San Mateo 5
5
Nduꞌu Jesús xini iin koꞌndo ra kaꞌan ra xaꞌa ña vaꞌa ña taxi Ndioxi ndaꞌa yuvi
1Ra te xini Jesús ña kuaꞌa ni yuvi xaa, ra saa nandaa ra iin koꞌndo ndakunduꞌu ra, ra kuyachin ndia itaꞌan xiꞌin ra nuu ra. 2Ra saa xaꞌa ra sañaꞌa ra na kachi ra saa:
3―Vaꞌa ni kee ndoꞌo, na nda̱ꞌví, na xini ñuꞌu ndiee Ndioxi nuu vichin, chi kuenda ndoꞌo va ke kuu ndivi nuu xanꞌdia ra chiñu. 4Ra vaꞌa ni kee ndoꞌo, na xáku vichin, chi vaxi kii ra ndoꞌo kuvi ndo kusii ni ini sa Ndioxi va. 5Ra vaꞌa ni kee tu ndoꞌo, na vita ni ini vichin, chi ndoꞌo kuvi na ndakiꞌin ñuꞌú ña ndikaꞌan Ndioxi taxi ra. 6Ra vaꞌa ni kee tu ndoꞌo, na kaꞌun ini nima vichin, ra ndachi ini ndo ña kuni ndo kuni soꞌo ndo ña kaꞌan Ndioxi, chi vaxi kii ra kuni va soꞌo ndo tuꞌun ra. 7Ra vaꞌa ni kee ndoꞌo, na ndaꞌvi ni ini vichin, chi ndoꞌo kuvi ndo kundaꞌvi ni ini Ndioxi kuni ra. 8Ra vaꞌa ni kee ndoꞌo, na ndakú nima, chi ndoꞌo kuvi ndo kuni nuu Ndioxi. 9Ra vaꞌa ni kee tu ndoꞌo, na ndachutaꞌan mani yuvi na kanitaꞌan va, saa chi ndoꞌo kuvi ndo kunani seꞌe Ndioxi va. 10Ra vaꞌa ni kee tu ndoꞌo, na kundivaꞌa na xiꞌin xaꞌa ña xa ndo ña vaꞌa ña kuni Ndioxi, chi ndoꞌo kuvi ndo niꞌi taꞌvi koo xiꞌin Ndioxi nuu xaꞌndia ra chiñu. 11Ra vaꞌa ni kee ndo, te kañaꞌa na xiꞌin ndo, ra kani taꞌan na xiꞌin ndo, ra xavaꞌa ini na tuꞌun chiꞌña xaꞌa ndo, xaꞌa ña ndikun ndo yuꞌu. 12Ra te xá na suꞌva xiꞌin ndo, ra na kusii ni ini ndo, chi ndivi ninu iyoo iin ña chee ni niꞌi ndo sa Ndioxi; ra na kuayüꞌvi ndo, chi saa xa tu na xiꞌin na ndikaꞌan tuꞌun yuꞌu Ndioxi xinaꞌa va ―kachi Jesús xiꞌin na.
Na kuu yo ta kuꞌva iyoo ñi̱i̱ ña vaꞌa
13Ra saa ndikaꞌan ka ra xiꞌin na kachi ra saa:
―Ndoꞌo kuvi ndo iyoo ta kuꞌva iyoo ñi̱i̱ ña xa uꞌva ña yuuvi yoꞌo, ra tu ná ndiꞌi xaꞌa ñi̱i̱, ra üꞌva ka koo ña. Saa ra, ¿ndixaa ka ke koo ña ña nduu uꞌva tuku ña, tuvi ndo? Ra na kundaa ini ndo, chi köo ka mii chuun kuu ka vi ña, chi ndia ña kutia va kuvi ña ra kuañu yuvi va ña ―kachi Jesús xiꞌin na.
Ñùꞌù ña tuun nuu ña yuuvi
14Ra saa ndikaꞌan ka ra xiꞌin na kachi ra saa:
―Ndoꞌo kuvi ndo iyoo ta kuꞌva iyoo ñùꞌù ña tuun nuu na yuuvi yoꞌo, ra ta kuꞌva iyoo iin ñuu ña nduꞌu xini iin koꞌndo, ra ^xini takundiꞌi va yuvi ña, ra küvi ka koo seꞌé ña, ra saa ke iyoo tu ndoꞌo va. 15Ra xa kundaa va ini ndo chi köo na ndatuun ñùꞌù, ra te ndiꞌi tu nandasi na xikoꞌo nuu ña, chi nuu sukun va chinduꞌu na ña, ra saa ke vaꞌa ^tuun ña nuu takundiꞌi va na ndee veꞌe kan. 16Ra saa ke na koo tu ndoꞌo va, ña kuyeꞌe ndo nuu na yuuvi yoꞌo, ra kuni na takundiꞌi ña vaꞌa ña xa ndo, ra ndasakaꞌnu na Tata yo Ndioxi ra iyoo ndivi ―kachi Jesús xiꞌin na.
