Kivunjo - 1999 Edition (NT)

New Testament in Kivunjo © Bible Society of Tanzania, 1999.

Mfiri ung'anyi o mkate ilangyitarang'ishe, okyelago Mfiri ung'anyi o Pasaka, uletikyira kufuhi. Na wang'anyi wa makohanyi na walosha wa mawawaso waweipfula njia ya immbaaga; kyipfa wawekyeowuo wandu.


Satana kacha na ko Yuda, ekyelago Isikariote, na oe nyi umwi o walya ikumi na wawi. Kafuma kandeṙeṙa na wang'anyi wa makohanyi, na wang'anyi wa asikari wa shiṙa, chandu eiṙima immbika mawokonyi gawo. Wakachihiyo, wakaiṙikyiana na oe imwenenga heleri. Kaiṙikyia, kapfula ṙaawa lyemṟiinga kowo kyiyeri wandu wa kyisanzionyi walaichi.


Mfiri o mkate ilangyitarang'ishe ukoshika na mfiri-cho kyiwewaṟi ishinja Kyiondo kya Pasaka. Kaṙuma Petiro na Yohane, echigamba, “Yendenyi, mundeluṟeyeṟia Pasaka luiṙime ilya.” Wakammbia, “Nukundi lukuṟeyeṟie hanga?” Kawawia, “Ilyi muiṙa na mṟinyi mokarisana msoṟo akuṙikyie kyitongoṟima. Muoshenyi muiṙe na numba-yo echiyenda. Na mowia monyi numba, ‘Mlosha nakuwia, kyookwi kyiṟi kya wayenu ngyilyiie-pfo pasaka hamwi na wanalosho wako?’ Na oe nemuloṟa kyiṟi kying'anyi kyikyeri kai, kyamchopo; ṟeyeṟenyi pfo.” Wakayenda, wakawona chandu alewawia, wakaṟeyeṟa pasaka.


Lyilya kyiyeri kyileshika nalewooka ilya, oe hamwi na wasu walya. Kawawia, “Ngalanga mnu ilya pasaka-i hamwi na nyoe ituuro lyako lyilandeshikye. Cha kyipfa ngyimmbia kye ngyechilya-se mṟasa kyiyeri yeafutsio Wumangyinyi wo Ruwa-pfo.” Kaambilyia kyiṙoo, kaana, echigamba, “Ambilyienyi ikyi, mugawane nyoe wenyi ko wenyi. Kyipfa ngyimmbia kye wookyia wulalu ngyechinyo-se kyindo kyawuka msabibunyi sile mṟasa kyiyeri Wumangyi wo Ruwa wochicha-pfo.” Kaambilyia mkate, kaana, kaupeṟenguo, kawaenengyia echigamba, “Ichu nyicho mmbiu oko uiwuto kyipfa kyanyu. Wutenyi kuṙi kui ingyikumbuo.” Kyiṙoo nakyo na wuṙo amlye; kagamba, “Kyiṙoo-kyi nyi mma mhya samunyi yako, ipusuka kyipfa kyanyu. Kyaindi kuwoko ko ulya aingyiṟiinga kukyeri hamwi na inyi iha mesenyi. Cha kyipfa Mana o Adamu naindepfa chandu kyiwaṟi kyaindi ochia lokye mndu ulya momṟiinga!” Wakawooka iwesana wo wenyi ko wenyi, nyi wui kyiiṙi kyawo ewuta kyindo-kyo.

Kukowaṙa iwingana kyiiṙi kyawo, kye nyi wui aitalo nang'anyi. Kawawia, “Wamangyi wa walya walaiṙikyie Ruwa wekyemchilyia, na walya wamchilyie wekyelago nyi wesaṟia; kyaindi konyu nyoe chi wuṙo-pfo, indi ang'anyi konyu nawe cha akyeri mtutu; na mochilyia nawe cha ulya aiṟundia wengyi. Kyipfa ang'anyi nyi uha? Ulya aṙamie echilya ang'u nyi ulya aiṟundia wengyi? Chi ulya aṙamie echilya-pfoe? Kyaindi inyi kyiiṙi kyanyu nyi cha mndu aiṟundia wengyi. Na nyoe muleṙio hamwi na inyi kyiyeri kyoose kya iyesho lyako. Chandu alengyienenga inyi Wumangyi, na wuṙo ngyechimuenenga nyoe Wumangyi; muiṙime ilya na inyo mesenyi yako Wumangyinyi woko; na iṙamia shitimenyi sha mng'ano, kunu mochianduya wandu wa mbaṟe ikumi na tsiwi tsa Isiraelyi.”


Kagamba, “Simion, Simion; Satana namlanga nyoe namuele cha nganu. Kyaindi ngakuterewia iyoe kundu iiṙikyia lyapfo lyilawe lyifofo; na iyoe ilyi okyiṟo ukarishe wana wa womoo.” Kammbia, “Mndumii, kyiyeri ngyikyeri hamwi na iyoe, ngyikuṟeyeṟie iyenda kyipfungonyi ang'u upfunyi.” Kagamba, “Ngakuwia, Petiro, ilying'onyi lyechifuga inu, iyoe ulangyikana kaṟaaṟu kye ungyiichi-pfo.”

