Samba Leko - 2007 - BSCAM NT Drama

Nouveau Testament en Samba Leko © Alliance Biblique du Cameroun, 1998. 

Zá Yéésù zá' ɛ̀m kɔ̀l aa Oliva nyìì bəd dìì bərə ba. Nwúndù oòrə, kə̀ limtə́ pít, kidbírà láŋsə́ wúuú. Bít nɛ́b zùúm bəd gbad bə̀ yaà oò sunú. Yéésù kùm yɛ́b ba, bít pìì bə̀ in sáànmbìá. Nɛ̀n indaŋ̀mbə̀ bəd kə̀ Farisa bəd gə̀b tá, bə̀ kò'à nɛ́ŋ kéèndo nə́ŋ̀ tə́ labsə̀ ma'nàá, yaà bə̀ zígə̀ nɛ́b zùúm númú, bít bə̀ bàà Yéésù: «Nɛ̀ná, bə́ kò'à nɛ́ŋ kéèndo aa yée bə́ŋyée ní, tə́ labsə̀ ma'ǹ naú. Musa bàà bə́ indaŋ̀mbə̀ rú gə́, làl báà lòd nɛ́ŋ kɛ́ɛ̀m bəraa tə́ in ma'ǹ kə̀ aakíin də kə̀ bəŋá. Zá ám gə́, ń bàà tə́ leè gú?»
Bə̀ bàà kàandə, bə̀ í'ù gɔ̀'wà gúdǹmbìá, bɔ̀b oò bə̀ gúsuúm vədǹ laànmbə̀ yílú. Zá Yéésù əb bít pìì in bádǹmbə̀ yɛ́b bə kə̀ nɛɛ̀n wàà yílá. Zɔ̀ŋ aa bə̀ tə́ù pe'ǹ kə̀ nwɔŋ dɛdǹmbə̀ yée gə́, Yéésù zá' dìì lɛgú, bít bàà bə̀: «Nɛ́ŋə̀ aa aí tə́ŋú, oò gə́, mà' bèd invaksə́ síndə, éèn oò lààù sə̀n kə̀ bəŋá.»
Kàanyée gə́, əb sɔ̀ŋ, bít pìì in bádǹmbə̀ yɛ́b ba. Zɔ̀ŋ aa bə̀ kìì nwɔŋ bəraa gə́, bə̀ ɛ̀m bəd nə́ŋ̀ nə́ŋ̀, éèn sɔ̀d nɛ́b gbàád bəd ba. Yéésù nyɛ́d sə̀ní oò nə́ŋ̀ní, nɛ́ŋ kéèndo rə kɔ̀ dìì oò númú. Kàanyée gə́, Yéésù zá' dìì taà lɛgú, bít dɛ̀rə̀: «Wàà kéèná, bə̀ tə́ bínì gú? Nɛ́ŋə̀ nə́ŋ̀má fág kò' n sín wa?» Kè' í'ù: «Báátììkpɛ̀ŋá, kóó nɛ́ŋə̀ nə́ŋ̀má sé.» Yéésù bààù: «Máá kɔ̀ fág mə́ kò' n gá. Ǹ ɛ̀m kúnú, zá m̀ mà' invaksə́ sɔ̀ŋ sí.»]

