Jɔn 9

Yesuɛ achǒŋté mod awě béchyááné ndím

1Áde Yesuɛ átómɛɛ́, dɔ́ɔ ányíné mod awě béchyááné ndím. 2Dɔ́ɔ ábē bembapɛɛ bésɛdtɛɛ́ mɔ́ bán, <<A-meléed, mbéb ḿme nzɛ́ɛ́ ńkə́ə́ boŋ béchyáá anɛ́n mod ne ndím? Mbéb ḿmē mwěn-ɛ, káa ḿme sáá bɔ́ nyaŋ?>> 3Yesuɛ ankwɛntɛ́n bɔ́ aá, <<Saké ḿme mbéb ńkə́ə́, saá-kaá ḿme sáá bɔ́ nyaŋ. Boŋ nɛ́n ábɛ́nlédé âbɛl ngíne e Dyǒb ébîd áwed áwē yə̌l. 4Ngáne bǐn éʼdíi ényînnɛɛ́ ámīn, detə́ŋgɛ́né débɛl nsɔ́n ḿme ane awě álómé mɛ. Ehíntɛ́n ékwógé apɛ áde mod éehɛnlé nsɔ́n abɛl. 5Bɔɔb áde ńdíí á nkǒŋsé, mɛ-ɛɛ́ ndé eʼnyínɛn bé ekíde bé nkǒŋsé.>> 6Áde Yesuɛ ámáá ahɔ́b nɛ̂, ansob aléed á ndɔɔb, atɔ́b dɔ́ boŋ áwɔ̄gtē ane mod a ndím á mǐd, 7álāŋgē mɔ́ aá, <<Kǎg, éwobe eʼsó á etoŋ é Silom>> (ádê dǐn ádé nɛ́n bán, <<Bélómé>>). Né-ɔɔ́, ane mod ankɛ̌, áwōbē-ʼɛ mǐd. Antǐm ámbīd, ányînneʼ.

8Hɛ́ɛ bad ábe bémbīī mɔ́ ne bad ábe bényínáá ngáne áchɔ́mɛɛ́ bwěm, bésɛdtɛɛ́ bán, <<Saá anɛ́n mod ayɔ̌gké adyɛɛ ásē, áchɔ̄mē bwěm-ɛ?>> 9Doŋge dénhɔ̄b bán, <<Mɔ̂dé,>> ábíníí-ʼɛ bán, <<Aáy! Awágne mɔ́ wágnɛ́n.>> Boŋ ane mod mwěn anhɔ́b aá, <<Mměn-ɛɛ́ ndé.>> 10Dɔ́ɔ bésɛdtɛɛ́ mɔ́ bán, <<Chán-nɔ̄ émwédé abooted dé anyínɛn?>> 11Ankwɛntɛ́n bɔ́ aá, <<Mod awě béchəgɛɛ́ bán, Yesuɛ, antɔ́b elɔɔb, awɔ́géd mɛ chɔ́ á mǐd, aláá-ʼɛ mɛ aá ńkɛ á etoŋ é Silom, ńkɛ ńwobe mǐd. Né-ɔɔ́, menkɛ̌. Awobe áde ńwóbpé mǐd, ḿbootéd-tɛ anyínɛn.>> 12Bênsɛdéd mɔ́ bán, <<Héé ane mod adíí?>> Ankwɛntɛ́n bɔ́ aá, <<Meebíiʼɛ́.>>

