Matiyu 7
7
Kǝla ambo shara njǝddoyen
(Luk 6.37-45)
1«Bare wundumaro shara yidduwwi,#7.1 bare wundumaro shara yidduwwi - Bare kǝlandoa sharawu am gadeyero ngonuwwi. nayi yero shara njaddiwawo. 2Jiɍi ambo shara yidduwidǝ gai, nayi yero shara njaddi. Koro jiɍi ambo ngalgǝwidǝ gai, nayi yero ngalnjagai.
3«Awiro kalǝm sim kamanǝmben rumi duwon, karjǝm curo simmǝmbea asunǝmbawodǝ? 4Akko ni simmǝmlan karjǝmbadǝ, awiawin gǝle kamanǝmbo: “Kolle kalǝm simmǝmbedǝa tuluwukke,” nǝmi? 5Mǝnafǝk! Karjǝm simmǝmbedǝa tuluwumiya duwon, daji ngǝlaro rume kalǝm sim kamanǝmbedǝa tuluwumi.
6«Bare awo tayirdǝa kǝriyaro yiwwi, koro bare awondo darajaa fuwu aladeyayen kolluwwi. Kolluwiya, tayia guguwaccai, kǝriya ye suwordane nayia njanjannjai.
Kǝla koro-a madu-a cinna bakta-ayen
(Luk 11.9-13)
7«Korowo njadi, manowo fanduwi, cinna bangowo kanjagai. 8Wundu duwon cuworimadǝro cadi, kam majimadǝ ye cuwandi, koro kam cinna bakcimadǝ yero kajagai.
9«Wundundo tadanju tia burodiro cuworiya, dongur kauye cidǝ? 10Bi buniro cuworiya, kadi cidǝ? 11Nayi diwidǝ awowa ngǝla tadawandoro njo nonuwwa, balle Bawando Mai Samema awowa ngǝla am tia caworiro cidǝ! 12Adǝ nangaro awo duwon amso nayiro njaddiya raawwadǝa nayi ye tayiro yiddowo! Adǝma maana Attaura-a kitawuwa nawiyaye-ayedǝ wo.
Kǝla ngaworam jǝkkadǝyen
13«Ngaworam jǝkkadǝyen ngawowo, dalilnjudǝ ngaworam farak, jawalnju ye kǝskedǝ, tima ngaworam kannuyedǝ wo, am tiyen ngasayidǝ kada. 14Amma ngaworam jǝkka, jawalnju ye jaudǝ, tima ngaworam ro sawisoyero cadimadǝ wo, am tia cawandidǝ ganama.
Kǝla kǝska-a tadanju-ayen
(Mat 12.33-37; Luk 6.43-45)
15«Nawiya kattuwuyero hangal gǝnanowo! Tayidǝ nandoro isaiya, alamanja dimi gai, amma karwunja jauro diwi bulduye gai.#7.15 alamanja dimi gai, karwunja buldu gai - Curo dǝla, ngawo kani. 16Tada casakkidǝlan tayia asunuwi. Inab coccoɍilan njakcai wa? Koro tarmu kolollan cadori wa? 17Kǝska ngǝla nguson tada ngǝla cakki, koro kǝska diwi ye tada diwi cakki. 18Kǝska ngǝladǝ rakce tada diwi cakkiwawo, koro kǝska diwidǝ ye rakce tada ngǝla cakkiwawo. 19Kǝska fi duwon tada ngǝla cakkiwawodǝa caljane kannuro fijagai. 20Adǝ nangaro tadanjalan tayia asunuwi.
Kǝla fuwura jireyen
21«Am wuro: “Kǝma! Kǝma!” cani samma gǝni nodo bargaa Mai Samemayero ngasayi, sai kam awo Bawani Mai Samema cǝraanaa cǝdimadǝ. 22Yim adǝn#7.22 yim adǝn - Kiyama. am ngǝwu wuro: “Kǝma, Kǝma, cunǝmlan gǝna nawinawi kidiye, sedanso duyeiye, koro awo ajabba ajabba kada ye kidiye?” cani. 23Daji wuye tayiro: “Ngaltema nayia nonjakkǝni. Wun kuruwunno lenowo, nayi diwi diomasodǝ!” nǝkki.
Misal fado tandowu yindiye
(Luk 6.46-49)
24«Adǝ nangaro wundu duwon manani ania fanje jǝganamadǝ, ti alama kam hangalla soronju kǝla kauyen cǝdandǝnadǝ gai. 25Ingi sameye cudure bǝrǝm fala tarje, karuwa ye cije sorodǝa babakkenniya, sorodǝ wurdǝnni, dalilnjudǝ fǝrdunju kǝla kauyen tǝdandǝna nangaro. 26Amma wundu duwon manani ania fanjǝna jǝgannimadǝ, ti alama kam hangal bawoa soronju kǝla cidi kesayen cǝdandǝnadǝ gai. 27Ingi sameye cudure bǝrǝm fala tarje, karuwa ye cije sorodǝa babakkenniya, wurde tǝgǝmbo fiyada,» yeno Isaye.
28Isa mana ania cǝde kerǝnniya, jama captanadǝ alamdunjudǝa ajapkera, 29dalilnjudǝ malǝmbanja Attauraye gai gǝni, kǝnduwoaro tayia alamji nangaro.
Àwon tá yàn lọ́wọ́lọ́wọ́ báyìí:
Matiyu 7: kby
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© (Active), SIM International