Jøøn 2
2
Luum Nywöm Mana Tïïc Yi Keena
1'Ba na tïme na ri dää nïne da nywöm ma atïïc yi Keena yi Galili. 'Ba mii Jecu ena kanyøce. 2Ni Jecu thuwø ocwølø kar nywöm ki bääge. 3'Ba na thum køøŋ nyïïomøki, mii Jecu aköö jï Jecu, ni «Køøŋ nyïïomøki athum jïge.»
4'Ba Jecu aköö jï menni, «?Ayaŋ, agïnaŋø ni tïïyï ki aani en? Kara poot kär öö.»
5Ni kö menni jï jø tïïc, ni «Noo dee gïn mo caane jïïu, wär tïïyu.»
6'Ba kaace da dääe abïciel mo otïïc jø Juuthi na mo wø jiiŋge dëëtge ki geni, na aciel yie da rumme ariiø wala adägö.#2:6 Dääe moøgø aciel man nø løny ki man tïme ni röömi ki thääŋ baarmïïl. 7Ni kö Jecu jïge, ni «Pääŋŋu däägögø ki pïï.» Ni ö geni ni pääŋge ge gøøc dhøkge. 8Ni kööe jïge, ni «Lwötu rege kawaane ni mëëgu gø kwääy nywöm.» Ni putge gø käl.
9'Ba na ö kwääy nywömmi na bel pïïögø na tïmö na køøŋ nyïïomøki, ni kanya käl yie kuue, 'ba ŋäya jø tïïci na twøm pïï; eni ŋat nywöm acwøle. 10Ni kööe jïre, «Nyie, jiy bëët wø kwøŋa køøŋ nyïïomøki moa met kälö, 'ba noo mäth jiyi døøc, køøre mo wø bäth cäŋ ka kälö nø. 'Ba ïïni køøŋ nyïïomøki moa met adwøgï cään, gøøc kawaane en nø.» 11Manøgø beeye ŋïï mana tïïc Jecu dïkwøŋ yi Keena yi Galili, ni nyootha ajieme. Ni ö bääge ni jïëcge ki eni ni ŋääthge gøøni.
12'Ba køør manøgøøni Jecu aci yi Kapernaam, ki menni ki nyïïmenni ki bääge. Ni bëëtge kaace ki nïne mo nøk.
Kanya Ö Jecu Na Rïëm Jø Gath Wøk Ki Yi Øt Jwøk
(Mathiew 21:12-13; Maak 11:15-17; Luk 19:45-46)
13'Ba ajwöm-cam Cäŋa Pööth Thøøe Yie#2:13 Cäŋa Pööth Thøøe Yie beeye kanya piem jø Icriel ni 'näk kaai mo Ijep. Luubö manøgø løny ki man kwaanï yi wëël Bwøth Wøk 12:1-27 mar jø Juuth kare ocäännö, ni ö Jecu ni ci yi Jerucalem. 14'Ba na ö yi kal mar Øt Jwøk Mana Dwøŋ, jø wø dwök pwödhö ki rwädhe ki dïëk ka akuyi, ki jø wø wïïdö ki gwel ajoode ni geno pï piny kwör tïïe moge. 15Kanyøgø ena tïïö ka adaay, ni riem jøøgø wøk bëët ki yi kal mar Øt Jwøk Mana Dwøŋ, ki dïëk ki rwädhe, ni køny gwel piny mo jø wø wïïdö ki gwel, ni jaal tharabëëte moge. 16Ni ööe ni luum jø wø gädhö ka akuyi, ni «Kïthu gïïögø wøk. Uuni øt Wära ba dou tïïö na øt gath.» 17Kanyøgø bääge wïthge aputge caar ki luumma no ogöörö, ni «Remø mara atwak kiper øtø marï.»#Dut Pwøc 69:9
18'Ba jø Juuth aköö jïre, na «?A ŋïï mane noo nyoothï jïwa, na tïïyï gïnögø kipere?»
19Ni løgi ya Jecu jïge, «Nyagu Øt Jwøk man. 'Ba aani, ødøgø otïŋa maal ki nïne adägö.»
20'Ba kanyøgøøni, jø Juuth aköö jïre, ni «Kanya geer Øt Jwøk manøgøøni, akän wøk ki cwiiri ma pïëraŋween ka abïciel. ?Aŋø, ï doo köö ni tïŋï maal ki nïne adägö keerge?» 21'Ba eni caana Øt Jwøk mana näk dëëre. 22Kiper manøgønø, kanya tïŋi maal ki yi thøø, bääge wïthge aputge caar, ni luummögø akwøŋ caan, ni jïëcge ki luup moa no ogöörö, ki luup moa caan Jecu.
Jecu Gïn Wø En Cwïny Dhaanhø Ŋääe
23'Ba kanya en Jecu yi Jerucalem ya ajwöm-cam cäŋ Cäŋa Pööth Thøøe Yie, jiy mo thööth ajïëy ki nyeŋŋe ni ŋääthge gøøni, kanya jootge ŋïïce moa tïïe. 24'Ba Jecu, dëëre käre wëëk geni, kiper eni jiy ŋääe bëët, 25ni eni ba cac dhaanhø mør mo køp gïr ŋat mør jïre. Kiper eni ki dëëre gïn wø en cwïny dhaanhø ŋääe.
Àwon tá yàn lọ́wọ́lọ́wọ́ báyìí:
Jøøn 2: AnyuB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© The Bible Society of Ethiopia