Befarisia béhɛ́dé áte ngáne Yesuɛ áchóŋté mod a ndím

13Bênkɛɛ́n ane mod awě ankwɛ̌ ndím wɛ́ɛ Befarisia. 14Epun éche Yesuɛ ántɔ̄bpē elɔɔb ánēdē-ʼɛ ane mod mǐd áte, ébédɛ́ɛ Mbwɛ-mé-nkɔ́me-áte. 15Befarisia bênsɛdéd ane mod awě ankwɛ̌ ndím ámpē bánken, <<Chán émwédé abootéd dé anyínɛn.>> Hɛ́ɛ álâŋgɛɛ́ bɔ́ aá, <<Antɔ́b elɔɔb awɔ́géd mɛ á mǐd. Áde ńwóbpé eʼsó, ḿbootéd-tɛ anyínɛn.>> 16Hɛ̂ dɔ́ɔ doŋge á Befarisia béhɔ́bɛɛ́ nɛ́n bán, <<Anɛ́n mod awě abɛlé ádɛ́n dyam, eéhɛ̄lɛ̄ɛ̄-sɛ abɛ́ mod awě Dyǒb álómé, áyə̄le eékoŋgɛɛ́ mbéndé e Mbwɛ-mé-nkɔ́me-áte.>> Boŋ ábíníí-ʼɛ béhɔ́béʼáá bánken, <<Chán mod a mbéb áhɛlɛsɛ ábɛléʼ échɛ́n ndín e menyáké?>> Nɛ́n dêmpɛɛ́n nkabɛ́n átîntê echâb. 17Né-ɔɔ́, Befarisia bênsɛdéd ane mod ámpē bánken, <<Ngáne éhɔ́bé wɛɛ́ mɔ̂bɛlé boŋ ényînneʼ, cheé éwóó ahɔ́b á yə̌l echê?>> Hɛ́ɛ ane mod ákwɛntanné bɔ́ aá, <<Adíi nkal éʼdəə́dəŋ.>>

18Ké nɛ̂, bad bé Israɛl bénkêndúbɛ́ɛ́ bán, ane mod ansébé ndím akwɛ. Nɛ̂ dêmbɛ̌l bénchɛ̄lē sáá bɔ́ nyaŋ. 19Bênsɛdéd bɔ́ bánken, <<Nyɛ́ɛ̄ nyêchyáá anɛ́n mod awě nyéhɔ́bé bán, béchyáá ne ndím-ɛ? Chán-nɔ̄ ébɛ́nlédé boŋ ányīnnē bɔɔb?>> 20Dɔ́ɔ sáá bɔ́ nyaŋ békwɛntanné bán, <<Sêbíí bán awɛd mwǎn mɔ̂dé, sêbíí-ʼɛ bán bénchyāā mɔ́ ne ndím. 21Boŋ séēkooʼɛ́ abíi ngáne ámwédé anyínɛn, séebíi-ʼáa mod awě abɛlé boŋ ányīnneʼ. Nyésɛdte mɔ́, eésaá mwěndem, mwěn áhɔ̂b.>> 22Bénhɔ̄b nɛ̂ áyə̄le bébááʼáá bad bé Israɛl. Bad bé Israɛl bénhɔ̄b bán, kénzɛ́ɛ́ awě adúbpé aá Yesuɛ mɔ̂dé Ane-awě-Béwɔ́gté, bɛ́nan mɔ́ á ndáb e mekáne. 23Nɛ̂ dɔ́ɔ dênkə̌ŋ boŋ sáá bɔ́ nyaŋ béhɔ́b bán, <<Nyésɛdte mɔ́, eésaá mwěndem, mwěn áhɔ̂b.>>

