Shiyanso 3
3
Ishiyanso sha wunansi
1UMutwa uNguluvi wáwumbaga inkhanu soona. Lino, injokha yikhandi nsugu kishila inkhanu iso soona. Ilijuva limonga, injokha yamujovela umudala, “Aasi, shiyooli uNguluvi wávajovelaga, ‘Musikhaliisaga amakhomo ga mapishi goona aga mu shiisi’?” 2Umudala wáyijovela injokha, “Amakhomo ga mapishi ga mu shiisi shoona tikwiliile kiilya. 3Leelo, uNguluvi wátujovelaga, ‘Musikhajelaji kiilya amakhomo ga mupishi guna guli paakhati ya shiisi, wala musikhajelaji kigupyasa. Nda mugahe ndeeno, mukhafwa.’” 4Injokha yamujovela umudala, “Shiyooli musikhafwa. 5UNguluvi wájovile ndeeno, kwa kiiva ameenye ilijuva pina mukhalya amakhomo ago, mukhava nu wumanyi. Omwe mukhalingaana nu Nguluvi, kimanya amanofu na mavi.”
6Umudala uyo wáawona amakhomo ga mupishi gula gufwaya kiliiwa, munofu pa meeho, goope mupishi gwa luhala gudobokhwa. Baheene wátoola amakhomo, wáalya wámupeela nayu mugoosi waakwe, woope wáalya. 7Baaho vaava nu wumanyi, khanji vayimanya kiija vali bwinda. Vaahona amahamba ga mupishi ngaja gwa mujombe, vafwala.
8Baheene uluhaavi lwa mepo lwa shinyiijuva, vapulikha amagulu ga Mutwa uNguluvi ijenda mu shiisi. Vatiila, vatyega mu mapishi, uNguluvi asikhavaagaga. 9Leelo uNguluvi wámushemeela umugoosi yula wáaja, “Wee, uli kwi?” 10Woope wámujovela, “Nakupulikha wijenda mu shiisi, natiila, kiiva one nili bwinda, natyega.” 11Baheene uNguluvi wámuposa, “Yu naani wákujovela kiija uli bwinda? Wuli! Owe waalya amakhomo ga mupishi guna nakulajisaaga usikhaliisaga?” 12Umugoosi wáaja, “Umudala uyu yuna wanipeelaga akhale noone, yumwene yuna wánipeela amakhomo ga mupishi ugo, naalya.”
13Apo, uNguluvi wámuposa umudala yula, “Waagaha shi?” Umudala wáaja, “Injokha yanijanjilisa, naalya.”
Kiyiijilwa kwa njokha ni nyi
14UMutwa uNguluvi wáyijova injokha,
“Kwa kiiva wagagaha ago,
wayiijilwa owe kishila inkhanu soona!
Usiive witambala kwa wutumbu waakho,
insiku soona isa wiikhasi waakho, usiive wiilya amankundi.
15One nikhavagaha musikhapulinkhanaga nu mudala uyo,
na mu shisafi shaakwe na mu shisafi shaakho.
Umwene akhakutova umutwe gwakho,
na yuuwe ukhamuluma ishinsikiliinyi.”
16Wámujova umudala,
“Shiyooli nikhakuyonjelesesa uwuvafi waakho, uwa kisava kwakho,
kwa wuvafi ukhasava avaana.
Ilihaahi lyakho likhava kimutema umugoosi waakho,
leelo umwene akhakutema.”
17Baheene wámujova umugoosi,
“Kwa kiiva wamupuliisa umudala waakho,
na waalya amakhomo ga mupishi guna nakukhaanaga kiilya,
inyi nayiyiijila kwa kiiva ya owe,
usiive wiilya ishakiilya kwa kisenga insengo inkhamu insiku saakho soona.
18Inyi yikhakusavila amabalwe na mimfwa,
leelo owe ukhalya ifimelo ifya mu mugunda.
19Usiive wiipata ishakiilya shaakho kwa kitwinkha
mbakha ilijuva lina ukhatina mu lilongo,
kwa kiiva owe wawumbwagwa kwa lilongo.
Owe uli mankundi na mu mankundi ukhatina.”
20Umugoosi yula uAdamu, wámutambulila umudala waakwe ilitaawa lyakwe Hawa,#3:20 Hawa: Litaawa lya Shihebulaniya. Uluganulo lwakwe, umuunu yuna muumi. kwa kiiva umwene yu maayi wa vaanu woona. 21UMutwa uNguluvi wávagahila amafwasi ga nkwembe uAdamu nu Hawa, baheene wávafwasa.
UAdamu nu Hawa viidagwa mu shiisi
22Apo uMutwa uNguluvi wáaja, “Lino, umuunu uyu wáava ngaja muyeesu kwa kiiva wáamanya amavi na manofu. Lino asilaave agolose iliwokho lyakwe ayave amakhomo ga mupishi ugwa kiiva muumi, alye, ave muumi shiluta.” 23Baheene uNguluvi wámudaga kihuma mu shiisi sha Edeni, alime inyi yina wáwumbilwagwa. 24Wáganile kivadaga uAdamu nu Hawa, uNguluvi wávaviikha avamalayikha va makelubi#3:24 Avamalayikha va makelubi: Iliswi lya Shihebulaniya. Uluganulo lwakwe, vamalayikha va Nguluvi vina viyangalila. Yimba iliswi Malayikha mu Maswi aMahensa. ulubali lwa kunena lwa shiisi sha Edeni. Khanji wáviikha ipanga ya mooto yina yikhandi yiseetukha kuno na kuno, yiyangalila insila yina yiiluta ku mupishi ugwa wuumi.
Àwon tá yàn lọ́wọ́lọ́wọ́ báyìí:
Shiyanso 3: Shisangu
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2020, Wycliffe Bible Translators, Inc. All rights reserved.