Luka 18
18
Valkéén nə́ŋ̀ kə̀ nɛ́d fágə́n bə̀ ma'ǹ nə́ŋ̀ tá zagəmá
1Bòórú gə́, Yéésù sán bə̀ zagəm aa yóo, bɔ̀b boò dàà Vɛnɛ́b nyɛɛ̀mbə̀ sí, bít boò bɔ̀' váàndo boò sí, sə́g sə́g. 2Bàà bə̀: «Nɛ́d fágə́n bə̀ ma'ǹ nə́ŋ̀ kùm bìl nə́ŋ̀ú, nùù Vɛnɛ́b gá, bít ləə nɛ́ŋə̀ nə́ŋ̀má gá kɔ̀. 3Bìl aarə rú kɔ̀ valkéèn nə́ŋ̀ wərà, yaà sáá oò sunú, sɛŋ gə́ kóólé, bààù: ‹Ǹ fág mə́ nwɔŋ kə̀ ɔ̀dmáàn mə́ra.›
4«Sɛŋ zùúm, nɛ́d fágə́n bə̀ ma'ǹ məə bée. Bítsɔ̀ŋ, bàà yíl oò: ‹Vɛ́nà, mə́ nùù Vɛnɛ́b gá, bít mə́ ləə nɛ́ŋə̀ nə́ŋ̀má gá. 5Zá valkéèn aa yaà tə́ mə́ vɔgə̀l sáàn yée, máá nwɔŋ oò kíìn fágàá. Síngə́, dàà líbm̀ yaànmbə̀ gá, bít dá mə́ kíìn mú'ǹ gbàákù.› »
6Kàanyée gə́, Báátììkpɛ̀ŋ bàà nɛ́b tù' bə̀ ma'ǹ oò bəd: «Kìì ìì kùd kíìn sɔ̀ɔ̀nkè, nwɔŋ aa nɛ́d fágə́n bə̀ aa kə̀ wɔ̀ɔ̀lə̀ naà síndə tə́ baàn doó. 7Vɛnɛ́b nɛ́b bəd kpə̀ə̀ bə̀ tə́ Vɛnɛ́b dɛdǹ tígə́l kə̀ nyàámbərə̀ tá. Sɛŋ gə́ kóólé, Vɛnɛ́b dá bə̀ in aa tə́ wɔ̀ɔ̀lə̀ rə piinàá. Bít Vɛnɛ́b náŋ nwɔŋ boò bəd ke'ǹ í'ǹmbə̀ gá. 8Mə́ tə́ ii kíìn baanàá, Vɛnɛ́b dá bə̀ in wɔ̀ɔ̀lə̀ ma'nàá, bít dá bə̀ ma'ǹ kə̀ báŋ. Zá sɛŋ aa nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə yaaì rə, dá bée nɛ́b tɛ́mbagké bə̀ bəd bɔbm̀ zɔ̀ŋə yɛ́b beè?»
Farisa váàn nə́ŋ̀ zagəmá, kə̀ nɛ́d ba'káám bə̀ ke'ǹ nə́ŋ̀ zagəmá
9Yéésù nàà zagəm nə́ŋ̀, kə̀ nɛ́b kam bəraa bə̀ zíg yíl boò bənə́ nɛ́b wɔ̀ɔ̀lə̀ bərá, bít bə̀ ɛ̀g nɛ́b kambəd kìínmbə̀ in tɛdń kíin doó. Bàà: 10«Nɛ́b vɔ̀ɔ̀m bəd iira, na' ìì ɛ̀m láŋsə́ wúuú, Vɛnɛ́b dáàn nyɛɛ̀mbìá. Nɛ́ŋə̀ nə́ŋ̀ gə́, Farisa; nɛ́ŋə̀ ɔ̀d kɔ̀, nɛ́d ba'káám bə̀ ke'ǹná.
