Luka 19
19
Jakayɔ ʉnyɨa nʉ ɓʉhɨa
1Tiga ndʉ Yeso i꞉nye kukumunio anʉ Yeliko, a꞉ijo 'ʉngyɛndʉ wʉ gʉlʉ ngiinanɨ. 2Mombi mʉngana i꞉nye nanɨ ino ɓɔ Jakayɔ, ngama ʉ ɓandɔmbɛ ɓɔɔ ɓulipise manzanza. I꞉nye mombi ʉ lɨkyɛmɛ. 3I꞉nye kʉhata kʉna Yeso ɓɔ ʉmbɨa ɓɔ a‑zʉ anɨ ɓʉ kpɛ, ɨkyɛmɨngana ndʉ i꞉nye kʉ gbititi, ambikinye ikanzi ngia amʉna jʉ ungbutu wʉ ɓombi wi꞉nye wʉɓaaneni ɓaana. 4Kʉ ɓwanɨ, a꞉sa tiga bangʉ apɛɛ akʉ ɨngbaa ngia Yeso i꞉nye‑ɔɔ kʉɓaa, ambuɗito ekoo ʉ ɓʉtɨ ambʉ ʉmʉna tʉkʉ naa.
5Iya Yeso a꞉choo akʉ Jakayɔ i꞉nye‑ɔɔ, ambʉtɨna waja ekoo, kija a꞉musigio ɓɔ: « Ɔwɛ Jakayɔ, ijo ya ɛsɨ gagaa jʉ ɓʉɓʉnɨ ngia yɨkwanana ɓɔ muwulo andɔɔ. » 6Kija Jakayɔ a꞉kyananaka gagaa, ambijo ɓʉ kputu, ambʉjananɨa Yeso nʉ ɨgyagya! 7Iya ɓombi kʉ ɓuɓomu ɓa꞉na moni ngikʉnanɨ, ɓambufaniso gʉa Yeso kusigo ɓɔ: « Ɓiɛ, akʉsa kuwulo tʉkʉ ɔɔ mombi ʉ ɓʉɓɨɓɨ ngiakɛ! » 8Jakayɔ ambʉmaa, ambusigio Makʉʉɓɨɨ ɓɔ: « Makʉʉɓɨɨ, ʉna! Ma꞊nahʉa kumbo ngiasɛmɛ akʉ ati, ma꞊chɨka wagba mungono mambʉɨpakɨa ɓombi ɓʉ ɓanangyɨa. Yɛmɔ ɓɔ mʉdyɨeni jɛnɛ mombi ɨkyɛmɛ nʉ mapimbili, ma꞊mutuisio tiga ɛyɔ nɨsɨ ɓʉgɨna. » 9Kija Yeso amutisio ɓɔ: « Ɓʉɓʉnɨ ɓʉhɨa ɓu꞉kumunio amati ʉ ɨkáa ngia kumunioo, jʉ ɛyɔ a kʉ mwana ʉ ɓanɔnɔ ʉ Abalama. 10Jʉ ɛmɛ Mwana ngia ʉ Mombi ma꞉ka kʉhata nʉ kuhiiso ɓombi ngiɓa ɓa꞉yangaa. »
Isisinio yɨ lipumo lʉ ɔlɔ
(Mat 25:14-30)
11Ati ngia ɓombi ɓi꞉nye‑ɔɔ kʉkɔ moni ngikʉnanɨ, Yeso i꞉nye tiga kʉ tinene nʉ Yelusalɛma. Kija a꞉nzo isisinio mɨngana ekoo ʉ ɓombi ngiɓa ɓi꞉nye kuyo ɓɔ Ɓʉngama ɓʉ Asʉɓɨɨ ɓakʉka tʉkʉ kʉ ɨtakɨ‑takɨ ngiinanɨ. 12Ambuɓusigio ɓɔ: « Gue mʉngana akʉ anza ʉ ɓʉngama mʉngana ɓɔmʉ, i꞉nye kʉkʉnda kʉsa akʉ ɨkʉmbʉ yɛɛ ɨja nga yɛmɔ yɛɛ danga, aka ekoo ngia ɓɔ ɓumunzo ɓʉngama, ambʉtʉa. 13Pɛɛ angɔ kʉʉngwɨa kɨnda, a꞉soko ɓombi kumi ati ʉ ɓombi ɓʉ kuu ngiɓangɔ. Ambuɓunzikio lipumo lʉ ɔlɔ ngana ngana. Kija a꞉ɓusigio ɓɔ: ‹ Chiseni ɔlɔ ngia ɨngbaa akʉ gabanaka kʉɓʉya ɓisi ongo tʉkʉ akʉ ma꞊tʉa‑ɔɔ. › 14Ɨkyɛmɨngana, ɓombi ɓʉ ɨkʉmbʉ ngiangɔ ɓambʉmʉyaa, ɓambʉtʉma ɓombi mbise angɔ nayɔ kusigio ɓɔ: ‹ Kʉbayakɔmʉ ɓɔ ɛyɔ uɓio ngama ʉndɛsʉ. ›
