Luca 1
1
1-4Teofilu, asawi di. Ãhã na wa za aima rob'ui'éré, Wanhib'apito Zezu Cristuhu wasu'u na, sena na waihu'u da. Ni'wam norĩ hã ma tô Zezusihi wasu'u na te te 're dapo're pu'u na'rata za'ra, titõmo na te te ãma 're i'madâ'â za'ra mono norĩ hã. Ta norĩ hã ma tô iwasu'u na'rata hawi wama rowasu'u za'ra. Tawamhã isimirowasu'u zarina, ma tô iwasu'u na ãma rob'ui'éré za'ra ni, da'ahâ na. Tahawa, wa hã wa duré ĩsima wẽ, te ãma aima rob'ui'éré da. Iwasu'u na'rata hawi, wa tô rosa'rata pese, te waihu'u pese da. Ni'wam norĩ hã ma tô iwasu'u hã aima wasu'u za'ra. Tahawa, wa tô ĩsima wẽ, upsãtã pese na te aima rowasu'u da, rob'ui'éré na, Zezusihi wasu'u hã sena na waihu'u da.
Zuwã Batistaha potozé wasu'u
5Erodi hã zudeu norĩ nhipti'ai 're, apito na 're hâimana mono ré hã, aibâ hã te 're hâimana, Zacaria na isisi hã. Zacaria hã sasedoti, 'Re ihâimana u'âsi mono ma da'ãma romhuri'wa. Abiasihi nhihudu norĩ me, te te tãma 're romhuri za'ra. Imro nhisi hã, Izabé na. Izabéhé hi'rada hã, Arã na isisi hã. 'Re ihâimana u'âsi mono ma, da'ãma romhuri'wa, Arã hã. 6Zacaria norĩ hã ma tô 're hâimana wẽ zahuré. 'Re ihâimana u'âsi mono nhimiroti te te 're 'madâ'â pese zahuré. Tahawa, tãma wẽ zahuré di, 'Re ihâimana u'âsi mono ma. 7Tane nherẽ, 'ra zahuré õ di. Izabé hã 'ra waihu'u õ wa, ma tô 'ra ãna si'ihi zahuré.
8Tawamhã nimahã bâtâ na ma tô Zacaria hã tinhimiromhuri hã 'manha, sasedoti te te 're i'manharĩ za'ra mono hã, 'Re ihâimana u'âsi mono nhorõwa 'ri 'remhã. Taha te hã bâtâ wa, ma tô romhuri 'manha. 9Isiré norĩ hã ma tô tãma pisutu za'ra, 'ri para u sébré da, te te tãma romhuri da. Tahawa, 'ri para u, ma tô oto ãzé Zacaria hã, wedewati isadaze hã wedeza ne na te te tãma zata da. 10-11Tawamhã te te tãma zata ré, te ai'ubumro ni rowi, 'Re ihâimana u'âsi mono ma, damreme zusi da. Ãne ré, hâiwa hawimhã uburé Danhib'apito ma romhuri'wa hã ma tô tãma sihâi'ré. Wedeza nhimire niwĩ te za, isõ're uwaibaba, ro'o ré, wedewati isadaze hã. 12Tawamhã te te sãmri wamhã, ma tãma pẽ'ẽwara, Zacaria hã. Te te rosa'rata waihu'u õ di. 13Tawamhã te tãma tinha, ãne:
— Zacaria, aipahi tõ. 'Re ihâimana u'âsi mono, ma tô aimreme hã wapa, tiwi irowaptẽrẽzém na hã. Aimro te za oto ti'ra. Tawamhã ai'ra aima waptã'ã wamhã, te za isisi, Zuwã na. 14Tawamhã duré iwaptã'ãzé hã te za rowẽ aima sina waze. Te za duré uburé isabâdâ 're dato za'ra. 15-16Prédu wapsi, isimiroti hã pire di za. Tahawa, te za isimiroti pire na waihu'u, 'Re ihâimana u'âsi mono hã. Uwa 'rãi wa'u isé hã te te 're hâsi mono õ di za, duré âzé hã. Waptã'ã hawim haré, te za 'Re ihâimana u'âsi mono pẽ'ẽzani ré 're mo. Taha si, te za te te 're wapari pese. Tahawa, te za tisiré Izaraéu nhihudu norĩ hã te te 're apawapto tinhimiroti na, 'Re ihâimana u'âsi mono nhimiroti si, da te 're 'madâ'â pese za'ra mono da oto. 17'Re ihâimana u'âsi mono zadawa 'mahârâ'wa, te za 're mo. Wahi'rada Eliasihi ne, te za 're mo, mreme pire na, duré waihu'u pese na. Tawamhã ai'ra nhimiroti zarina, te za damama norĩ ti'ra norĩ hã te te 're sawi pese za'ra. Duré danhimipari ãna 're idanomro mono hawimhã, te za 're dasipizari za'ra, 're idanomro wẽ mono zarina, oto 're danomro mono da. Ãne wamhã, te za danhimiza'rese sô 're danhimipari za'ra, Danhib'apito zô.