24Hɛ́ɛ ábê bad bé Israɛl béchɛ̂nlɛɛ́ ane mod awě Yesuɛ ândidté bwâm ngen échě élóntɛ́né ébɛ, boŋ bélāŋgē mɔ́ bán, <<Kǎl echoŋ mbále á dǐn á Dyǒb. Sêbíí bán anɛ́n mod awě achǒŋté wɛ adíi mod a mbéb.>> 25Dɔ́ɔ ane mod átimtanné bɔ́ aá, <<Meebíiʼɛ́ mɛ ké adé mod a mbéb kéʼɛ eésaá. Dyam ahɔ́g áde ḿbíí, ádé nɛ́n, menkwɛ̌ ndím boŋ bɔɔb nnyînneʼ.>> 26Hɛ́ɛ bésɛdtɛɛ́ mɔ́ bánken, <<Cheé âmbɛnlé boŋ ébootéd anyínɛn?>> 27Ankwɛntɛ́n bɔ́ aá, <<Mmaá nyé aláa boŋ kénɛ̂, nyéedúbpɛ́ɛ́ mɛ. Cheé nyéhɛdɛɛ́ bán ńláa nyé ámpē? Nyémpē nyêhɛdeʼ ábē bembapɛɛ abɛ́-yɛ?>> 28Hɛ́ɛ bésyə́əʼɛ́ mɔ́, béhɔ̄bē bán, <<Wɛ-ɛɛ́ edé mbapɛɛ awě ane mod. Sêdíi bembapɛɛ ábe Mosɛɛ. 29Sêbíí bán, Dyǒb dénhɔ̄b wɛ́ɛ Mosɛɛ, boŋ séebíiʼɛ́ wɛ́ɛ anɛ́n mod pɛn ábídé.>> 30Ane mod ankwɛntɛ́n aá, <<Nɛ́n ádé nkɔ̂mtɛn ń yə̌l áte. Nyéebíiʼɛ́ wɛ́ɛ ábídé, boŋ kénɛ̂ abɛlé nnyînneʼ. 31Debíí bán, Dyǒb déekwɛntánné mekáne mé bad bé mbéb, boŋ akwɛntan mekáne ḿme bad ábe bébage mɔ́ edúbé, bébɛlé-ʼɛ mam ḿme áhɛdɛɛ́. 32Taasɛ nkǒŋsé ḿbootad mod eéwōgɛ̄ɛ̄ mbêd, bán mod abɛlé mod awě béchyááné ndím anyînneʼ. 33Nzé anɛ́n mod awě achǒŋté mɛ enkêmbɛ́ mod a Dyǒb, né eéhɛleʼaá-sɛ ábɛl enɛ́n ndín e dyam.>> 34Dɔ́ɔ ábê bad békwɛntanné mɔ́ bán, <<Béchyáá wɛ á mbéb-te, ékwōg-kɛ á mbéb-te, boŋ bɔɔb éhɛdé sé ayə́ged-ɛ?>> Hɛ́ɛ dɔ́ɔ bébídté mɔ́ á ndáb e mekáne.

Ndím e edəə́dəŋ

35Áde Yesuɛ áwógé bán bébídté ane mod awě ânchoódté á ndáb e mekáne, anhɛd mɔ́. Áde ányíné mɔ́, ansɛdéd mɔ́ aáken, <<Edúbpé Mwǎn-a-Moonyoŋ-ɛ?>> 36Ane mod antimtɛ́n mɔ́ aá, <<A-Sáŋ nzɛ́ɛ́ adé Mwǎn-a-Moonyoŋ, láá mé âbɛl nɛ́n ńdúbe mɔ́?>> 37Yesuɛ anláá mɔ́ aá, <<Emaá mɔ́ anyín, nyúmɔ̄-ʼaá nyêkaleʼ nɛ́n.>> 38Hɛ́ɛ ane mod áhɔ́bɛɛ́ aá, <<A-sáŋ, ndúbpé!>> Abwɔ́g-kɛ mebóbóŋ âbɛ mɔ́ edúbé. 39Yesuɛ anhɔ́b aá, <<Mpedé á nkǒŋsé wɛ́n, âkáad bad âbɛl nɛ́n bad ábe békwédé ndím bényínɛn, ábe bɔ́-ʼɛ bényînneʼ, békwɛ ndím.>>

40Áde doŋge á Befarisia ábe bɔ́ɔbɛ Yesuɛ bémbɛ̄ áhed béwógé nɛ̂, bênsɛdéd mɔ́ bánken, <<Sêdúbpé bán, weehɔ́bɛ́ɛ́ wɛɛ́ sémpē sêkwedé ndím?>> 41Yesuɛ anláá bɔ́ aá, <<Nzé nyênkwɛ ndím, né mbéb méesaá nyé á yə̌l. Boŋ bɔɔb áde nyéhɔ́bɛɛ́ bán nyênyínneʼ, mbéb ńdíí ńdé nyé á yə̌l.>>

Àwon tá yàn lọ́wọ́lọ́wọ́ báyìí:

Jɔn 9: bss

Ìsàmì-sí

Pín

Daako

Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀

Mọ̀ Sí Nípa Melɛ̌ Mékɔ̄ɔ̄lē