If you would like a copy of this version please contact info@davaraudiobibles.org

Bodo Parja New Testament, CC-BY-SA-4.0, The Love Fellowship. Bodo Parja New Testament Audio Bible, CC-BY-SA-4.0, Davar Partners International, The Love Fellowship, 2023.

Bodo Parja New Testament

Bodo Parja Bible (ବ୍‌ଡ଼୍ ହ୍‌ର୍‌ଜା) by The Love Fellowship is licensed under Creative Commons Attribution-ShareAlike 4.0 License.

“ବିନ୍‌ଲକାର୍ ବିଚାର୍‌ କ୍‍ରାନାଇ, ତ୍‍ବେ ଇଶ୍ୱର୍‌ ହେଁ ତୁମାର୍ ବିଚାର୍‌ ନ୍‌କେରେ। କାଇତାକ୍ ତୁମିମ୍‍ନ୍ ଜ୍‌ନ୍‌କାର୍ ବିନ୍‌ଲକାର୍ ବିଚାର୍‌ କ୍‍ରାସ୍, ମାପ୍‌ରୁ ହେଁ ତୁମୁକ୍ ସେନ୍‍କାର୍ ବିଚାର୍‌ କ୍‍ରେଦ୍। ଆରେକ୍‌, ଜ୍‌ନ୍‌କ୍‌ରି ତୁମିମ୍‍ନ୍ ବିନ୍ ଲକ୍‌କେ ନାହି ଦିଆସ୍, ସେନ୍‍କ୍‌ରି ମାପ୍‌ରୁ ହେଁ ତୁମୁକେ ନାହିକ୍‍ରି ଦେଇଦ୍। ଜ୍‌ଡେବ୍‌ଳ୍ ତୁମାର୍ ନିଜାର୍ ଜୀବନେ ପାପ୍ ଦସ୍ ଗଟେକ୍ ବ୍‍ଡ୍ କାଡା ହର୍ ତୁମାର୍ ଆକି ଲ୍‌ଗେ ଆଚେ। ସେରି ନ୍‌ଦେକି, ତୁମି କାଇରି ତୁମାର୍ ବାଇର୍ ଆକିର୍ ସାନ୍ କୁଟା ହର୍ ପାପ୍ ଦସ୍‌କେ ଦ୍‌କୁଲାସ୍? ଆରେକ୍‌ ତୁମି କ୍‍ବେହେଁ କାକେ ତାର୍ ପାପ୍ ଦସାର୍ ଗିନେ କାଇରି କ୍ଉଆନାଇ, ଜ୍‌ଡେବ୍‌ଳ୍ କି ତୁମି ନିଜେ ବ୍‍ଡ୍ ପାପ୍ ଲ୍‌ଗେ ରିଆସ୍‌, ଆଗେ ତୁମି ନିଜାର୍ ପାପ୍ ଦସ୍ କ୍‌ରୁକେ ଚାଡା, ତ୍‍ବେ ତୁମି ବିନ୍‌ଲକାର୍ ପାପ୍ ଦସ୍‌କେ ବ୍‌ଲ୍‌କ୍‍ରି ଦ୍‌କୁହାରାସ୍, ଆର୍ ତାର୍ ସାନ୍ ପାପ୍ ଦସ୍‌କେ ବ୍‍ଲ୍ କ୍‌ରୁହାରାସ୍! ରେ ଅକାରିଆମ୍‌ନ୍, ଆଗେ ନିଜାର୍ ଆକି ଲ୍‌ଗେରିଲା ଡାଙ୍ଗ୍‍କେ ବେଟା, ତାର୍ ହ୍‌ଚେ ନିଜାର୍ ବାଇର୍ ଆକିର୍ କୁଟାକେ ବାର୍‌କ୍‌ରୁକେ ବ୍‌ଲ୍‌କ୍‍ରି ଦ୍‌କୁହାରାସ୍। ମାପ୍‌ରୁର୍ କ୍‌ତାକେ ଯେ ଶୁଣୁକେ ଇଚା ନ୍‌କେରେ ତାକେ କ୍ଉଆନାଇ। ଯଦି ତୁମି କ୍ଉଆସ୍, ତ୍‍ବେ କୁକୁରାର୍ ଆଗେ ବ୍‍ଲ୍ ଜିନିଷ୍ ହିଙ୍ଗ୍‍ଲେକ୍, କି ଗୁଷ୍‍ରାର୍ ଆଗେ ମୁକ୍‍ତା ହିଙ୍ଗ୍‍ଲେକ୍ କାଇରି ଅଇଦ୍? ସେ ସେ ତାକେ ତ୍‌ଳେ ହ୍‍କାଇ ମାଡେଦ୍ ଆର୍ ହ୍‌ଚେ ତୁମୁକେ ମାରୁକେ ଆସେଦ୍।”