Yéésù yaà gám nɛ́b zùúm nwɔŋ sɔ̀ŋ, bít bàà bə̀: «Máára mə́ kùmsə̀n laa nyɛdkè zɔ̀ŋə yɛ́b bə bìá. Màn aa bàg mə́ rə, dá gɔ̀ŋsə́ laa nyɛdkè bə̀ bɔbàá, bít ɛ̀m tígə́lə́ sɔ̀ŋ gá.»
Farisa bəd gə̀b bààù: «Ń mà' sedako tə́ ám yílə́ kə̀ yíl ámbə̀ ní, bít nwɔŋ aa ń bàà rə, nwɔŋ sɔ̀ɔ̀n gá.»
Yéésù kè' í' bə̀: «Kóó dáà mə́ mà' sedako tə́ máá yílə́ kə̀ yíl máá bə̀ ní máá, nwɔŋ aa mə́ bàà rə gə́, nwɔŋ sɔ̀ɔ̀ná. Kàandə, mə́ gàb zɔ̀ŋ aa mə́ vúgà bərə yàá. Bít zɔ̀ŋ aa mə́ tə́ dáàn bərə kɔ̀, mə́ gàb yàá. Zá aí gə́, íí gàb zɔ̀ŋ aa mə́ vúgà bərə sé. Bít zɔ̀ŋ aa mə́ tə́ dáàn bərə kɔ̀, íí gàb sé. Íí fág nɛ́ŋə̀ tə́ kìínmbə̀ nɛ́b zɔ̀ŋə yɛ́b bə bə̀ kíin. Máá gə́, mə́ fág nɛ́ŋə̀ nə́ŋ̀má bə́ŋyée sé. Wə́ə́ mə́ì nɛ́ŋə̀ fágǹmbə̀ gə́, fágə́n mə́ rə, fágə́n sɔ̀ɔ̀ná. Kə̀ aakíin də, kùm mə́ fág máá nə́ŋ̀ní sé, zá mə́ tə́ kə̀ Báá máà tùm máà rə tá. Bə̀ bád tə́ aí indaŋ̀mbə̀ nwɔŋú, màìgə́ nɛ́b bəd iira, ìì mà' sedakoì luùm nə́ŋ̀ní gə́, sedako boò rə, sedako sɔ̀ɔ̀ná. Mə́ mà' sedako máá yílú, kə̀ yíl máá bə̀ ní; bít Báá mə́ aa tùm máà rə, oò kɔ̀ mà' sedako tə́ máá yílə́ kɔ̀.»
Bə̀ dɛ̀rə̀: «Báá ḿ də, oò tóó?» Yéésù ke' í': «Íí gàb mə́ sé, Báá mə́ kɔ̀, íí gàbə̀ sé. Dáà íí gàb mə́ì gə́, íí dá Báá mə́ kíìn gabm̀ kɔ̀.»
Yéésù gám nwɔŋ bəraa rə, sɛŋ aa tə́ nɛ́b bəd Vɛnɛ́b nwɔŋ sáàn láŋsə́ wúu roó. Kùm zɔ̀ŋ aa bə̀ lɛ́l ba' bərə ba, nɛ́ŋə̀ nə́ŋ̀má kò'ù sé. Kàandə, sɛŋ oò bə̀ wə́ə́ bə́ŋ̀ sé.

Yéésù bàà bə̀ sɔ̀ŋ: «Máá kíìn ɛmàá, bít íí dá mə́ kíìn saanàá. Zá val dá ii kodǹ invaksə́ íí rú. Íí bán dáànmbə̀ zɔ̀ŋ aa mə́ tə́ dáàn bərə gá.»
Yahudu bəd nɛ́b yíl bə̀ bəd bə̀ bàà ɔ̀dnə́ŋ̀ bəd boò bòdba: «Dáá yíl oò lo'nì? Bàà: ‹Íí bán dáànmbə̀ zɔ̀ŋ aa mə́ tə́ dáàn bərə gá,› roó?»
Yéésù kè' í' bə̀: «Íí vúg zɔ̀ŋə yɛ́b ba, zá máá gə́, mə́ vúgà lɛgə́ poú. Íí nɛ́b zɔ̀ŋə yɛ́b bə̀ bərá, zá máá gə́, mə́ nɛ́d zɔ̀ŋə yɛ́b bə bə̀ gá. Kə̀ taàbìá, mə́ bààiyà taà val dá ii kodǹ invaksə́ íí bərú. Kə̀ aakíin də, val dá ii kodǹ invaksə́ íí bərú, íí gàb nɛɛ̀n aa mə́ kùm dú rə síngə́ roó: ‹Mə́ nɛ́ŋə̀ aa túrú zèd kə̀ zèd doó.› » Bə̀ dɛ̀rə̀: «Ń nɛ́ɛ̀réè gú?»
Yéésù kè' í' bə̀: «Nɛɛ̀n aa mə́ bààiyà rú, sɛŋ aa sɔ̀d dú roó. Mə́ tə́ kə̀ nwɔŋ naà zùúm aí bə̀ baànmbìá, bít fágǹmbə̀ aí bìá. Zá màn aa tùm máà rə, bàà nwɔŋ sɔ̀ɔ̀ná, bít in aa mə́ kììà oò naà rə ní, mə́ bàà taà nɛ́b bəraa zɔ̀ŋə yɛ́b bəroó.»
Gabm̀bə̀ gám bənə́ nwɔŋ aarə tə́ Báá aa lɛgə́ paà rə yílə́ rə, bə̀ gàb sé. Kàanyée gə́, Yéésù bàà bə̀: «Màìgə́, pà' íí ná' Nɛ́ŋ Váàndo Wààì lɛgə́ gə́, íí dá taà gabàá ‹Mə́ nɛ́ŋə̀ aa túrú zèd kə̀ zèd doó.› Bít sèl íí dákíìn gabàá, mə́ mà' in nə́ŋ̀má kə̀ yíl máá bə̀ ní sé. Mə́ bàà in aa Báá mə́ aa lɛgə́ rə, sán mə́ máà mà' rə ní. Màn aa tùm máà rə, tə́ kə̀ máá tá, lɛ́' dàà mə́ má nə́ŋ̀ní sé; kàandə, mə́ tə́ in aa tɛ́m oò bə̀ í' rə ma'nàá, sɛŋ gə́ kóólé.»
Zɔ̀ŋ aa Yéésù tə́ nwɔŋ gáàm kə̀ aakíin gə́, nɛ́b zùúm bəd bàgə̀ yàá.