11«Farisa váàn dìì lɛgú, bít nyɛ̀m Vɛnɛ́b kə̀ aakíin: ‹Báá Vɛnɛ́bá, mə́ mɔ̀' n yàá, kə̀ nɛɛ̀n aa máá gə́, mə́ kùm kìínmbə̀ nɛ́b kam bəraa kíin sín yóo. Nɛ́b aarə, boò gə́, bə̀ lííro bərá, bə̀ nɛ́b invaksə́ bə̀ ma'ǹ bərá, bít nɛ́b labsə̀ bə̀ bərá. Mə́ mɔ̀' n yàá kə̀ nɛɛ̀n aa mə́ kùm kìínmbə̀ nɛ́b ba'káám bə̀ ke'ǹ aakíin sín yóo. 12Sɛŋ nə́ŋsínə̀ dá ma'ǹ gə́, mə́ gíd in sɛŋ iira. Bít mə́ mà' tù', mə́ bɔ̀b inì kób gə́, vúŋ mə́ pii n nə́ŋ̀.›
13«Nɛ́d ba'káám bə̀ ke'ǹ gə́, dìì zɔ̀ŋ bùúrá, bít bág yílə yɛ́b ba. Zá oò gə́, zìb nɛɛ̀n gíìlə́ kə̀ tɛ́m lɔbkèá, bít bàà: ‹Báá Vɛnɛ́bá, ɛ̀g ǹ bé' mə́ búúrá. Máára mə́ kùmsə̀n nɛ́d invaksə́ bə̀ ma'ǹná.› »
14Yéésù bàà zəg sɔ̀ŋ: «Mə́ tə́ ii kíìn baanàá, nɛ́ŋ váàndo aa yée, Vɛnɛ́b zígə̀ tə́ kìínmbə̀ nɛ́d wɔ̀ɔ̀lə̀ kíin, sɛŋ aa tə́ bídǹ oò yiìl loó. Zá Farisa váàn aa gə́, Vɛnɛ́b zígə̀ kə̀ nɛ́d wɔ̀ɔ̀lə̀ kíin sé. Kàandə, kóó nɛ́ɛ̀réè, káŋ yíl oòì gə́, Vɛnɛ́b dáù bí'ǹ dùú, bít màn aa bí' yíl oò dùù rə kɔ̀, Vɛnɛ́b dáù ná'ǹ lɛgú.»
Yéésù zíg yɛb bɛ̀ŋ́sə̀ bəd nɛɛ̀n yílú
(Mata 19.13-15; Markus 10.13-16)
15Nɛ́b bəd àà yɛb bɛ̀ŋ́sə̀ bəd Yéésù sunú, bɔ̀b oò zíg bə̀ nɛɛ̀n yílú. Nɛ́b sáànmbə̀ bəd bé' bə̀ gə́, bít ìì ál bə̀ kúnú. 16Zá Yéésù dɛ̀d àà yɛb bɛ̀ŋ́sə̀ bəd oò sunú, bít bàà nɛ́b sáànmbə̀ oò bəd: «Ìì dàà yɛb bɛ̀ŋ́sə̀ bəd boò yaà máá sunú! Ìì dàŋ bə̀ sí. Kàandə, Vɛnɛ́b ləə gààd tə́ nɛ́b aa kìínmbə̀ yɛb bɛ̀ŋ́sə̀ bəraa kíin də yílú. 17Mə́ tə́ ii kíìn baanàá, aarə nwɔŋ sɔ̀ɔ̀ná' Màn aa kè' Vɛnɛ́b oò ləə gààd obəǹ yílú, kìínmbə̀ wàà bɛ̀ŋ́sə̀wà kè' rə kíin síndə, bán piìnmbə̀ Vɛnɛ́b Gààrú gá.»
Nɛ́d váàndo gbaŋə̀ bìá
(Mata 19.16-30; Markus 10.17-31)
18Yahudu bəd gààd nə́ŋ̀ dɛ̀d Yéésù: «Nɛ̀n sɔ̀ɔ̀ná, má níì ma'n, má taà gɔ̀ŋsə́ aa bɛ́d bə gá rə bɔbm̀ gú?»
19Yéésù bààù: «Kə̀ níìbə̀ ń dɛ̀d mə́ taà nɛ̀n sɔ̀ɔ̀n gú? Nɛ́ŋə̀ nə́ŋ̀má nɛ́ŋə̀ sɔ̀ɔ̀n sé, Vɛnɛ́b oò nə́ŋ̀ní tə́ŋtə́ŋ, kùmsə̀n nɛ́ŋə̀ sɔ̀ɔ̀ná! 20Ń gàb Vɛnɛ́b indaŋ̀mbə̀ bəd yàá: ‹Ǹ mà' labsə̀ sí, ǹ lò' yíl sí, ǹ pa' lííro sí, ǹ mà' sedako gúsuúm bə̀ nɛ́ŋə̀ yílə́ sí, ǹ káŋ báá ḿ da, kə̀ nà'á ḿ da.› »
21Màn váàn kè' í' bàà: «Indaŋ̀mbə̀ bəraa kóólé, mə́ kò' yàá, bɔ̀b bə́ŋ̀ mə́ tə́ wàà də̀bá.»
22Bòórú Yéésù kìì nwɔŋ aa kàangə́, bààù: «Nyɛ́d n tə́ in ɔ̀d nə́ŋ̀ ma'ǹmbə̀ sɔ̀ŋ' Pú' dá ǹ gə́l gbaŋə̀ bəraa ń kə̀ naà rə gə́ kóólé, ǹ gàm basaa ń bɔ̀b də nɛ́b búúd bə̀ bərá; kàandə, ń dá gbaŋə̀ bəd dáàn bɔbm̀ lɛgə́ poú; bít yaà ǹ bàg mə́ kúnú.»
23Zá zɔ̀ŋ aa màn váàn də kìì nwɔŋ bəraa Yéésù bààù rə kàangə́, tɛ́m nwuù yàá; kàandə, màn váàn aarə, tə́ kə̀ gbaŋə̀ naà gbàákù. 24Zɔ̀ŋ aa Yéésù bé' nɛ́ŋə̀ aarə tɛ́m nwuùì yée gə́, bít bàà: «Gbò'ì gbàákù, nɛ́b gbaŋə̀ bə̀ bəd dáàn piìnmbə̀ Vɛnɛ́b gààrú. 25Dá kuùm ɔ̀gkeá, gɛloba piìnmbə̀ zìlə̀wà nyíírú, kə̀ nɛ́d gbaŋə̀ bə̀ piìnmbə̀ Vɛnɛ́b gààrú.»
26Nɛ́b aa tə́ù zɛŋ̀ də, ìì bàà: «Zá tə́ kàangə́, nɛ́ɛ̀réè dá sə̀n báàn súùnmbə̀ gú?»
27Yéésù kè' í': «In aa nɛ́b bəd bán ma'ǹmbə̀ gá rə, Vɛnɛ́b gə́, dá kíìn báàn ma'ǹmbìá.»
28Kàanyée gə́, Piyɛr bàà: «Ǹ ɛ̀ga, zá' bə́ dàà in bəraa bə́ kə̀ naà rə yàá, bít bə́ í' kuùmbə̀ nɛ́b sáànmbə̀ ḿ bərá.»
29Yéésù bàà bə̀: «Mə́ tə́ ii kíìn baanàá, aarə nwɔŋ sɔ̀ɔ̀nà, dáà nɛ́ŋə̀ zá' dàà bìl oò yàá, sínkɔ̀ kéèn oò yàá, kudvɛɛ̀l oò bərì kə̀ níí oò bəd tá, báá oòì kə̀ nà'á oò tá, bít kə̀ yɛb oò bəd tá, Vɛnɛ́b Gààd nwɔŋ bòórú gə́, 30dá in aa kàn aa bəraa rə bɔbm̀ sɛŋ aa bə́ŋyée rú, bít dá gɔ̀ŋsə́ aa bɛ́d gá rə bɔbm̀ sɛŋ aa dáà yaànà númú rə ba.»
