يوحنا 2
2
لْمُعْجِيزَا ثَمزْوَارُوْت ن سِيذِيثْنغ عِيْسَى
1ذِي نْهَار وِيس ثڒْتِيَّام ذِنِّي يجّن ن ڒْفَارْح ذݣ وبِيلَاج ن قَانَا ذِي ثْمُوْرْث ن لْجَالِيل. ذِنِّي يمَّاس ن عِيْسَى. 2ؤُڒَا ذ عِيْسَى ذ يمحْضَارن نّس تْوَاعَرْضن غَار ڒْفَارْح نِّي. 3وَامِي وَار غَارسن قِّيمن وَامَان ن وضِيڒ، ثنَّا-ٱس يمَّاس إِ عِيْسَى قَا اَمَان ن وضِيڒ قْضَان.
4ينَّا-ٱس عِيْسَى: "آ ثَمْغَارْث، مَاشِي ذ شّْغڒ ينُو. نش ڒْوقْث ينُو عَاذ وَار د تُوْسِي شَا."
5ثنَّا-ٱسن يمَّاس إِ يخدَّامن: "ݣّم مِين ذَاوم يقَّار."
6ذِنِّي ذِي ثدَّارْث نِّي ستَّا ن يقْنُوْشن ن وَامَان عْلَاحْسَاب مَامّش نُّوْمن تݣّن زَّايْسن يسْرَائِيلِيْين ڒُوْضُو. ئِقْنُوْشن نِّي تْوَاخذْمن س وزْرُو، كُڒ يجّن يكسِّي زِي ثْمَانِين اَڒ مِيَّا أُو عِشْرِين لِيتْرُو ن وَامَان. 7ينَّا-ٱسن عِيْسَى إِ يخدَّامن: "عمَّرم يقْنُوْشن-أَ س وَامَان." عمَّرن-ثن س وَامَان اَڒ وقمُّوْم. 8ينَّا-ٱسن: "أَيْمم شْوَايْت اَوِيم-ثن إِ ونِّي يتْكلَّافن زِي ڒْفَارْح." أُوْشَا ؤُوِين-اَس شِي حَجَا. 9ؤُفِين اَمَان عَادِي نِّي ذوْڒن ذ اَمَان ن وضِيڒ. ونِّي يتْكلَّافن زِي ڒْفَارْح-أَ يقَّاس-يثن وَلَكِن نتَّا وَار يِسِّين شَا مَانِيس د كِّين وَامَان-أَ ن وضِيڒ. ئِخدَّامن نّس إِي ذَاس د يُوْيمن اَمَان-أَ، ذ نِثْنِي إِݣ سّْنن مَانِيس د يكَّا مَانَايَا. ثُمَّا ونِّي يكلّْفن زِي ڒْفَارْح يسِّيْوڒ اَك مُوْڒَاي 10ينَّا-ٱس: "عَدَتَان ذݣ ومزْوَارُو يوْذَان تِيشّن-اَسن إِ ينوْجِيْون اَمَان ن وضِيڒ يصبْحَانن. خْمِي تِيڒِي سْوِين زَّايْسن اَطَّاس، ذِي ڒْوقْث نِّي إِي ذَاسن تِيشّن اَمَان ن وضِيڒ عَادِي. شك لَّا، ثْخمّْڒذ اَمَان ن وضِيڒ يصبْحَانن اَڒ ڒخُّو."
11ثَانِيتَا ذ لْمُعْجِيزَا ثَمزْوَارُوْت إِݣ يݣّا عِيْسَى. ئِݣِّي-ت ذݣ وبِيلَاج نْ قَانَا ذِي ثْمُوْرْث ن لْجَالِيل. ئِسْمظْهَار-د لْعَظَمَا نّس، ؤُمْنن زَّايس يمحْضَارن نّس. 12منْبَعْد إِ مَانَايَا يهْوَا غَار وبِيلَاج ن كَفرْنَاحُوْم، نتَّا ذ يمَّاس ذ أَيْثْمَاس ذ يمحْضَارن نّس، قِّيمن ذِنِّي ذْرُوْس ن وُوْسَّان.
