Génesis 6
6
Unin ꞌucha ꞌaisamaira ꞌikë Nukën ꞌIbu Diosan isa bana
1Uni ꞌaisamaira ꞌuakamë ꞌëoi ka me tsitsirui buküakëxa, usai ꞌikin ka unin xanu upíirabu ꞌinun bëchiakëxa, 2usa ꞌain ka Diosan bëchikëkaman unin bëchikë xanukama upíirabu isakëxa. Usa ꞌain ka uinu ꞌikë xanu kara kuëënia abë kuëënani unikamax biranankëxa. 3ꞌAínbi ka Nukën ꞌIbu kiakëxa: ꞌËn kana uni xënibutia tsónun ꞌimitima ꞌain, usa ꞌaish ka bamati ꞌikën, unix ka namishi ꞌikën, usa ꞌain ka unix tsóti ꞌikën, ciento veinte baritia ishi.
4Usa ꞌain ka chaxkë́irabu ꞌimainun chaiirabu uni ënë menu mërakëxa, Diosan bëchikëkaman unin bëchikë xanukama ami bëchipati biakëxa, bixun ka ami bëchipakëxa. Bëchipakëx ka a unikamax asérabi rakuëma kushiirabu bërámabi nëtë ióñu ꞌiakëxa. 5Nukën ꞌIbu iskëxbi ka unin ꞌucha ꞌaisamaira ënë menu ꞌiakëxa, ꞌimainun a ꞌatima sinánñu ꞌixun ꞌatima ñuishi ꞌati sinánñuirabu ꞌiakëxa, 6usa ꞌain ka uni uniotankëxbi usai ꞌia isi sinanakëxa. ꞌItsaira anun masá sinani, 7kiakëxa: ꞌËn uniokë ënë menu ꞌikë unikama kana këñuti ꞌain, ꞌimainun kana kamabi ñuina a ꞌarakakë, ꞌimainun men niríkë ñukama, ñuina pëchiñu akama. ¡ꞌËn uniokë ñukama ꞌaisamakëbë kana sinanan! 8Usaia abë ꞌikë unikama ꞌikëbëtanbi ka Nukën ꞌIbun Noé ashi upí sinánñu uni ꞌikë isakëxa.
Noénën nunti chaiira ꞌá bana
9Ënëx ka uisai kara Noé ꞌiakëxa, kixun ñuikë bana ꞌikën.
Noé ax ka achúshi uni upí ꞌiakëxa, usa ꞌixun ka Diosan kakësabiokin ꞌakëxa. A uníxëshi ka raíri unikama ꞌikësama anúan tsóa nëtëkaman Diosan kuëënkësabi oi tsóakëxa. 10Noé ax ka rabë́ ꞌimainun achúshi bëchikëñu ꞌiakëxa, aín anë ka Sem, Cam ꞌimainun Jafet, kakin anëkë ꞌiakëxa.
11Nukën ꞌIbu Diosan iskëx ka ënë menu ñu unin bëtsi bëtsi ñu ꞌaisamaira ꞌanan bënë́kinshi ñu ꞌaisama ꞌakë ꞌiakëxa, 12kamabi unin ka ꞌatima ñuira ꞌati sinánñu ꞌiakëxa. Usa iskin ka Nukën ꞌIbu Diosan ënë menuxun ꞌaisamaira ñu ꞌatima ꞌaia isakëxa, 13usa iskin ka Noé kakëxa: Kamabi unikama këñuti kana sinan. Atun ꞌucha kupín ka ënë menuxun ꞌaisamaira ñu ꞌatima ꞌaia, usa ꞌain kana ꞌën a unikama ꞌimainun menu ꞌikë ñukama këñuti ꞌain. 14Usa ꞌain kamina ꞌati ꞌain, achúshi nunti chaiira i bëpinñuira xubu namë́sokin, ꞌatankëxun kamina anua ñukama ꞌiti ꞌati ꞌain, aín namë ꞌukëmëu kamina bëarati ꞌain, ꞌanan kamina aín xabankëkama anun ꞌumpax atsintisama okin mëu ꞌimainun ëman xaran bëtasti ꞌain, anun ꞌumpax atsintisama okin. 15ꞌAkin kamina nunti chaiira a ësokin ꞌati ꞌain: ciento treinta y cinco ka aín chaxkë́ ꞌiti ꞌikën, ꞌimainun ka veintidós metro ꞌimainun medio aín namë ꞌiti ꞌikën, ꞌimainun ka aín manámiu trece metro ꞌimainun medio manan ꞌiti ꞌikën. 16ꞌIanan kamina rabë́ ꞌimainun achúshi okin ꞌain manámi uarukin ꞌanan, achúshi xëkuë chukúma aín maskuan meu anun isti ꞌati ꞌain, ꞌanan kamina aín xëkuë chaiira uimi kaina ꞌaisatani anu ꞌati ꞌain. 17ꞌËn kana bakan tita chaiira an me mapurukin anu ꞌikë ñukama këñuti ꞌëmiti ꞌain, an kamabi menu ꞌikë unikama këñunu. Usokin ꞌakëbë ka menu ꞌikë kamabi ñukama bamati ꞌikën. 18Usa ꞌaínbi kana mibëtan achúshi ñu ꞌain, usa ꞌain kamina mi ꞌimainun min xanu min bëchikëkama ꞌimainun min bëchikënën xanukama aturibi nunti chaiirami ꞌakë anu ꞌaruti ꞌain. 19ꞌImainun kamina nunti chaiirami ꞌakë anu ñuina aín bënë achúshi ꞌimainun aín xanu achúshiribi kamabi ñuina menu ꞌikë ꞌaruti ꞌain, a ñuina kamax ka mix ꞌikësaribiti tsóti ꞌikën. 20Mibë ka nunti chaiira anu rabë́ rabë́, bëtsi bëtsi ñuina këñuruti ꞌikën: usai ꞌika pëchiñu ñuina ꞌimainun a ꞌarakati ñuinakama, ꞌimainun ka men nikë ñuinakama axribi, këñutima kupí këñuruti ꞌikën. 21ꞌAnan kamina kamabi ñu min piti ꞌimainun ñuinakaman pitiribi bitankëxun puruti ꞌain, usa ꞌain ka min piti ꞌimainun ñuina kaman pitiribi anu ꞌiti ꞌikën.
22Usa ꞌain ka Noénën Diosan kakësabiokin kamabi ñu ꞌakëxa.
Àwon tá yàn lọ́wọ́lọ́wọ́ báyìí:
Génesis 6: cbrPB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 1978, 1995, 2008, 2022 Wycliffe Bible Translators, Inc. All rights reserved.