Yohanis 7
7
Lɔga Kɔyɛa :Yesusi Gibiriya Dhagɛa :Zugu Gahachina
1Na hunaa Yesus mɛzziya ko zugo na tewa ushaye, nɔng tɔu baa Gelila ngonu sɔng na bhokkonnɔ ngani ngakɔyo. Na bhɛa senno kɔtɔyɛ baa Yudha ngani ngahinno ke ngaya hinɛsɛnɛ :gulsachina Ayhudhi rɛsɛye. 2Na gibiriya zuga Ayhudhi kèe “Gibiriya Gahachinuny”#7.2 Ngagibirita kèe “Gibiriya Gahachinunyde,” anna ammɛa :zugu kolea suneonɛa woyn kawarɛ ko girari kawarɛ na zugo kɔdhdhɛ gahachina na kagatay lɔga bere kokonginyaa gɛ hunde bere bhakkɛ gahachina korugiyeye. hunaa tewa jaye, 3Yesus seyɛsɛ :gɔynggɛu, “Ga bana na ok baa Yudha na zuga kɔbhbhinyɛa kargi ngalɔkta bu dhandal mesiye. 4Hirre se kete hira toynɛnaye, lɔgɔ dari ngamesso. Na mɛa inye hunde mesi ngalɔkta bu dhandalde, maya dhɔlɛsɛn zuga bhakkɛa ba kumulɔng.” 5Yɔk bhee dha bere senɛ ngangaye, a ngaya chɔɔ gochonginyaa gɛnyɛ nɔng ngani kɛyɛbhtɛoye.
6Na Yesus sɛɛsɛ yɔk, “Kolea ale kɔgɔyɛi :anyo mɛa ngayo. Na nɔng igge kolee hinnonɛoye hɛo hung. 7Yɔk zuga bhakkɛa ba bhee marrɛungɛ igge ninggɛ. Nɔng anye marranyɛ ke ngaya kudhugunɛsɛn lɔga messɛa :yɔkku ku kuhuyamoye. 8Na igge mɛa banda ago gibiriyɔ. Anye mɛa ngagibiritonu ngakɔgɔyo ke ngaya kolea kɔgɔyɛi :anyo mɛa ngaanɛoye.” 9Na hunaa yogɛsɛa gɔynggɛ ngalɔkta na tewa ushaye, nɔng dhɔyɛ baa Gelila.
10Na hunaa gɔynggɛ hɛa gibiriyɔye, nɔng koo dhulu dari na ogu ngonu. 11Na yɔk gulsachina Ayhudhi ɛlla gibiriyɔ bere lamiyɛa nɔng, ga bo ghinnɛna na sennɛa, “Na ngahirronu dha i ori?”
12Na bhɛa zuga ɛlla ngonu, gena bere mɛzziyɛa lɔga gɛnyɛ hɛhɛyɔ na sennɛa, “Ngahirra a hira challa!” Na gena sennɛa, “Ay, a gɛrsi! Nɔng itabh zugo.” 13Na chɔɔ ko hunde kete nganga, hirre bere dhugunnono lɔga gɛnyɛ bhɛa sɛrɔ ɔdhdha bere ningginɛna dhul, ke ngaya ɛngɛrsɛ gulsachina Ayhudhiye.
Lɔga Madhinɛnɛa :Yesusi Gibiriyɔ
14Na Yesus hunaa saniwa Yerusalemɔ ungo wush na tewa ushaye,#7.14 Gibiriya Gahachinuny a gibiriya ammɛa :zugu ungo issey. koo ogu doraa Tumu barara tu kɛngɔ na madhu zugo. 15Na yɔk zuga Ayhudhi iwachi na se, “Na ngahirra lɔga Tumu ngani kɛdhɛmisiyoye, lɔgɔ goore ga ɛnɛng?”
