Àwọn Ẹsẹ Bíbélì Tí Ọ̀pọ̀ Èèyàn Mọ Aba Vatowo 17

Pín

Tuwo Eberam ikaiyaka aaa, ana tala naintinain (99) ibabane, e isowóduwo yaina, idigo kana, ‘Yau Yaubada . Im ketoiya madabokina goi kwabikaonēgu go, tuta liliuna im guinuwa goi geya am pikwanāmo.

Tauna geya tuwaina yoim Eberam, go sem bogina avayokoim kom bei boda badabadaidi tubudi, tauna yoim vau moe Eberamo.

Guna kanasiunayana akamoitamoe bego ikaiyako vata kom ma natumowo nakae tubumowo be yau yaida. Yau bei im Yaubada go, nava bei tubumowo idi Yaubada.

‘Kunōve. Yau guna kanasiunayana yaim ame nakae: Akatótula bego kom bei boda badabadaidi tubudi.

Go kina Yaubada idigo kana, ‘Tauyana geya, go sem monem Sera bei ivenátuna, natuna koroto go, bei kuvayou Aisake. Tauyana be nakae tubunao bei akanasiukoidi go, anasiunayana bei ikaiyako vata yaidi.

Kenani goi kom tuta ame kueogaoga go, nava bei poyapoya ana madabokina Kenani goi kom nakae tubumowo avinimi, e bei ikaiyako vata yaimi. Yau bei tubumowo idi Yaubada.’

Tuwo Eberamo aena ivatugúyala ikanakabobo go, ivanama; ina nuwonúwana kana, ‘Yau guna tala tayamo andedi (100) go, Sera ana tala naintinain (99). Manakae? Itoboinema kavenátuna?’

E tuwaina Yaubada idigo kana, ‘Eberamo, geya tuwaina monem kududūwe Serai, go sem kududūwe Sera.

Sakava ana kupwanayana moe aba kinana kom be yau yaida bego bogina akanasiukoim.

Go tala tayamo ikavava, Sera bei ivenátuna, natumi Aisake go, niga bei Aisakeyana akanasiuko.’

E ame tuta nakae tuta simamaima ava gómana koroto ibíbina yaim goi, neta ana maliyalina ainima aito bogina ibabanedi, e sakavaina kukūpo. Nakona im vada goi ibíbina o tauyana ogaoga goi kugimone, tauyana sakavaina kukūpo. Ame aba kinana yaida bego akanasiukovataem.