15Iya ɓa꞉munzo ɓʉngama nani akʉ a꞉sa‑ɛɛ, mbise ɔngɔ ambʉtʉa kʉ andɔngɔ akʉ ɨkʉmbʉ. Kija a꞉tumisio ɓombi ɓʉ kuu ɓangɔ ngiɓa a꞉ɓunzikio lipumo lʉ ɔlɔ kʉka apɛɛ angɔ, aka ekoo ngia ɓɔ ʉmbɨa ɓɔ ɓa꞉nyɨa nʉ lɨkyɛmɛ lɨpɨtanɨ ekoo ɔngɔ. 16Mombi ʉ kuu mʉngana ambʉka pɛɛ, ambumusigio ɓɔ: ‹ Makʉasɛmɛ, ipumo yɨ ɔlɔ ngia wa꞉nanzo ya꞉iso pongo tiga lipumo nga lɔmɔ kumi. › 17Kija ngama a꞉musigio ɓɔ: ‹ Ya iɗo, wa mombi ʉ kuu ngia aakyananakɨa mapanʉ muɗo nʉ ɔɔ bayanɨɛ! Jʉ wi꞉nye pongo ngbingbii akʉ kumbo ɔɔ ɗɛkɛkɛ, mʉnachwa tiga ngama kʉkanga ɓagʉlʉ kumi. › 18Mbise angɔ, mombi ʉ kuu ʉ ɓepini ambʉka ambumusigio ɓɔ: ‹ Makʉasɛmɛ, ipumo yɨ ɔlɔ ngiisɔɔ wa꞉nanzo, ya꞉cho pongo tiga lipumo ɓɔkɔ. › 19Kija ngama a꞉sigio gwa ngiinanɨ ɓɔ: ‹ Abana gʉ ɔwɛ, mʉnachwa ngama ekoo ʉ ɓagʉlʉ ɓɔkɔ. ›
20Mombi ʉ kuu nga kɔmɔ ɓata ambʉka ambumusigio aka ɓɔ: ‹ Makʉasɛmɛ, ipumo yɨ ɔlɔ ngiisɔɔ wa꞉nanzo iiyakɛ. Ma꞉ɨsangaka tʉkʉ nʉ wagba wʉ ɨpʉkʉ. 21Mi꞉nye kyɨa pongo nɔwɛ kukumo, jʉ wa ɓʉkaɨ. Waachɨka ɨkyɛmɛ ngia wa꞉napɨakɔmʉ, nʉ waabʉa masɔɔ ngika wa꞉hʉnakɔmʉ. › 22Kija ngama a꞉musigio ɓɔ: ‹ Wa tʉkʉ mombi ʉ kuu ɔɔ ɓɨɓɨ! Ngbanga ngbanga tʉkʉ ndʉ moni kʉsɔɔ kusigoo, ma꞊tɨna 'ʉkɔmbɔ nguʉsɔɔ tʉkʉ ndʉ ananɨ. Wi꞉nye kʉmbɨa kʉtaa ɓɔ ma mombi ɔɔ ɓʉkaɨ, ɓɔ maachɨka ɨkyɛmɛ ngia ma꞉napɨakɔmʉ, nʉ maabʉa masɔɔ ngika ma꞉hʉnakɔmʉ. 23Akʉ moni kʉ ɨmanɨ wa꞉napɨakɔmʉ falanga ngiasɛmɛ akʉ ɨkáa yɨ ɓoso falanga? Jʉ ambʉ ndʉ ma꞉ka, mambumiso tiga kʉ nʉ mwana ʉ dada ekoo ɔngɔ? ›