16Na dhugunɛsɛ :Yesusi na sɛɛsɛ, “Anye ngalɔkta kamadhdhagungge ga sabbaa nanu ngayo. Agga ajjanyi :Tumu, hira bere ekkononyi. 17Na hunde lɔ hirre se keme lɔga hinno :Tumu na kurrugɛsɛye, ale gayɔ hunde ngalɔkta kamadhɛsɛn zugoye agga bere ajjanyi :Tumu oo hunde agga sabbaa nanuye. 18Nɔng inde yokkono lɔga sabbaa nɛnɛye, lami bhɛa senno kɔdhɔnggɛ :zugu na kayɛ diram. Na nɔng inde hin bhɛa senno zugo kɔdhɔnggɛ hira bere ekkonoye, a hirre mɛzzi lɔga ku dhereye. Na chɔɔ bhɛa nɛnɛ butomo ninggɛ dhul. 19Nɔng Muse annaa bere aungɔ Damiya Tumu. Na chɔɔ bhɛa nu hirre bhɛk ngadamitonu ninggɛ dhul. Na mɛa igge hinnogonyu rɛsɛ kɛ ɔng?”
20Na seyɛsɛ :zugu, “Ngahirra tɔkkaginyde, ngangaye, inde hinnoginy rɛsɛye a nɛng?”
21Na nɔng Yesus sɛɛsɛ, “Anye Kala Ayawsuny annaa bɔɔ kemesi lɔga bo dhandala barara inde ku dhɔnɛ na a nganda iwachinɛno gooreye. 22Nɔng igge anno ngagiya kedhdho erroa gu rɛhiya maya Kala Ayawsuny ke ngaya anɛ damiya bere ajɛungu :Museye. (Nɔng ngadamitonu anna bere ajjungɛa :kokonginyaa gu sabbɔ. Muse ngani kaungo.) 23Na hunde igge anno ngagiya kedhdho erro rɛhiya maya Kala Ayawsuny na bhɛkko damiya bere Muse shɛɛ na ngaɛddɛoyoye,#7.23 Ngalɔkta ɛlɛhɛnnɛ lɔga Zuga Ayhudhi bhɛgɛa damiya Muse na kedhdhɛa erroa gɛ rɛhiya maya hunde hudhukkinya na unga gɛ ku issey a Kala Ayawsunyde. na anye hunde kibbaysi hiri rɛ kumulɔng Kala Ayawsunyde, igge marro kɛ ɔng? 24Mɛa lɔgɔ maraga shɛɛ na kedhdhigi dib. Zugo mumi ngagunynyo na kedhdho lɔgɔ ke bhaseni.”
Lɔga Yesus Anɛa Hira Bere Bɛrrana :Tumu Ku Kirisos Dhere
25Na yɔk zuga Yerusalemi gen se, “Nganda ngayo hira bɔɔ senno kɔgɔdhɔ :gulsachina Ayhudhi rɛ dha? 26Nɔng mɛa a nganda yokkono lɔgɔ bhɛa sɛrɔ ɔdhdha na chɔɔ ngazuktonu nɔng hun kona ngani keseyɛsɛoye. Na gulsachina hunde a ngagiya gunynyɛ dhɛɛye, yɔk dha sennɛ a Kirisos dhere ka?#7.26 “Kirisos” a bhɛa kènɛa “Hira Bɛrrana :Tumu ku Komoruya Ibbayseo Zugo.” 27Nɔng ngahirra hunde a hira ba inongge, agge kàggayɔ. Nɔng Kirisos hunde ale kunde, hirre ga baye kunɛye ninggɛ.”#7.27 Zuga Ayhudhi gena hunde Lɔga Tumu dha bere sennɛ Kirisos ale hudhukkinya Betelemɔye gaɛyɔ. Yɔk gena sennɛ Kirisos ale dhullana dari na chɔɔ bhee hudhukkinyanɛye zugo imaggɛyɔ.
28Na Yesus hunaa ngani madhdha zugo doraa Tumu barara tu kɛngɔye, koo yogo lɔgɔ goore na seu, “Anye hunde kani hir inong na bere kichillan oriye, igge gaoyɔ. Nɔng anye sabbaa nanu bhichang ngani kèseayo na kùgoo. Hira bere ekkononyi anye ihe. Nɔng anna ku dhere na igge imaggoyɔ. 29Anye nɔng kaggayɔ, ke ngaya kɛlɛo kari na ekkonɛany na kugunɛye.”
