Jøøn 4
4
Luum Jecu Ki Cï Jø Cameria
1'Ba kanyøgøøni awïny jø Paricithi, ni Jecu löö na nyuudhi ni tïïya bääŋi mo thööth mo kaala mo Jøøn. 2'Ba Jecu ki dëëre kär löö na nyuudhi, 'ba beege bääge keerge na löö. 3'Ba na ö Jecu na ŋäc gïnögø, eni Judia awiie, ni cäŋ aa yi Galili. 4Ni eni doo pöödhö ki yi Cameria. 5Kiper manøgø nø, ena ci yi paac mør mo ena yi Cameria mo cwøl ni Caykar, na cään ki pwötha cïp Jeekapi jï wääde ma Jocep. 6'Ba iith Jeekap ena kanyøce. Kanyøgø nø, Jecu kiper mana näk eno ööl ki wääth mare, ena pï piny buut iidhøgø. Ni cäŋ ena dhöör.
7'Ba kanyøgøøni nyijø Cameria mør aö kuna öömme ki pïï. Ni kö Jecu jïre, ni «Mooc aani ki pïï naa mätha.» 8'Ba bääge oaa dï paac kuna ŋëëwge ki cam.
9'Ba nyijø Cameria aköö jïre, na «?Aŋø ni pëënynyï nyijø Cameria ki pïï mo maathï en, ni ïïna ŋat Juuth?» Kiper jø Juuth ki jø Cameria røkge ba liimge.
10Ni løgi ya Jecu jïre, «Onää muu Jwøk ŋäyï, ki ŋat cäänö ki ïïni en, ni ‹Mooc aani ki pïï naa mätha›, eni diï pëënynyö, ni dee cïpö jïrï ki pï kwøw.»
11'Ba dhaaŋŋøgø aköö jïre, «Kwäärö, jïrï bäŋ gïrpiny mo diï töömmö ki gø, kiper iith man bäär. ?Pï kwøw a diï gø kälö ki kaa? 12?Aŋø, dwøŋŋa ïïni ki kwarwa ma Jeekap na cïp iidhi jïwa, na kwøŋ mädhö yie ki dëëre, ki wääte, ki dhäk moe bëët?»
13'Ba aløk Jecu jïre, ni kööe, ni «Jiy bëët mo wø maath pïïögø, wø cäŋ riewi ka nägö. 14'Ba ŋato wäro mäthi ki pïïo cïba jïre, ba näk riewi këët. 'Ba pïïo cïba jïre otïmö na jøøro mo kwödö yie, mo kännö ki kwøw mana näk adïëri mo bäŋ cuŋŋe.»
15Ni kö dhaaŋŋøgø jïre, «Kwäärö, mëëk a pïïögø, naa ba 'näk riewi këët, naa ba ööa kany këët kuna öömma ki pïï.»
16'Ba Jecu aköö jïre, «Ciï ni cwølï cwørï ni duu kany.»
17'Ba aløk dhaage jïre, «Aani jïra bäŋ dïcwøø.»
Ni kö Jecu jïre, «Marï adïëri møn na caanï gø ni jïrï bäŋ dïcwøø. 18Kiper ïïna kwøŋ bëëdö ki cwøw abïïc, 'ba dïcwøø manø ni bëëdï ki gø kawaane enøgø, paa cwørï. Manøgø acaanï na adïëri møn.»
19'Ba dhaagø aköö jïre, «Kwäärö, ajooda ni ïïna nyikuŋ Jwøk. 20Kwäcwa wø lämö bäät kïdi man, 'ba ïïna köö, ni yi Jerucalem beeye kanya di jiyi lämö yie.»
21Ni kö Jecu jïre, «Nyijøøe, jïëyï ni ŋääthï luubö mara man, da kany mo öö, mo jiy Wuuö ba lamge bäät kïdi man wala yi Jerucalem. 22Uuni, u lama gïn mo kuyu, 'ba waani, wa lama gïn mo ŋäcwa. Kiper pïëm man piem jiy ki gø ena baŋ jø Juuth. 23'Ba kare anø cäännö, ni beeye kawaane en, kanyo ö jø wø lämö na adïëri, noo lamge Wuuö ki cwïnyge na adïëri. Kiper beege teeŋ jøøgø wø many Wuue nee eni lamge. 24Jwøk a Jwïëy, ni jø wø lam gø doo lämö ki cwïnyge na adïëri.»
25Ni ö dhaage ni kööe jïre, ni «Ŋääa ni Macaaya ni wø cwøl ni Krictø öö. 'Ba noo ööe, jammi bëët onyoodhe jïwa.»
26Ni kö Jecu jïre, «Beeye aani ni cäänö ki ïïni en.»
27Kanyøgø nø, bääge aput öö, ni thäŋ yïthge kiper mana cääne ki dhaagø. 'Ba bäŋ ŋat mo oköö, na «?Agïnaŋø ni manynyï?» Wala, «?Aŋø ni cäänï ki dhaaŋŋi en?»
