Yohana 11
11
Lazarus valá
1Nɛ́ŋ váàndo nə́ŋ̀, bə̀ dɛ̀rə̀ Lazarus, ləə mará, kùm Betaniya, bìl aa Mariyama kə̀ mɔ̀mmà oò Marta tá, bə̀ kùmà rú roó. 2(Mariyama kùmsə̀n nɛ́ŋ kéèndo aa dá urdi zadǹ Báátììkpɛ̀ŋ dun ba, bít dá tədǹ kə̀ yíl gí' oò roó. Kun váàn oò Lazarus ləə sə̀n mará.) 3Kun kɛ́ɛ̀m oò bəraa iirə yée, ìì tùm nɛ́ŋə̀ nə́ŋ̀, dáá oò bàà Yéésù: «Báátììkpɛ̀ŋá, ɔ̀dzéd í'sɛ̀lbə̀ ń də, tə́ kə̀ mará.»
4Zɔ̀ŋ aa Yéésù kìì nwɔŋ aa gə́, bàà: «Lazarus maraa yée, lò'ù gá. Zá tù' oòrə, dá Vɛnɛ́b kpɛŋsɛ́l bə̀ kaŋsɛ́l laa nyɛdkè i'nàá, bít dá Vɛnɛ́b Wàà kaŋsɛ́l laa nyɛdkè i'ǹ nɛ́b bəd núùrú.»
5Yéésù í' Marta kə̀ kudvɛɛ̀l oò Mariyama tá, bít kə̀ Lazarus tá. 6Zá zɔ̀ŋ aa kìì bə̀ Lazarus ləə tə́ mad gə́, kùm náŋ sɛŋ iira, zɔ̀ŋ aa kùm bərə ba. 7Bít bòórú oò gə́, bàà nɛ́b sáànmbə̀ oò bəd: «Kid báà bídǹ kíìn Yahudiya yɛ́b ba!»
8 Nɛ́b sáànmbə̀ oò bəd kè' bə̀ í'ù: «Nɛ̀ná, sɛŋ máá ká' sé, Yahudu bəd nɛ́b yíl bə̀ bəd sàànnà taà laàn lo'ǹmbə̀ kə̀ bəŋá. Bít ń í' kidǹbídǹmbə̀ wərə̀ ní sɔ̀ŋ wa?»
9Yéésù kè' í' bə̀, bàà: «Nyàm nə́ŋ̀ní, ba' wàà tə́ kób zè iira. Kàan sínì? Nɛ́ŋə̀ ɛ̀m tə́ nyàámbərə̀ gə́, tà' dun wàà yíl gá. Kàandə, bé' laa nyɛdkè aa zɔ̀ŋə yɛ́b bəroó. 10Zá nɛ́ŋə̀ ɛ̀m tə́ tígə́lə́ gə́, tà' dun wàà yíl kúnú. Kàandə, laa nyɛdkè oò naà sé.»
11Yéésù bàà bə̀ nwɔŋ bəraa gə́, bít bàà zəg sɔ̀ŋ: «Ɔ̀dzéd bə́n Lazarus ləə ləəm yàá; zá dɛ̀d máù kíìn dáàn lɛ́màá.»
12 Nɛ́b sáànmbə̀ oò bəd kè' bə̀ í'ù: «Báátììkpɛ̀ŋá, dáà ləə tə́ ləəm ní gə́, dákíìn gágàá.»
13Yéésù í' baànmbə̀ gə́, Lazarus val kò'ù yàá. Zá nɛ́b sáànmbə̀ oò bəd sèl gə́, gám bənə́ nwɔŋ tə́ ləəm ləə̀nmbə̀ sɔ̀ɔ̀n yílú. 14Kàanyée gə́, Yéésù bàà bə̀ nyɛdkè: «Lazarus val kò'ù yàá. 15Mə́ tə́ kə̀ tɛ́m làmkè kə̀ aíra, mə́ wərə̀ síndoó. Kə̀ aakíin də, íí dáá mə́ taà bagàá. Báà ɛɛ̀m oò sunú.»
