Jɔnə 5
5
Yeso a Tsóʼə Nkweglə Yitsə̌.
1Ndɛd yitsə̌ ə́laŋ, pɨ pə́ Islɛl pó chîə á mə́ jî nə́ akɔŋtə yətsə̌ á mə́m Jɛlusalɛmə, Yeso a tíʼ ńkɔ́ʼ ńgɛn ə́wə́. 2Aləmə́ nkǐ yətsə́ á nə ńchîə Jelusalɛm ḿbáatə ntsǒnkáʼ yitsə́ pə́ fóŋə nə́ Ntso Nkáʼ Məmbéŋ mə́ ndzɛlə, ə́fóŋə aləmə́ yə əwɨ́ nə́ atséebə Islɛl ńgə́ Bɛzata. Aləmə́ yəwə́ á kə túg məkwuunə́ mɛ́n tâ, pə́ pɔ́ nə́ ándó əlaakə. 3Pəghɔ pi nɨ́ nə pó kə noŋnə̂ á mə́m əlaakə pi wə́, páʼ pətsə́ pə́ nə əfəg nə́, pətsə́ pó pə́ pəkə́neʼə́ntá pópə pəkweglə. 4(Pó tə́ ḿbyáabə ńgə́ nkǐ ə́sɛdnə̂), ńté ńgə́ ntseŋndɛ̂ Mmaʼmbîə a nə̈ ńtsóolə tsɔʼə ngǎ ngǎ ə́sɛdkə̂ nkǐ yi wə́, əghâ yi ə́wɨ́ ntsɛɛmbi ŋwu páʼ a kwú nə́ á mə́mə aləmə́ nkǐ yə wɨ́, ndzaŋ páʼ ntseŋndɛ̂ Mmaʼmbîə a pěʼ nə́ ə́sɛdkə̂ nkǐ lə́, a yáŋə yí nə́ ntê aghɔ ntsəm páʼ ə́ pěʼ nə́ ńtə́ ńjwaʼə̂ yə́). 5Ŋwu tsə̌ a nə ńchî ə́wɨ́ páʼ a ghɔ nə́ nə́ ngoʼ məghə́m mɛ́n mə́ teelə́ nə́ ngoʼ nəfeemə́. 6Əghâ ándó Yeso a nə ńdzɨ́ nə́ yí lə́, ńjî ńgə́ a nə ńnoŋnə̂ aliʼ yi ə́wɨ́ tə ndi sagə̂, Yeso a pítə yí ńgə́, gho loonə̂ a mə́ yáŋ nə́? 7Ngɔ wə̂ a kwěe yí ńgə́, Tǎ, maŋ kě ŋwu tsə̌ túg təmbɔʼ a néŋə mə á mə́m aləmə́ nkǐ əghâ páʼ nkǐ ə́sɛdnə̂ nə́ pô. Əghâ atsəm páʼ maŋ tə́ nə́ ńdoonə̂ á mə kwú nə á mə́m wɨ́ lə́, ŋwu ndaʼ a peg ńkwúnə á mbi maŋə. 8Yeso a sóŋ nə́ yí ńgə́, lǒo ndəsê ḿbyáanə mə́ta əgho ńnyinə̂. 9Tsɔʼə əghâ yi ə́wɨ́ ŋwu wə̂ a yáŋə yə́, ńtíʼ ḿbyáanə mə́ta əyǐ ńchúʼə á mə́ nyi nə́. Alě páʼə anu zəənə́ á nə ńdɔg nə́ alíʼ lə́, lə́ nə ḿbə́ alěláʼə́sê. 10Nətû nə́ pəjus nə́ sóŋə á mbô ŋwu pə́ tsóʼ nə́ yí lə́ ńgə́, Ə́sɛ̂n lɛ̌ lə́ Alěláʼə́sê, noŋkə əwɛ́nə a kě pí ńgə́ mbɔʼ gho twáamə mə́ta əgho pô. 11A kwěe ághɔ́b ńgə́, ŋwu páʼ a tsóʼ nə́ mə a sóŋ nə́ maŋ ńgə́, pyáanə mə́ta əgho ńnyinə̂. 