Matyo 23
23
Yeso a Kwantə̂ Ngaŋə́zoŋə́ndzəm Əjí ńté Ngaŋə́zéʼkə Pənoŋkə pópə Pəfalasiə
(Mag 12.38, 39; Luk 11.43, 46; 20.45, 46)
1Yeso a tíʼ ə́sóŋ nə́ apoŋə pɨ zə̂ pópə ngaŋə́zoŋə́ndzəm əjí ńgə́, 2“Ngaŋə́zéʼkə pənoŋkə pópə Pəfalasi náanə akɔʼ Mosisə. 3Lə́ a pə́ ńgə́ nə́ shib ńdzóʼnə ághɔ́b ńkə́ ə́faʼə̂ anuə atsəm páʼ pó sóŋ nə́ ńgə́ nə́ faʼə̂, lə́, kɔ nə́ faʼə̂ anu pö faʼ nə́ ńté ńgə́ pó kě faʼə̂ lə́ anu pó zéʼkə nə́ pô. 4Pö kwúd əpeʼ pi lɛd nə́ ńtə́gə á mbeʼtə pəənə, ḿbə́ ńkě chî təmbɔʼ pó lɔg tsɔʼə fîəpô ńtɔ́mtə ághɔ́b ə́wɨ́ pô. 5Anuə atsəm pó faʼ nə́, pö faʼə̂ lə́ ńgə́ pɨ pə́ zə́ənə ághóobə́. Pö ghɛlə̂ pəpɔ́b pɔ́ pə́ nkwum páʼə atséebə Əsê á chî nə́ ə́wɨ́ pə́ wê nə́ á nəzeŋnə́ pópə apô lə́ pə́ fáŋkə̈, ńkə́ ńgɛlə̂ məmɔ́b məndzíglə́ mə́ atsəʼ mə́ sakə̂! 6Pó kɔŋə̂ á mə́ náanə nə́ əkɔʼ pi weŋə́ aliʼə́ akɔŋtə ńkə́ ńkɔŋə̂ á mə́ náanə nə́ nə́ əkɔʼ chigə pəənə á ndɛ̂sê pəjusə. 7Pó kɔŋ ńgə́ pə chaʼtə̂ ághóobə́ á ndu məteenə́ ńkə́ ńkɔŋ ńgə́ pə fóŋə ághɔ́b ńgə́ ‘Ndzéʼkə.’ 8Lə́, kɔ nə pí pə́ fóŋə áwɨ́ ńgə́ ‘Ndzéʼkə’ ńté ńgə́ nə́ túg lə́ tsɔʼə táʼ Mə́sa pɨ pətsəm nə tíʼ ḿbə́ lə́ pɔ́pə́mɛ́. 9Kɔ nə́ láʼ ńkə́ fóŋə ŋwu tsə̌ á ndu ndəsê ńgə́, ‘Tǎ’ ńté ńgə́ nə́ túg lə́ tsɔʼə táʼ Tǎ páʼ a chî nə́ á nəpóolə. 10Kɨ kɔ nə́ kə́ ḿbí pə́ fóŋə áwɨ́ ńgə́ ‘Mə́sa’ ńté ńgə́ nə́ túg lə́ tsɔʼə ndaʼ táʼ ‘Mə́sa’ páʼ a pə́ nə́ Nchwádkə. 11Ŋwu yi ngweŋə́ á mə́m pəənə́ a yǐ pə́ lə́ ngaŋəfaʼ əwəənə́. 12Ńté ńgə́ ŋwu ntsəm páʼ a kɔ́ʼkə nə́ mbɨ əjǐ pə́ yǐ tsóokə yə́. Ŋwu ntsəm páʼ a kə́ nə́ ńtsóokə mbɨ əjǐ pə́ yǐ kɔ́ʼkə yə́.”
