Matyo 9
9
Yeso a Tsóʼə Ŋwu Tsə̌ Páʼə a kə Kwû nə́ táʼ Əléemə
(Mag 2.1-12; Luk 5.17-26)
1Yeso a kwúnə á mə́mə aŋkənúʼə́, ńtú ńgyǐəə á ndzɛnə́ aláʼ pó. 2Pɨ pətsə́ pə́ peʼə̂ nkweglə á ndu mə́ta ńgyǐ nə yə́ á mbô yə́. Yeso a nə ńjɨ́ mbimə́ əzɔb ńtíʼ ə́sóŋ nə́ nkweglə wə́ ńgə́, “Wam ntɨ́ əghô móonə mə! Pə́ ləgnə̂ pətəpɔŋ pô.”
3Ngaŋə́zéʼkə pənoŋkə pətsə́ po tíʼ ə́sóŋə a tətɨ pó ńgə́, “ŋwu nə́ a tə́ ńdzɔmtə̂ Əsê.”
4Yeso a nə ńjîə akwaŋə azɔ́b ńtíʼ sóŋ nə́ pó ńgə́, “Lə́ ghɛlə̂ akə̂ nə́ túgə akwaŋə təpɔŋə á ntɨ́ pɨ lɛ?” 5A pwɔ́dnə lə́ mə́ sóŋ nə́ ńgə́, “pə́ ləgnə̂ pətəpɔŋ pô” kəənə á mə́ sóŋ nə́ ńgə́ “lǒo á əsê ńnyinə̂? 6Maŋ yǐ nəələ̂ á mbô pɨ ńgə́ Mɔ́ Ŋwunə a túg mətəənə a ndu mbîə mə́ ləgnə̂ nə́ pətəpɔŋə” ńtíʼ ə́sóŋə á mbô ŋwu wə̂ páʼ a kwû nə́ táʼ əlá lə̂ ńgə́, “Lǒo á əsê ḿbyáanə mə́ta əgho ńkwə̂ gho á nchîndɛ̂!”
7Ŋwu wə̂ a lǒo á əsê ńkwə̂ yə a ndɛ̂ yə́. 8Ndzaŋ ənɔ pɨ wə́ nə ńjɨ́ nə́ anu yə wɨ́ lə, ḿbɔ́g lɛ tətə ńtíʼə ńgóʼkə Əsê ndzaŋ páʼə a fɛ̂ nə́ jɨ ndzaŋ mətəənə á mbô pəənə.
Yeso a Fóŋə Matyo
(Mag 2.13-17; Luk 5.27-32)
9Ndzaŋ Yeso a nə fɛ́d nə́ alíʼ yə wɨ́ lə́, ńdzə́ənə nkwânchubə aláʼ yitsə̌ pə̈ fóŋə yí nə́ Matyo, a náanə á aliʼə́ akwáalə́nchubə aláʼ yə́. Yeso a sóŋə á mbô yí ńgə́, “Zoŋə̂ mə.” A lǒo á ndəsê ńdzoŋə̂ yə́.
10Ndzaŋ Yeso a nə ńtə́ nə́ ńjîə məjîə á ndɛ̂ Matyo lə́, ngaŋə́kwáalə́ nchubə aláʼ yitsə̌ tə ńnɨ́ pópə ngaŋə́ghɛlə təpɔŋ ə́ yǐ ńtégə Yeso pópə ngaŋə́zoŋə́ndzəm əjí pó po tə́ ńjîə məjîə. 11Ndzaŋ pəfalasi pətsə́ pə́ nə ńjɨ́ nə́ anu jɨ lə́, ńtíʼ ḿbítə ngaŋə́zoŋə́ndzəm əjí ńgə́, “Lə́ ghɛlə̂ akə̂ ndzéʼkə əwəənə́ ä jîə məjî pópə ngaŋə́kwáalə́ nchubə aláʼ ḿbá ngaŋə́ghɛlə təpɔŋə?”
