Yohane 3
3
Yesu So Nikodima
1Ŋei mane yewa geke eŋetine Nikodima, eŋe Yuda ŋei eŋane ŋetne, eŋe Parisi magu eŋane keuwo ŋine, 2Ŋei wa yewaŋo ruwo maneo, Yesu wano ari more qesonka rake, “Kito ŋebo ŋebon, ŋene kineŋone detmaine, ge kito ŋebo ŋebon mane, Kaisaleŋo biragangi ketkone. Ge masi togogole mamaine iwa eya mo ŋei maneŋo Kaisale midaine ge more maine iwa yale mi mayake.”
3Yesuŋo donine mainge olale rake, “Naŋane don iwa welekakatne golatpe, detlukkanom! ŋei mane eŋe soringe more wako wakon musele mi wakoniyake, eŋe Kaisale wane ŋadino gege togon me qeli ewe zonom, eya maine mi marat kayake.”
4Raki mo, Nikodimaŋo qesonka rake, “Ŋei mo suwa more, sele okane gegineŋo koso daleo wako wakon musele eya manerop koso wakoniyake? Eŋe maine welekatne koso nagainane kotino ketki paki wakongi koso atak mane okaniyake me?”
5Yesuŋo koso iwa yale mainge olatke, “Naŋane don iwa welekakatne golatpe detluk kanom! Mane eŋe doku so Asu wane ŋatko ŋine wako wakon musele mi wakoniyakeŋo eŋe Kaisale wane ŋadino gege togon me qeli ewe zonom pamaike eya wane kotino maine mi wakesiyake. 6Ŋei mane eŋe nabok wane ŋatko ŋine wakonge, eŋe ŋei kaitka, ŋo mane eŋe Asu wane ŋatkoŋine wakonge, eŋe Asu wane kaitka. 7Na golatmaile, eya wane ge misuk detnom qe kayake, ‘Ŋine korop koso takotke Asu wane Nikodima ŋatko wako wakon musele eya manerop wakonikei.’ 8Momo eŋe numaine ariyakane wetke okanmaike, eya wane rokop puwan okanmaike. Paki mo, ge ukatne mamaike, eyamo ge det okanmaine, ŋo kine diyawao ŋine sarimaike, me diyawao arimaike, yemo ge mi detmaine. Ŋei Asu wane ŋatkoŋine wakon wakon musele wakon okanmami, eŋane numa weku yale waka pamaike.”
9Raki mo, Nikodimaŋo qesonka rake, “Kine kine yewa ge ramaine, eyamo daleo wakoniyake?”
10Yesuŋo doninane turuŋine koso mainge iwa yale olatke, ge Israel ŋei eŋane kito ebon ebon suwaine, ŋo ge daleo wane don iwa wane kine ŋaŋae maine me? 11Naŋane don iwa welekakatne golatpe detluk kanom! ŋene kine kine mo det okanmaine yewa wane ra okanmaine, so kine kine mo okangone yewa ŋidan okanmaine, ŋo siluŋ ŋinano ŋine maneŋo ŋenane donze yewa mi dere ewekki paki tewek okanmaike, ŋine yemo ŋenane don yewa dere more, siluŋ ŋadekka okanmami. 12Na kepeo kine kine wako wakone, eya wane ŋidanbe ŋine detpi paki, siluŋ mi malipka okanmami. Paki mo na qeliwo ŋine sanka wako wakone, eya wane ŋidanbe, ŋine dere onoka ŋineŋo malip kaikei? 13So ŋei maneŋo qeliwo mi wake, i midakaka, Ŋei Wawainane Gipole, eŋe wekuŋo qeliwo ŋine qelige kepo ketke.
14Mokaka kepe yaup papaino Moseŋo aen sisineŋo koma oŋaine maki paki, mawa ekiwo rasikki okorake, rokop weku yale waka eŋe Ŋei Wawainane Gipole mawa rasikkei, 15Paki ŋei koropŋo eŋe malipkakei, eyaŋo eŋe maine gege togon marat kakei, so naso baŋem ge arikei. 16Kaisale eŋe kepe baŋem ŋei ŋerep korop eŋane simileine zok manerop pakane, Gipole Wemedep wekuku, eya siluŋ qikka ebonge, eya wane ŋei ŋerep koropŋo eŋe malip kaikeiwo, eŋe maine mi seuke more siukkei, midaka, eŋe maine gege togon maratka naso baŋem ge wakei. 17Kaisaleŋo gipole wano wanok urata mayakane raki paki kepeo mi birakaki ketke, eŋe ŋei borikino ŋine ebu more mainone eŋino takot oniyakane raki paki birakaki ketke.
