YOHANIS 1
1
Dede'a-kokolak manafe so'da ka
1Nai makasososa na, fo daebafa ka beita da'di fa te, dede'a kokola ka nai ndia so.
Dede'a kokola ka nakabubua no Manetualain.
Ma dede'a kokola ka sama no Manetualain.
2Neme makasososan mai a, dede'a kokola ka nakabubua no Manetualain.
3Basa hata lala'e na, nananakadada'dik tunga Ndia,
ma neme basa hata manada'dik lala'e na,
ta hapu hata esa boen, fo ana da'di ta no Ndia fa.
4Dede'a kokolak ndia,
maso'da ka huu na, boema maso'dak ndia, ana fe hataholi daebafa ka mangale'dok.
5Fo mangale'dok ndia, nandela-nasa'a nai makahatu ka dalek,
tehu makahatu ka ta hapu tao namate fan.
6 #
Mat. 3:1; Mrk. 1:4; Luk. 3:1-2 Manetualain nadenu hataholi a ana mai so,
na'de Yohanis.
7Ana mai tui-benga la'eneu mangale'dok ndia,
fo ela basa hataholi la lamahele.
8Tehu hataholi ndia, ta nde mangale'dok ndia fa,
hataholi ndia ka'da manatui-benga na.
9Mangale'do matetuk fo nangale'do nala basa hataholi daebafa ka,
ana mai leo daebafa ka mai.
10Dede'a kokola ka hapun nai daebafa ka,
fo daebafa ka nananakadada'dik tunga Ndia,
tehu daebafa ka ta nalela kana fa.
11Ana mai leo nusa na mai, tehu
hataholi nala ta sipo kana fa.
12Tehu hapu hataholi sipo kana,
ma lamahelen boe;
Hataholi sila, Ana fes hak fo ala da'di Manetualain anan.
13Fo hataholi daebafak ta nde bongi nana fa,
nanahu so'da beuk ndia, ana da'di neme Manetualain mai.
14Dede'a-kokola ka,
Ana da'di hataholi daebafak,
de Ana leo nai ita tala'da,
boema ita tita matua-mademan so.
Matua-mademan ndia, Ana sipo kana
da'dileo Ama ka Ana kisa na.
Tunga Anan ndia, de ita tita Manetualain,
ma susue-lalain neu ita.
15Yohanis ana mai fo ana da'di sakasii na,
de ana tui-benga nae:
“Au afa'da hataholi a nde Ndia so;
Neukose Ana mai nakabuik neme au mai,
tehu ba'u lena au,
nanahu au beita da'di fa te, Ndia da'di so.”
16Hataholi ndia henuk no susue-lalai ka;
susue-lalain manaketu basa tak.
Ana ba'e-pala ita.
17Ita sipo Manetualain Hoholo-lalanen tunga Musa.
Tehu lafa'da Manetualain susue-lalain,
ma liinekan, tunga Yesus Kristus.
18Beita la'iesa boen fo hataholi hapu nita Manetualain,
ka'da Ama ka Ana kisa na mesa kana,
fo sama leo Ama ka, boema Ana da'di esa no Ama ka.
Ndia nde natu'du Ama ka neu ita.
Yohanis tutui-bebengan
(Mat. 3:1-12; Mrk. 1:1-8; Luk. 3:1-18)
19Basa manakoasa Yahudi manai Yerusalem-mala, ladenu ima mala lo Lewi hataholi nala, leu leo Yohanis leu, fo latanen lae, “O ia see?”
20Boema Yohanis manaku no mangale'dok nae, “Au ta nde Mane Mana Fe So'da ka ndia fa.”
21 #
Ul. 18:15, 18; Mal. 4:5 Boema hataholi sila latane selu kana lae, “Metema leondiak soona, o ia see? Ade Elia ta nde o fa do?”
Tehu Yohanis nataa nae, “Ta.”
Boema latane la'iesa selu kana lae, “Ade o ia Nabi do?”
Yohanis nataa nae, “Ta.”
22Boema lafa'dan lae, “Metema leondiak soona, mafa'da ami, see o ia, fo ami meu soona, ami mafa'da hataholi manamadenu ami a mae, see o ia.”
23 #
Yes. 40:3
Boema Yohanis nafa'das nae, “Au nde hataholi fo Nabi Yesaya nafa'da ka nae:
‘Hataholi fo nalo bou-bou neme mo solokae ka nae:
Tao matetu eno kala soaneu Manetualain.’ ”
24Boema hataholi Farisi la ladenu hataholi la leu, 25latanen lae, “Metema o ta nde Mane Mana Soi-Tefa ka, ma ta nde Elia, boema ta nde nabi esa boen, na tao le'e de o salani hataholi?”
26Tehu Yohanis nataa nae, “Au salani inik oe. Tehu nai emi dalek, hapu hataholi esa, fo emi ta malela kana fa. 27Ana mai nakabuik neme au mai, tehu se'i ta'bu ei na tali na boeo, au ta andaa fa.”
28Basa sila la, ala da'di leme Betania, nai Lee Yarden-na boboan dulu, fo nai mamanak fo Yohanis salani hataholi la.
