Zulgo - 1988 Edition (Drama-NT)

Aləka i təv ana Yesuw a fə̀r aà gà asiŋ gà mburma ana hinne ti dehe a a təv ŋgar a ka, tə tsala a gər kwite nda gà ɓəzla mazazama ŋgat. Tə daha ka, a ndza a bəɗ a fata. I təv ana a ndza a bəɗ tsara ya ka, gà mburma ŋgar ata ti sìrìkaha a təv ŋgar ndiɓ bise. A dza ba aà metsìkè a tar guma ŋgar.


A gwaɗa a tar:
«Maŋgayaba i təv gà mburma ana kinehe,
tə sər, mər ka, gà ɓəzla matawak
ika miɗ Mbulum taluw taluw a,
aɗaba tar ka, ti ti ndze a nda gà Mbulum
i mekwere ŋgar.
Maŋgayaba i təv gà na ti tiwe a, agəra
dukw bakal ana mburma ta ge a ika gər ahəɗ a,
aɗaba Mbulum à ta me a terehe a à arəv.
Maŋgayaba i təv gà na tiɓìzl ta həna
à gər tar a bəɗ, ti ne aba
kamala gà ɓəza ndirkiz a,
aɗaba Mbulum a ta vile a ter a
mekwere gər ahəɗ tserdze.*fa*
Maŋgayaba i təv gà na ti dzele a ka,
megemir Mbulum nda gəzləŋ ilik
kamala ana Mbulum a waya ɗekɗek a,
aɗaba Mbulum a ta vile a ter a zayya
a gəzləŋ tar.
Maŋgayaba i təv gà na ta gewa gər
a gà ɓəzla mesewere are ya,
aɗaba ti ti ndze a are tsehe a Mbulum mbaŋa.
Maŋgayaba i təv gà na gəzləŋ tar
tsəɗaŋŋa, bakal tar a riŋ tsiye,
aɗaba tar ka, ti ta ŋget a a Mbulum nda are tar.
Maŋgayaba i təv gà na lìfèɗìɗe
ti sir a ba à mburma ya,
aɗaba tar ka, ti ti ne a gà ɓəza Mbulum.
Maŋgayaba i təv gà na ti ne a ter a are
agəra ana ta ge a ka, dukw ana Mbulum a waya ya,
aɗaba tar ka, ti ti ndze a nda gà Mbulum
i mekwere ŋgar.»
A gwaɗa a tar asa: «Maŋgayaba i təv kurum, na bəla gà mburma tàa ndavaya a kurum, ti ne a kurum a are, ti tsik aà kurum a dukw ana ŋgwal ŋa tsiye, hə̀rə̀ts hə̀rə̀ts nda pàrsa, aɗaba ana kurum gà mburma gà ya ka, mà tsəɓ a kurum tsidze. Ŋgeywim ba hinne, gəzləŋ kurum ma ndza ndzəɗakkà ivaɗ, aɗaba Mbulum a ta vile a kurum a dukw maya ba kurum i gər ŋa i mbulum ka, batsah ŋa. Ama sərum dər ka, tàa ge dukw ana ŋgwal ŋa tsiye hinne, a gà ɓəzla məma à guma Mbulum ana tə lah ahər ɗa ya ka, kataya mbaŋa.»



I dəba ŋa ya ka, Yesuw a gwaɗa a tar asa: «Kurum kà nwim ika gər ahəɗ ka, kamala liwir ana ika ala ya. Ama na liwir aka və̀ɗ ika ala ya tsəna, ki ge a dər ana, meme, na dite à vìɗ a ya? Ama na bəla a ge a ŋgulum asa tsa dukw ŋgar ka, say dùf mende dər iɗəm a dala ya, mburma ta ɓala aaka pəra.
Kurum kà nwim ka, dzaydzay gər ahəɗ. Ar ka, kamala ŋgwal kə̀sà ana ika təv dzàzl ŋa, makàhà ŋa tsa, mburma a ŋgeter a ɗazlzlà lele ya. Ama wura a tike a akwa aà lalampa ka, dite a kèhe a dər aà huɗ maàslə̀làh tsa asa mbaŋa. A tike a ka, a təv ana dzəgəɗaf ŋa ya ivaɗ, dite na a ge a dzaydzay a gà mburma ana i ga ata tserdze ya. Aɗaba taŋa, mede kurum ana ŋgwal ŋa ya, mə̀ pàt aba ika miɗ mburma tserdze, kamala dzaydzay ata ya, dite ta fə̀r aà megemir kurum ana ki gwim a a Mbulum ŋgwal ŋa lele ya ka, tar ibam, tə̀ zàmbaɗa à Mbulum Tsir kurum ana i gər ŋa ya mbaŋa te.»