Kawawesa, “Ngyesa lyilya ngyilemuṙuma mulawoṙe kyikuchu, maa mkunja, maa shiaṙu, muleuṟa kyindo?” Wakagamba, “Ote.” Kawawia, “Kyaindi wulalu mndu awoṙe kyikuchu nakyiṙuo, na mkunja na wuṙo; na alawoṙe ushu, nakumbe ijoho lyakye nandeguṟa. Cha kyipfa ngyimmbia, isho shileṟeio kyakooya iafutsio koko, kye naletalyio hamwi na wanyamaṟi. Cha kyipfa isho shingyiwaṟi shiwoṙe mafurumionyi gasho.” Wakagamba, “Mndumii, iha hawoṙe mapanga gawi.” Kawawia, “Lekyenyi, kyishikyie.”


Kafuma kayenda mṟasa fumvunyi ya Mseituni chandu aweichiwie, wanalosho wakye wakaoshana na oe. Kyiyeri aleshika handu halya nalewawia, “Terewenyi kundu mulacheṙoo kyiyeshionyi.” Oe amonyi kalekana nawo cha handu hewiyitsa igoe, kapfiria ndi katerewa, echigamba, “Hoi Awu, kokooya nyi wuṙo ukundi ungyiwute kyiṙoo-kyi. Indi chi chandu ngakunda inyi-pfo, kyaindi kyilya ukundi kyiwutikye.” Malaika iwuka ruwewu kacha na kokye kamkarisha. Na oe kyipfa awekyeri wukyiwenyi wung'anyi, kaengyeṟa mnu iterewa; msino okye ukowa cha maṙonyi ga samu gechitonyika wanda. Kyiyeri alewuka kyiterewonyi, kacha na ko wanalosho wakye, kawakooya walee maṙoe kui fowa. Kawawia, “Ny'kyilyi molaa maṙoe? Amkyenyi, mundeterewa, mulacheiṙa na kyiyeshionyi.”


Kyasia, kyiyeri aweiṙeṙa, wuingyi wo wandu, na ulya ekyelago Yuda, umwi o walya ikumi na wawi, nawewasongoye. Katikyira ko Yesu kundu namkombe. Yesu kammbia, “Yuda, noṟiinga Mana o Adamu kui imkomba?” Na walya wawekyeri kufuhi na oe kyiyeri walewona kyindo kyichewutika, walegamba, “Mndumii, lukowakapa na ushu?” Umwi owo kakapa mṟundi o Mkohanyi ang'anyi kuta woose kamṙumbuo kuṙwi ko kulyoe. Yesu kagaluo, kagamba, “Lekyenyi, kuwoṙe ikapana-se-pfo.” Kampaaya kuṙwi kamkyiṟa. Yesu kawia wang'anyi wa makohanyi, na wasongoru wa hekalu, na wasongoru wa wandu, walecha kyipfa kyakye, “Ngyesa mocha muwoṙe ngyuushu na ṟungu cha ilyi muichewaṙa msokyi? Orio mfiri ngyiwekyeri na nyoe hekalunyi kyaindi mulengyileshia kuwoko-pfo, indi ikyi nyikyo kyiyeri kyanyu, na wuchilyi wo meema.”


Wakammbaṙa, wakamṙuo, wakayenda na oe kanyi ko Mkohanyi ang'anyi kuta woose. Na Petiro nalemwosha ai kuleshi. Na kyiyeri wamuatse moṙo makyiṙi-gawi ga pata, waleṙamia handu hamwi, na Petiro kaṙamia kyiiṙi kyawo. Nyi lyo-ndu kyisinga kyimwi kyilemmbona aṙamie saenyi, kyikamwambuya karii, kyikagamba, “Na ichu nawekyeri hamwi na oe.” Kakana, echigamba, “Iyoe mndu mka, ngimwichi-pfo.” Hamwiṙe kyiyeri kyitutu mndu ungyi nalemmbona, kagamba, “Na iyoe nyi umwi owo.” Petiro kagamba, “Iyoe mndu, chi inyi-pfo.” Numa ya iho cha saa imwi, mndu ungyi kapfuṟukana igamba, “Kyaloi na ichu nawei hamwi na oe, cha kyipfa oe taa nyi Mgalyilaya.” Petiro kagamba, “Iyoe mndu, ngyiichi kyindo uigamba-pfo.” Na kyiyeri aweiṙeṙa kuṙo, ilying'onyi lyilefuga. Mndumii kainduka kaambuya Petiro. Petiro kakumbuo kyindo kyilya Mndumii alemmbia, “Inu ilying'onyi lyilafuga, nongyikana kaṟaaṟu.” Kafuma na nja kafiiṟa mnu.


Na wandu walya waweiweṙa Yesu walemtaluo na imkapa. Wakamshikyia meso, numa wakammbesa-wesa, wechigamba, “Manya nyi wui akukapa?” Wakammbia na shindo shingyi shifoi shemlahia.


Kyiyeri kulekya, wasongoru wa wandu walewaṙa kyisanzionyi na wang'anyi wa makohanyi, na walosha wa mawawaso, wakamwende na mengyenyi kowo, wechigamba, “Kokooya iyoe nyi oe Kristo, luwie.” Kawawia, “Maa ngammbia, mochiiṙikyia maa ale-pfo. Lyingyi-se, ngammbesa mongyigaluo-pfo. Kyaindi wookyia wulalu Mana o Adamu nechiṙamia ura lo kulyoe lo Ruwa Mopfinya.” Wakagamba woose, “Kyasia, iyoe nyi oe Mono-Ruwa-ng'ue?” Kawawia, “Nyoe mogamba kye inyi nyi oe.” Wakagamba, “Kyasia, lukundi-se wuṟingyishi wokyi? Kyipfa, soe luwenyi loicho maṙeṙo ga ṙumbu lyakye.”

Feti si Luka 22