سِيذِيثْنغ عِيْسَى يتَازّڒ خ يِنِّي يتݣّن تِّجَارَا ذِي ثمْزِيذَا ثَمقّْرَانْت
13وَامِي د يُوْوض ڒْعِيذ اَمقّْرَان ن أَيث-إِسْرَائِيل، ئِكَّر عِيْسَى يُوْڒِي غَار ثنْدِينْت ن لْقُدْس. 14يُوْفَا ذِي ثمْزِيذَا ثَمقّْرَانْت زْنُوْزَان ذَايس يفُوْنَاسن ذ يحُوْڒِيْين ذ يذْبِيرن، ؤُڒَا ذ يصَرَّافن قِّيمن ذِنِّي تْصرَّافن تْمنْيَاث. 15ئِمُوْذ يسغْوَان، س يسغْوَان نِّي يُوْزّڒ خَاسن مَارَّا زِي ثمْزِيذَا ثَمقّْرَانْت س يحُوْڒِيْين ذ يفُوْنَاسن. ئِقْڒب-اَسن مِيسَّاث ن يِنِّي يتْصَرَّافن، يزدْجع-اَسن تْمنْيَاث نِّي ذِي ثْمُوْرْث. 16ينَّا-ٱسن إِ يِنِّي يزْنُوْزَان يذْبِيرن: "إِيْسِيث مَانَايَا سَّانِيتَا. وَار تَارَّاث شَا ثَدَّارْث ن بَابَا ذ سُّوْق!"
17فكَّرن يمحْضَارن نّس مَانَايَا يُوْسَا-د ذِي لْكِتَاب: "أَذ صدّْقغ ثُوْذَارْث ينُو خ ڒمْحِبّث ن ثمْزِيذَا نّش."
18كَّرن يسْرَائِيلِيْين نَّان-اَس: "مَان لْعَلَامَا ثَمقّْرَانْت إِي غَا ثݣّذ بَاش اَغَارش يِيڒِي ڒْحَقّ اَذ تݣّذ مَانَايَا؟"
19ينَّا-ٱسن عِيْسَى: "هذْمث ثَمْزِيذَا-يَا ثَمقّْرَانْت، نش اَتِيد سِيڒِيغ ذِي ثڒْتِيَّام!"
20نَّان-اَس يسْرَائِيلِيْين: "شك، أَتِيد ثْسِيڒِيذ ذِي ثڒْتِيَّام؟ ثَمْزِيذَا-يَا ثَمقّْرَانْت ثبْنَا ذِي ستَّا و اَرْبعِين يسݣّْوُسَا!" 21وَلَكِن ثَمْزِيذَا ثَمقّْرَانْت مِينْخف يسَّاوَڒ عِيْسَى نتَّاث ذ دَّات نّس. 22وَامِي د يكَّر زِي ڒْموْث، فكَّرن يمحْضَارن نّس مِين ذَاسن ينَّا، ؤُمْنن زِي لْكِتَاب ذ وَاوَاڒ إِي ينَّا عِيْسَى.
23وَامِي يدْجَا ذِي ثنْدِينْت ن لْقُدْس ذِي ڒْعِيذ اَمقّْرَان ن أَيث-إِسْرَائِيل، أَطَّاس ن يِوْذَان إِي زَّايس يُوْمنن زݣ يِيسم نّس وَامِي ࢲْرِين لْمُعْجِيزَاث إِݣ يتݣّ. 24وَلَكِن نتَّا وَار ذَايْسن يتِّيقِي شَا مِينْزِي يسّن يوْذَان مَارَّا مِين ذَايْسن. 25وَار يتحْذِيجِي بُو ڒشْهُوْذ خ يِوْذَان، نتَّا يعْڒم خ وُوْڒَاون نْسن.
Àwon tá yàn lọ́wọ́lọ́wọ́ báyìí:
يوحنا 2: ريف
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