Matayo 3
3
Emyasi era Yowani Mubatisayi éndee ákangirisa ebandu
(Mar 1:1-8; Luk 3:1-18; Yow 1:19-28)
1Mwe'si suku, Yowani Mubatisayi áulukiraa mwa buyeye* bwe'Yuteya áhubanganyisa ebandu mbu: 2«Mubíndukaa muténge mwa bibi byenyu! Bushi eBwami bo'kwa nguba* bùli ofu.» 3Oyu Yowani i'no'yu i'murebi* Isaya áhambalaa'ko mbu:
«Emundu ola ulí mwa buyeye* énjire áteta na murenge munene mbu:
‹Mukunganyisaa Enawetu enjira!
Mulámbaatanyaa ala angárenga!›»#3:3 Somaa Isaya 40:3.
4Yowani, enjimba sai sábaa sikúnganyisibwe mu boya bwa nyama nguma mbu i'ngamiya,#3:4 Enjimba sa Yowani Mubatisayi éndee embala, sábaa siri nge'sa sa Eliya. Somaa Bami ba kabiri 1:8. kanji éndee áchimina mukaba wa luu mwa mbinji. Ebiryo byai, byábaa emiuku ne'buki. 5Ebandu béndee bámuikiranga kutengera eYerusalemu, no'mwa chio choshi che'Yuteya, no'kwa nyinda soshi se'lwishi lwe'Yorotani. 6Abu bandu bábaa bénjire báchiaya changanama kwa bibi byabo. Yowani nai, era kunde ábabatisa mwo'lu lwishi.
7Si mango Yowani álolaa kwa Bafarisayo* ne'Basandukayo* bénjire bámuikiranga banene, chasiya abábatise, era kunde ábabura mbu: «Mwabo mùli nga buko bwa njoka!#3:7 Buko bwa njoka: Yowani áburaa abu bandu bacha, bushi eBayuta nabo bábaa banêshi kwa enjoka itula ìkaliire, kanji itúsa na bukalange. Rero, nde iwàbalosise enjira ye'kufufumuka ebuchinjibusi bwa Ongo bwa bwěshire? 8Bushi no'ku, mundaa mwálosa kurengera emyanya yenyu kwa mwàbindukire kutenga mwa bibi byenyu! 9Kanji muténdaa mwáchitonga mbu: ‹Tubano, Aburahamu ihokulu wetu!› Rero, nábabura kwa Ongo àngaala kukulira Aburahamu ebana na mwa'mano makoi! 10Ekakuma kàbikirwe mira kwa kukondera emichi kwanabisina! Rero, chira muchi woshi ola ùteka bifuma bibuya, angákonjibwa, na kuumwa mwa muliro.
11«Nyono nénjire nábabatisa mwa meshi, kwa kulosa kwa mwàbindukire kutenga mwa bibi byenyu. Si era nyuma sanyi, kuchiri kungáika unji mundu ola unyírenzise ebuashi. Oyu mundu, chiro ndéte kwa nyìri kwa kùngatuma námukongola ebiryato. Yeke i'ungábabatisa kwa Muchima Mubuya-buya, no'kwa muliro. 12Rero, era ète elweri mwa mino sai, kwa kwélula ebichi mwa bulo. Obu bulo, angálunda'bo mwa nguli yai. Si ebichi byeke, angáuma'bi mwa muliro. Oyu muliro, atákasime chiro na hicha.»
Ekubatisibwa kwa Yesu
(Mar 1:9-11; Luk 3:21-22)
13Mwa'mu mango, Yesu era kutenga mwa chio che'Kalilaya. Era kuikira Yowani kwa lwishi lwe'Yorotani chasiya àmubatise. 14Si Yowani era kuereka kunana mbu: «Chacha! eWaliya, si nyono nyi nyěmire kubatisibwa nao! Rero, kute ku u'wérire wányiikira?» 15Yesu nai mbu: «Rékaa bíbe bacha tanga, bushi bitwěmire tuíre byoshi bya bìtungenene era muhondo sa Ongo.» Yowani era kwire êmerera.
16Mango Yesu ábaa era àbatisibwaa, era kutenga mwa meshi. Unao-unao, enguba kuna kubookala. Era kulola kwa Muchima wa Ongo ândaala nga chiruka, na chámuumbirira'ko. 17Kanji kwa nguba kwera kutengera murenge ola wábaa wáteta mbu: «Onola, i'Muala wanyi musiirwa, utúla unyísimise.»
Àwon tá yàn lọ́wọ́lọ́wọ́ báyìí:
Matayo 3: tbt
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2017 Wycliffe Bible Translators, Inc.