16Kàanyée gə́, Tomas aa bə̀ dɛ̀rə̀ wàà bàrə̀b də, bàà nɛ́b sáànmbə̀ kambəd: «Báà ɛɛ̀m wərà, obə́n kɔ̀ val dá oò kò' bə́n kə̀ nɛ̀n bə́n tá!»
Yéésù kùmsə̀n díímke valə́ bìá, bít kùmsə̀n gɔ̀ŋsá
17Zɔ̀ŋ aa Yéésù yaà wə́ə́ Betaniya bìlə́ gə́, bɔ̀b bə̀ lə̀ə̀ Lazarusì sààrú gbòód, mà'ì sɛŋ naara. 18Betaniya bìl pè' tə́ kə̀ Urusalima bìl tá, wə́ə́ kílomɛ́tà toorə sé. 19Bít Yahudu bəd zùúm, bə̀ yaà Marta sunú, kə̀ Mariyama sunú, boò bə̀ yaàn tɛ́'ǹmbìá, kun váàn boò val kò'ù yéroó.
20Zɔ̀ŋ aa Marta kìì Yéésù yaà tə́ kíìn wə́ə̀n gə́, zá' ɛ̀m dáàn sáŋ̀mbə̀ kə̀ oòra. Zá Mariyama gə́, kùm yiìl ní. 21Marta bàà Yéésù: «Báátììkpɛ̀ŋá, dáà ń kùm tə́ zɔ̀ŋə ní gə́, kun váàn máà yée val kò'ù gá. 22Zá mə́ gàb də, kóó bə́ŋyée má, Vɛnɛ́b dáan in aa ń dɛ̀rə̀ rə kíìn piìn kóólé.»
23Yéésù kè' í'ù: «Kun váàn ń dákíìn díìm valú.»
24Marta kè' í'ù: «Mə́ gàb yàá dákíìn díìm valú, sɛŋ aa val bəd dá díìm kə̀ kùrú, bít sɛŋ aa Vɛnɛ́b dá nɛ́b bəd kóólé fágǹ bəroó.»
25Yéésù bààù: «Máára mə́ kùmsə̀n díímke valə́ bìá, kə̀ gɔ̀ŋsá. Màn aa bàg mə́ rə, dá kuùm kə̀ gɔ̀ŋsá, kóó val oò kò'ù kúnú. 26Bít nɛ́ŋə̀ aa kùm tə́ kə̀ gɔ̀ŋsá, bàg mə́ì rə, val kò'ù gá sə́g sə́g. Ń kè' nwɔŋ aarə yèè?» 27Marta kè' í': «Èè, Báátììkpɛ̀ŋá mə́ kè' yàá, ámda ń kùmsə̀n Krístù, ń Vɛnɛ́b Wàà aa dáà yaànà zɔ̀ŋə yɛ́b bəroó.»
Yéésù kpə̀ə̀ Lazarus valá
28Zɔ̀ŋ aa Marta gám tá' nwɔŋ kə̀ aakíin gə́, zá' ɛ̀m kudvɛɛ̀l oò Mariyama dɛdǹmbìá, bít bɔ̀n bààù kúnú: «Nɛ̀n tə́ zɔ̀ŋə, bít bə̀ ǹ dáá kúnú.»
29Zɔ̀ŋ aa Mariyama kìì nwɔŋ bəraa kàangə́, zá' lɛgú, ɛ̀m kə̀ báŋ Yéésù sunú. 30(Bə́ŋ̀ Yéésù pìì bìlə́ sé, zá kùm tə́ zɔ̀ŋ aa Marta dá sáŋ̀ bərə bə ní.) 31Zɔ̀ŋ aa Yahudu Urusalima bə̀ kam bəraa bə̀ kùm yiìl kə̀ Mariyama tə́, oò bə̀ tɛ́'ǹmbə̀ rə, bə̀ bé'ù zá' tə́ vúgǹ kə̀ báŋ yée gə́, bə̀ bàgə̀ bòórú. Bə̀ sèl gə́, bə̀ bàà nyà'aa tə́ ɛɛ̀m sàà ba, dáàn kpəə̀nmbə̀ wərà.