Yeso a Kǐəə Anuə Məfɨgə Azóobə́
(Mag 12.40; Luk 11.39-42, 44, 52; 20.47)
13Ndɔ ə́ chîə atû pəənə́, ngaŋə́zéʼkə pənoŋkə pó Pəfalasi, pɨ lə́ ngaŋmə́fɨgə! Nə̈ kɨ́ʼ ndúmə anuə nəfoonə nəpóolə á əshî pəənə ḿbə́ ńkě ajɨ́ ə́wɨ́ kə́ ńchîə á mə́ kwú nə́ pô ńkě kə́ ńchîə á mə́ mɛdtə̂ nə́ pɨ pó lɔ nə́ mə́ kwú nə́ ə́wɨ́ pó kwú ə́wɨ́ pô.#23.13 Pətsə́ əŋwaʼlə peg nkaŋ 14; Ndɔ ə́ chîə atû pəənə́, ngaŋə́zéʼkə pənoŋkə pópə Pəfalasi, pɨ lə́ ngaŋmə́fɨgə! Nə́ jîə ape nə́ pəkog ńkwáalə məngyaʼə́ mɔ́b ńtíʼ ńdɔgə̂ tə́sɛ achaʼtə́sê ḿbóŋkə ə́wə́. Ńdaŋ ə́lɨ́d, əjɨ ngə́ʼ yǒ chaanə̂.
15“Ndɔ ə́ chîə atû pəənə́, ngaŋə́zéʼkə pənoŋkə pópə Pəfalasi, pɨ lə́ ngaŋmə́fɨgə! Nə̈ jáʼə pəkɔŋ pópə pəmɛ́ pə́ mənkǐə á mə́ kwúblə nə táʼ ŋwunə a pímə azə́ənə́ anǔəsê. Əghâ ándó a yǐ nə́ ḿbí ndzoŋ ndzəm əjɨ, nə ghɛd a koʼnə̂ á mə́ ghɛn nə́ á mə́m móg Satan ńtsɛɛlə̂ wɨ́ ngǎ pɛ̌.”
16“Ndɔ ə́ chîə atû pəənə́, pɨ lə́ pəfəg ḿbə́ ńtə́ ńkwá mbi pəənə! Pɨ̈ sóŋə ńgə́, ‘mbɔʼ ŋwunə a ghɛlə̂ atyǎntə ndaʼnə nə́ əlɛ́n Tə́kɔʼndɛ̂sê, á kě ajûtsə́ pô. Lə́ təmbɔʼ ŋwunə a pə́ ńgɛlə̂ atyǎntə ndaʼnə nə́ əlɛ́n ngɔʼ yi ŋwaŋkə̂ nə́ páʼ ə́ chî nə́ Tə́kɔʼndɛ̂sê, a shib ə́faʼə̂ anu yəwə́.’ 17Əkəkóg pəfəg pətsə́! Zə́ənə́ á səglə̂ nə́? Lə́ ngɔʼ yi ŋwaŋkə̂ nə́ zə̂, kɨ Tə́kɔʼndɛ̂sê páʼ a fɛ̂ nə́ nəsəg nə́ ngɔʼ yi ŋwaŋkə̂ nə́? 18Nə́ kə̈ ə́sóŋə ńgə́, ‘mbɔʼ ŋwunə a ghɛlə̂ atyǎntə ndaʼnə nə́ nəpá nə́ Əsê, a kě anu yətsə́ pô. Lə́ ḿbə́ ńgɛlə̂ atyǎntə ndaʼnə nə́ akáŋə́sê páʼ á tɨ́ nə́ á nəpá Əsê, a shib faʼə̂ anu yəwə́.’ 19Pəfəg pətsə́! Zə́ənə́ á səglə̂ nə́, akáŋə́sê kɨ nəpá nə́ Əsê páʼ nə́ ghɛd nə́ akáŋə́sê á səglə̂? 20Lə́ələ́ pə́ ńgə́ ŋwu ntsəm páʼ a ghɛd nə́ atyǎntə ndaʼnə á nəpá Əsê a ghɛlə̂ ázɨ́d lə́ pópə ajúmə atsəmə á ndu wə́. 21Ŋwu ntsəm páʼ a kə́ nə́ ghɛd nə́ atyǎntə ndaʼnə nə́ əlɛ́n Tə́kɔʼndɛ̂sê, a ghɛd lə nə́ zɨ́d pópə Əsê páʼ ə́ chî nə́ á mə́m ə́wə́. 22Ŋwu páʼ a kə́ nə́ ńgɛd nə́ nəpó, a ghɛd lə́ nə́ aləŋə́ Əsê ńkə́ ńgɛd lə́ nə́ ŋwunə ä náanə nə́ ə́wə́.”
