Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወእምዝ ወሰዶ መንፈስ ለእግዚእ ኢየሱስ ገዳመ ከመ ይትመከር እምኀበ ዲያብሎስ። ወጾመ አርብዓ መዓልተ ወአርብዓ ሌሊተ ወእምድኅረ ዝ ርኅበ። ወቀርበ ዘያሜክሮ ወይቤሎ እመሰ ወልደ እግዚአብሔር አንተ በል ከመ እላ አእባን ኅብስተ ይኩና። ወአውሥአ እግዚእ ኢየሱስ ወይቤሎ ጽሑፍ «ከመ አኮ በኅብስት ክመ ዘየሐዩ ሰብእ አላ በኵሉ ቃል ዘይወፅእ እምአፉሁ ለእግዚአብሔር።» ወእምዝ ነሥኦ ዲያብሎስ ወወሰዶ ውስተ ቅድስት ሀገር ወአቀሞ ውስተ ተድባበ ቤተ መቅደስ። ወይቤሎ እመሰ አማን ወልደ እግዚአብሔር አንተ ቅንጽ እምዝየ ወተወረው ታሕተ እስመ ጽሑፍ «ከመ ለመላእክቲሁ ይኤዝዞሙ በእንቲኣከ ከመ ይዕቀቡከ በኵሉ ፍናዊከ ወበእደዊሆሙ ያነሥኡከ ከመ ኢትትዐቀፍ በእብን እግርከ።» ወአውሥአ እግዚእ ኢየሱስ ወይቤሎ ካዕበ ጽሑፍ «ኢታመክሮ ለእግዚአብሔር አምላክከ።» ወእምዝ ነሥኦ ዲያብሎስ ውስተ ደብር ነዋኅ ጥቀ ወአርአዮ ኵሎ መንግሥታተ ዓለም ወኵሎ ክብሮሙ። ወይቤሎ ዘንተ ኵሎ እሁበከ እምከመ ሰገድከ ሊተ ወአማኅከኒ። ወእምዝ ይቤሎ እግዚእ ኢየሱስ ሑር እምድኅሬየ ሰይጣን ጽሑፍ ለእግዚአብሔር አምላክከ ትስግድ ወኪያሁ ባሕቲቶ ታምልክ። ወእምዝ ኀደጎ ዲያብሎስ ወናሁ መላእክት መጽኡ ይትለአክዎ።

ወሰሚዖ እግዚእ ኢየሱስ ከመ አኀዝዎ ለዮሐንስ ተግኅሠ ውስተ ደወለ ገሊላ። ወኀደጋ ለናዝሬት ወመጺኦ ኀደረ ቅፍርናሆም እንተ መንገለ ባሕር ውስተ አድባረ ዛብሎን ወንፍታሌም። ከመ ይትፈጸም ዘተብህለ በኢሳይያስ ነቢይ እንዘ ይብል። «ምድረ ዛብሎን ወምድረ ንፍታሌም ፍኖተ ባሕር ማዕዶተ ዮርዳኖስ (ጰራልዩ ወጰራልያስ) ወገሊላ ዘአሕዛብ። ሕዝብ ዘይነብር ውስተ ጽልመት ርእየ ብርሃነ ዐቢየ ወለእለሂ ይነብሩ ውስተ ጽልመት ወጽላሎተ ሞት ብርሃን ሠረቀ ሎሙ።»

ወእምይእቲ ዕለት አኀዘ እግዚእ ኢየሱስ ይስብክ፥ ወይበል ነስሑ እስመ ቀርበት መንግሥተ ሰማያት።

ወእንዘ ያንሶሱ መንገለ ባሕረ ገሊላ ርእየ ክልኤተ አኀወ ስምዖንሃ ዘተሰምየ ጴጥሮስ ወእንድርያስሃ እኅዋሁ እንዘ ይወድዩ መርበብቶሙ ውስተ ባሕር እስመ መሠግራን እሙንቱ። ወይቤሎሙ እግዚእ ኢየሱስ ንዑ ትልዉኒ ድኅሬየ ወእሬስየክሙ ትኩኑ መሠግራነ ሰብእ። ወበጊዜሃ ኀደጉ መሣግሪሆሙ ወተለውዎ። ወኀሊፎ ሕቀ እምህየ ርእየ ካልኣነ ክልኤተ አኀወ ያዕቆብሃ ወልደ ዘብዴዎስ ወዮሐንስሃ እኅዋሁ ውስተ ሐመር ምስለ ዘብዴዎስ አቡሆሙ እንዘ ይሠርዑ ወያስተሣንዩ መሣግሪሆሙ ወጸውዖሙ። ወበጊዜሃ ኀደጉ ሐመሮሙ ወዘብዴዎስሃ አባሆሙ ወተለውዎ።

ወአንሶሰወ እግዚእ ኢየሱስ ውስተ ኵሉ ገሊላ እንዘ ይሜህር በምኵራባቲሆሙ ወይሰብክ ወንጌለ መንግሥት ወይፌውስ ኵሎ ደዌ ወኵሎ ሕማመ ዘውስተ ሕዝብ። ወወፅአ ስሙዓተ ነገሩ ውስተ ኵላ ሶርያ ወአምጽኡ ኀቤሁ ኵሎ ድውያነ ወኵሎ ሕሙማነ ዘለለ ዚኣሁ ሕማሞሙ ወጽዑራነ ወእለሂ ቦሙ አጋንንት ወወርኃውያነ ወእለሂ ነገርጋር ወመፃጕዓነ ወአሕየዎሙ ለኵሎሙ። ወተለውዎ ብዙኃን አሕዛብ እምገሊላ ወእምዐሥሩ አህጉር ወእምኢየሩሳሌም ወእምይሁዳ ወእማዕዶተ ዮርዳኖስ።

Feti si ወንጌል ዘማቴዎስ 4