32Zɔ̀ŋ aa Mariyama yaà wə́ə́ zɔ̀ŋ aa Yéésù kùm bərə gə́, bé'ù gə́, yaà pí' oò dun ba, bít bààù: «Báátììkpɛ̀ŋá, dáà ń tə́ zɔ̀ŋə gə́, kun váàn máà val kò'ù gá.»
33Yéésù bé'ù tə́ kíìn kpəənàá, bít Yahudu bəraa kùm kə̀ boò tə́ wúu rə kɔ̀, ìì tə́ kíìn kpəənàá. Búúd yíl na'ùwì gbàákù, 34bít dɛ̀d bə̀: «Íí lə̀ə̀ù tə́ bínì gú?» Kè' bə̀ í'ù: «Báátììkpɛ̀ŋá, yaàn ɛ̀g kúnú.»
35Yéésù kpə̀ə̀ kúnú. 36Yahudu bəd ìì bàà: «Ìì ɛ̀g nɛɛ̀n aa í'ù rú roó!»
37Zá nɛ́b kam boò tə́ŋú, ìì bàà: «Oòra kèèrà sə̀n nyəd váàn núùá. Bít kə̀ níìbə̀ bán taà val daŋ̀mbə̀ oò kò' Lazarus sí gú?»
Yéésù díím Lazarus valú
38Yéésù tɛ́m nyágə́lə̀ gbàákù sɔ̀ŋ yée gə́, zá' ɛ̀m sàà ba. Sàà rə, kìínmbə̀ vɔ̀g lib kíin, bə̀ ke' gú' oòrə kə̀ bəŋ pɛgə́lá. 39Yéésù bàà: «Pà' ìì zá' bəŋ də kúnú.» Marta val kun kéèn də, bàà: «Báátììkpɛ̀ŋá, bə́ŋyée dákíìn so'nàá. Kàandə, ləəì sààrú wərə̀ sɛŋ naara.»
40Yéésù kè' í'ù: «Mə́ bàà n sínì, ń bàg mə́ì gə́, ń dá Vɛnɛ́b kaŋsɛ́l laa nyɛdkè kíìn bé'ǹ doó?»
41Pà' bə̀ zá' bəŋá. Yéésù zá' núù lɛgə́ poú, bít bàà: «Báá, mə́ tə́ən kíìn mɔ̀'nàá, kə̀ nɛɛ̀n aa ń zɛ̀ŋ mə́ rú roó. 42Mə́ gàb yàá, sɛŋ gə́ kóólé, ń tə́ mə́ kíìn zɛŋàá. Zá mə́ bàà n nwɔŋ aa yérə, nɛ́b zùúm aa ìì páá mə́ tə́ŋə́ yée bòórú, bɔ̀b boò gàb kíìn vɛ́nà, ámda ń tùm máà sùnú.»
43Zɔ̀ŋ aa bàà bɛ́' nwɔŋ bəraa gə́, bít gám nwɔŋ lɛgú, dɛ̀rə̀: «Lazarus, ǹ vúgà kíìn wərà!»
44Val vúgà kúnú, dun oò kə̀ nɛɛ̀n oò bəd tá, tabmíìn naà kə̀ val gɔ̀sá. Bít núù oò kɔ̀ báŋmíìn naà kə̀ gɔ̀sá. Yéésù bàà bə̀: «Ìì bìn Lazarus kúnú, bɔ̀b oò bɔ̀b kpaŋ̀ ɛɛ̀mbìá.»
Yahudu bəd wál bə̀ wúú nwɔŋ, Yéésù ko'ǹ lo'ǹmbìá
(Mata 26.1-5; Markus 14.1-2; Luka 22.1-2)
45 Yahudu bəd zùúm, nɛ́b aa bə̀ yaà Mariyama səǹ də tə́ŋú, bə̀ bé' in aa Yéésù mà' rə gə́, bít bə̀ bàgə̀ yàá. 46Zá nɛ́b kam boò tə́ŋú, ɛ̀m dá ìì bɔ̀b Farisa bəd gə̀b gə́, bít bə̀ ùd bə̀ in aa Yéésù mà' roó. 47Farisa bəd kə̀ láŋsə́ gààd bəd tá, dɛ̀d bə̀ wál bìl bəraa laa toorə zè kób də nɛ́b yíl bə̀ boò bərá, dɛ̀d bə̀ wál Dam bəd Wálke Gbà'á, bít bə̀ bàà: «Báan níì ma'ǹ gú? Kàandə, Nɛ́ŋ Váàndo aa yée mà' inkɔrə bəd tə́ zùúm! 48Bə́n daànnə̀ tə́ in aa í' rə ma'ǹ dáàn kə̀ númú kàangə́, nɛ́b aa zɔ̀ŋə yɛ́b bərə gə́ kóólé, bə̀ dáù kíìn bagàá, bít nɛ́b gbàád gɔ̀mnà Roma bə̀ bəd yaà bə̀ dá Vɛnɛ́b wúl gbà'á bə́n aa kíìn wɔbàá, bə̀ dá yɛ́b bə́n kíìn yɛɛlàá.»
