Matyo 3
3
Jɔn Əfɛ̂nkǐə a Tyáŋtə Əsêndúmə
(Mag 1.1-8; Luk 3.1-18; Jɔn 1.19-28)
1Á nə ḿbə́ nə́ əlě pə́ wɨ́ lə́, Jɔn Əfɛ̂nkǐə a yǐ ńtə́ ə́sóŋə anǔəsê á kɔŋ məŋkwâʼlə̌ á Judya, 2ńtíʼə ə́sóŋə ńgə́ “Mɛdtə̂ nə́ mənu mə́ təpɔŋ pɨ ghɛd nə́, ńté ńgə́ anuə nəfoonə á nəpóolə á páatə.” 3Lɛ̌ ŋwu páʼ ntûsê Izaya a nə̈ ńtsáb nə́ ńté yí, ə́sóŋ ńgə́,
“Ngye ŋwu tsə̌ ə́ tə́ ə́fóŋə á kɔŋ yi njǔbtə,
Tyáŋtə nə́ əsêndúmə á mbô Mmaʼmbîə,
Ghɛd nə́ alaŋə́ ajíə á tɨ́ ndə̌ŋdəŋə́.”
4Jɔnə a nə ńgwê ətsəʼ páʼ pə́ nə ńtsoŋkə̂ nə́ lə́ nə́ mənoŋ mə́ kəmbôʼnkɔnə́, ḿbɨ ńkə́ ńgwê atwéŋ páʼ pə́ nə ńtsoŋkə̂ nə́ nə́ ngwubə á ntə̂ yə́, məjî mí mə́ nə ḿbə́ lə́ ngwumnə́ pó nûə akoobə́. 5Pɨ pə́ nə ə́fɛ́lə á Jɛlusalɛm pópə mboʼ Judya ḿbɨ ḿbə́ nə́ əláʼ páʼ ə́ páatə nə́ Nkǐ Jodan ńgyǐəə á mbô yə́. 6Ńkyéŋə ńgə́ pə́ ləgnə̂ pətəpɔŋ póobə́, Jɔnə a tíʼə ə́fɛ̂ nkǐə á mbô pó á mə́m Nkǐ Jodanə.
7Lə́ əghâ ándó a nə ńdzɨ́ nə́ Pəfalasi pópə Pəsadusi pə́ tə́ ńgyǐəə á mbi yí tə ńnə́ənə á mə́ kwá nə́ əghɔ́b nkǐ lə́, a sóŋə á mbô pó ńgə́, “Ngwud mənó mə́ təpɔŋ, əwə a kwantə̂ nə́ áwɨ́ ńgə́ təmbɔʼ nə́ kəələ̂ azáŋə́ndé Əsê páʼə á tə́ nə́ ńgyǐəə? 8Zə́m nə́ mənteemə́ á mə́ nɨd nə́ ńgə́ nə́ kwúblə a mə́m təpɔŋ əwəənə́. 9Kɔ nə́ kwaŋ ńgə́ nə́ láʼ sóŋ nə́ mbɨ zɨ ńgə́ pəg túgə Ablaamə ándó Tǎ əwəgə́, mäŋ fiʼtə̂ áwɨ́ ńgə́ á mə́m məngɔʼ mɨ təmbɔʼ Əsê a tsoŋkə̂ pɔ́ ə́wɨ́ ə́fɛ̂ nə́ Ablaamə. 10Ndza ə́ pɛ́d tə ńtə́əmə nətɛ́n nə́ atǐə, lə́ atǐə atsəm páʼə á kě nə́ mənta mimə əshîʼnə zə́m pə́ yǐ kə́ʼ maʼə̂ á mógə́. 11Mäŋ fɛ̂ nkǐ nə́ pɨ lə́ á mə́ nɨd nə́ ńgə́ nə́ kwúblə məntɨ́ mə́ənə́, lə́ ŋwu tsə̌ a yǐ pɨ yǐəə á ndzəm maŋ páʼə a tsɛ nə́ mə tə maŋ kě koʼə̂ á mə́ túg nə́ ngwub əjí pô. A yǐ fɛ̂ nkǐə Ajwǐəsê nə́ pɨ pó yi mógə́. 12A túg əpú əpí á mbô yí páʼə a yǐ nə́ lɔg póʼ məkwú ə́wɨ́ ə́tsɛntə̂ məkwú mí mimə wɨ́ ghɛn néŋə á mə́m nkye məjî əjǐə, lə́ pə́ tɔ əkaglə́ əpíə á mə́m móg páʼ ə́ láʼ nə́ kě pə́gnə pô.”
Ndzaŋ Yeso a nə Ńkwá nə́ Nkǐə
(Mag 1.9-11; Luk 3.21, 22)
13Əghâ yi wɨ́ Yeso a lǒo Galili ńgyǐəə á Nkǐ Jodan á mə́ kwá nə́ nkǐə á mbô Jɔnə. 14Lə́ Jɔnə a pə́ ńdoonə̂ á mə́ ghɛd nə́ a kwúblə ntɨ́ əyíə, ńtíʼ ə́sóŋ ńgə́, “Lə́ pěʼ ńchî gho á mə́ fɛ̂ nə́ nkǐ nə́ maŋə, gho pɛn ḿbɨ ńtíʼ ńgyǐəə pə́ á mbô maŋ lə́ ə́lɛ́?”
15Yeso a kwěe ńgə́, “Mɛdtə̂ á chî ə́lɨ́d əghâ nə́; ńté ńgə́ á koʼnə̂ á mbô pɔ̌ á mə́ faʼ nə́ anuə atsəm páʼ Əsê ä lɔ nə́.” Jɔnə a tíʼ ḿbímə.
16Əghâ ándó Yeso a nə məgtə̂ nə́ mə́ kwá nə́ nkǐ lə́, tsɔʼə əghâ yi wɨ́, a fɛ́lə á mə́m nkǐ, nəpó nə́ ŋáʼnə, a zə́ənə Ajwiə a pə́ nə́ yə Əsê, á tsóolə á nəpó ńtíʼ ńtə́əmə á ndu yə́ ándó alúʼə. 17Ngye yitsə̌ ə́ fɛ́lə á nəpó ə́sóŋ ńgə́, “Lɛ̌ móonə mə páʼ maŋ kɔŋ nə́, maŋ pyádnə̈ ńkɔŋtə̂ ńté yə́.”
Àwon tá yàn lọ́wọ́lọ́wọ́ báyìí:
Matyo 3: azo
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