या.
14यशया संदेष्ट्यान तीकेल पहिला जे शप्पीनेद उंड्या आदी पुर्ण कावाबेक आंका वाड आंदुक फो.
15“जबुलून इंगा नफताली इ प्रांत,
समुद्र कंटाम मिंदुडदी, यार्देन आतकुडदी प्रदेश इंगा यहुदी लेनोरदी गालील
16या मंदी अंधकारला जगायदुर वार,
फेद्दाद यलगु सुशीर.
साव उंडीने अंधकारमय प्रदेशला निलचेतोर मिंदा,
यलगु वच्चीनेद उंडाद.”
17आप्पुडनोट येशुड उपदेश शेशेद सुरु शेशा इंगा वाड आनेदेंक आंट्या की; “मी पापलाकेल परमेश्वर तीकुड तिरगुना, येनटीक की स्वर्गद राज्य मी देगार वच्चीनाद.”
येशुड वान पहिला शिष्यलान फिलच्या
18मंग वगा नाड यप्पुड येशुड गालील सरोवर देगाटेल फोयेताप्पुड, शिमोन आनीनोड पेत्र इंगा वान शिन्ना तम्मुड अंद्रिया इर इद्दारनी जाळी येशेताप्पुड सुशा येनटीक की वार मिल फट्टेतोर उंडीर. 19येशुड वारनी आन्या, “ना यंका दांडा, आंटे निन मिमलान मनसुलान फट्टेतोर बनाय मततान.” 20मंग वार लगेच जाळी इडशीगास वान यंका नडशेदेंक आंटीर.
21येशुड आंदुकेल मुंदारकी नडस्का फोयेताप्पुड वाड इंगा इद्दार तम्मुळ्ळु; जब्दीन कोडकु याकोब इंगा वान तम्मुड योहान इरनी वार आब्बान जब्दीन जताक जहाजला सुशा. वार जाळील शिंगार शेयदुर. आप्पुड वाड इद्दारनी पण फिलच्या, 22आप्पुड वार इद्दार पण लगेच वारदी नाव इंगा आब्बान इडशीगास वान यंका यल्लीर.
येशुड बिमार मंदीन बागा शेस्ताड
23येशुड गालील प्रांतला आन्नी तीकुड तिरगुका, वार यहुदी सभास्थानला फोईगास नेरप्या, परमेश्वर राज्यद सुवार्ता शप्या इंगा मंदी आन्नी प्रकारी रोगलु इंगा आन्नी प्रकारी बिमारील शिंगार शेशा. 24येशुन बद्दलदी बातमी आंता सिरीया देशला पसराशा; मंग यवार बिमारीलता इंगा शेंगेम प्रकारी रोगलाता पिडीत उंडीर, यवारकी दुष्टात्माल आंटीनेय उंड्या, मिरगी लेशेतोरनी इंगा लकवा आंटीनोरनी इल्ला आंता मंदीन वान देगार यकोचीर इंगा येशुड वारनी बागा शेशा. 25मंग गालील प्रांत, दकापलीस#4:25 दकापलीस आंटे फदी शहरलु नगर, यरुशलेम शहर, यहुदीया प्रांत इंगा यार्देन वंका आतकेल वच्चीने मंदीद फेद्दा गर्दी वान यंका नडशेदेंक आंट्या.
Ekhethiweyo ngoku:
MAT 4: WNT
Qaqambisa
Kopa
Thelekisa
Yabelana
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena