Jon 3
3
O Iesu der nam o Nikodimas
1 #
Jn 7:50; 19:39 Ara musano tagun a kum Parisi, a risano o Nikodimas, i ara mugumugu anun a taro Juda. 2I wan torom o Iesu una ra bung na mirum ma i watungi tano lena, “Tene ususer, met tasman ui ra ui a tene ususer, ra o God i tulu ru ui. Katu musano in pam lar pas a kum ukinalong ra u ser pami, ra o God ke kis tomo nami.” 3#Mt 18:3; 1 Pit 1:23O Iesu i balu i lena, “A inanos ui nama lingmulus, osi ra ka di usus matoki, ken tama lar pas a matanitu anun o God.” 4O Nikodimas i tingi lena, “Din usus matok petlan pas taio ra i sa takano? Pepetlai, in ruk melet unin balan o nano sur in usus matoki?”
5 #
Ese 36:25-27
Ra o Iesu i balu i lena, “A inanos ui nama lingmulus, osi ra ka di usus matoki una danim ma una nion, ken ruk lar pas una matanitu anun o God. 6#Jn 1:13Osi ra di ususi una pinindi, i ra a pinindi ut, ma osi ra di ususi una nion, i ra a nion ut. 7Gong u kisin ra a watungi tam lena din usus matok mot. 8A wuwu i wan tuptupukus elar nam anun a nemnem. U longoro a wungu ino, ikut, ko tasmani lena i wan tagai, ma i wan urai. Lenkutkai ra torom det rop ra a Nion i usus matok det.” 9Ra o Nikodimas i tingi lena, “In pepetlai a utna ri?” 10O Iesu i balu i lena, “Ui a labino tene ususer anun a taro Israel, ma ilai ra ko tasman a kum utna ri? 11A inanos ui nama lingmulus, met watung asau ra met tasmani, ma met wasiso un asau ra met sa tama tari, ikut ka mot nurnur un asau ra met wasiso uni. 12A inanos mot una kum utna taginin upiso ma ka mot nurnur uni. Mot in nurnur pepetlai ra an inanos mot una kum utna tagisapat una langit? 13Kataio i wan pas utmakai usapat netes una langit, a Nutun a Musano sot kut ra i wan pirso tagisapat netes una langit. 14#Nam 21:9; Jn 8:28; 12:32Numugu, o Moses i ukete in nusui unin nanai una nubual kalako taro uni. Lenkutkai ra din ukete a Nutun a Musano usapat, 15#Jn 20:31sur det rop, ra det nurnur uni, det in laun tukum.
16 #
Jn 3:36; 10:28; Rom 5:8; 8:32; 1 Jon 4:9-10 “O God i maris a rakrakon bual, ra i pitar tar o Nutunu ara sot kut, sur osi ra in nurnur uni, in laun tukum ma ken iru. 17#Lk 19:10O God ke tulu tar o Nutunu urin una rakrakon bual sur in pitar a warkurai na minabalu torom a rakrakon bual. I tulu tari kut sur in ulaun a rakrakon bual. 18#Jn 5:24Osi ra i nurnur uni, ka din pitar a warkurai na minabalu toromi. Ikut, osi ra ke nurnur, i sa tur una dekdek na warkurai na minabalu uni ke nurnur un ara Nutun o God sot kut. 19#Jn 1:5, 9; 8:12Iri a warkurai anun o God: A talapor i sa wanpat una rakrakon bual, ikut a taro det nem a dumirum kut ma a talapor awu, uni det pam a kum sakino petutna. 20Det rop ra det ser pam a kum sakino petutna, det nget a talapor, ma ka det wan suri, sako din tama pupuaso pas anundet a kum sakino petutna. 21Ikut, osi ra i murmur a lingmulus, i ser wanpat una talapor, sur din tama pupuaso i lena anun a kum pinapam i kibino ut tan o God.”
O Jon a Tene Baptaiso i wasiso talapor un o Iesu
22 #
Jn 4:1-2
Numur, o Iesu tomo nam anun a kum nat na ususer det wan tagisapat o Jerusalem sur ara tamon lik kura una papor Judia. Det kis tiro iai, ma i baptaiso a taro. 23O Jon kai i baptaiso tong o Ainon milau o Saleim, uni a susut na danim kura iai. A taro det wanan toromi sur in baptaiso det. 24A utna ri i wanpat, ra kabaut di uruk o Jon una karabus. 25A ramano kum nat na ususer anun o Jon det wasiso na engaras tomo nama ara te Juda una nirurus keles, elar nama petutna una lotu Juda. 26Det wan torom o Jon ra det watungi tano lena, “Tene ususer, a musano ra mur kis tomo pas nami tong un ara papor danim Jodan, i ra u inanos taru uni, uniri kurong mo kai i baptaiso. Ra a taro rop det wan mukut toromi.” 27O Jon i watungi tandet lena, “Kataio in pam pas tu utna ra o God ke pitar tari tano. 28#Jn 1:20; Mt 11:10Mot ut mot sa longoro tari ra a watungi lenri, ‘Awu sur iau a Karisito. O God i tulu ru iau kut sur an mugu tano.’ 29Tu musano ra i nolin nam tu ino, anun a ino ut ra. A pasan a musano ra i nolin, in tur ma in longoro suri. Ra in longoro in nalngano, in gas doko. Uniri, anung a gasgas i elar nam anun a gasgas, ra anung a gasgas i sot maragom. 30O Iesu ut in labo nanan ma iau an natino nanan.
O naro ra i wan pirso tagisapat una langit
31 #
Jn 8:23
“O naro ra i wan pirso tagisapat una langit, i labo sakit taun a taro rop. A musano ra taginin upiso, taginin ut upiso, ma i wasiso kut una kum utna taginin upiso. I ra i wan tagisapat una langit, i labo sakit taun a taro rop. 32#Jn 3:11Ma i wasiso talapor una kum utna ra i tama tari ma i longoro tari, ikut kataio i nurnur una nun a wasiso. 33Ikut det ra det nurnur una nun a wasiso, det mulaot lena o God i a lingmulus. 34I ra o God i tulu ru i, i wasiso nama wasiso anun o God, uni o God i pitar rop tar a Tokodos na Nion toromi. 35#Mt 11:27; Jn 5:20O Tamano i nem o Nutunu, ra i pitar rop tar a kum utna ulamano. 36#Jn 3:16-18; 1 Jon 5:12Osi ra i nurnur una Nutun o God, i sa utur ukai a nilaun tukum. Ikut, osi ra i rosumur gusun o Nutunu, ken utur ukai a nilaun, uni a kankan anun o God kura uni.”
Àwon tá yàn lọ́wọ́lọ́wọ́ báyìí:
Jon 3: kqw
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2019 Wycliffe Bible Translators, Inc. All rights reserved.