12Pó pítə yí ńgə́, Lə́ əwə ŋwu páʼ a sóŋ nə́ á mbô gho ńgə́, pyáanə mə́ta əgho ńnyinə̂? 13Ŋwu pə́ nə ńtsóʼ nə lə́ a nə ńkě jîə ŋwu páʼ a tsóʼ nə́ yí pô, ńté ńgə́ Yeso a nə ńtsóʼə yí ńtíʼ ə́sóotə á mə́m ənɔ pɨ pó nə ńchî nə́ ə́wɨ́ ńgɛnə̂ yə́. 14Ndɛd yitsə̌ laŋ Yeso a zə́ənə ŋwu ə́wə́ á mə́m Tə́kɔʼndɛ̂sê, ńtíʼ ə́sóŋə á mbô yí ńgə́, Zə́ənə, gho yáŋə. Kɔ pɨ ńgɛlə̂ təpɔŋə, ńjî ńgə́ kɔ anu yətsə́ á tsɛ nə́ yətsə́ zə̂ á pɨ́ ńdaŋə̂ a mbɨ gho. 15Ŋwu wə̂ a ghɛn ńtíʼ ə́fiʼtə̂ nətû nə́ Pəjusə ńgə́ lə́ Yeso páʼ a nə ńtsóʼ nə́ yə́. 16Pəjus pó kə chúʼə mə́ tsaŋkə̂ nə́ Yeso ńté ńgə́ a kə tsóʼə ŋwu ghɛnə́ alěláʼsê. 17Lə́ Yeso a kwěe ághɔ́b ńgə́, “Tǎ mə ä faʼə̂ lə́ əghâ ətsəmə, maŋ kə́ ńchîə mə́ faʼ nə́ ə́lə́ələ́.” 18Anu páʼ Yeso a nə sóŋ nə́ lə́ á ghɛd mətû mə́ Pəjusə mə́ loonə̂ mə́ jwítə nə́ yí ńtsɛ ndzaŋ pó nə ńchúʼ nə́ mə́ tsaŋkə̂ nə́ yí lə́, pó nə sóŋ ńgə́ Yeso a nə ńkě wǔ lə́ tsɔʼə noŋkə Alěláʼə́sê pô, a kə ghɛn nə́ mbiə a mə́ fóŋ nə Əsê nə́ Tǎ əyǐə, ńdoonə̂ á mə́ sóŋ nə́ ńgə́ pó əsê lə́ pələŋə́. 19Yeso a fɛ̂ akwe zəənə́ á mbô pó ńgə́, “Mäŋ fiʼtə̂ áwɨ́ nə́ ndə̌ŋdəŋ ńgə́, təmbɔʼ Móonə#5.19 Yeso a ghə́ tsáb əghâ tsə́ a pə́ ándó a tséebə nə́ ŋwu ndaʼ lə́ ḿbə́ ńtséebə ńté lə́ mbɨ əjǐə, a tséebə ə́lɨ́d lə́ əghâ azoŋə á chî nə́ á tətɨ pópə pɨ pó po tsáb nə́. á kě anu yətsə̌ a ngǎ yí ghɛd pô, a ghɛlə̂ lə́ tsɔʼə mənu páʼ ä zɨ́ nə́ Tǎ əyǐə a ghɛlə̂ mə́ələ́, anuə atsəm páʼ Tǎ a faʼ nə́, lə́ zɨ́d páʼ a kə́ nə̈ ə́faʼə̂. 20Lə́ ə́lɨ́d ńté ńgə́ Tǎ a kɔŋə̂ mɔ́ əyǐ, ńtíʼ ńnəələ̂ a yí nə́ anu páʼə ä faʼ nə́, Lə́, a yǒ kə́ nəələ̂ yí nə́ pətə́kɔʼ pə́ mənu páʼ mə́ tsɛ nə́ məənə́, ńjî ńgə́ anu yəwə́ á chígə́ ńkɨʼnə̂ áwə́ənə́. 21Tsɔʼə ndzaŋ Tǎ a nə ńjúmkə nə́ pəkwû ḿbɨ́ ə́fɛ̂ nchîmbîə á mbô pó lə́, lə́ ndzaŋ mɔ́ əyǐ á yǒ nə́ kə́ ə́fɛ̂ nchîmbîə á mbô ŋwu páʼə a kɔŋ nə́. 