Yéésù bíd yaà tə́ baàn sɔ̀ŋ, val dá bəǹ kíìn ko'nàá, bít bəǹ dákíìn díìm valú
(Mata 20.17-19; Markus 10.32-34)
31Yéésù ɛ̀m kə̀ nɛ́b sáànmbə̀ oò bəraa kób zè iirə rə tá, bít bàà bə̀: «Ìì ɛ̀ga, bə́n tə́ən na'ǹ ɛɛ̀m Urusalima bìlú. Vɛnɛ́b gbantumsə̀ bəd nwɔŋ bəraa bád bə̀ dàà boò núúboòrú, nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə yílə́ rə, dákíìn wə́ə́nàá. 32Kàandə, kò' bə̀ dá nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə piìn nɛ́b aa bàg Vɛnɛ́b síndə nɛɛ̀n tɛ́mú. Lò' bə̀ dáù kèéd bí'nàá, bə̀ dáù kíìn dúlàá, bít bə̀ dáù sudn tó'ǹ ba. 33Bə̀ dáù kíìn zibàá, bòórú gə́, bə̀ dáù kíìn lo'nàá; bít sɛŋ toorə bə gə́, dákíìn díìm valú.»
34Zá nɛ́b sáànmbə̀ oò bəd gə́, Vɛnɛ́b mə́' bə̀ nwɔŋ wàà lɛ̀ɛ́ŋə̀ rə tə́ bée, bít bə̀ gàb nɛɛ̀n aa nwɔŋ bəraa rə í' baànmbə̀ rú rə sé.
Yéésù gáŋ nyəd nə́ŋ̀ núù Yeriko bìlú
(Mata 20.29-34; Markus 10.46-52)
35Zɔ̀ŋ aa Yéésù ɛ̀m yaà wə́ə́ Yeriko bìl kàd bə gə́, nyəd nə́ŋ̀ kùm kpaŋ̀ kàd ba, bít tə́ in nyɛmàá. 36Nyəd kìì nɛ́b zùúm dìímsə̀ tə́ taàn kpaŋə́ gə́, dɛ̀d nɛ́b kam aa wərə̀ rə, níì taà sìnì? 37Nɛ́b bəd kè' bə̀ í'ù: «Yéésù Nazaratu bə̀ tə́ sə̀n taanàá.»
38Kàanyée gə́, zá' páá kpə̀ə́ǹ lɛgú, dɛ̀d: «Yéésù, Dauda Wàá, ɛ̀g ǹ bé' mə́ búúrá!»
39Nɛ́b bəraa ké' kpaŋ̀ Yéésù númú rə, ìì álə̀ kúnú, bɔ̀b oò tɛb nwɔŋá. Zá oò gə́, məə kíìn tɛbm̀bìá, kpàm nwɔŋ lɛgə́ gbàákù sɔ̀ŋ: «Dauda Wàá, ɛ̀g m̀ bé' mə́ búúrá!»
40Yéésù dìì gə́, bít bàà nɛ́b aa bə̀ pe' kə̀ oò tə́ rə, boò ààùwà kúnú. Zɔ̀ŋ aa nyəd gbad yaà wə́ə́ gə́, Yéésù dɛ̀rə̀: 41«Ń í' máà mà' n níì gú?»
Kè' í', bàà: «Báátììkpɛ̀ŋá, mə́ í' núù mə́ bəd boò keèd kúnú.»
42Bít Yéésù bààù: «Núù ń bəd boò keèd kúnú! Tɛ́mbagké ń gáŋ n si' yàá.»
43Kə̀ nwɔŋ aa nuù yée kíinní, núù oò bəd keèd yàá, bít bàg Yéésù kə̀ Vɛnɛ́b káŋ̀mbìá. Zɔ̀ŋ aa nɛ́b zùúm bé' nɛ́ŋə̀ aa núù keèd gə́, bə̀ pìì Yéésù bagǹmbə̀ bòórú, bít bə̀ pìì Vɛnɛ́b káŋ̀mbə̀ kɔ̀.
Àwon tá yàn lọ́wọ́lọ́wọ́ báyìí:
Luka 18: SLNT98
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Nouveau Testament en Samba Leko © Alliance Biblique du Cameroun, 1998.
