Luka 17
17
Yayami
(Mateo 18.6-7, 21-22; Marko 9.42)
1Yesu de e kaseli ɔmɛ ke, “Níhi nɛ haa nɔ nane kpataa a, ja a ba kɛ̃. Se nɔ nɛ nɔ nɛ ní nɛ ɔmɛ guu kɛ baa a, musu tloo lɛ! 2Afani nɛ a kɛ teji wɛ muɔ e kuɛ, nɛ a ya sake lɛ ngɔ fɔ wo mi pe nɛ e ma ha nɛ bimɛ tsɔwi nɛ ɔmɛ a ti nɔ kake maa pee yayami. 3#Mat 18.15 Lɔ ɔ he ɔ, nyɛɛ hyɛ nyɛ he nɔ saminya!
“Ke o nyɛmi tɔ o nɔ ɔ, kã e hɛ mi, nɛ ke e pia e he ɔ, kɛ pa lɛ. 4Ke e tɔ o nɔ si kpaago ligbi kake, nɛ eko fɛɛ eko se ɔ, e kpale ba de mo ke, ‘I pia ye he’ ɔ, kɛ pa lɛ si kpaago ɔ jã kɛ̃.”
Hemi kɛ yemi
5Bɔfo ɔmɛ de Nyɔmtsɛ ɔ ke, “Ha nɛ wa hemi kɛ yemi ɔ mi nɛ wa!”
6Nyɔmtsɛ ɔ he nɔ ke, “Nyɛ hemi kɛ yemi kle kaa sinapi wu ngu kake jinɛ nyɛ ko fa sikamore tso nɛ ɔ ke e hia kɛ e sipoku kɛ je zu mi kɛ ya ma wo mi, nɛ e maa bu nyɛ tue.
Sɔmɔlɔ blɔ nya ní tsumi
7“Waa ngɔ lɛ kaa nyɛ ti nɔ kake ngɛ sɔmɔlɔ nɛ huɔ, aloo e lɛɛ lohwe ha lɛ. Ke e je ngmɔ mi kɛ ba a, pe o ma de lɛ ke e ba hi si esɔesɔ nɛ e ye ní lo? 8Dɛbi, nɔ́ nɛ o ma de lɛ mohu ji, ‘Yaa nɛ o ya hoo ní ha mi. Lɔ ɔ se ɔ, dla o he, nɛ o ba sɔmɔ mi kɛ yaa si ma ye ní nɛ ma nu nɔ́ ko. Ke i gbe nya, konɛ mo hu o ya ye ní nɛ o nu nɔ́ ko.’ 9Tsɔlɔ ɔ, e hia we lɛ sina kaa e pee nɔ́ nɛ a fa lɛ ke e pee ɔ. 10Enɛ ɔ kɔɔ nyɛ hu nyɛ he jã kɛ̃. Ke nyɛ pee níhi tsuo nɛ a fa nyɛ ke nyɛɛ pee ɔ, nyɛ de ke, ‘Wɔɔ lɛɛ sɔmɔli nɛ he be se nami kɛkɛ ji wɔ. Ní tsumi nɛ sa kaa wa tsu ɔ, lɔ ɔ pɛ wa tsu nɛ ɔ nɛ.’ ”
Yesu tsa nyumuhi nyɔngma
11Benɛ Yesu ngɛ blɔ ɔ nɔ kɛ yaa Yerusalem ɔ, e ya gu huza a nɔ ngɛ Samaria kɛ Galilea a kpɛti. 12Benɛ e miɔ nɛ e maa sɛ kɔpe ko mi ɔ, nyumuhi nyɔngma nɛ he womi nɔ hiɔ yaya ngɛ a he ji nɛ ɔ nɛ daa si ngɛ tsitsaa lokoo. 13A ngɛ ngmlaa kpae ke, “Yesu lee! Tsɔɔlɔ lee! Naa wɔ mɔbɔ oo, naa wɔ mɔbɔ!”
14 #
Mose III, 14.1-32
Yesu na mɛ, nɛ e de mɛ ke, “Nyɛɛ ya nɛ nyɛɛ ngɔ nyɛ he ya tsɔɔ osɔfo ɔmɛ.”
Benɛ a yaa ngɛ blɔ ɔ nɔ ɔ, a he womi nɔ tsɔ. 15Benɛ a ti nɔ kake na kaa a tsa lɛ ɔ, e kpale e se kɛ ba, nɛ e ba je Mawu yi kɛ ngmlaa. 16E kɛ e hɛ mi ba bu si ngɛ Yesu nane nya, nɛ e na lɛ si. Se nyumu ɔ, Samaria no ji lɛ. 17Kɛkɛ nɛ Yesu bi ke, “Pi nyumuhi nyɔngma nɛ i tsa a? Jije nɛɛ ɔmɛ ngɛ? 18Mɛni he je nɛ ma se no nɛ ɔ pɛ lɛ kpale e se kɛ ba na Mawu si ɔ?” 19Kɛkɛ nɛ Yesu de lɛ ke, “Tee si nɛ o ya; o hemi kɛ yemi tsa mo.”