22Tǎ a kě əsáʼ ŋwu tsə̌ tə́ ńtsɔ́ʼtə pô, lə́ ḿbə́ ə́fɛ̂ mətɨ mətsəm nə́ mɔ́ əyǐ ńgə́ a tsɔ́ʼtə məsáʼ mə́ ŋwu ntsəmə. 23Tǎ a ghɛd ə́lɛ̌ ńjî ńgə́ ŋwu ntsəmə a zóʼnə mɔ́ əyǐ, tsɔʼə ndzaŋə ándó a zóʼnə nə́ Tǎ. Ŋwunə a kě nə́ Mɔ́ zóʼnə, a kě Tǎ páʼ a tú nə́ yí kə́ zóʼnə pô. 24Mäŋ fiʼtə̂ áwɨ́ nə́ ndə̌ŋdəŋ ńgə́, ŋwu ntsəm páʼ a zóʼ nə́ atséebə mə ńkə́ néŋ ntɨ́ nə́ ŋwu páʼ a tú nə́ mə, a túg nchîntɨ páʼ ə́ mɛdnə̂ nə́ ngǎ mɔʼə́, Pə́ yǒ kě əsáʼ əyí tsɔ́ʼtə pô. A pɛ́dtə fɛ́lə a mə́m nəwû ńkwúnə á mə́m nchîmbîə. 25Mäŋ fiʼtə̂ áwɨ́ nə́ ndə̌ŋdəŋ ńgə́, ndɛd tə́ ńgyǐəə, zɨ́d pɛn ńkoʼ əghâ nə́ páʼ pəkwû pó yǒ nə́ zóʼ ngye Mɔ́ Əsê, pɨ pó zóʼ nə́ pó yǒ chîə mbîə. 26Ndzaŋ páʼ Tǎ nə́ nkɔ̌ʼmbɨ əyíə a túg nə́ nchîmbî ńkə̈ ə́fɛ̂ á mbô pɨ lə́, a kə́ ńgɛd Mɔ́ nə́ nkɔ̌ʼmbɨ əyə́ á túg nchîmbî ńkə́ əfɛ̂ a mbô pəənə. 27Lə́ a kə́ ə́fɛ̂ mətəənə á mbô Mɔ́ ńgə́ a tsɔ́ʼtə əsáʼ pɨ ńté ńgə́ lə́ Mɔ́ ŋwunə. 28Kɔ zəənə́ á kɨʼnə̂ áwə́ənə́, ndɛd tə́ ńgyǐəə páʼ pəkwû pətsəm pó chî nə́ á mə́m nəse pó yǐ nə́ zóʼ ngye əyə́, 29ə́tíʼ ə́fɛ́lə á mə́m məse móobə́, pɨ pó faʼ nə́ əshîʼnə pó júmnə nəwû ńchîə á mbîə, pɨ pó ghɛd nə́ təpɔŋ á mə́m mbî ghɛn pó júmnə nəwû ńgwǔ əsáʼə.”
Pɨ Pó Fiʼtə̂ nə́ Ndə̌ŋdəŋ Ńté Yeso
30Yeso a ghɛn nə́ mbiə a mə́ sóŋ nə́ ńgə́, “Təmbɔʼ maŋ kě anu yətsə̌ nə́ mətəənə mə faʼ pô, ndzaŋ páʼ Tǎ mə a fiʼtə̂ nə́ mə lə́ ndzaŋ páʼ maŋ tsɔ́ʼtə nə əsáʼə. Maŋ tsɔ́ʼtə əsáʼ lə́ ndə̌ŋdəŋ ńté ńgə́ maŋ kě loonə̂ mə́ faʼ nə lə́ anu páʼ maŋ kɔŋ nə́ a mə́ faʼ nə pô, maŋ faʼə̂ lə́ anu páʼ Tǎ mə, páʼ a tú nə́ mə, a lɔ nə́ ńgə́ maŋ faʼə̂. 31Təmbɔʼ maŋ tsáb ńté mbəəmə mə, anu páʼ maŋ sóŋ nə́ ńté mbəəmə mə a kě lə́ ndə̌ŋdəŋ pô. 32Lə́ ŋwu tsə̌ a chî ə́wɨ́ páʼ ä tsáb nə ńté mə, anu páʼ ä sóŋ nə lə́ ndə̌ŋdəŋə́. 