Luka 18
18
Valkéén nə́ŋ̀ kə̀ nɛ́d fágə́n bə̀ ma'ǹ nə́ŋ̀ tá zagəmá
1Bòórú gə́, Yéésù sán bə̀ zagəm aa yóo, bɔ̀b boò dàà Vɛnɛ́b nyɛɛ̀mbə̀ sí, bít boò bɔ̀' váàndo boò sí, sə́g sə́g. 2Bàà bə̀: «Nɛ́d fágə́n bə̀ ma'ǹ nə́ŋ̀ kùm bìl nə́ŋ̀ú, nùù Vɛnɛ́b gá, bít ləə nɛ́ŋə̀ nə́ŋ̀má gá kɔ̀. 3Bìl aarə rú kɔ̀ valkéèn nə́ŋ̀ wərà, yaà sáá oò sunú, sɛŋ gə́ kóólé, bààù: ‹Ǹ fág mə́ nwɔŋ kə̀ ɔ̀dmáàn mə́ra.›
4«Sɛŋ zùúm, nɛ́d fágə́n bə̀ ma'ǹ məə bée. Bítsɔ̀ŋ, bàà yíl oò: ‹Vɛ́nà, mə́ nùù Vɛnɛ́b gá, bít mə́ ləə nɛ́ŋə̀ nə́ŋ̀má gá. 5Zá valkéèn aa yaà tə́ mə́ vɔgə̀l sáàn yée, máá nwɔŋ oò kíìn fágàá. Síngə́, dàà líbm̀ yaànmbə̀ gá, bít dá mə́ kíìn mú'ǹ gbàákù.› »
6Kàanyée gə́, Báátììkpɛ̀ŋ bàà nɛ́b tù' bə̀ ma'ǹ oò bəd: «Kìì ìì kùd kíìn sɔ̀ɔ̀nkè, nwɔŋ aa nɛ́d fágə́n bə̀ aa kə̀ wɔ̀ɔ̀lə̀ naà síndə tə́ baàn doó. 7Vɛnɛ́b nɛ́b bəd kpə̀ə̀ bə̀ tə́ Vɛnɛ́b dɛdǹ tígə́l kə̀ nyàámbərə̀ tá. Sɛŋ gə́ kóólé, Vɛnɛ́b dá bə̀ in aa tə́ wɔ̀ɔ̀lə̀ rə piinàá. Bít Vɛnɛ́b náŋ nwɔŋ boò bəd ke'ǹ í'ǹmbə̀ gá. 8Mə́ tə́ ii kíìn baanàá, Vɛnɛ́b dá bə̀ in wɔ̀ɔ̀lə̀ ma'nàá, bít dá bə̀ ma'ǹ kə̀ báŋ. Zá sɛŋ aa nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə yaaì rə, dá bée nɛ́b tɛ́mbagké bə̀ bəd bɔbm̀ zɔ̀ŋə yɛ́b beè?»
Farisa váàn nə́ŋ̀ zagəmá, kə̀ nɛ́d ba'káám bə̀ ke'ǹ nə́ŋ̀ zagəmá
9Yéésù nàà zagəm nə́ŋ̀, kə̀ nɛ́b kam bəraa bə̀ zíg yíl boò bənə́ nɛ́b wɔ̀ɔ̀lə̀ bərá, bít bə̀ ɛ̀g nɛ́b kambəd kìínmbə̀ in tɛdń kíin doó. Bàà: 10«Nɛ́b vɔ̀ɔ̀m bəd iira, na' ìì ɛ̀m láŋsə́ wúuú, Vɛnɛ́b dáàn nyɛɛ̀mbìá. Nɛ́ŋə̀ nə́ŋ̀ gə́, Farisa; nɛ́ŋə̀ ɔ̀d kɔ̀, nɛ́d ba'káám bə̀ ke'ǹná.