Manetualain Bi'ilopo Ana na
29Balahaa boema, Yohanis nita Yesus mai boema nae, “Mete mitak, Manetualain Bi'ilopo Anan, fo mana kokaheni daebafa ka sala singo na, ana mai nde ndia. 30Fo au afa'da ae, Ana mai nakabuik neme au mai a, Hataholi a nde ndia so. Tehu Hataholi ndia ba'u lena au, nanahu beita bongi au fa te, Hataholi ndia da'di so. 31Ndia te, au ta bubuluk see Ndia fa. Te see ko na au mai, fo au salani unik oe, fo ela hataholi Israe la lalela kana.”
32Yohanis boeo, ana fe sakasii nae leo ia, “Au ita Manetualain Dula Dale na, ana kona neme lalai mai, sama na leo manupui kalua, de ana sa'e neu Hataholi ndia lain. 33Lelek ndia, au beita bubuluk see Hataholi ndia fa. Tehu Manetualain, fo nde nadenu au salani unik oe a, nafa'da basa au nae, ‘Metema o mita Manetualain Dula Dale na ana kona mai, fo ana sa'e neu see lain soona, neukose Hataholi ndia nde salani ninik Manetualain Dula Dale na.’ ” 34Boema Yohanis nae, “Au ita matang Hataholi ndia, de au afa'da ae, Hataholi ndia nde Manetualain Ana na.”
Yesus ana manatunga makasososa na
35Balahaa boema, Yohanis no ana manatungan dua, bei lai mamanak ndia seluk. 36Yohanis nita Yesus la'ok tunga ndia boema, ana kokolak nae, “Mete leona, te Hataholi ndia nde Manetualain Bi'ilopo Ana na.”
37Yohanis ana manatunga kadua nala lamanene Yohanis kokolak nae leondia boema, duas leu tunga Yesus. 38Yesus lipa leo dea neu boema, nita duas tungan. Boema natanes nae, “Emi dua sanga beek?”
Boema duas lataa lae, “Mesen, Mesen leo nai bee?” (Dede'a Rabi ndia, sosoa na nae, Mesen.)
39Tehu Yesus nafa'da duas nae, “Mai fo mita matam.” Boema duas tunga Yesus, fo sue ka nde duas bubuluk Yesus mamana leleo na. Ndia te, li'u ha le'donoso na so. Faik ndia dale na, duas leo lo Yesus.
40Yohanis kokolak no hataholi kaduak fo basa boema duas leu tunga Yesus ndia, esa na'de Anderias, fo Simon Petrus tolanoo na. 41Tutika Anderias lai-lai neu sanga Simon, fo tolanoo na, de nafa'dan nae, “Ami matongo mo Mesias so!” (Mesias sama leo Kristus, fo nde: Mane Mana Fe So'da ka.) 42Boema Anderias no Simon leu leo Yesus leu.
Yesus mete tetee Simon boema nafa'dan nae, “O Simon, Yona anan. Neukose loke o soona lae, Kefas.” (Kefas sama leo Petrus, fo sosoa na nae, lete batu.)
Yesus nalo Felipus no Natanael
43Fo'a mai boema, Yesus naketu basa, Ana sanga neu leo Galilea neu. Neu boema, natongo no Felipus, tutika nafa'dan nae, “Mai fo tunga au!” 44Felipus ia neme Betsaida mai, fo Anderias no Petrus nggolo na. 45Felipus natongo no Natanael boema, nafa'dan nae, “Ami matongo mo hataholi fo Musa sesei kana nai Manetualain Susula Hoholo-lalanen dale ka, fo nabi la tui-benga ka. Hataholi ndia nde Yesus neme Nazaret, fo Yusuf ana na.”
46Tehu Natanael nataa nae, “Neme bee mai a, hata malole esa, ana bole da'di neme Nazaret mai?”
Boema Felipus naen nae, “Mai teu fo mita matam.”
47Yesus nita Natanael mai boema, nafa'dan nae, “Mete mitak hataholi Israel matetu ka nde ndia. Ta nanasese'do-babalik fa.”
48Boema Natanael natane Yesus nae, “Te tao leo bee de Ama malelak au?”
Tutika Yesus naen nae, “Felipus beita nalo o fa, te Au ita o mangatuuk meme ai ka huu na so.”
49Boema Natanael nafa'da Yesus nae, “Ama Mesen, tete'e ka Ama nde bee na, Manetualain Anan! Ama nde da'di hataholi Israe la, Mane na!”
50Boema Yesus nafa'dan nae, “O mamahele nana Au afa'da o ae, Au ita o mangatuuk meme ai ka huu na hetu? Neukose o mita dede'a matuaina la, ba'u lena seluk ndia bai!” 51#Kej. 28:12 Yesus nafa'dan boe nae, “Tete'e ka, mamahele leona te neukose o mita lalai natahuka, fo o mita Manetualain ata nusa so'da nala, ala kona kae leo Ana Hataholi ka mai.”
Àwon tá yàn lọ́wọ́lọ́wọ́ báyìí:
YOHANIS 1: twu
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