“ମାଗା ତ୍‍ବେ ଇଶ୍ୱର୍‌ ତୁମୁକ୍ ଦେଇଦ୍। କଜା ତ୍‍ବେ ଇଶ୍ୱର୍‌ ତୁମୁକେ ମିଳାଇ ଦେଇଦ୍, କାହାଟେ ମାରା ତ୍‍ବେ ଇଶ୍ୱର୍‌ ତୁମାର୍ ଗିନେ କାହାଟ୍ ଉଗାଳି ଦେଇଦ୍। କାଇତାକ୍ ଯେ କେ ମାଗେଦ୍, ସେ ହାଇଦ୍। ଯେ କଜେଦ୍, ସେ ସେରି ହାଇଦ୍। ଆର୍, ଯେ କାହାଟେ ମାରେଦ୍, ତାର୍ ଗିନେ କାହାଟ୍ ଉଗାଳି ଅଇଦ୍। ଆରେକ୍‌ ତୁମାର୍ ବିତ୍‌ରେ ଅନ୍‌କ୍‌ରି କେ ଆଚେ, ଯେ ନିଜାର୍ ହଇସି ରୁଟି ମାଗ୍‍ଲେକ୍ ତାକେ ଟେଡା ଦେଇଦ୍, ଆର୍ ମାଚ୍ ମାଗ୍‍ଲେକ୍ ତାକେ ସାହ୍ ଦେଇଦ୍? ସେତାର୍‍ଗିନେ ତୁମିମ୍‍ନ୍ ଦୁଷ୍ଟ ଅଇରିଲେକ୍ ହେଁ, ଜ୍‌ନ୍‌କାର୍ ନିଜାର୍ ନିଜାର୍ ହିଲାମ୍‍ନ୍‍କେ ବ୍‍ଲ୍ ବ୍‍ଲ୍ ଜିନିଷ୍ ଦେମ୍‍ ଜାଣାସ୍, ତ୍‍ବେ ତୁମାର୍ ସ୍‌ର୍‌ଗାର୍ ଉବା ତାର୍ ଲ୍‌ଗେ ମାଗ୍‌ତା ଲକ୍‌ମ୍‍ନ୍‌କେ କ୍‍ତେକ୍ ବେସି ବ୍‍ଲ୍ ଜିନିଷ୍ ନ୍‍ଦେଇଦ୍!”


“ଲକ୍‍ମ୍‍ନ୍ ଜ୍‌ନ୍‌କ୍‌ରି ତୁମାର୍ ସ୍‍ଙ୍ଗ୍‍ ଜୁଇସ୍‌ବୁ କ୍‌ରତ୍‌ବ୍‌ଲି ମ୍‍ନ୍‍କ୍‍ରୁଲାସ୍, ତୁମିମ୍‍ନ୍ ହେଁ ସେମ୍‍ନ୍‍କାର୍ ସ୍‍ଙ୍ଗ୍‍ ସେରି ସ୍‍ବୁ କ୍‍ରା, କାଇତାକ୍ ଇରି ମୋଶାର୍ ନିୟମ୍ ଆର୍ ବବିଶତ୍ କ୍‌ତା କ୍‌ଉତା ଲକ୍‌ମ୍‌ନ୍‌‍କାର୍ ଦ୍‌ର୍‌ମ୍ ଶାସ୍‌ତରାର୍ ମୁଳ୍ କ୍‌ତା। ଇଶ୍ଵରାର୍ ରାଇଜେ ହୁରୁକେ ଅଲେ ସାନ୍ କାହାଟ୍ ବାଟ୍ ଜ୍‌ମ୍‌କେ ଚେଷ୍ଟାକ୍‌ରା, କାଇତାକ୍ ସ୍‍ବୁ ନାସ୍ କ୍‌ର୍‌ତା ବାଟ୍ ଓସାର୍ ଆର୍ ସିଦା, ଆର୍ ସେ କାହାଟ୍ ବାଟ୍ ଅଇ ହୁର୍‍ତା ଲକ୍ ବେସି। ଆରେକ୍‌ ନ୍‌ସେର୍‍ତା ଜୀବନ୍‍କେ ନେତାର୍ କାହାଟ୍ ସାନ୍ ଆର୍ ର୍‌ସ୍‌ତା ସାକୁଡ୍, ଆରେକ୍‌ ତାର୍ କଜ୍ ହାଇଲା ଲକ୍ କ୍‍ଣ୍ଡେକ୍।”