18Tawamhã Zacaria asa ma tô sadanha, romhuri'wa hã, ãne:
— E niha wa za asaze, tane na hã. Wa hã ĩhi uptabi oto. Duré ĩmro zama, ihi uptabi.
19Tawamhã te duré asa tãma tinha, ãne:
— Wa hã Gabriéu, 'Re ihâimana u'âsi mono ma romhuri'wa. Ta hã ma tô we ĩzatõ, rowasu'uwẽ hã te aima wasu'u da. 20Tazahã, ĩnhimirowasu'u na ĩzazei õ di, sena na. Tahawa, te za aima rob'manha 'Re ihâimana u'âsi mono hã, aimreme õ na, ai'ra hã iwaptã'ãzéb u. Ai'ra waptã'ã wapsi, te za apâ aima tisõ, aimreme hã.
21Zahadu te rowi sô mapari za'ra ni, Zacariaha zô. Sô danhimipari za'ra wamhã, ma ãma tatob'uzu za'ra ni, sô irowaptâ'âzém na hã, 'ri para. 22Tawamhã Zacaria hã ma tô oto datẽme watobro, rob u. Watobro wamhã, mreme waihu'u õ di. Tahawa, te dasima nharĩ za'ra ni, ãne:
— Marĩ hã ma tô sõ'awi sabu Zacaria hã, sõtõ 'rowim ne.
Tawamhã mreme waihu'u õ wa, ma tô tinhiptõmo na si dama rowasu'u.
23Tawamhã Zacaria, te te romhuri pari, te apâ mo, 'Re ihâimana u'âsi mono nhorõwa 'ri hawi, tinhorõwa u. 24Suru na ãma ronomro wi, ma tô tiwasã, Izabé hã. Tawamhã a'amo imrotõ na ãma isi'utõrĩzém na hã watobro õ di, tinhorõwa hawimhã.
25Tawamhã te sima tinha, ãne:
— Ãhã na ma tô Wanhib'apito hã ĩpawapto. Da te oto ĩma 're nharĩ za'ra mono õ di za, ĩ'ra õ na hã.
Zezusi za iwaptã'ãzém na, Gabriéu te te iwaihu'uzé wasu'u, Mariaha ma
26-27Tawamhã a'amo imropâ hã Izabéhé ãma oto si'utõrĩ wamhã, iwasã na hã, 'Re ihâimana u'âsi mono ma we duré satõ ti'ai u, Gabriéu hã, hâiwa ãma tãma iromhuri'wa hã. Nazaré u, ma we satõ, pi'õi ubuni ma, te te duré sadawa wasu'u da. Galiléa ãma, Nazaré hã. Pi'õ nhisi hã, Maria na isisi hã. Ta hã, azarudu. Niwapsi, Zuzéhé me te za sina timro zahuré, apito Dawihi nhihudu me. 28Tawamhã ma tô we itẽme wi, Mariaha u, hâiwa ãma romhuri'wa hã. Itẽme wisi wamhã, te tãma tinha, ãne:
— Maria, rowẽ na 're aihâimana mono. 'Re ihâimana u'âsi mono, ma tô aiwẽsã, Wanhib'apito hã. Tahawa, te za aima tinhopru, iwẽ uptabi na.
29Tane nherẽ, Maria hã te te waihu'u õ di, isimirowasu'u hã. Tahawa, te tipẽ'ẽ na hã, sima tinha, ãne:
— E niha bâ, te õne ĩma tinha. 30Tawamhã te duré tãma tinha, hâiwa ãma romhuri'wa hã:
— Maria, aipahi tõ. 'Re aimorĩ wẽ na, ma tô 'Re ihâimana u'âsi mono hã aiwẽsã. 31Tahawa, te za aiwasã. Ai'ra te za aibâ na aima podo. Ai'ra hã poto wapsi, Zezusi na te za isisi. 32Ai'ra hã prédu wapsi, te za dama pire na hã 're mo. 'Re ihâimana u'âsi mono 'ra na isisi hã za, danhipai u ipire uptabi 'ra na. Ta hã uburé Danhib'apito uptabi hã te za ti'ra ma pisutu, tihi'rata ne, si'apito da, Dawihi ne. 33Danhib'apito 're morĩ wa, te za Zacoho nhihudu sidâpâsi, Isib'apito na hã tãma 're hâimana u'âsi za'ra, õne u'â. Te za ãma 're sib'a'uwẽ u'âsi za'ra.
34Tawamhã asa te tãma tinha, Maria hã, ãne:
— E niha wa za ĩ'ra, aibâ te sa'rese õ nherẽ.
