(cc) 2016-2023 པར་དབང་དམ་པའི་གསུང་རབ་བོད་འགྱུར་གསར་མའི་རྩོམ་སྒྲིག་སྡེ་ཚན་ལ་དབང་བ་ཡིན། (cc) 2016-2023 New Tibetan Bible translation committee. The Holy Bible in Modern Literary Tibetan, New Tibetan Bible translation. This translation is made available under the terms of the Creative Commons Attribution-NonCommercial-NoDerivatives 4.0 International license. * Attribution: When using the New Tibetan Bible text, you must credit the New Tibetan Bible (new-tibetan-bible.com) as the source. * NonCommercial: You may not sell the New Tibetan Bible text or use it for commercial purposes. * NoDerivatives: You may share the New Tibetan Bible text, but you may not change it.

འཇིག་རྟེན་ཁམས་བཀོད་པའི་མདོ་ཞེས་བྱ་བའི་ངོ་སྤྲོད་མདོར༌བསྡུས།
ཁ་བྱང་དང་ལོ་རྒྱུས་རྒྱབ་ལྗོངས།
འཇིག་རྟེན་ཁམས་བཀོད་པ་ཞེས་བྱ་བའི་གཞུང་གི་ལེའུ་དང་པོའི་ཚིག་རྐང་དང་པོའི་དུམ་བུ་དང་པོ་ནི་ཨིབ་རི་པའི་གཞུང་གི་མ་ཕྱི་ནས་གསུངས་པ་ལྟར་ཐོག་མ་ཞེས་པའི་དོན་ཡིན། བཀོད་པའི་གཞུང་འདི་ནི་དོན་དག་མང་པོ་ཞིག་གི་ཐོག་མའི་སྐོར་ཡིན་པར་གསུངས་ཡོད་དེ། དཔེར་ན། འཇིག་རྟེན་ཁམས་ཀྱི་ཐོག་མ་དང་། སྐྱེས་ཕོ་མོ་གཉིས་ཀྱི་ཐོག་མ། མིའི་རིགས་ཀྱི་སྡིག་པ་ཐོག་མ། དཀོན་མཆོག་གི་ཐར་པའི་ཞལ་བཞེས་དང་དགོངས་གཞི་ཐོག་མ་སོགས་ཀྱི་སྐོར་ཡིན།
ཡི་གེར་འགོད་མཁན་དང་འགོད་དུས།
ཡ་ཧུ་དཱ་པ་དང་མཱ་ཤི་ཀ་པ་རྣམས་ཀྱིས་འཇིག་རྟེན་ཁམས་བཀོད་པའི་གཞུང་འདི་ཡི་གེར་འགོད་མཁན་ནི་མོ་ཤེ་ཡིན་པར་མོས་མཐུན་གནང་ཡོད་པར་མ་ཟད། ཞལ་ཆད་རྙིང་པའི་ནང་གི་ཐོག་མའི་པོད་ལྔ་པོ་ལ་མོ་ཤེའི་གླེགས་བམ་ལྔ་ཞེས་ཀྱང་འབོད།
མོ་ཤེ་འཇིག་རྟེན་དུ་བཞུགས་པའི་དུས་རབས་དེའི་ལོ་རྒྱུས་ནི་རྒྱལ་རབས་དང་པོའི་ལེའུ་དྲུག་པའི་ཚིག་རྐང་དང་པོ་ལ་ཁུངས་གཏུགས་ན། རྒྱལ་པོ་སོ་ལོ་མོན་གྱིས་ཡེས་ར་ཨེལ་ལ་སྲིད་བསྐྱངས་པའི་ལོ་བཞི་པ་སྟེ། ཡེས་ར་ཨེལ་གྱི་མི་རྣམས་ཨེ་ཅིབ་ཡུལ་ནས་ཕྱིར་ཐོན་ནས་ལོ་བཞི་བརྒྱ་བརྒྱད་ཅུ་ལོན