“ମିଚୁଆ ବବିଶତ୍ କ୍‌ତା କ୍‌ଉତାଲକ୍ ମ୍‌ନ୍‌କାର୍‌ ତ୍ଇହ୍‍ଣି ସାବ୍‍ଦାନ୍ ଅଇରିଆ। ସେମ୍‍ନ୍ ମେଣ୍ଢା ମ୍‌ନ୍‌କାର୍‌ ଚାମ୍ ଡାହି ଅଇକ୍‍ରି ତୁମାର୍ ଲ୍‌ଗେ ଆତ୍‍ତି, ମ୍‍ତର୍ ସେମ୍‍ନ୍‌କାର୍ ମ୍‌ନ୍ ବିତ୍‌ରେ ସ୍‌ତ୍‌କ୍‌ରି ହୁଣ୍ଡାଳ୍! ସେମ୍‍ନ୍‍କାର୍ କାମ୍ ଦ୍‍କି ତୁମିମ୍‍ନ୍ ସେମ୍‍ନ୍‍‍କେ ଚିନାସ୍। ଲକ୍‍ମ୍‍ନ୍ କାଟା ଗ୍‌ଚେ ଅଙ୍ଗୁର୍ ହ୍‍ଳ୍, କି କାଟା କଳି ଗ୍‌ଚେ ହ୍‍ଣି ଡୁମ୍ବୁର୍ ହ୍‍ଳ୍ ହ୍‌ଳେଦ୍ କି? ସେନ୍‍କ୍‌ରି ସ୍‍ବୁ ବ୍‍ଲ୍ ଗ୍‌ଚେ ବ୍‍ଲ୍ ହ୍‍ଳ୍ ହ୍‍ଳେଦ୍, ମ୍‍ତର୍ କ୍‍ରାପ୍ ଗ୍‌ଚେ କ୍‍ରାପ୍ ହ୍‍ଳ୍ ହ୍‍ଳେଦ୍। ବ୍‍ଲ୍ ଗ୍‌ଚେ କ୍‍ରାପ୍ ହ୍‍ଳ୍ ହ୍‍ଳି ନ୍‌କେରେ, କି କ୍‍ରାପ୍ ଗ୍‌ଚେ ବ୍‍ଲ୍ ହ୍‍ଳ୍ ହ୍‍ଳି ନ୍‌କେରେ। ଜୁଇ ଗ୍‌ଚ୍ ହେଁ ବ୍‍ଲ୍ ହ୍‍ଳ୍ ହ୍‍ଳି ନ୍‌କେରେ, ସେରି ଟଲିକ୍‍ରି ଜୟେ ହିଙ୍ଗା ଅଇଦ୍। ଅନ୍‌କାର୍ ମିଚୁଆ ବବିଶତ୍ କ୍‌ତା କ୍‌ଉତା ଲକ୍‌ମ୍‌ନ୍‌‍କେ ହେଁ ନ୍‌ର୍‌କେ ହିଙ୍ଗା ଅଇଦ୍। ଜ୍‌ନ୍‌କ୍‌ରି ତୁମିମ୍‍ନ୍ ସେମ୍‍ନ୍‍କାର୍ କାମ୍ ଦ୍‍କି ସେମ୍‍ନ୍‍‍କେ ଚିନାସ୍।”