12Yeso a zóʼə anu pó sóŋ nə́ ńtíʼ ńkwěe ńgə́, “Ŋwunə a chî nə́ əshîʼnə a kě ntsóʼ náŋə pô. Lə́ náŋə ŋwunə a tə́ nə́ ńgoonə̂.” 13Ghɛn nə́ ńdzéʼə anu páʼ atséebə Əsê á sóŋ nə́ ńgə́, “Maŋ kɔŋ lə́ akóolə́mə́lə́ŋə, maŋ kě lə́ afyaʼə́nu kɔŋ pô.” Maŋ kě yǐ lə́ mə́ fóŋ nə́ pɨ pə́ tɨ́ nə́ ndə̌ŋdəŋ pô. Maŋ yǐ lə́ á mə́ fóŋ nə́ ngaŋə́ghɛlə təpɔŋə.
Apítə ńté mə Ghɛd nə Achaʼtə́sênjiə
(Mag 2.18-22; Luk 5.33-39)
14Ngaŋə́zoŋə́ndzəm Jɔn tíʼ ńgyǐəə á mbô Yeso ḿbítə yí ńgə́, “Lə́ ghɛlə̂ akə̂ pə̂gpə pəfalasi zá ńgɛlə̂ achaʼtə́sênjiə, lə́ əzô ngaŋə́zoŋə́ndzəm pə́ ńkě kwíʼnə ńgɛlə̂ pô?”
15Yeso a kwěe ńgə́, “Mbɔʼ ngaŋə́ko tǎdndzɔʼə́ ə́ fɨnə̂ páʼ tǎdndzɔʼə́ a chî nə́ pó po? Ngá! Lə́ ndɛd yǐ koʼ páʼ pə́ yǐ nə́ kwáalə tǎdndzɔʼə́ á mbô pó, pó tíʼ ńgɛlə̂ achaʼtə́sênjiə.”
16“Təmbɔʼ atsəʼ yə lɛnə̂ a sɛɛnə̂, pə́ kě apagə atsəʼ yə fî lɔg ńtɛ̂ ə́wɨ́ pô. Ńté ńgə́ apagə atsəʼ yə fî zə̂ á yǐ tsɔ́ʼnə pɨ peg ngɔ́d nə́ atsəʼ zə̂. 17Kɨ pə́ kě kə́ ńnéŋə məloʼ mə́ pwɔ́dnə nə́ kâʼlə̌ ngwub na yi ndɛn pô. Mbɔʼ pə́ néŋ ə́lɨ́d, ngwub na yi wɨ́ ə́ yǐ sánə ḿbə́gə zə́ələ́, məloʼ məwɨ́ mə́ kwɛdnə̂ mə́ələ́. Pə̈ néŋə məloʼ mimə pwɔ́dnə nə́ lə á mə́m kâʼlə̌ ngwub na yi féŋ ńjî ńgə́ kɔ táʼə ajúmə á mə́m pó á pə́gə.”
Akwûə Mɔ̂ Məngyě pó Ngɔ Məngyě Yitsə̌
(Mag 5.21-43; Luk 8.40-56)
18Ndzaŋ Yeso a kə tə́ nə́ ḿbɛ́lə ńtséebə lə́, nətû nə́ pəjusə nətsə́ nə́ yǐ ńkwə́ʼtə məko yí ə́sóŋ ńgə́, “Móonə mə yi məngyě a kwû tsɔʼə əghâ nə́, lə́ yǐ ńnoŋkə̂ apô azô a ndu yə́ a pɨ ńjúmnə.”
19Yeso a lǒo á ndəsê pó yí ghɛn, ḿbá ngaŋə́zoŋə́ndzəm əjíə.
20Tsɔʼə əghâ yi wɨ, məngyě yitsə̌ páʼ a kə tə́ nə́ ńgoonə̂ nə́ mə́sɔ́ tə ńkoʼ ngoʼ ntsɔb pɛ̌ a zoŋə̂ ndzəm yí ńkwum nəlwî nə́ atsəʼ jíə. 21Ə́sóŋə á mə́m ntɨ́ yí ńgə́, “Mbɔʼ maŋ kwum tsɔʼə atsəʼə́ ají maŋ yáŋə.”