30Na nɔng bere senno kibhigi :zugu.#7.30 Yɔk zugo dha bere se kibhigi ke ngaya wa senɛ anna ɛlla ko Tumu kari na kunno bhɛa nɛnɛye. Na hirre dhɔnɛ idhdhar nɔng garu ke ngaya kolea nɛnɛ sennanɛa :Tumu dha bere ngani keteyɛoye. 31Na bhɛa zuga ɛlla ngonu, ga bo mɛra yɛbhɛ nɔng na se, “Hunde Kirisos#7.31 “Kirisos” a bhɛa kènɛa “Hira Bɛrrana :Tumu ku Komoruya Ibbayseo Zugo.” ale kunde, anda lɔga bo barara jorronɛa ngalɔkta me :ngahirraye, messɔ? Ngamesso.”
32Na zuga kɔbhbhɛa damiya Bhɛrɛsi hunaa shikkɛa zugo hunde mɛzzɛɛ lɔga Yesusi hɛhɛyɔye, koo ago na mɛzzi ko gɔldangɛa bibiyo doraa Tumu barara na ayɛ zuga bhɛkkɛa doraa Tumu barara lɔgɔ na kibhigi Yesus.
33Na nɔng Yesus sɛɛsɛ zugo, “Anye ale kɛllana ko igge kari bhe chinyi na kɔgɔ bhɛa Tumu, hira bere ekkononyi. 34Na igge ale lameonyuyɔ na nɔng bhee jɔanɛanyu ninggɛ. Na chɔɔ gɔrre kihɛ :anyoye, bhee honyɛo ninggɛ.”
35Na yɔk gulsachina Ayhudhi koo mɛzzi kɛngɔ na se, “Na mɛa dha ngahirra gɔrre se kɔgɛ na agge ngakɔjɔanɛye a ore? Dha se kok oriya bere bhasanyɛsɛnɛa :zuga ga bhakkɛa ko zuga Giriki kari na kamadh zuga Giriki ka? 36Na ngaya senɛ, ‘Igge ale lameonyuyɔ na nɔng bhee jɔanɛanyu ninggɛ. Na chɔɔ gɔrre kihɛ :anyoye, bhee honyɛo ninggɛye,’ dha a bhɛa senno keseɛ ɛnɛng?”
37Na kala dheshinyanɛa :gibiriyɔ na zugo duriyɛa goore, Yesus koo chilu doraa Tumu barara tu kɛngɔ na yogo lɔgɔ goore na seu, “Hunde lɔ inde dhak :hunyde, sɛɛ kugo bhɛa nanu na kirrɛ. 38Inde yɛbhbhany anyeye, maa basseyny dhudhuttanɛ kɛnga nɛnɛ toye huna kidhona taannɛa, damiya bere senɛa :Dadaba Lɔga Tumu.” 39Nɔng Yesus dha bere hunde se ngangaye, dhugunɛsɛn zugo lɔga Kuloya Tumu, ale kàjjɛa zuga yɛbhbhɛa nɔng. Na dha bere ngakoleonu Tumu Kuloya nɛnɛ zugo ngani kaynɛo, ke ngaya kolea Tumu ajjɛa Yesus diram ngani keteyɛoye.
40Na zugo hunaa shikkɛa ngalɔktaye, gena se, “Ngahirra dhaa a Hira Yogɛsɛna Zugo Lɔga Dhugunono :Tumu bere kènno ale kuni chi!”
41Na yɔk gen se, “Nganda a Kirisos#7.41 “Kirisos” a bhɛa kènɛa “Hira Bɛrrana :Tumu ku Komoruya Ibbayseo Zugo.” rɛ.”
Na gen se, “Ay! Anda Kirisos Gelilagiye hudhukkinya ɛnɛng? 42Dadaba Lɔga Tumu ngayo nganda se Kirisos ale hudhukkinya bhɛa ashaa Dawiy ɔra bere bhakka :Dawiy Betelemɔye dha?” 43Na lɔgɔ banda bhɛa ngalɔkta Yesusiye, na zugo kendɛ kɛngɔ. 44Na gen bere senno kibhigitɔ. Na nɔng hirre idhdhari garu.
Lɔga Gulsachina Ayhudhi Yesus Ngayɛbhɛayo
45Na zuga bhɛkkɛa doraa Tumu barara waga na ago bhɛa ɛlɛa gɔldangɛa bibiyo doraa Tumu barara ko zuga kɔbhbhɛa damiya Bhɛrɛsi. Na kìghini na kèseyɛsɛ, “Na hiri wa ngani ngahonyɛoyoye, tɔlɔ ɔng?”