Kàanyée gə́, Yéésù bàà Yahudu bəraa ìì bàgə̀ rə: «Dáà íí kè' nwɔŋ bəraa mə́ bàà ii rə yàá, bít íí tə́ diìn ma'ǹmbə̀ kìínmbə̀ nɛɛ̀n aa insánke mə́ bàà ìì mà' rə kíin gə́, vɛ́nà, íí nɛ́b sáànmbə̀ mə́ bərá. Kàandə, íí dá vɛ́nà kíìn gabàá, bít vɛ́nà káá dáá ii kíìn ke'ǹ invaksə́ íí rú.»
Bít kè' bə̀ í'ù: «Bə́ Abraham yɛb kàá bərá, bít kùm bə́ bèd nɛ́ŋə̀ nə́ŋ̀má kɔ̀' sé. Ééleè ń dá taà báàn baànmbə̀, Káá dáá ii kíìn ke'ǹ invaksə́ íí rú,» gú?
Yéésù kè' í' bə̀: «Mə́ tə́ ii kíìn baanàá, aarə nwɔŋ sɔ̀ɔ̀ná, kóó nɛ́ɛ̀réè, tə́ diìn invaksə́ ma'ǹmbə̀ gə́, dá kuùm invaksə́ kɔ̀sá. Kɔ̀' gə́, kùm dùg yiìl gá. Zá wàà váàndo gə́, dá kuùm yiìl sɛŋ gə́ kóólé. Dáà Vɛnɛ́b Wàà káákè' iiyì gə́, vɛ́nà, íí kùm kɔ̀' sɔ̀ŋ gá. Mə́ gàb yàá, íí Abraham yɛb kàá bərá. Zá íí sàà mə́ tə́ lo'ǹmbìá; kàandə, íí kè' nwɔŋ mə́ sé. Mə́ bàà ii in aa mə́ bé'à Báá mə́ naà roó. Zá aí gə́, íí mà' in aa báá íí bààiyà roó.»
Kè' bə̀ í'ù: «Abraham kùmsə̀n Báá bə́ ra.» Yéésù bàà bə̀: «Dáà vɛ́nà íí tə́ Abraham yɛb gə́, íí dá ma'ǹ kə̀ Abraham kíin. Zá bə́ŋyée kɔ̀, mə́ bàà ii vɛ́nà aa mə́ kììà Vɛnɛ́b naà rə gə́, íí sàà mə́ ko'ǹ lo'ǹmbìá. Abraham mà' bèd in luùm aa kàandə sé! Íí mà' tù' luùm aa báá íí tə́ ma'ǹ doó.»
Kè' bə̀ í'ù: «Obə́ gə́, bə́ yɛb wáàl bəd gá. Bə́ tə́ kə̀ Báá nə́ŋ̀ní tə́ŋtə́ŋ, oòra kùmsə̀n Vɛnɛ́bá.»
Yéésù bàà bə̀: «Dáà Vɛnɛ́b tə́ sə̀n Báá íí gə́, íí dá mə́ kíìn í'nàá; kàandə, mə́ vúgà Vɛnɛ́b sunú, bít mə́ yaà zɔ̀ŋə oò nə́gə́lú. Mə́ yaà zɔ̀ŋə kə̀ yíl máá bə̀ ní sé. Zá oòra tùm máà sùnú. Kə̀ níìbə̀ íí kè' taà nwɔŋ bəraa mə́ tə́ ii baàn də sín gú? Kàandə, íí bán nwɔŋ mə́ bəd ke'ǹmbə̀ gá. Sámbàŋyɛ́rə̀ kùmsə̀n báá íí ra, bít íí mà' kə̀ nɛɛ̀n aa tɛ́m oò í' rə kíni. Sɛŋ aa yɛ́b sɔ̀d dú rə máá, nɛ́d yíl bə̀ lo'ǹná. Gám bèd nwɔŋ sɔ̀ɔ̀n oò gú' bə kɔ̀ sé, kàandə, nwɔŋ sɔ̀ɔ̀n oò naà sé. Gám gúsuúm nwɔŋ bərì gə́, gám sáá kə̀ nɛɛ̀n aa lɛɛ̀m dú rə kíin. Oòrə, nɛ́d gúsuúm bìá, bít oòra kùmsə̀n gúsuúm bóò ra. Zá máá gə́, mə́ bàà vɛ́nà. Kə̀ taàbìá, íí məə mə́ taà bagǹmbìá. Nɛ́ɛ̀réè zɔ̀ŋə aí tə́ŋú, dá sə̀n báàn i'ǹmbə̀ mə́ mà' invaksə́ì gú? Bít dáà mə́ gám tə́ vɛ́nà gə́, kə̀ níìbə̀ íí bàg mə́ taà sín gú? Nɛ́ŋə̀ aa tə́ Vɛnɛ́b nɛ́ŋə̀ rə, dá Vɛnɛ́b nwɔŋ kíìn ke'nàá. Zá aí gə́, íí Vɛnɛ́b nɛ́b bəd gá yée gə́, íí məə taà Vɛnɛ́b nwɔŋ ke'ǹmbìá.»