22Yeso a sɛdnə̂ ńdzə́ənə yí ə́sóŋ ńgə́, “Wam ntɨ́ əgho móonə mə. Mbimə́ əzô ə́ ghɛd gho yáŋə.” Məngyě wə̂ a kə́ ńgyáŋə yí tsɔʼə əghâ yi wə́.
23Ndzaŋ Yeso a nə ńgyǐ nə́ ńkwúnə á ndɛ̂ nətû nə́ pəjusə zə̂ lə̂, ńdzɨ́ ngaŋə́zoobə mənkǐ mə́ nəwû pópə ənɔ pɨ páʼ ə́ jwáglə nə́, 24ə́sóŋə á mbô pó ńgə́, “Fɛ́dkə nə apeŋə́, mɔ̂ məngyě nə́ a kě lə́ kwû nə́ kwû pô; a lê yí lə́ lê nə́.” Pó pə́ ńgweŋə̂ yə́. 25Əghâ ándó pó nə fɛ́dkə nə́ apeŋ lə́, Yeso a kwúnə ntaŋ ńgwaamə̂ apô mɔ̂ məngyě wə̂ a lǒo á əsê. 26Atsáb ńté anu zəənə́ á nə nyinə̂ á əlá aláʼ wɨ́d wə̂.
Yeso a Tsóʼ Pəfəg pó Chípóʼə́
27Ndzaŋə ándó Yeso a nə ńdǒo nə́ yí wɨ́ ńtə́ ńgɛnə̂ lə́, pəfəg pɛ́n pɛ̌ pə́ tə́ ńdzoŋə̂ yə́, ə́fóŋnə yí nə́ pətə́kɔʼ pə́ ngye ə́sóŋə ńgə́, “Mɔ́ Debid, kó mələ́ŋ mə́gə́.”
28Əghâ ándó a nə ńgɛn nə́ ńkwúnə á ndɛ̂ lə́, pəfəg pə wɨ́ pó yǐəə á mbô yə́, a pítə ághɔ́b ńgə́, “Nə́ pí ńgə́ maŋ chî təmbɔʼ maŋ faʼə̂ zɨ?” Pó kwěe ńgə́, “pəg pímə ḿbə́ Mmaʼmbî.”
29A tíʼ ńkwum əmə́g mɔ́b ə́sóŋ ńgə́, “Ńdzoŋ nə́ mbimə́ əzɨ tíʼə á pə́ lə́ələ́ á mbô pəənə́.” 30Pó pɨ ńtíʼ ńchúʼə á mə́ zɨ́ nə́ əliʼə́. Yeso a chígə́ ńkwantə̂ ághɔ́b ńgə́, “Kɔ nə fiʼtə̂ á ŋwu tsə̌ nə́ anu zəənə́.” 31Lə́ pó pə́ ńgɛn ńgeebə̂ atsáb ńté yí nə́ əlá aláʼ wɨ́d wə̂ tsɔʼ ətsəmə.
32Ndzaŋ pó nə ńtə́ nə́ ńgɛnə̂ lə́, pə́ lɔgə̂ ŋwu tsə̌ páʼ pɛ̌sê pə́ nə ńchî nə́ á mbɨ yə́ tə́ a kě pɛ́lə ńtséebə pô, ńgyǐ nə́ yə́ á mbô Yeso. 33Əghâ ándó pə́ nə ńkəm nə́ pɛ̌sê pə̂ lə́, chípóʼ wə́ a chúʼə á mə́ tsáb nə́. Anu yəwə́ á nə ńkɨʼnə̂ ənɔ pɨ pó nə ńchî nə́ aliʼ yi wə́, pó tíʼ ə́sóŋ ńgə́, “Pə́ kě kə́ láʼə zə́ənə anu yətsə́ ándó zɨ á mə́mə aláʼə Islɛlə pô.”