46Na yɔk zuga bhɛginɛna seyɛsɛ, “Agge hirre yokkono lɔgɔ hunde ngahirraye, bere sabbɔ ngani kìshiktoyo.”
47Na yɔk zuga kɔbhbhɛa damiya Bhɛrɛsi seyɛsɛ, “Yee! Wa itabhung chɔɔ igge sɛgɛn? 48Nɔng agge bhɛa nayo gulsachinuny ko bhɛa zuga gayo kɔbhbhɛa damiya Bhɛrɛsi, inde yɛbh nɔng chɔɔ dhɔnɛ ninggɛ! 49Yɔk ngazukta bu mɛr imaggɛ Damiya Tumuye, a chɔrnɛ.”
50Na hira nɛ bere kɔa na mɛzziyɛa ko Yesus kèe Nikodhimos sɛɛsɛ yɔk, 51“Agge damiya na, hira kìchilɛa hunde lɔga gɛnyɛ hologun ngani kùdhugundɛsɛo na kìshigitoye, nganga hung ngakùjjukkanao.”
52Na yɔk yaktɛsɛ na seyɛsɛ, “Ngangaye, inye ngaaniyo hira Gelila rɛ dha? Ga marak Lɔga Tumu shɛɛ na ko inye tak hunde Hira Yogɛsɛna Zugo Lɔga Dhugunono :Tumu Gelilagiye ale ngahudhukkinyaoye.” 53Na koo banda na bhassayɛ na ago doriyoa gɛ.#7.53 Ngalɔkta ɛl 7:53ɔ ko bhee anɛ 8:11ye dadabinyaa Lɔga Tumu tuga Giriki gena lɔkte sennɛ nganga ninggɛ.
Àwon tá yàn lọ́wọ́lọ́wọ́ báyìí:
Yohanis 7: SUQ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©2023 Suri Translation Project which is a project of the Ethiopian Evangelical Church Mekane Yesus
Yohanis 7
7
Lɔga Kɔyɛa :Yesusi Gibiriya Dhagɛa :Zugu Gahachina
1Na hunaa Yesus mɛzziya ko zugo na tewa ushaye, nɔng tɔu baa Gelila ngonu sɔng na bhokkonnɔ ngani ngakɔyo. Na bhɛa senno kɔtɔyɛ baa Yudha ngani ngahinno ke ngaya hinɛsɛnɛ :gulsachina Ayhudhi rɛsɛye. 2Na gibiriya zuga Ayhudhi kèe “Gibiriya Gahachinuny”#7.2 Ngagibirita kèe “Gibiriya Gahachinunyde,” anna ammɛa :zugu kolea suneonɛa woyn kawarɛ ko girari kawarɛ na zugo kɔdhdhɛ gahachina na kagatay lɔga bere kokonginyaa gɛ hunde bere bhakkɛ gahachina korugiyeye. hunaa tewa jaye, 3Yesus seyɛsɛ :gɔynggɛu, “Ga bana na ok baa Yudha na zuga kɔbhbhinyɛa kargi ngalɔkta bu dhandal mesiye. 4Hirre se kete hira toynɛnaye, lɔgɔ dari ngamesso. Na mɛa inye hunde mesi ngalɔkta bu dhandalde, maya dhɔlɛsɛn zuga bhakkɛa ba kumulɔng.” 5Yɔk bhee dha bere senɛ ngangaye, a ngaya chɔɔ gochonginyaa gɛnyɛ nɔng ngani kɛyɛbhtɛoye.
6Na Yesus sɛɛsɛ yɔk, “Kolea ale kɔgɔyɛi :anyo mɛa ngayo. Na nɔng igge kolee hinnonɛoye hɛo hung. 7Yɔk zuga bhakkɛa ba bhee marrɛungɛ igge ninggɛ. Nɔng anye marranyɛ ke ngaya kudhugunɛsɛn lɔga messɛa :yɔkku ku kuhuyamoye. 8Na igge mɛa banda ago gibiriyɔ. Anye mɛa ngagibiritonu ngakɔgɔyo ke ngaya kolea kɔgɔyɛi :anyo mɛa ngaanɛoye.” 9Na hunaa yogɛsɛa gɔynggɛ ngalɔkta na tewa ushaye, nɔng dhɔyɛ baa Gelila.