24Kija a꞉sigio ɓombi ngiɓa ɓi꞉nye nanɨ ɓɔ: ‹ Mʉhɨnɨeni ipumo yɨ ɔlɔ ngiinanɨ anayɔ, nambunzo mombi ʉ kuu ngia a nalɔ kumi. › 25Kija ɓa꞉musigio ɓɔ: ‹ Makʉʉndɛsʉ, a‑zʉ kʉ nʉ lipumo lʉ ɔlɔ kumi! › 26Kija ngama ngiinanɨ a꞉sigo ɓɔ: ‹ Maninu kusigio ɓɔ mombi kʉ 'uɓomu ngia anʉ ɨkyɛmɛ ɓa꞊mʉmatɨa ɓata yɛmɔ kʉ aka ekoo ɔngɔ. Ɨkyɛmɨngana, mombi ngia ambʉkɔmʉ nʉ ɨkyɛmɛ, ɓa꞊mʉhɨnɨa mwana ɔngɔ ngia anayɔ kʉ hɨnɨaa. 27Tiga ɓakwa ngiɓʉsɛmɛ, iɓa ɓa꞉kʉndakɔmʉ ɓɔ muɓio ngama ekoo ʉndaɓʉ, ikeni naɓɔ aka. Ɓʉtɨneni lɨmɨɔ tʉkʉ aka apɛɛ asɛmɛ aka! › »
Yeso ukumunio anʉ Yelusalɛma
(Mat 21:1-9; Mak 11:1-10; Yʉa 12:12-15)
28Mbise ʉ ngaka moni ngikʉnanɨ, Yeso ambʉɓaa kɨndaka apɛɛ ʉ ungbutu wʉ ɓombi tiga kʉsa anʉ Yelusalɛma. 29Iya a꞉pa kʉ tinene nʉ ɨkʉmbʉ yɨ Bɛtɛfagɛ, nʉ ɨkʉmbʉ yɨ Betania, tinene nʉ ɨkpangba yɨ Mijeituni, ambʉtʉma ɓakpataka ɓapɨnɨ apɛɛ. 30Ambuɓusigio ɓɔ: « Seni akʉ ɨkʉmbʉ ngia ya apɛɛ akɛ, ndʉ naɓio kukumunio, na꞊gbʉka mwana ʉ punda 'ʉngɛ iya mombi ambuɗitokɔmʉ ekoo ɔngɔ. Muɓoneni ɓonoo nambʉnɨkyɨa nayɔ. 31Ndʉ mombi aniɓukuo ɓɔ: ‹ Na nayɔ kuɓono akʉ moni kʉ ɨmanɨ? ›, musigieni ɓɔ: ‹ Makʉʉɓɨɨ anʉ taa yangɔ. › » 32Kija ɓakpataka ɓa꞉sa, ɓambʉgbʉka moni kʉ muɓomu tʉkʉ ndʉ akʉ Yeso a꞉ɓusigio‑ɔɔ. 33Ati ngia ɓi꞉nye tiga‑ɔɔ kuɓono mwana ʉ punda ngiinanɨ, ɓambɨnyɨɓɔngɔ ɓambuɓukuo ɓɔ: « Nakuɓono mwana ʉ punda ngiinanɨ akʉ moni kʉ ɨmanɨ? » 34Ɓambuɓutisio ɓɔ: « Kanayɔ kuɓono jʉ Makʉʉɓɨɨ anʉ taa yangɔ. »
35Kija ɓa꞉ɨkyɨa Yeso nʉ mwana ʉ punda ngiinanɨ, ɓambʉnapɨa lɨpʉkʉ lʉ vɛvʉ ngilʉndaɓʉ ekoo angɔ, ɓambuɗitiso Yeso ekoo ɔngɔ. 36Ɛyɔ i꞉nye kʉsɨnganaka nʉ kɨnda, ɓombi ɓi꞉nyeni tiga kʉnaa lɨpʉkʉ lʉ vɛvʉ ngilʉndaɓʉ anɨngbaa. 37Iya a꞉pa tiga tinene nʉ Yelusalɛma, nɨngbaa kujo ɨkpangba yɨ Mijeituni, ungbutu wʉ ɓakpataka kʉ uɓomu wambuhuo nʉ ɨgyagya. Ɓambufaniso bibiso Asʉɓɨɨ nʉ iyo yɛɛ ɓʉmʉ ekoo ʉ moni kɔɔ mʉmbangɛ kʉ muɓomu ngika ɓi꞉nye ɓuneni. 38Ɓi꞉nye kusigo ɓɔ: « Asʉɓɨɨ umbuiso Ngama ɔɔ 'ʉja ngia akʉka akʉ ino yɨ Makʉʉɓɨɨ!