Lamnso - 2014 Cameroon Association for Bible Translation and Literacy (CABTAL) (NT) Non Drama

Lamnso - 2014 Cameroon Association for Bible Translation and Literacy (CABTAL) (NT) Drama

Kishiíy ké bam ki shaà, áwune bvəə́shí, e lì biʼ se vé‑eè baʼtin siy, e bvə̀y kijàvndzə kijàvndzə, a sì kishiíy ké mbìy ki fó ŋgàm, a dù e shùu sày fèy. Á meé fó, e yèn, aá tsə́ʼ ne kilán ke vé‑eè sətin shúu sày sho. Á nəə́ é sày, e tàʼ dzə́n Taàtá Jesus ntéŋ, e nèn jàáy, a tiy fo. Á lòo sìn, a wíri tíy aáwuné ghaŋ abaà, aá máʼ ndzə̀y, a sí bán, njaʼkìrì. Áwune fàn, e gvə̀ʼə́r vitú vév fó nsay. Wír vìyi dzə́r jii, «Vèn taʼ wír wo wù dzəə̀n e tin fo aŋkfəə́ mvəm ji ka? Wù yòʼ dzə̀ fen. Wù fəə̀ ne fo kpu. Vèn kuúmé kinyo ke wù‑uù suuyin e vèn, a vèn áwune dzə̀ə́ e Galeli. Wù‑uù sùúy jii, á wíy fo wun wo yírí dzəə̀n Wanwìr, é wír ve bií yúyrí é kintam, vishiíy ví mee vitaár, é wun fəə́ fó kpu.»
Áwune nèn kuùmé kinyo ke Jesus‑eè suuyin kee shooy, e lò, e dù, e fèr kinyo ke kí kooyin e wón lìm Jesus vee nshòv mòʼón e ghvə̀me, e kfə̀n fèr e wír vee áwuné ŋgoo adzə̀m. Vikìy vee shooyi‑iì dzə̀ jii, Maria Magdalen, wùn à Joana, à Maria woo yìy à Jeem, à vikìy ámóʼó sá. Áwune wáa fèr kinyo kee shooy aàŋgàa ntum Jesuse, á wáa yu ji vinjeenjèm ve vinyò, e làa yòʼ a biimé gheéy. Yii bèy, Pita ku yòʼ tùmnín, e lèʼ, e dù e shùu sày fèy, e bìʼtí e sày, e yèn, a sí néŋ ndzə̀y se vé‑eè boon dzə́n Jesus sho. Wù nèn bìnkìr, a kfən, a ghay jii, kinyo ke kí kooyin ben ki sà dzə̀ ka á?


Kú a dzə e kishiíy fóo fèy, aŋgàa ŋgoo Jesus ámóʼó lò fo Jerusalem abaà, a dù e ntèʼ yee Emar, a ntàm dzə̀ moo may saàmbà bèy. Á wáa dù, a ghay vinyo ve ví kooyin vee shooy vidzə̀m. Á kú a ghan, a suŋnín, a ghay bèy, Jesus nèn wìy, e shèm aáwuné ŋgoo, wùn áwune wáa dù. Kifá ki laàrì sí yév, la á yòʼ a kiíy ji dzə̀ á Jesus. Wù nèn dzə̀r aáwune jii, «Vèn ghán, fer a dzə̀ ka ke á fer, gháy wún ben?» Áwune tiím, e sòv vitú. Wùmòʼ wo vé‑eè yoŋ ji Kiliopar nèn lò, e dzə̀r shó jii, «Bó kù mày wò wo à dzəə̀n é Jerusalem fèn, a bó à yòʼ‑oo lo yù vinyo ve ví‑ii kooyin é vishiíy fen à?» Wù dzə́r jii, «Vinyo vee ka?» Á bìnèr jii, «Dzə̀ vinyo ve ví‑ii kooyin wír wo á yoŋ ji Jesus woó Naasarer. Wù‑uù dzə̀ *ŋgaà ntum Nyùy, yii viŋgaʼnìn ve vinyò, kfə̀n fiʼtì ve fiʼtìn ví, a Nyùy bínsi wun, a wìr dzə̀m bínsi sa. Vitú ve atàá cù vesən wùn à vé wòŋe siíy, e lì, e fò ji á sáʼ, e yùyrí. Á nèn tà wun e kintam. Vèr‑iì tiir vifií é wùn wó ji dzə̀ wun wo wù‑uù wíy tin wír veé Isray fo ŋgeʼ. Sì lèn vishiíy vitaár mo kinyo kee shooy ki‑ii kooyin. A bó yòʼ mày kee shoon, vikìy vee věr ŋgoo ámóʼó kfən sìíy, e gàʼár melív mer, aá kì dù é shùu sày kijàvndzə kijàvndzə, e tàʼ dzə́n Jesus ntéŋ, e nèn wìy, e sùúy e vèr ji nshèelav se Nyùy si kì bvə̀y aáwuné si moo njèm, e sùúy a ji Jesus dzə̀ e tin. Wír ámóʼó ve vèr áwune kì dzəə̀né dú é shùu sày, e yèn, a sayi dzə̀ e rə́, réŋréŋ mo vikìy kì suuyin. Yii bèy, e làa yòʼ yen sí Jesus.»
Jesus nèn sùúy aáwune jii, «Vèn yùŋsí feyì, melív men mè rəə́y é ŋàŋ, la vèn yòʼ a biimé vinyo ve aŋgàa ntum Nyùyi‑iì saŋen. Vèn yòʼ kì ji dzə̀ *Mfə̀ə́r wo Nyùy‑iì kàʼàn kù yèn ŋgeʼ sìn sidzə̀m, e bóo nəə́ e wùn vikùʼùy a?» Jesus nèn kèʼ, a toʼtí vinyo vidzə̀m ve vé‑eè saŋen é Ŋwàʼ Nyùy bìʼ wun, e kèʼ fo ve Mooser‑iì saŋen ví, e tùmsín e vé *aŋgàa ntum Nyùy vi adzə̀m. Wùn áwune dù, e lòo meé e ntèʼ ye áwune kì du sho, wù nèn a tàʼ, e bàr ŋgoo. Á ghár, e sùúy sho jii, «Vèsən wáa dù, e dù shìíy. Ndzə bàŋrìn ne, a yì sí sə́né.» Wù nèn biìmé, e dù ji wùn áwune wàá shiíy.
Wùn áwune yiì dù, e lòo yikír, wù lì ntuʼ kiban, e beèrì Nyùy, e bèʼnín, e fò aáwune. Sí yéví ku nèn raàné, á kiíy wun. Wù nèn ŋeèmé, e lày. Áwune siíy, a kfə̀ynìn jii, «Á kinyo ke kí kì yiìn, bo melív mèsò mè lum é ghan se vèsən áwune kì wiy e dzəə, a wù tóʼti kinyo ke Ŋwàʼ Nyùy e wòsò.»
Áwune ku nèn tùmnín e ŋkuùr foo fèy, e kfə̀n é Jerusalem. Á meé fó, e yèn, a wón lìm Jesus vee nshòv mòʼón e ghvə̀me báʼtí ne wùn à wír Jesus ámóʼó, a suúy jii, «Tàr wòsən fəə̀ ne rú fó kpu, Simon kì yèn wun.» Áwune nèn a fèr sa kinyo ke kí kì kooyin áwune é dzəə, a naàrì mo áwune kì səə̀mèn Jesus e ghan se wù kì beʼnin kibán.