I dəba ŋa ya, Yesuw a gwaɗa a tar aaka asa: «Ka tə dzalum i gər kurum, i dara ka, aà mimbètè à məpala ahəm Musa, kige tsa à dukw ana gà ɓəzla məma à guma Mbulum ti tsik a tsa. Aɗaba i dara ka, aà mimbètè dər tsa, ama aà mege dukw ana ta wiz ahər a mburma ya ivaɗ. Iye ihər i gweɗe a kurum a nda ndzer, pàrsa iɗəm tsa: Ku mege kinehe gà gəza mbulum nda gər ahəɗ a riŋ hiywe mba ka, məpala ahəm ata a dzeye a tsa. Ku mege dukw ana mewetse ŋa iɗəm kwizikw hinne tsiye tekeɗe, à nikiɗ a ihər a, a dzeye a ihər a ɓav tsa asa, haa a təv ana gà dukw məpala ahəm ata a tsik ahər tserdze ya ka, aka ndəv a. Aɗaba taŋa, na wura aka məsak à məpala ahəm ŋgiɗ ilik, ku mege kwizikw pəra tekeɗe, dite a ɗif a dər, mburma ta ge a ka, kamala na ŋgat a ge a ya ka, ŋgat a ti ne a kəla ŋa i *mekwere Mbulum. Ama wur ana aka gəs məpala ahəm ata lele, a ɗif a dər a mburma, ta ge a ka, kamala na ŋgat a ge a ya ka, a ti ne a batsah ŋa i mekwere Mbulum, na ŋgat a. Aɗaba taŋa asa, iye ihər i gweɗe a kurum a nda ndzer: Ki slwim a aà mede a mekwere Mbulum kataya tsa. Ki dwim a ka, say na ki gwim a dukw ana Mbulum a waya ya, a zè a dər biy gà ɓəzla medzeŋge məpala ahəm Mbulum nda biy gà *Farisa ya dzekwiŋ.»


A gwaɗa a tar asa: «Kurum ka, kàa sərum dukw ana ti tsik ɗa a gà tsir kurum a. Ta gwaɗawa a tar ka: <Ka ta kəɗ mburma tsa, wur ana aka kəɗ mburma ya ka, ta ger a seriye.>*fb* Ama iye ihər i gweɗe a kurum a nda ndzer: Na wura aka ge arəv aà damər ŋgar ka, ta ger a seriye asa mbaŋa. Dite asa ka, wur ana a gweɗe a a damər ŋgar, kər ka, ndzə̀fakkà, metsehe yak a riŋ tsiye ka, ti ta ge a seriye ŋgar ka, biy ana à mère a a dəba ya asa tsiye. Ama ku weke na a ndeveye a a damər ŋgar pìslìɗìɗe, a gweɗere a, kər ka, ndìrɓek kàa dzeye ika miɗ Mbulum a ka, bazlam ŋgar ata a tsiker a ka, biy maya ahər ŋgat a akwa ana a mbete a tsa aà biybiy a ide.
Aɗaba taŋa, na bəla ki hitse a ika miɗ Mbulum, ki vile a dukw masakəŋana ta vəlawar a, dite i dəba ŋa ya, kàa dzala masəra ba a riŋ ika magər kurum nda damər yak tsəka, məsak aba à dukw ata ki vile a a Mbulum zləmana ya, a fata. Dite kà mbəɗ gər a ma a təv ŋgar, kà dzum akaba bazlam ŋa, nda masəra ba lele, nda lìfèɗìɗe bazlam dzekwiŋ, dite ka dara, ka vəl dukw yak ata a Mbulum lele kuɗa.
Na bəla kàa gwim aba duwa nda wura, a de à kər a a seriye ka, mba aba a təv ŋgar, sərum ba nda ŋgat i təv ana a riŋ aà vatwa, aka da zukw tsiye, tsəka, ma tə da à kər a təv mala mege seriye dzekwiŋ tsa. Aɗaba na aka ta mede à kər a təv mala seriye ka, a vile a kər a ahər a gà sliwdze, tì yè a kər a ga daŋgay. Iye ihər i gweɗek a nda ndzer: Gədzaw ki mìts a riŋ i ga ata, ki sle a aà medera iɗəm a asa tsa, say na kàa pə̀lar dukw ana a ge dər aà kər seriye ya, kwizikw à mìts a a dəba tsiye dzekwiŋ.»