Yahudu bəd kè' bə̀ í'ù: «Bə́ kə̀ kpaŋ̀ naà ámbə̀ baànmbə̀, ń nɛ́ŋə̀ Samariya bìá, bít ń tə́ kə̀ nwul vaksə́ naà sínì?» Yéésù kè' í': «Mə́ kə̀ nwul vaksə́ naà sé. Mə́ káŋ Báá mə́ra, zá aí gə́, íí tə́ mə́ kíìn dúlàá. Mə́ sàà kaŋsɛ́l máá bə̀ sé. Nɛ́ŋə̀ nə́ŋ̀ ɔ̀d túrú, oòra sàà mə́ sə̀n káŋ̀mbìá, bít fág sáá sə̀n tù' bəraa mə́ tə́ ma'ǹ doó. Mə́ tə́ ii kíìn baanàá, aarə nwɔŋ sɔ̀ɔ̀ná, màn aa bàg nwɔŋ mə́ bəd yàá, bít mà' in aa mə́ bààù rəì rə, val kò'ù bə gá sə́g sə́g.»
Yahudu bəd bə̀ bààù: «Bə́ŋyée gə́, bə́ gàb yàá, ń tə́ kə̀ nwul vaksə́ naú. Val kò' Abraham yàá, Vɛnɛ́b gbantumsə̀ bəd kɔ̀ val kòd bə̀ yàá, bít ám gə́, ḿ bàà: ‹Màn aa bàg nwɔŋ mə́ bəd yàá, bít mà' in aa mə́ bààù rəì rə, val kò'ù bə gá sə́g sə́g.› Val ko' báá bə́ Abraham yàá. Ń sèl lə gə́, ń bə̀ bəǹ kànsə̀n Abraham kə̀ gbà'áì? Vɛnɛ́b gbantumsə̀ bəd kɔ̀ val kòd bə̀ yàá. Ám gə́, ń zíg yíl ń tə́ kə̀ nɛ́ɛ̀réè kíin gú?»
Yéésù kè' í' bə̀: «Dáà mə́ káŋ yíl máá bə̀ tə́ kə̀ yíl mə́ ní gə́, kaŋsɛ́l máá bə̀ kə̀ pɛ̀sə́ naà sé. Màn aa káŋ mə́ rə, Báá mə́ ra, nɛ́ŋə̀ aa íí tə́ baàn oòra kùmsə̀n Vɛnɛ́b bənə́ ra roó. Bít aí gə́, íí gàbə̀ sé. Zá máá gə́, mə́ gàbə̀ yàá. Dáà mə́ bààì mə́ gàbə̀ síngə́, má kuùm nɛ́d gúsuúm bə̀ kə̀ aí kíin. Zá mə́ gàbə̀ yàá, mə́ tə́ nwɔŋ oò bəd bagàá, bít mə́ tə́ taà nwɔŋ bəraa bàà mə́ rə ma'ǹ kə̀ tùsá. Doo íí Abraham kìì tɛ́m làmkèá, sèlà bəǹ dáá nyàm mə́ kíìn bé'nàá. Bé' nyàm aarə yàá, bít kìì tɛ́m làmkè yàá.»
Yahudu bəd bààù: «Bə́ŋ̀ ń wə́ə́ zèd laa iira zè kób sé, bít ń bàà bəǹ bé' Abrahamì wa?»
Yéésù kè' í' bə̀: «Mə́ tə́ ii kíìn baanàá, aarə nwɔŋ sɔ̀ɔ̀ná, bɔ̀b bə́ŋ̀ bə̀ lɛ̀b Abraham sé, ‹Mə́ túrú gbòód. Mə́ Nɛ́ŋə̀ aa túrú zèd kə̀ zèd doó.› »
Kàanyée gə́, bə̀ pú' bəŋ bərá, oò bə̀ laàl bə̀ kə̀ kùrú.

Feti si Yohana 8