49Nɛ́ŋə̀ nə́ŋ̀ boò tə́ŋú, nə́gə́l oò Kaifa. Zèd də bərə, oòra kùmsə̀n láŋsə́ gààd gbà'á, bàà bə̀: «Íí gàb in nə́ŋ̀má sé. 50Gabm̀bə̀ aa dá sɔɔ̀n də gə́, nɛ́ŋə̀ nə́ŋ̀ val oò kò'ù sə̀n nɛ́b zùúm bòórú, kə̀ yɛ́b kə̀ zɔ̀ŋtá yɛɛ̀l bə̀ rə, íí gàb sínì?» 51(Bàà nwɔŋ aarə, kə̀ í'sɛ̀l oò bə̀ ní gá. Zá sɛŋ aa kùm láŋsə́ gààd gbà'á zèd də bərə, gbád bàà gə́, Val oò kò' Yéésù kúnú, Yahudu bəd bòórú. 52Bít yɛ́b aa yée bə̀ ní gá, zá bɔbm̀ wáàlǹmbə̀ Vɛnɛ́b yɛb bəraa sa' zɔ̀ŋə yɛ́b bərə gə́ kóólé si' nə́ŋ̀ní.)
53Sɔ̀d nyàm aarə bəní, Yahudu bəd nɛ́b yíl bə̀ bəd wál bə̀ dúg taà gúsá, Yéésù lo'ǹmbìá. 54Kə̀ taàbìá, Yéésù gəə̀l wáá taà Yahudu bəd tə́ŋə́ sɔ̀ŋ sé. Zá' ɛ̀m zɔ̀ŋ nə́ŋ̀ gɔ̀ŋ ba, fɔ̀gú, bìl aa bə̀ dɛ̀d Efrayim də rú. Dáá kùm wərə̀ kə̀ nɛ́b sáànmbə̀ oò bəd tá.
55 Yahudu bəd wálke aa bə̀ dɛ̀d Paska rə, tə́ kíìn wə́ə́nàá. Bít nɛ́b zùúm bəd vúgə́là zɔ̀ŋ gɔ̀ŋ gɔ̀ŋ, bə̀ ɛ̀m Urusalima bìlú, láŋsə́ dáàn ma'ǹmbìá, Paska dá wə́ə̀n gə́ roó, bɔ̀b si' boò bí'ǹmbə̀ gìdń Vɛnɛ́b númú. 56Bə̀ sàà Yéésù ra, bít sɛŋ də, bɔ̀b bə̀ tə́ láŋsə́ wúuú. Bə̀ dɛ̀d ɔ̀dnə́ŋ̀ bəd boò bòdba, bə̀ bàà: «Íí sèl tə́ leè gú? Dáà kíìn yaànà wálke rú náà, kóó yaà géè?»
57 Láŋsə́ gààd bəd kə̀ Farisa bəd gə̀b tá, bə̀ bàà nɛ́b bəd gə́, dáà nɛ́ŋə̀ nə́ŋ̀ gàb zɔ̀ŋ aa Yéésù kùm bərəì gə́, oò bàà bənə́ kúnú, bɔ̀b oò bə̀ dáàn ko'ǹmbìá.
Àwon tá yàn lọ́wọ́lọ́wọ́ báyìí:
Yohana 11: SLNT98
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Nouveau Testament en Samba Leko © Alliance Biblique du Cameroun, 1998.