I dəba ŋa ya, a gwaɗa a tar asa: «Kurum ka, kàa sərum, na ta gwa ka, ka ta ge muva tsiye mbaŋa.*fc* Ama iye ihər i gweɗe a kurum ŋa: Na wura aka fə̀r aà məkəs mburma, aka ge aaka are i gəzləŋ ŋgar ɓìlè ɓìlè ka, aka ge muva tsara na taŋa ya. Kamala taŋa ya, na bəla are yak a bene a kər a bakal ka, ə̀ndzuɗ ndzàhara aba ya, kà yà a dala diriŋ. Ŋgulum dzerisl ba yak ma dzeye ilik, ndəna ki de a akwa ana a mbete a tsa aà biybiy nda gà ba yak fit a. Kige tsa asa, na ahər mezime yak à gis a kər a bakal ka, ə̀ndats sàs aba ya, kà yà a dala diriŋ. Ŋgulum dzerisl ba yak ma dzeye ilik asa, ndəna ba yak fit a wene a a akwa ana a mbete a tsa aà biybiy a mbaŋa.»


Ama a gwaɗa a tar asa: «Ta gwa piŋŋe ka, ku weke na a waya məmìyàkà à məkəs ŋgar ka, say mə vəlar wakita məmìyàkà à ŋgat a ahər, na dite a miyek a dər a.*fd* Ama kinehe iye ihər i gweɗe a kurum a ka: Ku weke na aka miyak à məkəs ŋgar, ze melè ahər aka mege muva, dite aka da a zal ka, a ne à ŋgat mala mege muva na taŋa ya. Dite bəla wur ana a zla məkəs aaha ta miyak dər a ka, a ge muva mbaŋa asa.»

I dəba ŋa ya a gwaɗa a tar asa: «Kurum tekeɗe, kàa sərum dukw ana ti tsik ɗa aà gà tsir kurum akahər ata ya. Ta gwaɗa a tar ka: <Ka ta mbaɗum nda pàrsa tsa. Ama na ki mbeɗwim a ka, Mbulum ma ta məts a kurum gər tsa. Sərum dər, dukw ana ka tsikwim ahər a tekeɗe ka, ki gwim a nda ndzer, tsəka, à me a a dəba tsa.>*fe* Ama kinehe ka, iye ihər i gweɗe a kurum ŋa: Na kataya ka, ŋgulum ka mbaɗum tsidze, ku mege nda zləm gà dukw ana i gər ŋa i mbulum a tekeɗe, aɗaba taŋa ka, təv mendze Əbay Mbulum. Ku mege nda zləm gà dukw ana i bəɗ a tekeɗe, aɗaba ar ka, aà huɗ sik Mbulum mbaŋa asa. Ku mege nda zləm kwite Yeruzalem, aɗaba kə̀sà ata ka, biy batsah Əbay asa mbaŋa. Ka ta mbaɗum, kù gwaɗum <iye manà, iye manà> tsidze. Aɗaba ki slwim a aà maslə̀là ambəz ana i gər kurum a nda ahər kurum ŋa ilik tsa, ku mege herrè ŋa, kige tsa lìviŋ lìviŋ a tekeɗe ibam a. Say ki gweɗwim a ka, <haya>, kige tsa <awaŋ> pəra, tsəka, aɗaba dukw ana aka za i gər a taŋa ya ka, taŋa a dara ka, i təv Əbay sitene ya.»