Á ku lòo fèr bèy, Jesus nèn sàsìn, e bvə̀y aáwuné mvəm, e shàʼtì jii, «Nyaáŋ wáa dzə e věn mvəm.» Kindzə́m kí gwàr áwune, á wáa fàn, a kwàʼtì ji á yèn a dzə̀ á kimalèŋ. Wù dzə́r jii, «Kí tárir ven ben ji ka? Vèn méŋnin mo ji ka? Vèn leéy wó yémé wùn à wuú yémé, é vèn nèn kìíy ji dzə̀ á mo féyì. Vèn mumri wún wómé, e yù mo wú koó. Bó kimalèŋ ki yòʼ yii kér jáv wùn à vighvə́r ví mo vèn yén, a m kérí.» Wù suúy bey, e dìn wó rə́, e kfə̀n dìn wuú. Aáwune kù leey wun, jaay jaàyín, a yúy kishéʼrì, la á yòʼ tàv biìmé gheéy. Wù nèn lò, e dzə̀r jii, «Vèn kér kifá ke yi fèn gheéy á?» Á lì kintín ke sə, aá naá ne, e fò shó. Wù sə́, a yi, aáwuné si.
Wù nèn lò, e sùúy aáwune jii, «Kinyo ke vèn yenen lán kìn ki dzə̀ ke mò‑oò suuy e vèn, a vèsən dzə̀ə́. Mò‑oò suuy jii, vinyo vidzə̀m ve vé‑eè saŋen é Ŋwàʼ Nsər Mooser, e sàŋ é Ŋwàʼ Aŋgàa Ntum Nyùy bìʼ mo, e kfə̀n sàŋ é Ŋwàʼ Nsùyrì Nyùy Nyùy vi kù kér fó wìy gheén.» Wù nèn mvə̀ʼtì vifií vév, á kiíy kinyo ke kí dzəə̀n é Ŋwàʼ Nyùy. Wù wáa suúy jii, «Kinyo ke vé‑eè saŋen kí dzə̀ jii, Mfə̀ə́r wo Nyùy‑iì kàʼàn kù‑uù kér fó wìy yen ŋgeʼ, e kpu, vishiíy ví mee vitaár, é wù fəə́ fó kpu. Kí kfə́n a dzə jii, á kér fó wìy kèʼ fo Jerusalem, a fìʼtì vitúm vidzə̀m e mǒ yir ji wíri biner melív mev, é Nyùy laysin vinyo vév ve bi ví. A dzə̀ ven vin ve á yenen ne vinyo ve Ŋwàʼ Nyùyi‑iì din vìn, e fíʼ a fìʼtì. Vèn wáa kiíy jii, m yíi tsənsí ven mbùʼmé wo Tàr wor‑iì kàʼàn ven shó. Kí nén a dzə jii, vèn goʼ é mvə̀mlaʼ fèn, e dù, e meé e ghan se Nyùy wíy fo ven vitaáví ve ví loòn fó yuv.»


Wù nèn lì áwune, e fəə̀ shó fo mvə̀mlaʼ fèy. Wùn áwune dù, e mèé e ntèʼ yee Betani, wù nàn wó rə́, a shàʼtì, a suŋnín aáwuné vitu. Wù wáa suŋnín bèy, a koʼ, e làynìn e yuv, a wón vəə́ tíy, shoŋrì. Á siíy, e lò fo fo, e kfə̀n é Jerusalem, a ker kishéʼrì ke ghaʼán kí. Á dù, a rəsí a dzə̀ é lav cù, a sùyrì Nyùy ghán sidzə̀m.

Feti si Luk 24