Yohana 11
11
Lazarus valá
1Nɛ́ŋ váàndo nə́ŋ̀, bə̀ dɛ̀rə̀ Lazarus, ləə mará, kùm Betaniya, bìl aa Mariyama kə̀ mɔ̀mmà oò Marta tá, bə̀ kùmà rú roó. 2(Mariyama kùmsə̀n nɛ́ŋ kéèndo aa dá urdi zadǹ Báátììkpɛ̀ŋ dun ba, bít dá tədǹ kə̀ yíl gí' oò roó. Kun váàn oò Lazarus ləə sə̀n mará.) 3Kun kɛ́ɛ̀m oò bəraa iirə yée, ìì tùm nɛ́ŋə̀ nə́ŋ̀, dáá oò bàà Yéésù: «Báátììkpɛ̀ŋá, ɔ̀dzéd í'sɛ̀lbə̀ ń də, tə́ kə̀ mará.»
4Zɔ̀ŋ aa Yéésù kìì nwɔŋ aa gə́, bàà: «Lazarus maraa yée, lò'ù gá. Zá tù' oòrə, dá Vɛnɛ́b kpɛŋsɛ́l bə̀ kaŋsɛ́l laa nyɛdkè i'nàá, bít dá Vɛnɛ́b Wàà kaŋsɛ́l laa nyɛdkè i'ǹ nɛ́b bəd núùrú.»
5Yéésù í' Marta kə̀ kudvɛɛ̀l oò Mariyama tá, bít kə̀ Lazarus tá. 6Zá zɔ̀ŋ aa kìì bə̀ Lazarus ləə tə́ mad gə́, kùm náŋ sɛŋ iira, zɔ̀ŋ aa kùm bərə ba. 7Bít bòórú oò gə́, bàà nɛ́b sáànmbə̀ oò bəd: «Kid báà bídǹ kíìn Yahudiya yɛ́b ba!»
8 Nɛ́b sáànmbə̀ oò bəd kè' bə̀ í'ù: «Nɛ̀ná, sɛŋ máá ká' sé, Yahudu bəd nɛ́b yíl bə̀ bəd sàànnà taà laàn lo'ǹmbə̀ kə̀ bəŋá. Bít ń í' kidǹbídǹmbə̀ wərə̀ ní sɔ̀ŋ wa?»
9Yéésù kè' í' bə̀, bàà: «Nyàm nə́ŋ̀ní, ba' wàà tə́ kób zè iira. Kàan sínì? Nɛ́ŋə̀ ɛ̀m tə́ nyàámbərə̀ gə́, tà' dun wàà yíl gá. Kàandə, bé' laa nyɛdkè aa zɔ̀ŋə yɛ́b bəroó. 10Zá nɛ́ŋə̀ ɛ̀m tə́ tígə́lə́ gə́, tà' dun wàà yíl kúnú. Kàandə, laa nyɛdkè oò naà sé.»
11Yéésù bàà bə̀ nwɔŋ bəraa gə́, bít bàà zəg sɔ̀ŋ: «Ɔ̀dzéd bə́n Lazarus ləə ləəm yàá; zá dɛ̀d máù kíìn dáàn lɛ́màá.»
12 Nɛ́b sáànmbə̀ oò bəd kè' bə̀ í'ù: «Báátììkpɛ̀ŋá, dáà ləə tə́ ləəm ní gə́, dákíìn gágàá.»
13Yéésù í' baànmbə̀ gə́, Lazarus val kò'ù yàá. Zá nɛ́b sáànmbə̀ oò bəd sèl gə́, gám bənə́ nwɔŋ tə́ ləəm ləə̀nmbə̀ sɔ̀ɔ̀n yílú. 14Kàanyée gə́, Yéésù bàà bə̀ nyɛdkè: «Lazarus val kò'ù yàá. 15Mə́ tə́ kə̀ tɛ́m làmkè kə̀ aíra, mə́ wərə̀ síndoó. Kə̀ aakíin də, íí dáá mə́ taà bagàá. Báà ɛɛ̀m oò sunú.»