34Lə́ Pəfalasi pó pə́ sóŋ ńgə́, “Lə́ mətɨ mə́ əfo pɛ̌sê páʼə ä lɔg nə́ ńkəmə̂ pɛ̌sê ə́wə́.”
Yeso a Túgə Akóolə́mə́lə́ŋə á mbô Ŋwu Məsɔŋə́
35Yeso a tíʼ ńgɛnə̂ á mə́m əláʼ pópə ətú ətsəm ńdzéʼkə á mə́m məndɛ̂ mə́ Əsê móobə́, ə́fiʼtə̂ nkɨ yi əshîʼnə ńté Anuə Nəfoonə Əsê, ńkə́ ńtsóʼ ntê məghɔ mətsəm pó əlɔʼ ətsəm páʼ ə́ nə ńchî nə á mbɨ pəənə. 36Ndzaŋə a nə ńdzɨ́ nə́ ənɔ pɨ lə́, ńkó mələ́ŋ móobə́, ńté ńgə́ pə́ nə̈ ńjwaʼə̂ ághɔ́b, ŋwunə a kě ə́wɨ́ kə́ ńchî təmbɔʼ a kwáalə ághɔ́b pô, pó tíʼ ńchîə ándó məmbéŋ mə́ ndzɛd mə́ tə ntseŋnə. 37A tíʼ ə́sóŋə á mbô ngaŋə́zoŋə́ndzəm əjí ńgə́, “Məjî mə̂ mə́ nə́ənə, pɨ pə̈ foʼ nə́ pó pə́ ńkə́gə. 38Chaʼtə̂ nə́ Əsê á mbô Mmaʼmbîə afoonə, ńgə́ a fɛ̂ ngaŋə́faʼ pó ghɛn əfoʼ məjîə afɔ yə́.”
Àwon tá yàn lọ́wọ́lọ́wọ́ báyìí:
Matyo 9: azo
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Matyo 9
9
Yeso a Tsóʼə Ŋwu Tsə̌ Páʼə a kə Kwû nə́ táʼ Əléemə
(Mag 2.1-12; Luk 5.17-26)
1Yeso a kwúnə á mə́mə aŋkənúʼə́, ńtú ńgyǐəə á ndzɛnə́ aláʼ pó. 2Pɨ pətsə́ pə́ peʼə̂ nkweglə á ndu mə́ta ńgyǐ nə yə́ á mbô yə́. Yeso a nə ńjɨ́ mbimə́ əzɔb ńtíʼ ə́sóŋ nə́ nkweglə wə́ ńgə́, “Wam ntɨ́ əghô móonə mə! Pə́ ləgnə̂ pətəpɔŋ pô.”
3Ngaŋə́zéʼkə pənoŋkə pətsə́ po tíʼ ə́sóŋə a tətɨ pó ńgə́, “ŋwu nə́ a tə́ ńdzɔmtə̂ Əsê.”
4Yeso a nə ńjîə akwaŋə azɔ́b ńtíʼ sóŋ nə́ pó ńgə́, “Lə́ ghɛlə̂ akə̂ nə́ túgə akwaŋə təpɔŋə á ntɨ́ pɨ lɛ?” 5A pwɔ́dnə lə́ mə́ sóŋ nə́ ńgə́, “pə́ ləgnə̂ pətəpɔŋ pô” kəənə á mə́ sóŋ nə́ ńgə́ “lǒo á əsê ńnyinə̂? 6Maŋ yǐ nəələ̂ á mbô pɨ ńgə́ Mɔ́ Ŋwunə a túg mətəənə a ndu mbîə mə́ ləgnə̂ nə́ pətəpɔŋə” ńtíʼ ə́sóŋə á mbô ŋwu wə̂ páʼ a kwû nə́ táʼ əlá lə̂ ńgə́, “Lǒo á əsê ḿbyáanə mə́ta əgho ńkwə̂ gho á nchîndɛ̂!”