33Pɨ nə ńtú mətû mə́ənə́ a mbô Jɔn ńgə́ pó pítə anu ńté mə, lə́, anu páʼ a nə sóŋ nə́ ńté mə lə́ ndə̌ŋdəŋə́. 34Lə́ kě pə́ ńgə́ maŋ tə́ ńnáŋə ŋwu ńgə́ a yǐ ńtsáb ńté ŋwu maŋ pə́ nə́ wɨ́d pô, mäŋ sóŋə jɨ lə́ ńgə́ mbɔʼ pɨ chwáalə. 35Jɔnə a kə pə́ lə́ lam páʼ ä kɛ́d nə́ ńkyaʼə̂, pɨ loonə̂ á mə́ kɔŋtə̂ nə́ á mə́m nkyaʼ əji nə́ mɔ́ akəmə ndɛlə́. 36Lə́, mənu mə́ chî páʼ maŋ tsáb nə́ tə ńtsɛ mənu páʼ Jɔnə a kə fiʼtə̂ nə́ pɨ ə́wɨ́ ńté mə. Məfaʼ páʼ Tǎ a fɛ̂ nə́ ńgə́ maŋ faʼ mə́ tə́ ńtséebə ńté mə ńkə́ ńnɨd ńgə́ Tǎ a tú nə́ mə. 37Tǎ páʼ a tú nə mə a tsáb nə́ anu ńté mə. Nə kě ngye əjǐ kə́ zóʼə pô, ńkě kə́ láʼə zɨ́ ndzaŋə a chî nə́ pô; 38Atséebə ajíə a kě á ntɨ́ pɨ chî pô, ńté ńgə́ nə́ kě ntɨ́ nə́ ŋwu páʼ á tú nə́ néŋ pô. 39Nə pyádnə ńdzéʼə aŋwaʼlə Əsê ńté ńgə́ nə kwaŋ ńgə́ zə́ələ́ á yǐ fɛ̂ nchîntəənə á mbô pəənə́, Aŋwaʼlə Əsê a pə́ ńtséebə lə́ anu ńté mə. 40Pɨ pɨ ńkǐə a mə́ yǐ nə́ a mbô maŋ ńjî ńgə́ təmbɔʼ pɨ túg nchîmbîə. 41Maŋ kě tə́ náŋə nəgháʼə a mbô ŋwu məsɔŋ pô. 42Maŋ jî ńgə́ nə kě akɔŋnə Əsê a ntɨ́ pɨ túg pô. 43Maŋ yǐ lə́ nə́ əlɛ́n Tǎ mə, lə́ nə pə́ ńkě mə pí pô, Lə́ mbɔʼ ŋwu ndaʼə a yǐ nə́ əyí əlɛ́n, nə́ pímə yí nə́ ntɨ́ əwɨ́ ətsəmə. 44Təmbɔʼ nə néŋ ntɨ́ lə́ ə́lɛ́ páʼ nə̈ náŋ nə́ pə́ nəgháʼ páʼ a lǒo nə́ pə́ á mbô pɨ nə́ pəənə́, ńkě túg ndɛd yitsə̌ nə́ nəgháʼ páʼ a lǒo nə́ á mbô Əsê pô? 45Kɔ nə kwaŋ ńgə́ maŋ yǐ néŋ əsáʼə á mbô Tǎ ńté áwə́ənə́. Lə́ Mosisə páʼ pɨ pí nə́ ńgə́ á yǐ kwáalə áwə́ənə́, lə́ yə́ a yǐ nə́ néŋ əsáʼ əwə́ənə́ á mbô Tǎ. 46Təmbɔʼ pɨ nə ḿbímə anu páʼ Mosisə a nə ŋ́ŋwaʼlə̂ nə́ tə ḿbə́ pɨ nə ńkə́ ḿbí lə́ mə ńté ńgə́ Mosisə a nə ŋ́ŋwaʼlə̂ ńté lə́ mə. 47Təmbɔʼ nə chî pímə anu páʼ Mosisə a nə ŋwaʼlə̂ nə́ pô, nə yǐ ḿbímə anu páʼ mäŋ sóŋ nə́ lə́ ə́lɛ́?”
Àwon tá yàn lọ́wọ́lọ́wọ́ báyìí:
Jɔnə 5: azo
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