28Køøre dhaaŋŋøgø dak mare awii piny, ni put ci dï paac ni caan gø jï jiy, 29ni «Ööu, ni neennu ŋati ni caan gïïa tïïa bëët en. ?Løny ki man tïme ni beeye Krictø?» 30Ni öge wøk ki dï paac ni cige baŋ gø.
31'Ba kanya poot dhaage ni kär duuö, bääge aö baŋe ni köge, ni «Dïpööy, ööï, ocämï.»
32'Ba ena köö jïge, ni «Aani jïra da cam mo cama camø mo kuyu.»
33Kiper manøgø nø, bääge acäänö yïthakicge keerge, ni «?Da ŋat mo okännö jïre ki gïn cam?»
34Ni kö Jecu jïge, ni «Cam mara beeye ki man tïïa mana many Ŋata jääŋ aani ni thööra tïïc mare. 35?Aŋø, u bäŋ wø cäänö, ni ‹Da dwäde aŋween mo poodi, 'ba noo näk køøre, beeye noo kac beel›? 'Ba a caana gø jïïu, ni tïŋu wïthu maal ni neennu pwöth ki nyeŋŋu no onø ciek ni rømi ka kac. 36Ŋat wø kää wø jïtö ki jammi, ni cooŋ moa no ociek kiper kwøw mana näk adïëri na bäŋ cuŋŋe, kiper nee dïpïïdhi ki dïkääy tïmge ni yïthge met bëët. 37Kiper luum wø caan jiyi beeye adïëri, ni ‹Ŋat mør a dïpïïdhi, ni ŋat mør a dïkääy.› 38'Ba, uuna jääŋŋa wøk baŋ kac kany mou kär kwøŋ öölö yie. Jø møøk beege na ööl ri tïïögø, ni ö uuni ni cou yïth gïïa tïïcge na ööl geni.»
39'Ba jø Cameria mo thööth na en paanøgø gena jïëy ki eni ni ŋääthge gø kiper mana caan dhaaŋŋøce, ni «Eni japa tïïa bëët acaane jïra.» 40Køøre na ö jø Cameria baŋe, ena pëënyge ki man bëëde ki geni. Ni ö eni ni bëëde kanyøce ki nïne ariiø. 41Ni ö jiyi mo thööth møøk ni jïëcge ki eni ni ŋääthge gø kiper mana caane. 42Ni köge jï dhaagø, ni «Paa kiper luummï këët na jïëcwa ki gøøni ni ŋääthwa gø, 'ba luumme awïnywa ki dëëtwa, ni beeye na jïëcwa ni ŋääthwa gøøni en. Ni ŋäcwa gø na adïëri møn ni beeye eni na Pïëmi mar piny bäre.»
Kanya Ö Jecu Na Køny O Kwäärö Mør
43'Ba na tïme na køør nïne ariiø, Jecu atïŋŋö ni aa Galili. 44'Ba ee caanø ki dëëre, ni «Nyikuŋ Jwøk bäŋ wø wøør dï poge.» 45'Ba kanyøgø, na ö yi Galili, ena pänh jø Galili kiper gïïa jootge bëët na tïïe yi Jerucalem kar ajwöm-cam. Kiper geno ci kar ajwöm-cam manøgø thuwø.
46Køøre ena cäŋ ö yi Keena na en yi Galili, kanya kwøŋ pïï tïïc na køøŋ nyïïomøki yie. 'Ba yi Kapernaam da dhaanhø ma kwäärö mo wääde tuu. 47'Ba na wïny gøøni ni Jecu aöö ki yi Judia ni ö yi Galili, ena cøø ni kwac gøøni nee ö kuna køny wääde. Kiper wääde kare cään ki thøø. 48Kanyøgø Jecu aköö jïre, ni «Ni näk ŋïïce ki gïï mo rëëma ec ba neennu, u ba jïëy ni ŋäädhu.»
49'Ba kwääyögø aköö jïre, «Kwäärö, ööï, kany poot wääda ni kär thøw en.»
50Ni kö Jecu jïre, «Ciï nø, wäädï okwøw.» Ni ö ŋatøgø ni jïëe ki mana caan Jecu jïre, ni put gø ŋääth, ni døø kuna ööe ki yie.
51'Ba kanya poode ni eni poot cäädhö, ena røømmø ki laage, ni caange gø jïre, ni «Wäädï akwøw.» 52Kanyøgø gena pëënynye ki caanna jöön dëëre yie. Ni köge jïre, ni «Ya awääre ki caa acielø#4:52 Caa acielø manøgø beeye caae abïriiø ki kwäänö mar Ithiöpia. beeye na aac täwi dëëre.» 53Ni puti ya wänni ŋäc ni beeye caanna ö Jecu na caan gø jïgø, ni «Wäädï okwøw.» Ni ö eni ki dëëre ni jïëe ki Jecu ni ŋääth gø, ki jø paare bëët. 54Manøgø beeye riet ŋïïce mana tïïc Jecu kanya ööe ki yi Judia ni ööa yi Galili.
Àwon tá yàn lọ́wọ́lọ́wọ́ báyìí:
Jøøn 4: AnyuB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© The Bible Society of Ethiopia