16Kàanyée gə́, Tomas aa bə̀ dɛ̀rə̀ wàà bàrə̀b də, bàà nɛ́b sáànmbə̀ kambəd: «Báà ɛɛ̀m wərà, obə́n kɔ̀ val dá oò kò' bə́n kə̀ nɛ̀n bə́n tá!»
Yéésù kùmsə̀n díímke valə́ bìá, bít kùmsə̀n gɔ̀ŋsá
17Zɔ̀ŋ aa Yéésù yaà wə́ə́ Betaniya bìlə́ gə́, bɔ̀b bə̀ lə̀ə̀ Lazarusì sààrú gbòód, mà'ì sɛŋ naara. 18Betaniya bìl pè' tə́ kə̀ Urusalima bìl tá, wə́ə́ kílomɛ́tà toorə sé. 19Bít Yahudu bəd zùúm, bə̀ yaà Marta sunú, kə̀ Mariyama sunú, boò bə̀ yaàn tɛ́'ǹmbìá, kun váàn boò val kò'ù yéroó.
20Zɔ̀ŋ aa Marta kìì Yéésù yaà tə́ kíìn wə́ə̀n gə́, zá' ɛ̀m dáàn sáŋ̀mbə̀ kə̀ oòra. Zá Mariyama gə́, kùm yiìl ní. 21Marta bàà Yéésù: «Báátììkpɛ̀ŋá, dáà ń kùm tə́ zɔ̀ŋə ní gə́, kun váàn máà yée val kò'ù gá. 22Zá mə́ gàb də, kóó bə́ŋyée má, Vɛnɛ́b dáan in aa ń dɛ̀rə̀ rə kíìn piìn kóólé.»
23Yéésù kè' í'ù: «Kun váàn ń dákíìn díìm valú.»
24Marta kè' í'ù: «Mə́ gàb yàá dákíìn díìm valú, sɛŋ aa val bəd dá díìm kə̀ kùrú, bít sɛŋ aa Vɛnɛ́b dá nɛ́b bəd kóólé fágǹ bəroó.»
25Yéésù bààù: «Máára mə́ kùmsə̀n díímke valə́ bìá, kə̀ gɔ̀ŋsá. Màn aa bàg mə́ rə, dá kuùm kə̀ gɔ̀ŋsá, kóó val oò kò'ù kúnú. 26Bít nɛ́ŋə̀ aa kùm tə́ kə̀ gɔ̀ŋsá, bàg mə́ì rə, val kò'ù gá sə́g sə́g. Ń kè' nwɔŋ aarə yèè?» 27Marta kè' í': «Èè, Báátììkpɛ̀ŋá mə́ kè' yàá, ámda ń kùmsə̀n Krístù, ń Vɛnɛ́b Wàà aa dáà yaànà zɔ̀ŋə yɛ́b bəroó.»
Yéésù kpə̀ə̀ Lazarus valá
28Zɔ̀ŋ aa Marta gám tá' nwɔŋ kə̀ aakíin gə́, zá' ɛ̀m kudvɛɛ̀l oò Mariyama dɛdǹmbìá, bít bɔ̀n bààù kúnú: «Nɛ̀n tə́ zɔ̀ŋə, bít bə̀ ǹ dáá kúnú.»
29Zɔ̀ŋ aa Mariyama kìì nwɔŋ bəraa kàangə́, zá' lɛgú, ɛ̀m kə̀ báŋ Yéésù sunú. 30(Bə́ŋ̀ Yéésù pìì bìlə́ sé, zá kùm tə́ zɔ̀ŋ aa Marta dá sáŋ̀ bərə bə ní.) 31Zɔ̀ŋ aa Yahudu Urusalima bə̀ kam bəraa bə̀ kùm yiìl kə̀ Mariyama tə́, oò bə̀ tɛ́'ǹmbə̀ rə, bə̀ bé'ù zá' tə́ vúgǹ kə̀ báŋ yée gə́, bə̀ bàgə̀ bòórú. Bə̀ sèl gə́, bə̀ bàà nyà'aa tə́ ɛɛ̀m sàà ba, dáàn kpəə̀nmbə̀ wərà.