23“Ndɔ ə́ chîə atû pəənə́, ngaŋə́zéʼkə pənoŋkə pópə Pəfalasi, pɨ lə́ ngaŋmə́fɨgə! Nə̈ fɛ̂ táʼə ajúmə náʼə á mə́m əpú náʼ nəghə́m pɨ foʼ nə́ atû ngoʼə́ á mbô Əsê, ḿbə́ ḿmɛdtə̂ á tə́kɔʼ ndzeʼkə́ á mə́m noŋkə, ándó anu á tɨ́ nə́ ndə̌ŋdəŋə́, akóolə́mə́lə́ŋ pópə mbimə́. Nə́ chîə á mə́ zéʼ nə́ mənu mɨ tsɔʼə mətsəm tsɔʼə tə myaʼə̂ yətsə́ 24Pɨ mətû, pɨ lə́ pəfəgə́! nə̈ fógə nənjwînə á mə́m məloʼ mə́ənə́, ḿbə́ ńnô anjwa!”
25“Ndɔ ə́ chîə atû pəənə́, ngaŋə́zéʼkə pənoŋkə pópə Pəfalasi, pɨ lə́ ngaŋmə́fɨgə! Nə̈ sogə̂ məmbɨ mə́ ndɔ́ŋ pópə əkáŋə, lə́ mə́m əjǐ pə́ ńdwɛ́nkə nə́ əpú páʼ nə́ kwá nə́ nə́ mətɨ, nə́ əkeelə́ pópə təpɔŋə. 26Pɨ Pəfalasi lə́ pəfəgə́! Peg ə́sog mə́m ndɔ́ŋ pópə mə́mə akáŋ ńjî ńgə́ ndzəmə apeŋ ə́ ŋwaʼə̂.”
27“Ndɔ ə́ chîə atû pəənə́, pɨ ngaŋə́zéʼkə pənoŋkə pópə Pəfalasi! Pɨ lə́ ngaŋmə́fɨgə! Pɨ chî lə́ ándó məse pə́ zɔ́ʼ nə́ nə́ mbəəmə́, páʼ mə́ pɔŋ nə́ apeŋə́, lə́ ndzəm mə́m ə́ pə́ ńdwɛ́nkə nə́ əkwəŋə́ əkwû pəənə pópə əpú páʼ ə́ kě nə ŋwaʼ pô. 28Tsɔʼə nə́ ndú wɨ́d wə́, á əshîsaŋ, pɨ chîə ándó nə pɔŋ lə́ ḿbə́ ńtə́ ńkwúnə á mə́m məntɨ́ pɨ nə lwɛ́nkə nə́ məfɨgə pópə təpɔŋə.”