I dəba ŋa ya, a gwaɗa a tar asa: «Aɗaba kà sərum, ta gwa piŋŋe ka, na wura aka hwìywasla à are a mìsle ŋgiɗ ka, tsùslum ta hwìywesler a à biy ŋgar mbaŋa. Na wura aka haɓara à zlir i bazlam a mìsle ŋgiɗ a ka, ɓal ta hìɓer a iɗəm à biy ŋgar a ilik asa mbaŋa. Kamala megweɗe ya: Kàa ge duwa aà wura ya ka, ta gik aɗəm a mbaŋa te.*ff* Ama iye ihər i gweɗe a kurum ŋa: Na wura aka ge aà kurum bakal a ka, ka ta mumar dər aɗəm tsa. Ama ku weke na aka lakək aka mahwalum aka tsèke ahər mezime ka, mbə̀ɗaraha à biy ŋgiɗ aaha, ma lakək aaka asa. Na wura aka ge aà kər seriye, a waya a zle a aà kər gèeriy a ka, ka ta palar ahəm tsa, vəlar aaka tùmbùlum ŋana asa. Na wura aka fàr aka kər ndzəɗa, aka gwaɗak, ŋgizliŋeha à dukw gà naha mibe ŋa zaakwa te ka, ka ti niw ahər tsa, ŋgəzlar dərraha, ma za i gər a biy ŋgar ata ya. Na wura aka wiz aà kər duwa ka, ka ti niwer dər tsa, vəlar. Kige tsa, na wura aka wiz aà kər gwèdèrè duwa ka, ka ti niwer dər tsa, vəlar mbaŋa asa.»


I dəba taŋa ya ka, a gwaɗa a tar asa: «Kurum kà sərum, na ta gwa ka: <Waya gà masla yak, dite ne are a gà ɓəzla mene are yak a.>*fg* Ama iye ka, iye ihər i gweɗe a kurum ŋa: Wayum gà ɓəzla mene are kurum ivaɗ. Hamum a Mbulum aɗaba gà na ti ne a kurum a are, ta ge a kurum a swalwa ya, dite ka, nwim gà ɓəza Mbulum Tsir kurum ana i gər ŋa ya. Aɗaba Mbulum ka, a waya mburma hinne. Pat ŋgar a də̀vawa ka, aka gər gà mburma ana ta ge a dukw ana ŋgwala tsiye mbaŋa, dite aka gər gà mburma ana gà ŋgwal ŋa ya tserdze. A dzawa yam tekeɗe, kamala taŋa ya mbaŋa, tsəka, a wele a ikaba mburma ya tsa. Na bəla ki weywim a ka, gà mburma ana ta waya kurum a ɗekɗek ana, aàmala na ki dzelwim a ka, Mbulum a ta vile a mər a dukw maya ba mər asa ya? Ku mege gà na wura a ndze a tar are tsehe tsiye tekeɗe, ta waya ba kataya mbaŋa. Dite bəla ki giswim a ka, gà damər kurum ɗekɗek ana, aàmala na ki dzelwim a ka, waytsà maa ge dukw ana ŋgwal ŋa ya. Aɗaba ku gà na tə sər Mbulum tsiye tekeɗe ka, ta ge a kataya mbaŋa. Ama nwim ka, gà ɓəzla mege dukw ana ŋgwal ŋa lele ya, kamala Mbulum Tsir kurum ana i gər ŋa, a wele a ikaba mburma ya tsiye.»

Feti si Mata 5