11«Farisa váàn dìì lɛgú, bít nyɛ̀m Vɛnɛ́b kə̀ aakíin: ‹Báá Vɛnɛ́bá, mə́ mɔ̀' n yàá, kə̀ nɛɛ̀n aa máá gə́, mə́ kùm kìínmbə̀ nɛ́b kam bəraa kíin sín yóo. Nɛ́b aarə, boò gə́, bə̀ lííro bərá, bə̀ nɛ́b invaksə́ bə̀ ma'ǹ bərá, bít nɛ́b labsə̀ bə̀ bərá. Mə́ mɔ̀' n yàá kə̀ nɛɛ̀n aa mə́ kùm kìínmbə̀ nɛ́b ba'káám bə̀ ke'ǹ aakíin sín yóo. 12Sɛŋ nə́ŋsínə̀ dá ma'ǹ gə́, mə́ gíd in sɛŋ iira. Bít mə́ mà' tù', mə́ bɔ̀b inì kób gə́, vúŋ mə́ pii n nə́ŋ̀.›
13«Nɛ́d ba'káám bə̀ ke'ǹ gə́, dìì zɔ̀ŋ bùúrá, bít bág yílə yɛ́b ba. Zá oò gə́, zìb nɛɛ̀n gíìlə́ kə̀ tɛ́m lɔbkèá, bít bàà: ‹Báá Vɛnɛ́bá, ɛ̀g ǹ bé' mə́ búúrá. Máára mə́ kùmsə̀n nɛ́d invaksə́ bə̀ ma'ǹná.› »
14Yéésù bàà zəg sɔ̀ŋ: «Mə́ tə́ ii kíìn baanàá, nɛ́ŋ váàndo aa yée, Vɛnɛ́b zígə̀ tə́ kìínmbə̀ nɛ́d wɔ̀ɔ̀lə̀ kíin, sɛŋ aa tə́ bídǹ oò yiìl loó. Zá Farisa váàn aa gə́, Vɛnɛ́b zígə̀ kə̀ nɛ́d wɔ̀ɔ̀lə̀ kíin sé. Kàandə, kóó nɛ́ɛ̀réè, káŋ yíl oòì gə́, Vɛnɛ́b dáù bí'ǹ dùú, bít màn aa bí' yíl oò dùù rə kɔ̀, Vɛnɛ́b dáù ná'ǹ lɛgú.»
Yéésù zíg yɛb bɛ̀ŋ́sə̀ bəd nɛɛ̀n yílú
(Mata 19.13-15; Markus 10.13-16)
15Nɛ́b bəd àà yɛb bɛ̀ŋ́sə̀ bəd Yéésù sunú, bɔ̀b oò zíg bə̀ nɛɛ̀n yílú. Nɛ́b sáànmbə̀ bəd bé' bə̀ gə́, bít ìì ál bə̀ kúnú. 16Zá Yéésù dɛ̀d àà yɛb bɛ̀ŋ́sə̀ bəd oò sunú, bít bàà nɛ́b sáànmbə̀ oò bəd: «Ìì dàà yɛb bɛ̀ŋ́sə̀ bəd boò yaà máá sunú! Ìì dàŋ bə̀ sí. Kàandə, Vɛnɛ́b ləə gààd tə́ nɛ́b aa kìínmbə̀ yɛb bɛ̀ŋ́sə̀ bəraa kíin də yílú. 17Mə́ tə́ ii kíìn baanàá, aarə nwɔŋ sɔ̀ɔ̀ná' Màn aa kè' Vɛnɛ́b oò ləə gààd obəǹ yílú, kìínmbə̀ wàà bɛ̀ŋ́sə̀wà kè' rə kíin síndə, bán piìnmbə̀ Vɛnɛ́b Gààrú gá.»
Nɛ́d váàndo gbaŋə̀ bìá
(Mata 19.16-30; Markus 10.17-31)
18Yahudu bəd gààd nə́ŋ̀ dɛ̀d Yéésù: «Nɛ̀n sɔ̀ɔ̀ná, má níì ma'n, má taà gɔ̀ŋsə́ aa bɛ́d bə gá rə bɔbm̀ gú?»