Yeso a Fiʼtə̂ Ngə́ʼ Páʼ ə́ Yǐ nə́ Yǐəə á Mbô Pó
(Luk 11.47-51)
29“Ndɔ ə́ chî atû pəənə́, ngaŋə́zéʼkə pənoŋkə pópə Pəfalasi! Pɨ lə́ ngaŋmə́fɨgə! Pɨ pɔ́ məse á mbô məntúmə́sê ḿbɨ́ ńtsoŋkə̂ məse mə́ pɨ pó ŋwaʼ nə́ á mbi Əsê. 30Lə́ ḿbə́ sóŋ ńgə́ təmbɔʼ pəg nə ńchî ə́wɨ́ nə́ ndɛd pətǎ pə́ pətǎ pə́g, tə ḿbə́ lə́ nə́ ńkě pə̌gpo nɔd ńjwítə məntúmə́sê pô. 31Lə́ələ́ pə́ ńgə́ nə pyádnə ḿbí ńgə́ pɨ lə́ əla pɨ pó nə ńjwítə nə́ məntúmə́sê lə̂. 32Ghɛn nə́ nə́ mbiə á mə́ məgtə̂ nə́ afaʼ pətǎ pə́ pətǎ pɨ́ pó nə́ ńchwáakə nə́.” 33Pɨ lə́ mənóolə! ngwud mənó mə́ təpɔŋ! Təmbɔʼ nə lə́ʼ lə́ ə́lɛ́ ńgə́ kɔ pə́ tsəŋkə̂ áwə́ənə́ á mə́m móg satanə? 34Lə́ələ́ pə́ ńgə́, maŋ yǐ tú məntúmə́sê pópə pɨ pó túg nə́ ajîə, ḿbɨ ḿbə́ nə́ ngaŋə́zéʼkə məntəgə́ mə́ Əsê; Pɨ yǐ jwítə pətsə́, ə́ kwumtə̂ pətsə́ nə́ atǐə apagləpaglə, ə́shúm pətsə́ a mə́m məláʼmə́sê mə́ Pəjusə, ə́ pɨ tsɔ́ʼ mbɔb pətsə́ á atúmə atúmə. 35Achǐə ŋwu ntsəm páʼ a kə tɨ́ nə́ ndə̌ŋdəŋ á yǐ tə́əmə á atû pəənə́, ńchúʼ nə́ yə mbóʼngaŋ Abɛl tə koʼ nə́ yə Zakalya mɔ́ Belekya páʼ pɨ nə ńjwítə nə́ yə́ á tətɨ Tə́kɔʼndɛ̂sê pó nəpá nə́ Əsê. 36Maŋ fiʼtə̂ áwɨ́ nə́ ndə̌ŋdəŋ ńgə́ təpɔŋ wɨ́d ghɛn ntsəmə á yǐ tə́əmə atû pɨ pə́ ngoʼ pəənə́!
Akɔŋnə Yeso ńté Jɛlusalɛmə
(Luk 13.34, 35)
37“O Jɛlusalɛm, Jɛlusalɛm, nə̈ jwítə məntúmə́sê ḿbəənə̂ ńtə́mə pɨ páʼ Əsê a tú nə́ á mbô pɨ nə́ məngɔʼə, maŋ nə ńdê ńchúʼ lə́ ngoʼə́ akə̂ ńdoonə̂ á mə́ tsɛntə̂ nə́ pɔ́ pɨ́ táʼə aliʼə́ ándó mɛ́ ngə́bə á kə́bkə nə́ pɔ́ pí nə́ mbab míə, lə́ nə́ pə́ ńkě kɔŋ pô. 38Jɨ́ nə́, Əsê a yǐ mɛdtə̂ məláʼ mɨ́ mə́ kɔ́ʼə afəmə́.” 39Lə́, mäŋ fiʼtə̂ áwɨ́ ńgə́ ə́fɛ́d nə́ pə əghâ nə́, nə láʼ kě mə pɨ jɨ́ pô, tə ńdéʼtə nə́ sóŋ ńgə́, “Mbwɔ́dnə ə́ chîə á mbô yí páʼ a yǐ nə́ nə́ əlɛ́n Mmaʼmbîə.”
Àwon tá yàn lọ́wọ́lọ́wọ́ báyìí:
Matyo 23: azo
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