Àwọn Ẹsẹ Bíbélì Tí Ọ̀pọ̀ Èèyàn Mọ Luca 13

Pín

— Tô sena, te za niwapsi da'ahâ na da te dasima 're wẽ za'ra, 'Re ihâimana u'âsi mono u 're danhisisi mono da. Tazahã, itẽme 're danhisisi mono õ di za. Tahawa, 'ri para u 'ridawa 're su'ure na 're danhisisi mono da, sada 're idanhiptete za'ra mono ne, te za sada 're asiptete za'ra wa'aba mo, 'Re ihâimana u'âsi mono u 're asisisi aba mono da.

Tame te pi'õ hã ihâzé ré hã dame nhamra. Hâzé ré ma tô ãma tiwahub ahâ, 18 na, wa'uburé te te 're upi u'âsi mono wa. Sihâpâ u'âsi, te tahawa 're mo, wãi wahutu ãna. Tawamhã Zezusi te te 'madâ'â wamhã, te 'mahâ, ãne: — Pi'õ, aihâzé hã te za oto aima apa.

Taha pari, ma tô tinhib'rada hã ãma tihi. Tawamhã ma tô awa'awi wãi wahudu. Wãi wahutu wamhã, te ãma tiwata, 'Re ihâimana u'âsi mono ãma, te te pese wẽ te.

Tawapsi, te za dama iwapu ma nharĩ za'ra, dama pire na 're hâimana za'ra mono da oto. Duré, dama ipire ma, te za nharĩ za'ra, dama wapu na 're hâimana za'ra mono da oto.

Nimahã na te za 'ri tede'wa hã wahudu, te te siré 'rinhitop tete da. Tawamhã te za i'ridawa ta'a za'ra wa'wa, rowi 're ai'ubumroi wa'aba mono hã. 'Ri tede'wa hã te za i'mahârâ za'ra wa'wa, ãne: “Apito, ma'ãpé we wazô 'ridawa za'ra na, ãma atẽme wanhisisi da.” Ãne te za 're i'mahârâ za'ra wa'aba mo. Tazahã, te za asa aima nharĩ za'ra wa'wa, ãne: “Te aiwaihu'u za'ra wa'aba õ di. E ma hawimhã, a norĩ wa'wa hã.”

Mare di. Taha wab õ di. Ta norĩ hã danhipai u, tiwasédé hã te te 're 'manharĩ za'ra mono õ di. Tane nherẽ, ma tô tidâ'â za'ra. Tane, te za tô a norĩ wa'wa hã isine 're atâ'â za'ra wa'aba mo, aiwasété wi 're aipizari za'ra wa'aba mono õ wamhã.

Tahawa, te za asa duré aima nharĩ za'ra wa'wa, ãne: “Te aiwaihu'u za'ra wa'aba õ di, ĩzazei'wa na hã. Aiwasédé hã ma tô 're i'manharĩ u'âsi za'ra wa'aba mo. Mo oto ai'aba'réi wa'aba, ĩnhiti.” Ãne te za aima rob'ru za'ra wa'wa.

Tawamhã Zezusi hã te dama tinha, ãne: — Niha marĩ na, wa za ãma simiré'é, 'Re ihâimana u'âsi mono, da'ãma 're isib'a'uwẽ mono zém na hã. Mostada nhamare na, wa za ãma simiré'é. Mostada nhamare hã aibâ hã ma tô a're. Tawamhã ma tô tiwa'ru. Wa'rui wamhã, papo za'ẽtẽ di oto. Tawamhã si hã te isu 'rowi, te te sima 're sasi za'ra. Ãne, 'Re ihâimana u'âsi mono, da'ãma 're isib'a'uwẽ mono zé hã.