19Yéésù bààù: «Kə̀ níìbə̀ ń dɛ̀d mə́ taà nɛ̀n sɔ̀ɔ̀n gú? Nɛ́ŋə̀ nə́ŋ̀má nɛ́ŋə̀ sɔ̀ɔ̀n sé, Vɛnɛ́b oò nə́ŋ̀ní tə́ŋtə́ŋ, kùmsə̀n nɛ́ŋə̀ sɔ̀ɔ̀ná! 20Ń gàb Vɛnɛ́b indaŋ̀mbə̀ bəd yàá: ‹Ǹ mà' labsə̀ sí, ǹ lò' yíl sí, ǹ pa' lííro sí, ǹ mà' sedako gúsuúm bə̀ nɛ́ŋə̀ yílə́ sí, ǹ káŋ báá ḿ da, kə̀ nà'á ḿ da.› »
21Màn váàn kè' í' bàà: «Indaŋ̀mbə̀ bəraa kóólé, mə́ kò' yàá, bɔ̀b bə́ŋ̀ mə́ tə́ wàà də̀bá.»
22Bòórú Yéésù kìì nwɔŋ aa kàangə́, bààù: «Nyɛ́d n tə́ in ɔ̀d nə́ŋ̀ ma'ǹmbə̀ sɔ̀ŋ' Pú' dá ǹ gə́l gbaŋə̀ bəraa ń kə̀ naà rə gə́ kóólé, ǹ gàm basaa ń bɔ̀b də nɛ́b búúd bə̀ bərá; kàandə, ń dá gbaŋə̀ bəd dáàn bɔbm̀ lɛgə́ poú; bít yaà ǹ bàg mə́ kúnú.»
23Zá zɔ̀ŋ aa màn váàn də kìì nwɔŋ bəraa Yéésù bààù rə kàangə́, tɛ́m nwuù yàá; kàandə, màn váàn aarə, tə́ kə̀ gbaŋə̀ naà gbàákù. 24Zɔ̀ŋ aa Yéésù bé' nɛ́ŋə̀ aarə tɛ́m nwuùì yée gə́, bít bàà: «Gbò'ì gbàákù, nɛ́b gbaŋə̀ bə̀ bəd dáàn piìnmbə̀ Vɛnɛ́b gààrú. 25Dá kuùm ɔ̀gkeá, gɛloba piìnmbə̀ zìlə̀wà nyíírú, kə̀ nɛ́d gbaŋə̀ bə̀ piìnmbə̀ Vɛnɛ́b gààrú.»
26Nɛ́b aa tə́ù zɛŋ̀ də, ìì bàà: «Zá tə́ kàangə́, nɛ́ɛ̀réè dá sə̀n báàn súùnmbə̀ gú?»
27Yéésù kè' í': «In aa nɛ́b bəd bán ma'ǹmbə̀ gá rə, Vɛnɛ́b gə́, dá kíìn báàn ma'ǹmbìá.»
28Kàanyée gə́, Piyɛr bàà: «Ǹ ɛ̀ga, zá' bə́ dàà in bəraa bə́ kə̀ naà rə yàá, bít bə́ í' kuùmbə̀ nɛ́b sáànmbə̀ ḿ bərá.»
29Yéésù bàà bə̀: «Mə́ tə́ ii kíìn baanàá, aarə nwɔŋ sɔ̀ɔ̀nà, dáà nɛ́ŋə̀ zá' dàà bìl oò yàá, sínkɔ̀ kéèn oò yàá, kudvɛɛ̀l oò bərì kə̀ níí oò bəd tá, báá oòì kə̀ nà'á oò tá, bít kə̀ yɛb oò bəd tá, Vɛnɛ́b Gààd nwɔŋ bòórú gə́, 30dá in aa kàn aa bəraa rə bɔbm̀ sɛŋ aa bə́ŋyée rú, bít dá gɔ̀ŋsə́ aa bɛ́d gá rə bɔbm̀ sɛŋ aa dáà yaànà númú rə ba.»