Bɔ nɛ matsɛ yemi ɔ maa pee kɛ ba
(Mateo 24.23-28, 37-41)
20Farisi bi komɛ ba bi Yesu ke, “Mɛni be Mawu matsɛ yemi ɔ maa ba?” E he nɔ ke, “Mawu matsɛ yemi ɔ be bae kaa nɔ́ ko nɛ a maa na kɛ hɛngmɛ. 21Nɔ ko hu be dee ke, ‘O nɛ, e ngɛ hiɛ ɔ;’ aloo, ‘E ngɛ lejɛ ɔ’; ejakaa Mawu matsɛ yemi ɔ, nyɛ mi lɛ e ngɛ.”
22Jehanɛ ɔ, Yesu de e kaseli ɔmɛ ke, “Be ma nɛ nyɛ ma hla kaa nyɛɛ na be ɔ nɛ Nɔmlɔ Bi ɔ maa ba ngɛ e hɛ mi nyami mi ɔ we ligbi kake pɛ, se nyɛ be nae. 23Ni komɛ ma de nyɛ ke, ‘Hyɛ, e ngɛ lejɛ ɔ’, aloo, ‘Hyɛ, e ngɛ hiɛ ɔ!’ Se nyɛ ko ya nyɛɛ jamɛ a ni ɔmɛ a se. 24Nɔmlɔ Bi ɔ maa ba, nɛ a maa na lɛ paa kaa bɔ nɛ oslabai kpɛɔ ngɛ hiɔwe nɛ e haa je ɔ tsuo la a. 25Se kekleekle ɔ, ja e na amanehlu babauu, nɛ kikɛmɛ a yi nɔ bi nɛ ɔmɛ kua lɛ. 26#Mose I, 6.5-8 Loko Nɔmlɔ Bi ɔ maa ba a, níhi nɛ ya nɔ Noa be ɔ mi ɔ maa ba mi jã nɔuu. 27#Mose I, 7.6-24 A ngɛ ní yee, nɛ a ngɛ ní nue; a ngɛ yihi ngɔe, nɛ a kɛ yihi ngɛ gba hae hluu kɛ ya su ligbi ɔ nɛ Noa sɛ lɛ ɔ mi. Kɛkɛ nɛ nyu kpekpemi ɔ ba, nɛ e ba kpata mɛ tsuo pɛpɛɛpɛ a hɛ mi. 28#Mose I, 18.20—19.25 Jehanɛ ɔ hu, níhi nɛ ya nɔ Lot be ɔ mi ɔ maa ba mi jã nɔuu. Kikɛ nɛ ɔ a ngɛ ní yee, nɛ a ngɛ ní nue; a ngɛ ní hee, nɛ a ngɛ ní juae; a ngɛ tsohi due, nɛ a ngɛ tsuhi mae. 29Ligbi ɔ nɛ Lot je Sodom ɔ, Mawu ha nɛ la nɛ ngɛ tsoe gegeege je hiɔwe ba kpata mɛ tsuo a hɛ mi. 30Ligbi ɔ nɛ Nɔmlɔ Bi ɔ hu maa ba kɛ e hɛ mi nyami ɔ, níhi maa ba mi kikɛ nɛ ɔ nɔuu.
31 #
Mat 24.17-18; Mar 13.15-16 “Jamɛ a ligbi ɔ, nɔ nɛ ngɛ e tsu yi mi ɔ, e ko kple si ba kukuɔ níhi ngɛ we ɔ mi. Jã kɛ̃, nɔ nɛ ngɛ ngmɔ si hu e ko kpale e se kɛ ba we mi. 32#Mose I, 19.26 Nyɛ kai Lot yo ɔ! 33#Mat 10.39; 16.25; Mar 8.35; Luk 9.24; Yoh 12.25 Nɔ tsuaa nɔ nɛ hlaa kaa e baa e klaa yi ɔ, e maa laa lɛ; nɛ nɔ tsuaa nɔ nɛ laa e klaa a, a kɛ maa to ha lɛ. 34I ngɛ nyɛ dee ke, jamɛ a nyɔ ɔ mi ɔ, ni enyɔ maa hwɔ sa kake nɔ; a maa ngɔ nɔ kake kɛ je, nɛ a ma si nɔ kake ngɛ se. 35Yihi enyɔ maa hi nɔ́ wɛɛe ngɛ he kake; a maa ngɔ nɔ kake kɛ je, nɛ a ma si nɔ kake ngɛ se.
[ 36“Nyumuhi enyɔ maa hi ní tsue ngɛ ngmɔ si; a maa ngɔ nɔ kake kɛ je, nɛ a ma si nɔ kake ngɛ se.”]
37Kaseli ɔmɛ bi lɛ ke, “Nyɔmtsɛ, jije?”
Yesu he nɔ ke, “He nɛ nɔ́ gbogboe fɔɔ si ngɛ ɔ, lejɛ ɔ okpokuhi ma bua a he nya ngɛ.”
Àwon tá yàn lọ́wọ́lọ́wọ́ báyìí:
Luka 17: Dangme
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Bible in Dangme © Bible Society of Ghana, 2018.