18Eya wane mane eŋe Gipole malip kayakeo, mo eŋe sotinane turuŋine mi maniyake. Ŋo ŋei mane eŋe Gipole mi malip kayakeo, eŋe sotkorop okanmaike, onoka wane eŋe Kaisale Gipole Wemedep Weku mi malip kamaike eya wane. 19Sot turuŋ wane don urata ma ma eya wane kine iwa yale pamaike, qelaŋanŋo kepeo wakonge, ŋo siluŋ ŋei eŋe qelaŋan wane simile oniyake yalemo panaman wane siminonge, onoka wane eŋe borikine kine kine makoi, eya wane yale okangoi. 20Eya wane mane eŋe masi tanik qotkoine okaniyake, eŋe qelaŋan ŋadek kayake, paki eŋe qelaŋango mi wakoniyake. Onoka wane, eŋe tanik manikine qotkoine, eya wane kine qelaŋango wakongi mi kaikei wane, yale okaniyake. 21Ŋo mane eŋe masi tanik maine so don welekatne teweke geyake eŋe qelaŋango wakoniyake, eyamo Kaisale wane don tewekki paki, eŋane zonomgo urataine wekumane make, eya wane kine qelaŋanŋo maine sikan ongi, ŋei ŋerep eŋe kaulukkei.
Yohaneŋo Yesu Wane Kine Ra Wakonge
22Eya wane ŋadino Yesu eŋine so dokoine eŋe Yuda kepe nat paromino arikoi. Ari naso natne yewa eŋerop gekoi, paki ŋei ŋerep doku tau-onge. 23Yohane eŋe yale waka Ainon matko, Salim mat osino ŋei ŋerep doku tau-onge, onoka wane, yewao doku loutne pake eya wane. Ŋei ŋerep eŋe eŋano doku tau-oniyakane sarikoi.
24Yohane eŋe naso yewao mulap urumgo mi birakakoi. 25Yohane wane dokoine natne eŋe so Yuda ŋei manerop doku tau tau diyawaŋo Kaisale wane kaitko masi koboineso qelaŋanerop, eya wane aŋa soraŋ aukoi. 26Paki eŋe Yohane wano ari more olale rakoi, “Kito ŋebo ŋebon, ge Yordan eri woken ŋei mane sogino gerop geki ge sikan ŋonnom paki kineine ra wakone ŋedangone eya detmaine? Ŋei yewa oŋo naso iwao doku tauongi ŋei ŋerep korop mo eŋano ari waremami!”
27Yale olatpi mo, Yohaneŋo edane rake, “Kaisaleŋo qeliwo ŋine oŋo kine kine mane ŋei yewa mi mangi, oŋomka daleo mayake? 28Ŋine ŋidom don iwa alakan ŋidangole mo detkoi, ‘Na Mesiya mida, na ŋeiwa ŋei ŋerep turuŋeno ŋine ebuyakane Kaisaleŋo birakake, yewa mida, ŋo siluŋ Kaisaleŋo eŋane numa makalane biranangi lewine alakangole.’ 29Ŋei ŋerep biŋek qe man mane oŋo ŋerep welaine. Paki mo ŋei yewa wane kimaine eŋe osop osop okoraki paki ketine more donine desiyake. Eŋe ŋerep ŋaunane done detki paki wetine zok peseyake. Rokop yale waka wet pesekŋo nae kotono mo watkemaike. 30Eŋane eŋetine ŋo manerop suwa wayake, ŋo naŋaneŋo nigale kesiyake.”
Eŋe Qeliwo Ŋine Sarike
31Weti qeliwo ŋine ketke oŋo kakapa suwaine, kine kine korop yuwan-on waremaike. Ŋo ŋei kepeo ŋine wakonge, eŋe kepe wane biŋek, so eŋe kepeo kine kine pamaike, eya wane don ra okanmaike. Ŋei weti qeliwo ŋine ketke, eŋe kine kine korop eya wane suwaine. 32Eŋe kine kine deineŋo kake, so ketneŋo detke, yewa ra okanmaike, pakimo, kepe ŋei maneŋo don kisi ra okanmaike, yewa mi dere malipka okanmaike. 33Ŋei mane eŋe eŋane donkisi wetineŋo ma nogan ka more malip kamaikeo, yemo Kaisale wane kine iwa yale qe wakonmaike, “Kaisale eŋe don wele ra okanmaike.” 34Kaisaleŋo ŋei weku birakaki ketke, oŋo Kaisale wane donka ra wakone okanmaike. Onoka wane Kaisaleŋo Asuine wat watko ra man okanmaike. 35Magaineŋo Gipolane zok similekaki kine kine korop eŋane metino motwareke. 36Mane eŋe Gipole wetneŋo malip kayakeo, eŋe gege togon marat kayake, so mane eŋe gipolane don dere ŋadek kayakeo, eŋe gege togon mane mi marat kayake, paki mo ŋei yalinane kutko eya mo Kaisale wane busuŋo manerop qoi qoine midaine tako rakot pa ariyake.
Àwon tá yàn lọ́wọ́lọ́wọ́ báyìí:
Yohane 3: onsNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2012, Wycliffe Bible Translators, Inc. All rights reserved.