32Zɔ̀ŋ aa Mariyama yaà wə́ə́ zɔ̀ŋ aa Yéésù kùm bərə gə́, bé'ù gə́, yaà pí' oò dun ba, bít bààù: «Báátììkpɛ̀ŋá, dáà ń tə́ zɔ̀ŋə gə́, kun váàn máà val kò'ù gá.»
33Yéésù bé'ù tə́ kíìn kpəənàá, bít Yahudu bəraa kùm kə̀ boò tə́ wúu rə kɔ̀, ìì tə́ kíìn kpəənàá. Búúd yíl na'ùwì gbàákù, 34bít dɛ̀d bə̀: «Íí lə̀ə̀ù tə́ bínì gú?» Kè' bə̀ í'ù: «Báátììkpɛ̀ŋá, yaàn ɛ̀g kúnú.»
35Yéésù kpə̀ə̀ kúnú. 36Yahudu bəd ìì bàà: «Ìì ɛ̀g nɛɛ̀n aa í'ù rú roó!»
37Zá nɛ́b kam boò tə́ŋú, ìì bàà: «Oòra kèèrà sə̀n nyəd váàn núùá. Bít kə̀ níìbə̀ bán taà val daŋ̀mbə̀ oò kò' Lazarus sí gú?»
Yéésù díím Lazarus valú
38Yéésù tɛ́m nyágə́lə̀ gbàákù sɔ̀ŋ yée gə́, zá' ɛ̀m sàà ba. Sàà rə, kìínmbə̀ vɔ̀g lib kíin, bə̀ ke' gú' oòrə kə̀ bəŋ pɛgə́lá. 39Yéésù bàà: «Pà' ìì zá' bəŋ də kúnú.» Marta val kun kéèn də, bàà: «Báátììkpɛ̀ŋá, bə́ŋyée dákíìn so'nàá. Kàandə, ləəì sààrú wərə̀ sɛŋ naara.»
40Yéésù kè' í'ù: «Mə́ bàà n sínì, ń bàg mə́ì gə́, ń dá Vɛnɛ́b kaŋsɛ́l laa nyɛdkè kíìn bé'ǹ doó?»
41Pà' bə̀ zá' bəŋá. Yéésù zá' núù lɛgə́ poú, bít bàà: «Báá, mə́ tə́ən kíìn mɔ̀'nàá, kə̀ nɛɛ̀n aa ń zɛ̀ŋ mə́ rú roó. 42Mə́ gàb yàá, sɛŋ gə́ kóólé, ń tə́ mə́ kíìn zɛŋàá. Zá mə́ bàà n nwɔŋ aa yérə, nɛ́b zùúm aa ìì páá mə́ tə́ŋə́ yée bòórú, bɔ̀b boò gàb kíìn vɛ́nà, ámda ń tùm máà sùnú.»
43Zɔ̀ŋ aa bàà bɛ́' nwɔŋ bəraa gə́, bít gám nwɔŋ lɛgú, dɛ̀rə̀: «Lazarus, ǹ vúgà kíìn wərà!»
44Val vúgà kúnú, dun oò kə̀ nɛɛ̀n oò bəd tá, tabmíìn naà kə̀ val gɔ̀sá. Bít núù oò kɔ̀ báŋmíìn naà kə̀ gɔ̀sá. Yéésù bàà bə̀: «Ìì bìn Lazarus kúnú, bɔ̀b oò bɔ̀b kpaŋ̀ ɛɛ̀mbìá.»
Yahudu bəd wál bə̀ wúú nwɔŋ, Yéésù ko'ǹ lo'ǹmbìá
(Mata 26.1-5; Markus 14.1-2; Luka 22.1-2)
45 Yahudu bəd zùúm, nɛ́b aa bə̀ yaà Mariyama səǹ də tə́ŋú, bə̀ bé' in aa Yéésù mà' rə gə́, bít bə̀ bàgə̀ yàá. 46Zá nɛ́b kam boò tə́ŋú, ɛ̀m dá ìì bɔ̀b Farisa bəd gə̀b gə́, bít bə̀ ùd bə̀ in aa Yéésù mà' roó. 47Farisa bəd kə̀ láŋsə́ gààd bəd tá, dɛ̀d bə̀ wál bìl bəraa laa toorə zè kób də nɛ́b yíl bə̀ boò bərá, dɛ̀d bə̀ wál Dam bəd Wálke Gbà'á, bít bə̀ bàà: «Báan níì ma'ǹ gú? Kàandə, Nɛ́ŋ Váàndo aa yée mà' inkɔrə bəd tə́ zùúm! 48Bə́n daànnə̀ tə́ in aa í' rə ma'ǹ dáàn kə̀ númú kàangə́, nɛ́b aa zɔ̀ŋə yɛ́b bərə gə́ kóólé, bə̀ dáù kíìn bagàá, bít nɛ́b gbàád gɔ̀mnà Roma bə̀ bəd yaà bə̀ dá Vɛnɛ́b wúl gbà'á bə́n aa kíìn wɔbàá, bə̀ dá yɛ́b bə́n kíìn yɛɛlàá.»