10Na hunaa gɔynggɛ hɛa gibiriyɔye, nɔng koo dhulu dari na ogu ngonu. 11Na yɔk gulsachina Ayhudhi ɛlla gibiriyɔ bere lamiyɛa nɔng, ga bo ghinnɛna na sennɛa, “Na ngahirronu dha i ori?”
12Na bhɛa zuga ɛlla ngonu, gena bere mɛzziyɛa lɔga gɛnyɛ hɛhɛyɔ na sennɛa, “Ngahirra a hira challa!” Na gena sennɛa, “Ay, a gɛrsi! Nɔng itabh zugo.” 13Na chɔɔ ko hunde kete nganga, hirre bere dhugunnono lɔga gɛnyɛ bhɛa sɛrɔ ɔdhdha bere ningginɛna dhul, ke ngaya ɛngɛrsɛ gulsachina Ayhudhiye.
Lɔga Madhinɛnɛa :Yesusi Gibiriyɔ
14Na Yesus hunaa saniwa Yerusalemɔ ungo wush na tewa ushaye,#7.14 Gibiriya Gahachinuny a gibiriya ammɛa :zugu ungo issey. koo ogu doraa Tumu barara tu kɛngɔ na madhu zugo. 15Na yɔk zuga Ayhudhi iwachi na se, “Na ngahirra lɔga Tumu ngani kɛdhɛmisiyoye, lɔgɔ goore ga ɛnɛng?”
16Na dhugunɛsɛ :Yesusi na sɛɛsɛ, “Anye ngalɔkta kamadhdhagungge ga sabbaa nanu ngayo. Agga ajjanyi :Tumu, hira bere ekkononyi. 17Na hunde lɔ hirre se keme lɔga hinno :Tumu na kurrugɛsɛye, ale gayɔ hunde ngalɔkta kamadhɛsɛn zugoye agga bere ajjanyi :Tumu oo hunde agga sabbaa nanuye. 18Nɔng inde yokkono lɔga sabbaa nɛnɛye, lami bhɛa senno kɔdhɔnggɛ :zugu na kayɛ diram. Na nɔng inde hin bhɛa senno zugo kɔdhɔnggɛ hira bere ekkonoye, a hirre mɛzzi lɔga ku dhereye. Na chɔɔ bhɛa nɛnɛ butomo ninggɛ dhul. 19Nɔng Muse annaa bere aungɔ Damiya Tumu. Na chɔɔ bhɛa nu hirre bhɛk ngadamitonu ninggɛ dhul. Na mɛa igge hinnogonyu rɛsɛ kɛ ɔng?”
20Na seyɛsɛ :zugu, “Ngahirra tɔkkaginyde, ngangaye, inde hinnoginy rɛsɛye a nɛng?”
21Na nɔng Yesus sɛɛsɛ, “Anye Kala Ayawsuny annaa bɔɔ kemesi lɔga bo dhandala barara inde ku dhɔnɛ na a nganda iwachinɛno gooreye. 22Nɔng igge anno ngagiya kedhdho erroa gu rɛhiya maya Kala Ayawsuny ke ngaya anɛ damiya bere ajɛungu :Museye. (Nɔng ngadamitonu anna bere ajjungɛa :kokonginyaa gu sabbɔ. Muse ngani kaungo.) 23Na hunde igge anno ngagiya kedhdho erro rɛhiya maya Kala Ayawsuny na bhɛkko damiya bere Muse shɛɛ na ngaɛddɛoyoye,#7.23 Ngalɔkta ɛlɛhɛnnɛ lɔga Zuga Ayhudhi bhɛgɛa damiya Muse na kedhdhɛa erroa gɛ rɛhiya maya hunde hudhukkinya na unga gɛ ku issey a Kala Ayawsunyde. na anye hunde kibbaysi hiri rɛ kumulɔng Kala Ayawsunyde, igge marro kɛ ɔng? 24Mɛa lɔgɔ maraga shɛɛ na kedhdhigi dib. Zugo mumi ngagunynyo na kedhdho lɔgɔ ke bhaseni.”