Yéésù bíd yaà tə́ baàn sɔ̀ŋ, val dá bəǹ kíìn ko'nàá, bít bəǹ dákíìn díìm valú
(Mata 20.17-19; Markus 10.32-34)
31Yéésù ɛ̀m kə̀ nɛ́b sáànmbə̀ oò bəraa kób zè iirə rə tá, bít bàà bə̀: «Ìì ɛ̀ga, bə́n tə́ən na'ǹ ɛɛ̀m Urusalima bìlú. Vɛnɛ́b gbantumsə̀ bəd nwɔŋ bəraa bád bə̀ dàà boò núúboòrú, nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə yílə́ rə, dákíìn wə́ə́nàá. 32Kàandə, kò' bə̀ dá nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə piìn nɛ́b aa bàg Vɛnɛ́b síndə nɛɛ̀n tɛ́mú. Lò' bə̀ dáù kèéd bí'nàá, bə̀ dáù kíìn dúlàá, bít bə̀ dáù sudn tó'ǹ ba. 33Bə̀ dáù kíìn zibàá, bòórú gə́, bə̀ dáù kíìn lo'nàá; bít sɛŋ toorə bə gə́, dákíìn díìm valú.»
34Zá nɛ́b sáànmbə̀ oò bəd gə́, Vɛnɛ́b mə́' bə̀ nwɔŋ wàà lɛ̀ɛ́ŋə̀ rə tə́ bée, bít bə̀ gàb nɛɛ̀n aa nwɔŋ bəraa rə í' baànmbə̀ rú rə sé.
Yéésù gáŋ nyəd nə́ŋ̀ núù Yeriko bìlú
(Mata 20.29-34; Markus 10.46-52)
35Zɔ̀ŋ aa Yéésù ɛ̀m yaà wə́ə́ Yeriko bìl kàd bə gə́, nyəd nə́ŋ̀ kùm kpaŋ̀ kàd ba, bít tə́ in nyɛmàá. 36Nyəd kìì nɛ́b zùúm dìímsə̀ tə́ taàn kpaŋə́ gə́, dɛ̀d nɛ́b kam aa wərə̀ rə, níì taà sìnì? 37Nɛ́b bəd kè' bə̀ í'ù: «Yéésù Nazaratu bə̀ tə́ sə̀n taanàá.»
38Kàanyée gə́, zá' páá kpə̀ə́ǹ lɛgú, dɛ̀d: «Yéésù, Dauda Wàá, ɛ̀g ǹ bé' mə́ búúrá!»
39Nɛ́b bəraa ké' kpaŋ̀ Yéésù númú rə, ìì álə̀ kúnú, bɔ̀b oò tɛb nwɔŋá. Zá oò gə́, məə kíìn tɛbm̀bìá, kpàm nwɔŋ lɛgə́ gbàákù sɔ̀ŋ: «Dauda Wàá, ɛ̀g m̀ bé' mə́ búúrá!»
40Yéésù dìì gə́, bít bàà nɛ́b aa bə̀ pe' kə̀ oò tə́ rə, boò ààùwà kúnú. Zɔ̀ŋ aa nyəd gbad yaà wə́ə́ gə́, Yéésù dɛ̀rə̀: 41«Ń í' máà mà' n níì gú?»
Kè' í', bàà: «Báátììkpɛ̀ŋá, mə́ í' núù mə́ bəd boò keèd kúnú.»
42Bít Yéésù bààù: «Núù ń bəd boò keèd kúnú! Tɛ́mbagké ń gáŋ n si' yàá.»
43Kə̀ nwɔŋ aa nuù yée kíinní, núù oò bəd keèd yàá, bít bàg Yéésù kə̀ Vɛnɛ́b káŋ̀mbìá. Zɔ̀ŋ aa nɛ́b zùúm bé' nɛ́ŋə̀ aa núù keèd gə́, bə̀ pìì Yéésù bagǹmbə̀ bòórú, bít bə̀ pìì Vɛnɛ́b káŋ̀mbə̀ kɔ̀.
Àwon tá yàn lọ́wọ́lọ́wọ́ báyìí:
:
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Nouveau Testament en Samba Leko © Alliance Biblique du Cameroun, 1998.