Məfaʼə 3
3
Pita a Tsóʼə Kɔ́ŋə́sê Yitsə̌
1A nə ńdáʼ ḿbə́ alě tsə́ Pita pó Jɔn tə́ ńkɔ́ʼə ńgɛnə̂ Tə́kɔʼndɛ̂sê nə́ anuə pəmə́nu pɛ́n teelə́ nə́ ənumnə páʼ a nə ḿbə́ nə́ ndɛlə́ achaʼtə́sê. 2Ŋwu tsə̌ a nə ńchî ə́wɨ́ ə́fɛ́d páʼ pə́ nə ḿbî nə́ yí a pə́ kɔ́ŋə́sê, pə́ zá ńtwáamə yí əlě ətsəm ńgyǐəə ńnáakə a ntsǒnkáʼ yi pɔ́ nə́ á Tə́kɔʼndɛ̂sê páʼ pə́ nə̈ fóŋ nə́ ńgə́ “Biyutiful Géd.” Pə́ nə̈ ńgyǐəə ńnáakə yí ə́wɨ́ lə́ ńgə́ a tə́ ńdɔ́ əpúmə á mbô pɨ pó nə̈ ńkwú nə́ á Tə́kɔʼndɛ̂sê. 3Ndzaŋə a nə ńjɨ́ nə́ Pita pó Jɔn pó tə́ ńdoonə̂ á mə́ kwú nə́ lə́, a póʼmbô nə́ pó ńgə́ pó fɛ̂ nkáb nə́ yə́. 4Pita tə́g əmə́g ńnáŋə yí ńtíʼ ə́sóŋ ńgə́, “Náŋə áwə́gə́!” 5A tíʼ ńnáŋə ághɔ́b ńkwaŋ ńgə́ pó yǐ fɛ̂ ajú nə́ yə́. 6Pita a tíʼ ə́sóŋ ńgə́, “Maŋ kě seleba kɨ gôlə túg pô, lə́ maŋ yǐ fɛ̂ ajú páʼ maŋ túg nə́ á mbô gho. Nə́ əlɛ́n Yeso klisto Mɔ́ Nazalɛd, maŋ sóŋ ńgə́ lǒo əsê ńnyinə̂.” 7A tíʼ ńgwaamə̂ apô ají yə tɨ ńkwáalə yə́ a lǒo əsê. Tsɔʼə əghâ yi wɨ́, məko mí pópə mələʼtə́ mə́ məko mí mə́ tyantə̂; 8A lî ńkɔ́ʼə atǐ ńtɨ́ nə́ məko mí ńchúʼə á mə́ nyi nə́. Pó po tíʼ ńgɛnə̂ á mə́m Tə́kɔʼndɛ̂sê, a nyinə̂ ńdîə ńkɔ́ʼə atǐ ńgóʼkə Əsê. 9Əghâ ándó ŋwu ntsəmə a nə ńjɨ́ nə yí a tə́ ńnyinə̂ ńtûə ńgóʼkə Əsê lə̂, 10pó leŋə̂ yə́ a pə́ lə́ tsɔʼə ŋwu wə̂ páʼ a nə̈ ńnáanə nə́ a ntsǒnkáʼ Tə́kɔʼndɛ̂sê yi pɔ́ nə́ páʼ pə́ fóŋ nə́ nə́ “Biyutiful Géd” ńdɔ́ nkáb lə́. Anuə á nə ńdaŋ nə́ á mbɨ ŋwu wə̂ á nə ńkɨʼnə̂ ághɔ́b ńkə́ ńtsɛɛlə̂ ághóobə́.
Anu Páʼ Pita a kə Sóŋ nə́ á Tə́kɔʼndɛ̂sê
11Ndzaŋ ŋwu wə́ a nə ńtsə́ŋnə nə́ á ndzəm Pita pó Jɔn lə̂, anu yəwə́ a kɨʼnə̂ ŋwu ntsəm pó tíʼ ńkə́ ńgyǐ ńtégə ághóobə́ aliʼ pó nə ńchî nə́ ə́wɨ́ pə́ fóŋə nə́, alaakə Solomun lə́. 12Pita a jɨ́ pɨ pə̂ ńtíʼ sóŋ nə́ pó ńgə́, “Pɨ pə́ Islɛl, lə́ ghɛlə̂ akə̂ anu zəənə́ a kɨʼnə̂ áwə́ənə́? Lə́ ghɛlə̂ akə̂ nə náŋə áwə́gə́ pə́ ándó pəg ghɛd lə́ nə́ mətɨ mə́g kɨ məntɨ́ mə́g mə́ ŋwaʼ lə́ ŋwaʼ nə́ á mbi Əsê tə́shúnə́? 13Əsê Ablaam, pó yi Azig, nə́ yi Jekɔb, Əsê pətǎ pɛn ə́ fɛ̂ nəgháʼə á mbô mɔ́ əyǐ Yeso. Pɨ nə fɛ̂ yí ńgə́ pə́ jwítə yə́, ńkǐəə yə́ á mbi Payilɛd páʼ Payilɛlə a nə ḿbǎ nə́ tə ə́sóŋ ńgə́ pə́ mɛdtə̂ yə́ a ghɛn lə́. 14Pɨ nə ńkǐəə áwə́ənə́ ŋwu páʼ a ŋwaʼ nə́ ńkə́ ńtɨ́ ndə̌ŋdəŋ ə́sóŋ ńgə́ pə́ mɛdtə̂ pə́ njwítə á mbô pəənə́. 15Pɨ nə ńjwítə ŋwu páʼ ä fɛ̂ nə́ nchîmbîə á mbô pəənə́, lə́ Əsê a pə́ ńjúmkə yə́ á nəwûə. Pəg nə ńjɨ́ ndɛn mənu ghɛn ətsəmə. 16Lə́ nə ńgɛd mətɨ mə́ chî nə́ nə́ əlɛ́n Yeso kɔ́ŋə́sê nə́ a tyantə̂. Ŋwu nə́ páʼ nə̈ jɨ́ nə́ yí ńkə́ ńjîə yí lə́, pə tsóʼə yí lə́ ńté ńgə́ a néŋ ńtɨ́ əyí nə́ əlɛ́n Yeso. Lə́ mbimə́ á mə́m Yeso páʼ ə́ ghɛd nə́ a yáŋə, ndzaŋ pɨ pətsəm ə́ jɨ́ nə́ lɛ̌.”
