Ap'u 2
2
Pitvet a Iten
1Inap'i lera Atua ien nadep' m'a p'knaran m'a si udlani iter a nln, kahiris ani. 2#Avruh 20:11.#Isrel 4:4,10.Laha, arna saru na napn, Atua ihiris a parian udlani iani karnrn hin arna saru na napn arna parei udlani la iten sarei ha. 3Kamhmah a saru na napn kani ti iv'i napnet, sena ti arna napn lera irnrn Hin arna parei udlani la Atua iten sarei ha.
Dui ilak al pitvet nahan iv'i Iten
4Si lera iv'i pla p'knaran m'a nadep', naran Atua ianr, arna napn Atua ien nadep' m'a p'knaran. 5Naran lera nava sei idahei uam arna nadep', nina idahsi uam arna nadep', sena ti a Mlin Atua idatep'a nu a ti ipau arna nadep', m'ertu ipahl nadep' idahei uam. 6V'eti niu ima eia dan dan al nadep' kani ti nadep' udlani im'am'ln.
7 #
1 Kurin 15:45. Laha, a Mlin Atua ien dui a neiev' na nadep', kaiv lkn kani im'im'in. Laha, dui nen isilv'.
Sei arani al pitvet nakl
8A Mlin Atua ilu pitvet arna Is na nut a Iten katu dui la iani hara a nln. 9#Rev 2:7; 22:2,14.A Mlin Atua iani ti nai udlani la ala ti ip'as ha, isi dan al nadep', navan ip'as a tim'ah. Katu nai na silv'ien iter a p't nut na pitvet, m'a nai na ti m'ertu iparndu si p'as m'a si stu.
10Nauei iamk irarev' dan a Iten a ti pitvet ipalev' nauei, irarev' kairirpri arna nut iv'a. 11Naha nki iamk iv'i a Pisun. Ki lera iv'i nki irarev' kamldan nut a Havila udlani, iv'i nut kul iter. 12Kul arna v'anu lera ip'as. Nai p'as iamk iak, uin m'in ip'as istudau, nahan iv'i ptelium. Nav'et p'as iamk iak atlera, nahan iv'i uniks. 13Naha tv'el nauei iv'i Kihun. Ki lera iv'i nki irarev' kamldan nut a Kus udlani. 14Naha nitla nauei iv'i Taikris. Ki lera iv'i nki irarev' kadav'a arna Is na nut Asiria. Naha niv'a nauei iv'i Iuvretis.
15A Mlin Atua ilev' dui lahara kataui al pitvet a Iten a ti ipam'akar kap'auri. 16Laha, a Mlin Atua itu v'nen hua a dui lera kavr ti a, “Nava nai udlani al pitvet pud vn ani. 17V'eti nava nai na ti m'ertu iparndu si p'as m'a si stu mkaudi, sena ti ipavr ti pud nava nai lera, arna napn nen lera mkam'a pr.”
18A Mlin Atua ivr ti a, “Iap'as a ti dui ipamamk. P'en m'ertu ml ipasr lm'an kaviviln ani.” 19Laha, a Mlin Atua ilev' nadep' kan si dm udlani ilak arna nadep', m'a m'anh udlani itetv eia, kauirma asn Atam a ti iparndu nahar la Atam ipatau anr ha. Naha si dm udlani iv'i nki Atam itau anr uaki. 20Atam itu naha si slm udlani, m'a m'anh itetv eia, m'a si dm udlani ilak arna nadep', v'eti akapasla m'ertu ipasr lm'an kaviviln ani.
21Sarei, a Mlin Atua iani ti Atam im'atr vnapn. Laha, ilev'la su ninakln iamk kauakar m'lnen ml arna p'akn. 22Laha, su ninakln lahara, la a Mlin Atua itlev'la sarei asn dui, iani ima kav'i tav'et, kav'av'ei kauirv'a asn dui.
23Laha, Atam ivr ti a, “M'ertu laha iv'i suk dau kav'i p'akk dau. Apatu nahan ipav'i Tav'et sena ti iaan asn Dui.” 24#Mat 19:5; Mak 10:7,8; 1 Kurin 6:16; Evases 5:31.Sena si lera dui ipaln a tetian m'ei a unian karp'lt m'ei a naun, karma karamk arna p'akr.
25Dui m'ei a naun arru karmalmal, v'eti aharmamih.
Àwon tá yàn lọ́wọ́lọ́wọ́ báyìí:
Ap'u 2: nmb
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2023 Presbyterian Reformed Church of Australia