7Ŋwu wə̂ a lǒo á əsê ńkwə̂ yə a ndɛ̂ yə́. 8Ndzaŋ ənɔ pɨ wə́ nə ńjɨ́ nə́ anu yə wɨ́ lə, ḿbɔ́g lɛ tətə ńtíʼə ńgóʼkə Əsê ndzaŋ páʼə a fɛ̂ nə́ jɨ ndzaŋ mətəənə á mbô pəənə.
Yeso a Fóŋə Matyo
(Mag 2.13-17; Luk 5.27-32)
9Ndzaŋ Yeso a nə fɛ́d nə́ alíʼ yə wɨ́ lə́, ńdzə́ənə nkwânchubə aláʼ yitsə̌ pə̈ fóŋə yí nə́ Matyo, a náanə á aliʼə́ akwáalə́nchubə aláʼ yə́. Yeso a sóŋə á mbô yí ńgə́, “Zoŋə̂ mə.” A lǒo á ndəsê ńdzoŋə̂ yə́.
10Ndzaŋ Yeso a nə ńtə́ nə́ ńjîə məjîə á ndɛ̂ Matyo lə́, ngaŋə́kwáalə́ nchubə aláʼ yitsə̌ tə ńnɨ́ pópə ngaŋə́ghɛlə təpɔŋ ə́ yǐ ńtégə Yeso pópə ngaŋə́zoŋə́ndzəm əjí pó po tə́ ńjîə məjîə. 11Ndzaŋ pəfalasi pətsə́ pə́ nə ńjɨ́ nə́ anu jɨ lə́, ńtíʼ ḿbítə ngaŋə́zoŋə́ndzəm əjí ńgə́, “Lə́ ghɛlə̂ akə̂ ndzéʼkə əwəənə́ ä jîə məjî pópə ngaŋə́kwáalə́ nchubə aláʼ ḿbá ngaŋə́ghɛlə təpɔŋə?”
12Yeso a zóʼə anu pó sóŋ nə́ ńtíʼ ńkwěe ńgə́, “Ŋwunə a chî nə́ əshîʼnə a kě ntsóʼ náŋə pô. Lə́ náŋə ŋwunə a tə́ nə́ ńgoonə̂.” 13Ghɛn nə́ ńdzéʼə anu páʼ atséebə Əsê á sóŋ nə́ ńgə́, “Maŋ kɔŋ lə́ akóolə́mə́lə́ŋə, maŋ kě lə́ afyaʼə́nu kɔŋ pô.” Maŋ kě yǐ lə́ mə́ fóŋ nə́ pɨ pə́ tɨ́ nə́ ndə̌ŋdəŋ pô. Maŋ yǐ lə́ á mə́ fóŋ nə́ ngaŋə́ghɛlə təpɔŋə.
Apítə ńté mə Ghɛd nə Achaʼtə́sênjiə
(Mag 2.18-22; Luk 5.33-39)
14Ngaŋə́zoŋə́ndzəm Jɔn tíʼ ńgyǐəə á mbô Yeso ḿbítə yí ńgə́, “Lə́ ghɛlə̂ akə̂ pə̂gpə pəfalasi zá ńgɛlə̂ achaʼtə́sênjiə, lə́ əzô ngaŋə́zoŋə́ndzəm pə́ ńkě kwíʼnə ńgɛlə̂ pô?”
15Yeso a kwěe ńgə́, “Mbɔʼ ngaŋə́ko tǎdndzɔʼə́ ə́ fɨnə̂ páʼ tǎdndzɔʼə́ a chî nə́ pó po? Ngá! Lə́ ndɛd yǐ koʼ páʼ pə́ yǐ nə́ kwáalə tǎdndzɔʼə́ á mbô pó, pó tíʼ ńgɛlə̂ achaʼtə́sênjiə.”