49Nɛ́ŋə̀ nə́ŋ̀ boò tə́ŋú, nə́gə́l oò Kaifa. Zèd də bərə, oòra kùmsə̀n láŋsə́ gààd gbà'á, bàà bə̀: «Íí gàb in nə́ŋ̀má sé. 50Gabm̀bə̀ aa dá sɔɔ̀n də gə́, nɛ́ŋə̀ nə́ŋ̀ val oò kò'ù sə̀n nɛ́b zùúm bòórú, kə̀ yɛ́b kə̀ zɔ̀ŋtá yɛɛ̀l bə̀ rə, íí gàb sínì?» 51(Bàà nwɔŋ aarə, kə̀ í'sɛ̀l oò bə̀ ní gá. Zá sɛŋ aa kùm láŋsə́ gààd gbà'á zèd də bərə, gbád bàà gə́, Val oò kò' Yéésù kúnú, Yahudu bəd bòórú. 52Bít yɛ́b aa yée bə̀ ní gá, zá bɔbm̀ wáàlǹmbə̀ Vɛnɛ́b yɛb bəraa sa' zɔ̀ŋə yɛ́b bərə gə́ kóólé si' nə́ŋ̀ní.)
53Sɔ̀d nyàm aarə bəní, Yahudu bəd nɛ́b yíl bə̀ bəd wál bə̀ dúg taà gúsá, Yéésù lo'ǹmbìá. 54Kə̀ taàbìá, Yéésù gəə̀l wáá taà Yahudu bəd tə́ŋə́ sɔ̀ŋ sé. Zá' ɛ̀m zɔ̀ŋ nə́ŋ̀ gɔ̀ŋ ba, fɔ̀gú, bìl aa bə̀ dɛ̀d Efrayim də rú. Dáá kùm wərə̀ kə̀ nɛ́b sáànmbə̀ oò bəd tá.
55 Yahudu bəd wálke aa bə̀ dɛ̀d Paska rə, tə́ kíìn wə́ə́nàá. Bít nɛ́b zùúm bəd vúgə́là zɔ̀ŋ gɔ̀ŋ gɔ̀ŋ, bə̀ ɛ̀m Urusalima bìlú, láŋsə́ dáàn ma'ǹmbìá, Paska dá wə́ə̀n gə́ roó, bɔ̀b si' boò bí'ǹmbə̀ gìdń Vɛnɛ́b númú. 56Bə̀ sàà Yéésù ra, bít sɛŋ də, bɔ̀b bə̀ tə́ láŋsə́ wúuú. Bə̀ dɛ̀d ɔ̀dnə́ŋ̀ bəd boò bòdba, bə̀ bàà: «Íí sèl tə́ leè gú? Dáà kíìn yaànà wálke rú náà, kóó yaà géè?»
57 Láŋsə́ gààd bəd kə̀ Farisa bəd gə̀b tá, bə̀ bàà nɛ́b bəd gə́, dáà nɛ́ŋə̀ nə́ŋ̀ gàb zɔ̀ŋ aa Yéésù kùm bərəì gə́, oò bàà bənə́ kúnú, bɔ̀b oò bə̀ dáàn ko'ǹmbìá.
Àwon tá yàn lọ́wọ́lọ́wọ́ báyìí:
:
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Nouveau Testament en Samba Leko © Alliance Biblique du Cameroun, 1998.