Lɔga Yesus Anɛa Hira Bere Bɛrrana :Tumu Ku Kirisos Dhere
25Na yɔk zuga Yerusalemi gen se, “Nganda ngayo hira bɔɔ senno kɔgɔdhɔ :gulsachina Ayhudhi rɛ dha? 26Nɔng mɛa a nganda yokkono lɔgɔ bhɛa sɛrɔ ɔdhdha na chɔɔ ngazuktonu nɔng hun kona ngani keseyɛsɛoye. Na gulsachina hunde a ngagiya gunynyɛ dhɛɛye, yɔk dha sennɛ a Kirisos dhere ka?#7.26 “Kirisos” a bhɛa kènɛa “Hira Bɛrrana :Tumu ku Komoruya Ibbayseo Zugo.” 27Nɔng ngahirra hunde a hira ba inongge, agge kàggayɔ. Nɔng Kirisos hunde ale kunde, hirre ga baye kunɛye ninggɛ.”#7.27 Zuga Ayhudhi gena hunde Lɔga Tumu dha bere sennɛ Kirisos ale hudhukkinya Betelemɔye gaɛyɔ. Yɔk gena sennɛ Kirisos ale dhullana dari na chɔɔ bhee hudhukkinyanɛye zugo imaggɛyɔ.
28Na Yesus hunaa ngani madhdha zugo doraa Tumu barara tu kɛngɔye, koo yogo lɔgɔ goore na seu, “Anye hunde kani hir inong na bere kichillan oriye, igge gaoyɔ. Nɔng anye sabbaa nanu bhichang ngani kèseayo na kùgoo. Hira bere ekkononyi anye ihe. Nɔng anna ku dhere na igge imaggoyɔ. 29Anye nɔng kaggayɔ, ke ngaya kɛlɛo kari na ekkonɛany na kugunɛye.”
30Na nɔng bere senno kibhigi :zugu.#7.30 Yɔk zugo dha bere se kibhigi ke ngaya wa senɛ anna ɛlla ko Tumu kari na kunno bhɛa nɛnɛye. Na hirre dhɔnɛ idhdhar nɔng garu ke ngaya kolea nɛnɛ sennanɛa :Tumu dha bere ngani keteyɛoye. 31Na bhɛa zuga ɛlla ngonu, ga bo mɛra yɛbhɛ nɔng na se, “Hunde Kirisos#7.31 “Kirisos” a bhɛa kènɛa “Hira Bɛrrana :Tumu ku Komoruya Ibbayseo Zugo.” ale kunde, anda lɔga bo barara jorronɛa ngalɔkta me :ngahirraye, messɔ? Ngamesso.”
32Na zuga kɔbhbhɛa damiya Bhɛrɛsi hunaa shikkɛa zugo hunde mɛzzɛɛ lɔga Yesusi hɛhɛyɔye, koo ago na mɛzzi ko gɔldangɛa bibiyo doraa Tumu barara na ayɛ zuga bhɛkkɛa doraa Tumu barara lɔgɔ na kibhigi Yesus.
33Na nɔng Yesus sɛɛsɛ zugo, “Anye ale kɛllana ko igge kari bhe chinyi na kɔgɔ bhɛa Tumu, hira bere ekkononyi. 34Na igge ale lameonyuyɔ na nɔng bhee jɔanɛanyu ninggɛ. Na chɔɔ gɔrre kihɛ :anyoye, bhee honyɛo ninggɛ.”
35Na yɔk gulsachina Ayhudhi koo mɛzzi kɛngɔ na se, “Na mɛa dha ngahirra gɔrre se kɔgɛ na agge ngakɔjɔanɛye a ore? Dha se kok oriya bere bhasanyɛsɛnɛa :zuga ga bhakkɛa ko zuga Giriki kari na kamadh zuga Giriki ka? 36Na ngaya senɛ, ‘Igge ale lameonyuyɔ na nɔng bhee jɔanɛanyu ninggɛ. Na chɔɔ gɔrre kihɛ :anyoye, bhee honyɛo ninggɛye,’ dha a bhɛa senno keseɛ ɛnɛng?”