#Popoko Mʉm 118:26 Majɨɔ ekoo ʉ ɓisi nʉ ɨbɨba akʉ Asʉɓɨɨ ekoo ʉ ɓisi nadɨndɨ. » 39Ɓafalisayɔ ngana ngana ngiɓa ɓi꞉nye ati ʉ ungbutu wʉ ɓombi ɓambusigio Yeso ɓɔ: « Mʉpananakɨa, sigio‑zʉ ɓakpataka ngiɓʉsɔɔ ɓɔ ɓʉkata! » 40Yeso ambuɓutisio ɓɔ: « Maninu kusigio ɓɔ: Ɛɓɔ ɓʉkateni, tii tʉkʉ mukopi ka꞊faniso nachokoo nɛmɛ kubibiso. »
Yeso akʉndɨa Yelusalɛma
41Iya Yeso a꞉pa tiga kʉ tinene nʉ gʉlʉ, ndʉ i꞉nye tiga nayɔ kʉ kʉna, kija a꞉faniso nayɔ ndɨa, 42kusigo ɓɔ: « Hoo! Ɔwɛ Yelusalɛma, wʉmbɨeni piɛ ɓʉɓʉnɨ moni ngika ka꞊nanzo majɨɔ! Ɨkyɛmɨngana, ka mʉɓatanɨɛ akʉ mesu ngikʉsɔɔ! 43Jʉ akʉ makwaa nga kɔmɔ ka sinani kʉka, ɓakwa ngiɓʉsɔɔ ɓa꞊tɨa sina aga nɔwɛ kukunguo ɓu kuu, ɓambʉka nʉ ɗite kija ɓa꞊nandʉndɨa magba kʉ mabɔbɔ. 44Kija ɓa꞊nato sinani nʉ ɓombi ngiɓʉsɔɔ tʉkʉ ɓʉ gbatata! Nʉ ɓa꞊mbʉkʉnasɨa sinani ikopi ɨnapɨɛ ekoo ʉ ikopi nga yɛmɔ, jʉ ɔwɛ wa꞉mbɨakɔmʉ ati ngia Asʉɓɨɨ a꞉ka‑ɔɔ nɔwɛ kʉsalɨa! »
Yeso u꞉kpinyo ɓombi amati ʉ Ɨkáa yɨ Asʉɓɨɨ
(Mat 21:12-16; Mak 11:15-18; Yʉa 2:13-16)
45Tiga ndʉ Yeso a꞉kumunio amati ʉ ɨkáa yɨ Asʉɓɨɨ, a꞉gbʉka ɓombi kugabiso kumbo na ambɛnɨ. Kija a꞉faniso naɓɔ kiso aɓei akʉ angu. 46I꞉nye naɓɔ kusigio ɓɔ: « Asʉɓɨɨ a꞉sigo amati ʉ ɨtaɓʉ yɨ mapanʉ ɓɔ: ‹ Ɨkáa ngiisɛmɛ yaɓio ɨkáa yɨ nɨta Asʉɓɨɨ. ›#Popoko Ɨsa 56:7 Ɨkyɛmɨngana, inu nʉ꞉ɨnɨtanakiso tiga izi yɛɛ junikie yɨ ɓombi ɓʉ ndiɓo. »#Popoko Yel 7:11
47Makwaa kʉ muɓomu, Yeso i꞉nye kyɨa kʉpanɨa amati ʉ ɨkáa yɨ Asʉɓɨɨ. Ʉna tɔ, ɓangama ɓʉ ɓakumu‑kumu, nʉ ɓapananakɨa ɓʉ mapanʉ, nʉ ɓangama ɓʉ ɓombi ɓi꞉nye tʉkʉ kʉhata nayɔ kʉwa. 48Ɨkyɛmɨngana, ɓambikinye mbɨa ɓɔ ɓamʉwa nɨngbaa tɨmanɨ, jʉ ɓombi kʉ ɓuɓomu ɓi꞉nye kyɨa nayɔ kʉkɔ nʉ taa yengo.
Àwon tá yàn lọ́wọ́lọ́wọ́ báyìí:
Luka 19: BudKoya
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2021, Wycliffe Bible Translators, Inc.