“ମକେ ମାପ୍‌ରୁ, ମାପ୍‌ରୁ ବ୍‍ଲି କୁଦ୍‌ତା, ଅନ୍‌କ୍‌ରି ସ୍‍ବୁ ଲକ୍ ସ୍‌ର୍‌ଗ୍‌ ରାଇଜେ ନ୍‍ହୁର୍‌ତି, ମ୍‍ତର୍ ଯେ ମର୍ ସ୍‌ର୍‌ଗାର୍ ଉବାର୍ ଇଚା ଲ୍‌ଗେ ଇଣ୍ତ୍‍ତି, ସେ ସ୍‌ର୍‌ଗ୍‌ ରାଇଜେ ହୁରେଦ୍। ବିଚାର୍‌ ଦିନେ ବେସିଲକ୍ ମକେ କ୍ଉତି, ଏ ମାପ୍‌ରୁ, ଏ ମାପ୍‌ରୁ, ଅମିମ୍‍ନ୍ କାଇରି ତର୍ ନାଉଁଏ ବାବବାଣି କ୍‌ଇନ୍‌କେରୁ? ଆର୍ ଅମିମ୍‍ନ୍ କାଇରି ତର୍ ନାଉଁଏ ବୁତ୍‌ଆତ୍ମାମ୍‍ନ୍‍କେ ଚାଡାଇ ନ୍‌କେରୁ? ଆରେକ୍‌ ତର୍ ନାଉଁଏ କି ବେସି ଚମ୍‌ତ୍‍କାର୍ କାମ୍‍କ୍‍ରି ନ୍‌କେରୁ? ସେଡେବ୍‍ଳ୍ ମୁଇ ସେମ୍‍ନ୍‍‍କେ ନିକାକ୍‌ରି କଇନ୍ଦ୍, ମୁଇ ତୁମୁକ୍‌ମ୍‌ନ୍ କ୍‌ବେ ହେଁ ଜାଣି ନ୍‌କେରି। ରେ ଅନ୍ୟାୟ୍ କାରି ମ୍‌ନ୍ ମର୍‍ଲ୍‌ଗେହ୍‍ଣି ଦୁରି ଅଉଆ।”


“ସେତାକ୍ ଯେ କେ ମର୍ ଇ ସ୍‍ବୁକ୍‍ତା ଶୁଣେଦ୍ ଆର୍ ମାନେଦ୍, ସେ ଟେଡା ଉହ୍‍ରେ କୁନାଦି ହ୍‍କାଇ ଗ୍‍ର୍ ବାନ୍ଦିଦିଲା ବୁଦିମାନ୍ ଲକାର୍‌ ହର୍ ଅଇଦ୍। ବ୍‌ର୍‌ଷା ଅଇଲି, ହୁର୍ ଅଇଲି, ଆର୍ ହ୍‌ବନ୍ ଆଇଲି ଆର୍ ସେ ଗ୍‌ର୍‌କେ ଦ୍‌କା ମାର୍‍ଲି, ଆରେକ୍‌ ସେରି ଅଦ୍‍ରି ନ୍‌କେରେ, କାଇତାକ୍ ଟେଡା ଉହ୍‍ରେ ତାର୍ କୁନାଦି ରିଲି। ଆରେକ୍‌ ଯେ କେ ମର୍ ଇ ସ୍‍ବୁକ୍‍ତା ଶୁଣିକ୍‍ରି ନ୍‌ମାନେ, ସେ ବାଲି ଉହ୍‍ରେ ଗ୍‍ର୍ ତିଆର୍ କ୍‍ଲା ନିର୍‍ବୁଦିଆ ଲକାର୍‌ ହର୍ ଅଇଦ୍। ଜ୍‌ଡେବ୍‌ଳ୍ ହାଣି ହ୍‍ବନ୍ ଆଇଲି ଆର୍ ଗ୍‌ର୍‌କେ ଦ୍‌କା ମାର୍‍ଲି, ସେ ଦାହ୍‍ରେ ସେ ଗ୍‍ର୍ ବାଙ୍ଗି ଗ୍‍ଲି, ଆରେକ୍‌ ତାର୍ ବ୍‍ୟଂକାର୍ ନ୍‌ଷ୍ଟ ଅଇଲି।”


ଯୀଶୁ ଇ ସ୍‍ବୁକ୍‍ତା କ୍ଇ ସ୍‌ରାଇଲା ହ୍‌ଚେ, ସ୍‍ବୁ ଲକ୍‍ମ୍‍ନ୍ ତାର୍ ଶିକ୍ୟାକେ ଶୁଣି ଚ୍‌ମ୍‍କି ଗ୍‍ଲାଇ, କାଇତାକ୍ ସେ ମୋଶାର୍ ନିଆଇ ଶିକାଉତା ଲକ୍‍ମ୍‍ନ୍‍କାର୍ ହର୍ ଶିକ୍ୟା ନ୍‌ଦେଇ, ‍ଜ୍‍ତେନ୍‍କି ସେ ଅଦିକାର୍ ହାଇଲା ଲକ୍ ହର୍, ସେମ୍‍ନ୍‍‍କେ ଶିକ୍ୟା ଦେତିରିଲା।

Feti si ମାଥିଉ 7