^Ndakani Jesús xaꞌa ndiayu ña ndakoo ra Moisés
17Ra saa ndikaꞌan ka ra xiꞌin na kachi ra saa:
―Ndoꞌo, na ndee yoꞌo, ra ndakäni ini ndo, ña xaa yu sandiꞌi yu xaꞌa ndiayu Ndioxi ña tiaa ra Moisés, ra nii ña ^sañaꞌa na ndikaꞌan tuꞌun yuꞌu Ndioxi xinaꞌa växi yu sandiꞌi yu xaꞌa; chi ña xaa yu saxinu yu nuu va kuvi ña. 18Ra ña ndixa ke kaꞌan yu xiꞌin ndo, ra na kundaa ini ndo: chi ndia nii tuꞌun loꞌo xiꞌin ndia nii letra loꞌo ña kuu ndiayu Ndioxi ña tiaa ra Moisés xinaꞌa, ra ndïꞌi xaꞌa ña, ra nii na ndiꞌi va xaꞌa ña yuuvi yoꞌo, ndi su xiniñuꞌu xinu ndiꞌi va ña kaꞌan tuꞌun Ndioxi. 19Ra ndia ndia ka yuvi na xïin kandixa sava chiñu loꞌo ña xaꞌndia ndiayu Ndioxi nuu na, ra nii sañäꞌa tu na inka yuvi ña na kandixa na ña kaꞌan ña, ra na xa ña yoꞌo ra na loꞌo vaꞌa va kuu na nuu xaꞌndia Ndioxi chiñu. Ndi su yuvi na kandixa takundiꞌi chiñu ña xaꞌndia ndiayu Ndioxi, ra sañaꞌa tu na inka yuvi ña na kandixa na ña, ra na kan kuvi na kuu na kunaꞌnu vaꞌa ka va nuu xaꞌndia Ndioxi chiñu. 20Ña kan ke kaꞌan yu xiꞌin ndoꞌo vichin, ra na kundaa vaꞌa ini ndo, chi küvi kiꞌvi ndo ndivi nuu xaꞌndia Ndioxi chiñu, tu na kandïxa ndinuni vaꞌa ka ndo Ndioxi nuu na maestro na sañaꞌa ndiayu Ndioxi xiꞌin na fariseo ―kachi Jesús xiꞌin na.
Na kindoo mani yo xiꞌin na sáa̱ ini xíní yo
21Ra saa ndikaꞌan ka ra xiꞌin na kachi ra saa:
―Ra xa kundaa va ini ndo, chi na xii xikua yo na xindee xinaꞌa, ra suꞌva va ke kachi ndiayu Ndioxi ña ndakoo ra Moisés ndaꞌa na: “Käꞌni kun yuvi”, saa chi tu na kaꞌni kun, saa ra chaꞌvi tu yoꞌo va xaꞌa kuachi kun nuu Ndioxi, kachi ña. 22Ndi su yuꞌu tu kaꞌan xiꞌin ndo vichin, chi ndia ndia ka yuvi na sáa̱ ini xini ñani taꞌan, ra kixi va tundoꞌo sata na kan; ra saa tu yuvi na kandivaꞌa xiꞌin taꞌan va, chi ku̱ꞌu̱n tu na kan va nuu na chiñu naꞌnu ña kundaku kuachi xiꞌin na; ra yuvi na kaꞌan, “na kiꞌvi” xiꞌin ñani taꞌan, ra ndia ndiaya nuu xixi ñuꞌu ke ku̱ꞌu̱n na kan kuꞌun na xaꞌa tuꞌun kan.
23’Ra ña kan ke kaꞌan yu xiꞌin ndo vichin, chi tu kuaꞌan ndo ña soko ndo ñaꞌa nuu Ndioxi ra te ndixaa ndo nuu arta yii veꞌe ñuꞌu kaꞌnu kan, ra ikan na ndakaꞌan ndo ña väꞌa iyoo ini iin ñani ndo xini na ndoꞌo, 24saa ra, vaꞌa ka va na ndakoo ñaꞌa ndo, ñaꞌa ña niꞌi ndo kuaꞌan ndo nuu arta yii kan, ra xiꞌna ka va na kuꞌun ndo ña ndakaꞌan mani ndo xiꞌin na, ña na koo kaꞌnu ini na xaꞌa ndo, ra saa vi ke kuvi nandiko ndo kuꞌun ndo ña soko ndo ñaꞌa ña kuaꞌan xiꞌin ndo nuu Ndioxi.