37Na kala dheshinyanɛa :gibiriyɔ na zugo duriyɛa goore, Yesus koo chilu doraa Tumu barara tu kɛngɔ na yogo lɔgɔ goore na seu, “Hunde lɔ inde dhak :hunyde, sɛɛ kugo bhɛa nanu na kirrɛ. 38Inde yɛbhbhany anyeye, maa basseyny dhudhuttanɛ kɛnga nɛnɛ toye huna kidhona taannɛa, damiya bere senɛa :Dadaba Lɔga Tumu.” 39Nɔng Yesus dha bere hunde se ngangaye, dhugunɛsɛn zugo lɔga Kuloya Tumu, ale kàjjɛa zuga yɛbhbhɛa nɔng. Na dha bere ngakoleonu Tumu Kuloya nɛnɛ zugo ngani kaynɛo, ke ngaya kolea Tumu ajjɛa Yesus diram ngani keteyɛoye.
40Na zugo hunaa shikkɛa ngalɔktaye, gena se, “Ngahirra dhaa a Hira Yogɛsɛna Zugo Lɔga Dhugunono :Tumu bere kènno ale kuni chi!”
41Na yɔk gen se, “Nganda a Kirisos#7.41 “Kirisos” a bhɛa kènɛa “Hira Bɛrrana :Tumu ku Komoruya Ibbayseo Zugo.” rɛ.”
Na gen se, “Ay! Anda Kirisos Gelilagiye hudhukkinya ɛnɛng? 42Dadaba Lɔga Tumu ngayo nganda se Kirisos ale hudhukkinya bhɛa ashaa Dawiy ɔra bere bhakka :Dawiy Betelemɔye dha?” 43Na lɔgɔ banda bhɛa ngalɔkta Yesusiye, na zugo kendɛ kɛngɔ. 44Na gen bere senno kibhigitɔ. Na nɔng hirre idhdhari garu.
Lɔga Gulsachina Ayhudhi Yesus Ngayɛbhɛayo
45Na zuga bhɛkkɛa doraa Tumu barara waga na ago bhɛa ɛlɛa gɔldangɛa bibiyo doraa Tumu barara ko zuga kɔbhbhɛa damiya Bhɛrɛsi. Na kìghini na kèseyɛsɛ, “Na hiri wa ngani ngahonyɛoyoye, tɔlɔ ɔng?”
46Na yɔk zuga bhɛginɛna seyɛsɛ, “Agge hirre yokkono lɔgɔ hunde ngahirraye, bere sabbɔ ngani kìshiktoyo.”
47Na yɔk zuga kɔbhbhɛa damiya Bhɛrɛsi seyɛsɛ, “Yee! Wa itabhung chɔɔ igge sɛgɛn? 48Nɔng agge bhɛa nayo gulsachinuny ko bhɛa zuga gayo kɔbhbhɛa damiya Bhɛrɛsi, inde yɛbh nɔng chɔɔ dhɔnɛ ninggɛ! 49Yɔk ngazukta bu mɛr imaggɛ Damiya Tumuye, a chɔrnɛ.”
50Na hira nɛ bere kɔa na mɛzziyɛa ko Yesus kèe Nikodhimos sɛɛsɛ yɔk, 51“Agge damiya na, hira kìchilɛa hunde lɔga gɛnyɛ hologun ngani kùdhugundɛsɛo na kìshigitoye, nganga hung ngakùjjukkanao.”
52Na yɔk yaktɛsɛ na seyɛsɛ, “Ngangaye, inye ngaaniyo hira Gelila rɛ dha? Ga marak Lɔga Tumu shɛɛ na ko inye tak hunde Hira Yogɛsɛna Zugo Lɔga Dhugunono :Tumu Gelilagiye ale ngahudhukkinyaoye.” 53Na koo banda na bhassayɛ na ago doriyoa gɛ.#7.53 Ngalɔkta ɛl 7:53ɔ ko bhee anɛ 8:11ye dadabinyaa Lɔga Tumu tuga Giriki gena lɔkte sennɛ nganga ninggɛ.
Àwon tá yàn lọ́wọ́lọ́wọ́ báyìí:
:
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©2023 Suri Translation Project which is a project of the Ethiopian Evangelical Church Mekane Yesus