16“Təmbɔʼ atsəʼ yə lɛnə̂ a sɛɛnə̂, pə́ kě apagə atsəʼ yə fî lɔg ńtɛ̂ ə́wɨ́ pô. Ńté ńgə́ apagə atsəʼ yə fî zə̂ á yǐ tsɔ́ʼnə pɨ peg ngɔ́d nə́ atsəʼ zə̂. 17Kɨ pə́ kě kə́ ńnéŋə məloʼ mə́ pwɔ́dnə nə́ kâʼlə̌ ngwub na yi ndɛn pô. Mbɔʼ pə́ néŋ ə́lɨ́d, ngwub na yi wɨ́ ə́ yǐ sánə ḿbə́gə zə́ələ́, məloʼ məwɨ́ mə́ kwɛdnə̂ mə́ələ́. Pə̈ néŋə məloʼ mimə pwɔ́dnə nə́ lə á mə́m kâʼlə̌ ngwub na yi féŋ ńjî ńgə́ kɔ táʼə ajúmə á mə́m pó á pə́gə.”
Akwûə Mɔ̂ Məngyě pó Ngɔ Məngyě Yitsə̌
(Mag 5.21-43; Luk 8.40-56)
18Ndzaŋ Yeso a kə tə́ nə́ ḿbɛ́lə ńtséebə lə́, nətû nə́ pəjusə nətsə́ nə́ yǐ ńkwə́ʼtə məko yí ə́sóŋ ńgə́, “Móonə mə yi məngyě a kwû tsɔʼə əghâ nə́, lə́ yǐ ńnoŋkə̂ apô azô a ndu yə́ a pɨ ńjúmnə.”
19Yeso a lǒo á ndəsê pó yí ghɛn, ḿbá ngaŋə́zoŋə́ndzəm əjíə.
20Tsɔʼə əghâ yi wɨ, məngyě yitsə̌ páʼ a kə tə́ nə́ ńgoonə̂ nə́ mə́sɔ́ tə ńkoʼ ngoʼ ntsɔb pɛ̌ a zoŋə̂ ndzəm yí ńkwum nəlwî nə́ atsəʼ jíə. 21Ə́sóŋə á mə́m ntɨ́ yí ńgə́, “Mbɔʼ maŋ kwum tsɔʼə atsəʼə́ ají maŋ yáŋə.”
22Yeso a sɛdnə̂ ńdzə́ənə yí ə́sóŋ ńgə́, “Wam ntɨ́ əgho móonə mə. Mbimə́ əzô ə́ ghɛd gho yáŋə.” Məngyě wə̂ a kə́ ńgyáŋə yí tsɔʼə əghâ yi wə́.
23Ndzaŋ Yeso a nə ńgyǐ nə́ ńkwúnə á ndɛ̂ nətû nə́ pəjusə zə̂ lə̂, ńdzɨ́ ngaŋə́zoobə mənkǐ mə́ nəwû pópə ənɔ pɨ páʼ ə́ jwáglə nə́, 24ə́sóŋə á mbô pó ńgə́, “Fɛ́dkə nə apeŋə́, mɔ̂ məngyě nə́ a kě lə́ kwû nə́ kwû pô; a lê yí lə́ lê nə́.” Pó pə́ ńgweŋə̂ yə́. 25Əghâ ándó pó nə fɛ́dkə nə́ apeŋ lə́, Yeso a kwúnə ntaŋ ńgwaamə̂ apô mɔ̂ məngyě wə̂ a lǒo á əsê. 26Atsáb ńté anu zəənə́ á nə nyinə̂ á əlá aláʼ wɨ́d wə̂.
Yeso a Tsóʼ Pəfəg pó Chípóʼə́
27Ndzaŋə ándó Yeso a nə ńdǒo nə́ yí wɨ́ ńtə́ ńgɛnə̂ lə́, pəfəg pɛ́n pɛ̌ pə́ tə́ ńdzoŋə̂ yə́, ə́fóŋnə yí nə́ pətə́kɔʼ pə́ ngye ə́sóŋə ńgə́, “Mɔ́ Debid, kó mələ́ŋ mə́gə́.”