25’Ra tu ndia na taxi kuachi xaꞌa ndo nuu na chiñu, ra vaꞌa ka va yachi na ndakaꞌan mani ndo xiꞌin na, ña vaꞌa na küꞌun ndo veꞌe chiñu, chi tu na kuꞌun ndo nuu ra juez ña sandaku ra kuachi xiꞌin ndo, saa ra ndataxi va ra kan ndoꞌo ndaꞌa ndia kumisio, ra chikaa va ndia ndoꞌo veꞌe kàà. 26Ra ña ndixa ke kaꞌan yu xiꞌin ndo, chi këe yachi vi ndo veꞌe kàà tu na taan ndia ndoꞌo, chi xiniñuꞌu ndiakua chaꞌvi ndiꞌi va ndo xuꞌun ña nduku ra juez nuu ndo, ra saa vi kee ndo veꞌe kàà ―kachi Jesús xiꞌin na.
Kaꞌan Jesús xaꞌa tiaa ndia ^kíꞌvi xiꞌin inka na siꞌi
27Ra saa ndikaꞌan ka ra xiꞌin na kachi ra saa:
―Ra xa kundaa va ini ndo ña kaꞌan ndiayu Ndioxi ña tiaa ra Moisés xinaꞌa ña kachi suꞌva: “Kïꞌvi kun xiꞌin yasiꞌi inka tiaa.” 28Ndi su yuꞌu tu kaꞌan xiꞌin ndo vichin: tu ndia iin tiaa ra ixtoꞌni ra nuu iin ñaꞌa, ra ndikun kuni ra kusun ra xiꞌin ña, saa ra xa kuachi va ke xa nima ra xiꞌin ña.
29’Ña kan ke tu iin xiyo nduchi nuu kuaꞌa kun, ra kuni ña sandakava ña yoꞌo, ña sa kun kuachi, saa ra vaꞌa ka va na tava kun ña, ra sakana kun ña; chi vaꞌa ka va ke na sandiꞌi kun xaꞌa iin xiyo nduchi nuu kun, nuu ña kuꞌun iinii saa kun ndiaya. 30Ra tu ndaꞌa kuaꞌa kun ke kuni sandakava yoꞌo ña sa kun kuachi, saa ra vaꞌa ka va ke na kaꞌndia kun ña, ra sakana kun ña, chi vaꞌa ka va ke na sandoñuꞌu kun iin xiyo iki kuñu kun, nuu ña kuꞌun iinii saa kun ndiaya ―kachi Jesús xiꞌin na.
Kaꞌan Jesús xaꞌa na ndakoo taꞌan
31Ra saa ndikaꞌan ka ra xiꞌin na kachi ra saa:
―Ra xa kundaa va ini ndo chi suꞌva ke kachi ndiayu Ndioxi ña tiaa ra Moisés xinaꞌa xaꞌa na ndakoo taꞌan: Tiaa ra kuni ndakoo yasiꞌi, ra xiniñuꞌu na taxi ra iin tutu ndaꞌa ña, ña ndakuiin ña xaꞌa ña, ña ndixa ke xa ndakoo ra ña. 32Ndi su yuꞌu tu kaꞌan xiꞌin ndo vichin: ra tu ndia iin tiaa ra na ndakoo ra yasiꞌi ra, ra ndi su süvi xaꞌa ña ña xika ña xiꞌin inka tiaa ke ndakoo ra ña, chi ña kuni mii va ra ke sa ra saa, saa ra, kuachi ra kan va ke tu na ndakiꞌin ña inka tiaa, saa chi taꞌan kuachi ña xa na ndiaka taꞌan ke xa tu ña kan va. Ra tiaa ra tandaꞌa tu xiꞌin iin ñaꞌa ña nindoo nuu yii, ra iin kuvi va kuachi ra kan xiꞌin na ndiaka taꞌan, na kanduu ndiayu Ndioxi ―kachi Jesús xiꞌin na.
Kaꞌan Jesús xaꞌa ña ^kindoo yo sa yo
33Ra saa ndikaꞌan ka ra kachi ra saa xiꞌin na:
―Ra xa kundaa va ini ndo ni ke kachi ndiayu Ndioxi ña tiaa ra Moisés taxi ra ndaꞌa na xii xikua yo na xindee xinaꞌa, ña kachi suꞌva: “Na käꞌnu kun ña kindoo kun sa kun nuu Ndioxi, saa chi tu kindoo kun sa kun iin chiñu nuu ra, ra na saxinu va kun ña”, kachi ña. 34Ndi su yuꞌu tu kaꞌan xiꞌin ndo vichin, ndia nii ñaꞌa chunäꞌa ndo, ni ndivi ninu küvi chunaꞌa ndo, chi ikan kuu nuu nduꞌu Ndioxi va. 35Ra nii ñuꞌu yoꞌo küvi chunaꞌa ndo, chi nuu xañu Ndioxi va kuvi ña; ra nii ñuu Jerusalén küvi chunaꞌa ndo chi ñuu Ndioxi, ra kuu rey ra kaꞌnu, va kuvi ña. 36Ra nii xini tu ndo küvi chunaꞌa ndo, chi ndia nii ixi loꞌo xini ndo ra küvi ndanama ndo ña, ña nduu ña, ña yaa a ña ndiaa. 37Ña kan ke te kaꞌan ndo ndia ndia ka va ña, ra tu kuvi sa ndo ña, ra “kuvi”, kachi va ndo, ra tu küvi sa ndo ña, ra “küvi”, kachi va ndo. Chi takundiꞌi ka tuꞌun ña ndakunuu kaꞌan ndo, ra xa kuenda ña väꞌa va kuvi ña kan ―kachi Jesús xiꞌin na.