17Əghâ nə́ nə́ pəlimə́ mə, maŋ jî ńgə́ anu pɨ̌pə mətû mɨ́ ə́ nə ńgɛd nə́ nə́ Yeso lə́, pɨ nə ńgɛd lə́ təjîə. 18Əsê a nə ńkyaʼ ńdaŋə̂ á mbô məntú mí mətsəmə á ngoʼ pəchə́ ńgə́. Yi páʼ Əsê a Tsəʼ nə́ a yǒ jɨ́ ngə́ʼə. Á pɛn ńkə́ ńdɔgə̂ aliʼ. 19Tíʼ nə́ ńkwúblə ḿbəənə̂ á mbô Əsê ńjî ńgə́ Əsê a ləgnə̂ təpɔŋ əwəənə́, 20ńjî ńgə́ Mmaʼmbî a ghɛd məntɨ́ mɨ́ mə́ féŋtə, a túmə Yi páʼ Əsê a tsɔ́ʼ nə́ ńtsəʼə̂ á mbô pəənə́, yí páʼ a pə́ nə́ Yeso lə̂. 21A yǐ ńchîə á nəpó tə ńkoʼ nə́ ndɛd páʼ Əsê a yǒ nə́ ghɛlə̂ ajúmə atsəmə a pə́ yə fîə. Ndzaŋ páʼ Əsê a nə ńdaʼnə̂ nə́ ə́fɛ́lə a ngoʼ pəchə́ ńdaŋə̂ á mbô məntú mí mimə ŋwaʼ nə́. 22Ńté ńgə́ Mosisə a nə sóŋ ńgə́, Mmaʼmbî páʼ a pə́ nə́ Əsê əzəənə́ a yǒ túmə ntûsê á mbô pɨ tsɔʼə ndzaŋ páʼ a nə ńtú nə́ mə lə̂, páʼ a yǐ nə́ fɛ́d tsɔʼə á mə́m pɨ pəənə́. Nə́ yǐ shib jwə́ʼtə anuə atsəm páʼ ä sóŋ nə́ á mbô pəənə́. 23Ŋwu ntsəm páʼ a kě nə́ á mbô yí jwə́ʼtə pô, pə́ yǒ fógə yə́ á mə́m pɨ pə́ Əsê jwítə yə́. 24Məntú mə́ Əsê mətsəm ńchúʼ nə́ Samuɛl ḿbéenə mi páʼ mə́ zoŋ nə́ á ndzəm yí páʼ pó kə túg nə́ məŋkɨ, pó kə̈ sóŋə anu ńté əlě mbî pəənə́. 25Məndaʼnə mə́ Əsê páʼ mə́ nə ńdaŋ nə́ á mbô məntú mí mə́ chî lə́ á mbô pəənə́. Pɨ lə́ pɔ́ pə́ məntúmə́sê, á pə́ ńgə́, Əka páʼ Əsê a nə ńgwad nə́ pópə Pətǎ pɨ lə́, ə́ kə́ ńchîə á mbô pəənə́. A kə sóŋə á mbô Ablaam ńgə́, Maŋ yǐ ghɛlə̂ á pɔŋə̂ á mbô ŋwu ntsəm á ndu ndəsê ə́ laŋ nə́ ngwud əzo. 26Ńdaŋ ə́lɨ́d Əsê a tsɔ́ʼə ngaŋə afaʼ əyǐ ḿbeg ńtúmə á mbô pɨ ńgə́ á ghɛd á pɔŋə̂ á mbô pɨ ńgɛd pɨ fɛ́lə á mə́m mənu mə́ afanə mə́ənə́.
Àwon tá yàn lọ́wọ́lọ́wọ́ báyìí:
Məfaʼə 3: azo
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