་པའི་རྗེས་ཡིན། དེ་ཡང་རྒྱལ་པོ་སོ་ལོ་མོན་གྱིས་སྲིད་བསྐྱངས་པའི་ལོ་བཞི་པ་ནི་སྤྱི་ལོ་སྔོན་གྱི་966ལོའི་ཡས་མས་ཡིན་པས། ཨེ་ཅིབ་ནས་ཐོན་པའི་དོན་རྐྱེན་དེ་སྤྱི་ལོ་སྔོན་གྱི་1446ལོའི་ཡས་མས་སུ་བྱུང་བ་ཐག་གིས་ཆོད། ཡང་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཐོན་རྗེས་དབེན་སྟོང་དུ་ལོ་བཞི་བཅུའི་རིང་ལ་འཁྱམས་པ་དང་། དེ་ནི་སྤྱི་ལོ་སྔོན་གྱི་1446ལོ་ནས་1406ལོའི་བར་ཙམ་ཡིན། དུས་དེ་ནི་མོ་ཤེ་ཡིས་འཇིག་རྟེན་ཁམས་བཀོད་པའི་གཞུང་འདི་ཡི་གེར་བཀོད་པའི་ལོ་ཚིགས་ཡིན་པར་བཤད།
བརྗོད་སྙིང་དང་གསུང་འཕྲིན།
འཇིག་རྟེན་ཁམས་བཀོད་པ་ཞེས་བྱ་བའི་གཞུང་འདིའི་ནང་གི་གསུང་འཕྲིན་ནི་དོན་ཟབ་ཅིང་ཕུན་སུམ་ཚོགས་པ་ཞིག་ཡིན་མོད། འོན་ཀྱང་གཙོ་ཆེ་ཤོས་ནི་དཀོན་མཆོག་དང་རང་བྱུང་ཁམས་བར་གྱི་འབྲེལ་བ་དང་། དཀོན་མཆོག་དང་མིའི་རིགས་བར་གྱི་འབྲེལ་བ། མི་དང་མིའི་བར་གྱི་འབྲེལ་བ་བཅས་བརྗོད་པའི་འབྲེལ་བའི་སྐོར་ཡིན། གཞུང་འདི་ལས་བདེན་པའི་དཀོན་མཆོག་གཅིག་པུ་ནི་འཇིག་རྟེན་སྣོད་བཅུད་མ་ལུས་པ་སྟེ། བྱ་དངོས་བཟང་ངན་ཇི་སྙེད་ཀུན་གྱི་བདག་པོ་ཡིན་པ་ནན་གྱིས་བརྗོད་ཡོད་པར་མ་ཟད། དཀོན་མཆོག་གིས་རང་ལ་བདམས་པའི་མི་རྣམས་ལ་བཞག་པའི་ཞལ་ཆད་དང་། ཁོང་གི་བྱམས་བརྩེ་དང་ཡིད་རྟོན་རུང་བའི་ཞལ་བཞེས་ཀྱི་ནང་དུ་ཇི་ལྟར་འཇུག་པའི་ལམ་ང་ཚོ་ལ་ངོ་སྤྲོད་གནང་ཡོད།
འཆར༌ཟིན།
1. བྱུང་བ་ཆེན་པོ་བཞིའི་བསྐལ་པ་ཡ་ཐོག་གི་ལོ་རྒྱུས། ༼1:1-11:32༽
ཀ འཇིག་རྟེན་ཁམས་དང་། མིའི་རིགས་ཀྱི་ཐོག་མ་ཨ་དམ་དང་ཧ་ཝཱ་གཉིས་ཀྱི་ལོ་རྒྱུས། ༼1:1-2:25༽
ཁ། མིའི་རིགས་སྡིག་པའི་ནང་དུ་ལྷུང་བ་དང་དེའི་མཇུག་འབྲས། ༼3:1-5:32༽
ག ཆུ་ལོག་ཆེན་པོ། ༼6:1-9:29༽
ང༌། མི་རིགས་རྣམས་སོ་སོར་བཀར་བའི་ལོ༌རྒྱུས། ༼10:1-11:32༽
2. ཡ་ཧུ་དཱའི་མེས་པོ་རྣམས་ཀྱི་མི་སྣ་རླབས་ཆེན་བཞིའི་ལོ་རྒྱུས། ༼12:1-50:26༽
ཀ ཨབ་ར་ཧམ་གྱི་སྐོར། ༼12:1-20:18༽
ཁ། ཨི་སཱག་གི་སྐོར། ༼21:1-26:35༽
ག ཡ་ཀོབ་ཀྱི་སྐོར། ༼27:1-37:1༽
ང༌། ཡོ་སེབ་ཀྱི་སྐོར། ༼37:2-50:26༽

Feti si བཀོད་པ། འཇིག་རྟེན་ཁམས་བཀོད་པའི་མདོ་ཞེས་བྱ་བའི་ངོ་སྤྲོད་མདོར༌བསྡུས།