Kaꞌan Jesús ndia kuꞌva ke kuvi sa yo te xa kundivaꞌa inka yuvi xiꞌin yo
38Ra saa ndikaꞌan ka ra kachi ra saa xiꞌin na:
―Ra xa kundaa va ini ndo chi suꞌva ke kachi ndiayu Ndioxi: “Tu na sataxin na nduchi nuu ndo, ra na sataxin tu ndoꞌo nduchi nuu na kan va; ra tu kani na yuꞌu ndo ra kita nùꞌù ndo, saa ra na tava tu ndoꞌo nùꞌù na kan va”, kachi ña. 39Ndi su yuꞌu kaꞌan tu xiꞌin ndoꞌo vichin: Tu ndia na ^xa ña väꞌa xiꞌin ndo, ra na sä ndoꞌo ña väꞌa xiꞌin na, ra tu ndia na xakin xaꞌndia iin xiyo nuu ndo, ra na taxi ndo inka xiyo nuu ndo na kani va na. 40Ra tu ndia na xakin kuachi xiꞌin ndo ña kuni na kindiaa na tikachi ña niꞌnu ndo, ra na taxi ndo ña ndaꞌa va na, ra ndia koto ña ndixi va ndo na taxi ndo kuꞌun xiꞌin na. 41Ra tu ndia na xa nduxa xiꞌin ndo ña kuiso ndo ñaꞌa xiꞌin na, iin mil metro, saa ra ndia uvi mil metro va na kuꞌun ndiaka ndo ña xiꞌin na. 42Ra na nduku ñaꞌa nuu ndo, ra taxi ndo ña ndaꞌa va na, ra na tatu ñaꞌa nuu ndo, ra na kuxïꞌndia ndo ña nuu na ―kachi Jesús xiꞌin na.
Ná kuꞌvi ini yo kuni yo na sáa̱̱ ini xini yo
43Saa ndikaꞌan ka ra kachi ra saa:
―Xa kundaa va ini ndo chi na xii xikua yo ra suꞌva va ke kachi na: “Kuꞌvi ini kun kuni kun na itaꞌan xiꞌin kun, ra na sáa̱̱ va ini kun kuni kun na sáa̱̱ ini xini yoꞌo”, kachi na. 44Ndi su yuꞌu tu kachi saa xiꞌin ndo vichin: Kuꞌvi ini ndo kuni ndo na sáa̱̱ ini xini ndoꞌo, ra na kaꞌan tu ndo xiꞌin Ndioxi xaꞌa na kanitaꞌan xiꞌin va ndo. 45Ra saa ke ndañaꞌa ndo mii ndo ña ndixa ke kuu ndo seꞌe Ndioxi ra iyoo ndivi, chi ra kan kuvi ra ^taxi kanata ñuꞌu ra tuun ña sata na vaꞌa xiꞌin na väꞌa va, ra ^taxi tu ra kuun savi sata na vaꞌa xiꞌin na väꞌa va. 46Ra tu kuꞌvi ini ndo xini ndo takua na kuꞌvi ini xini ndoꞌo va, saa ra köo yaꞌvi ndiaa vi ña nuu Ndioxi, chi saa xa tu na yuvi na kuëe kandixa Ndioxi va. 47Ra tu xatoꞌo ndo takua na ndikun Ndioxi xiꞌin va ndo, saa ra köo yaꞌvi ndiaa vi ña nuu Ndioxi, chi saa xa tu yuvi na xïni ichi Ndioxi va. 48Ña kan ke ndakú ni na koo nima ndo, ra ndia ta kuꞌva iyoo mii Tata yo Ndioxi ra nduꞌu ndiví ninu va ke, na koo ndo; chi ra kan ra vaꞌa ni ra; ra niña ña ndakú va ^xa ra ―kachi Jesús xiꞌin na.
Àwon tá yàn lọ́wọ́lọ́wọ́ báyìí:
San Mateo 5: mxvNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2017, Wycliffe Bible Translators, Inc. All rights reserved