28Əghâ ándó a nə ńgɛn nə́ ńkwúnə á ndɛ̂ lə́, pəfəg pə wɨ́ pó yǐəə á mbô yə́, a pítə ághɔ́b ńgə́, “Nə́ pí ńgə́ maŋ chî təmbɔʼ maŋ faʼə̂ zɨ?” Pó kwěe ńgə́, “pəg pímə ḿbə́ Mmaʼmbî.”
29A tíʼ ńkwum əmə́g mɔ́b ə́sóŋ ńgə́, “Ńdzoŋ nə́ mbimə́ əzɨ tíʼə á pə́ lə́ələ́ á mbô pəənə́.” 30Pó pɨ ńtíʼ ńchúʼə á mə́ zɨ́ nə́ əliʼə́. Yeso a chígə́ ńkwantə̂ ághɔ́b ńgə́, “Kɔ nə fiʼtə̂ á ŋwu tsə̌ nə́ anu zəənə́.” 31Lə́ pó pə́ ńgɛn ńgeebə̂ atsáb ńté yí nə́ əlá aláʼ wɨ́d wə̂ tsɔʼ ətsəmə.
32Ndzaŋ pó nə ńtə́ nə́ ńgɛnə̂ lə́, pə́ lɔgə̂ ŋwu tsə̌ páʼ pɛ̌sê pə́ nə ńchî nə́ á mbɨ yə́ tə́ a kě pɛ́lə ńtséebə pô, ńgyǐ nə́ yə́ á mbô Yeso. 33Əghâ ándó pə́ nə ńkəm nə́ pɛ̌sê pə̂ lə́, chípóʼ wə́ a chúʼə á mə́ tsáb nə́. Anu yəwə́ á nə ńkɨʼnə̂ ənɔ pɨ pó nə ńchî nə́ aliʼ yi wə́, pó tíʼ ə́sóŋ ńgə́, “Pə́ kě kə́ láʼə zə́ənə anu yətsə́ ándó zɨ á mə́mə aláʼə Islɛlə pô.”
34Lə́ Pəfalasi pó pə́ sóŋ ńgə́, “Lə́ mətɨ mə́ əfo pɛ̌sê páʼə ä lɔg nə́ ńkəmə̂ pɛ̌sê ə́wə́.”
Yeso a Túgə Akóolə́mə́lə́ŋə á mbô Ŋwu Məsɔŋə́
35Yeso a tíʼ ńgɛnə̂ á mə́m əláʼ pópə ətú ətsəm ńdzéʼkə á mə́m məndɛ̂ mə́ Əsê móobə́, ə́fiʼtə̂ nkɨ yi əshîʼnə ńté Anuə Nəfoonə Əsê, ńkə́ ńtsóʼ ntê məghɔ mətsəm pó əlɔʼ ətsəm páʼ ə́ nə ńchî nə á mbɨ pəənə. 36Ndzaŋə a nə ńdzɨ́ nə́ ənɔ pɨ lə́, ńkó mələ́ŋ móobə́, ńté ńgə́ pə́ nə̈ ńjwaʼə̂ ághɔ́b, ŋwunə a kě ə́wɨ́ kə́ ńchî təmbɔʼ a kwáalə ághɔ́b pô, pó tíʼ ńchîə ándó məmbéŋ mə́ ndzɛd mə́ tə ntseŋnə. 37A tíʼ ə́sóŋə á mbô ngaŋə́zoŋə́ndzəm əjí ńgə́, “Məjî mə̂ mə́ nə́ənə, pɨ pə̈ foʼ nə́ pó pə́ ńkə́gə. 38Chaʼtə̂ nə́ Əsê á mbô Mmaʼmbîə afoonə, ńgə́ a fɛ̂ ngaŋə́faʼ pó ghɛn əfoʼ məjîə afɔ yə́.”
Àwon tá yàn lọ́wọ́lọ́wọ́ báyìí:
:
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