35Tawamhã asa te duré tãma tinha, ãne:
— 'Re ihâimana u'âsi mono, te za we aipawapto, tiwaihu'u pese na aiwasã da, ai'ra da. Taha da, te za Tipẽ'ẽzani hã we atẽme satõ. Tahawa, 'Re ihâimana u'âsi mono 'ra na, te za ai'ra hã da te 're sisi za'ra.
36Te duré tãma tinha, ãne:
— Ana wapté hã wa za duré aima wasu'u, Izabé hã. Si'ihi uptabi nherẽ, ma tô tiwasã. 'Ra waihu'u õ na, ma tô aré da te 're wasu'u za'ra. Tazahã, wasã ré sãmra ré hã, 6 na ma tô oto ãma ai'utõ, a'amo hã. 37Uburé marĩ hã tãma waihu'u pese di, 'Re ihâimana u'âsi mono ma. Tahawa, ma tô tiwasã.
38Tawamhã Maria te asa tãma tinha, ãne:
— Wa hã, Wanhib'apito ma, romhuri'wa. Ta hã te te ĩma pisutu wa, wa tô ĩsima wẽ, imreme hã.
Tawamhã te te tãma rowasu'u pari, ma tô oto mo apâ hâiwa u, romhuri'wa hã.
Maria imorĩzé wasu'u, Izabéhé u
39-40Tawamhã bâdâ umro na ãma si'utõrĩ pari, ma tô Maria hã sima robza'ra pese, tina waptéb u morĩ da, Izabéhé u. Tawamhã Zudéa na danhipti'a nho'õmo nhisi u, te itẽme mo si'aba'ré na, 'ri ahâ sa'a na 're ihâimana mono u. Tawamhã ma tô oto wi, Zacariaha nhorõwa u. 'Ri para u sébré wamhã, ma tô tina wapté hã sawi. 41Tawamhã Izabé hã, Maria te te isawizém na te te wapari wamhã, ma tô ai'uté hã idi'i 'remhã 're sirési. Tawamhã ma tô ti'ra wapté ma rowasu'u, Izabé hã. 42'Re ihâimana u'âsi mono pẽ'ẽzani te te tãma iwaihu'uzéb zarina, rowẽ te, te mreme 'rãihâ na tãma rowasu'u, ãne:
— A hã pi'õ norĩ nhipai u, ma tô aima tinhopru, iwẽ uptabi na, 'Re ihâimana u'âsi mono hã. Ai'ra ma zama, te za tinhopru, iwẽ uptabi na, ai'uté norĩ nhipai u. 43Duré a hã Wanhib'apito na te za 're aimo. Tahawa, ĩma aipire di. Tane nherẽ, asisawi õ di, we ĩtẽme aimorĩ tõ da. Tahawa, ĩma rowẽ di. 44Aimreme na ĩzawi wi, ma tô ĩ'ra hã 're rési, ĩdi'i 'remhã, rowẽ te. 45A hã aima rowẽ di. E tihai wa. Wanhib'apito hã te te aima inharĩzém na ãma sazei wa, sena na. Tahawa, aima rowẽ di.
Maria, 'Re ihâimana u'âsi mono ãma iwatazé wasu'u
46Tawamhã Maria te tinha, ãne:
47-49— Wanhib'apito ãma, wa za 're ĩwata u'âsi. 'Re ihâimana u'âsi mono hã Ĩnho'reptui'wa, te 're mo. Tãma ĩwapure nherẽ, ma tô ĩ'ãma rosa'rata. Tahawa, ĩpẽ'ẽ na, wa 're ĩto. 'Re ihâimana u'âsi mono hã iwaihu'u pe hã, iwẽ uptabi hã iwẽ na ma tô ĩma 'manha. Tahawa, iwẽ na te te ĩma i'manharĩ wẽ na, te za dasima hã da te 're ĩwasu'u u'âsi.
50Imreme, da te 're 'madâ'â pese za'ra mono wamhã, te za da'ãma 're pẽ'ẽzé u'âsi. Õne u'âsi.
51Tinhib'rata nhiptete na te za 'râwi sina 're iwata za'ra mono norĩ hã te te 're awano'õ.
52Apito norĩ hã te za roti hawi te te 're azani, wapure na oto 're nomro mono da. Tipire na sina 're iwata za'ra mono õ norĩ si te za te te 're apisutu, pire na oto 're nomro mono da.
53Mra, da te 're sépata za'ra mono wamhã, sa'ẽtẽ na te za dama 're sõpru. Isibrob ahâ norĩ hã te za sisiti te te 're azatõrĩ, ubana oto 're nomro mono da.
54-55Duréihã wahi'rata norĩ ma, ma tô ropisutu, isihudu sidâpâsi te te 're apawapto mono da. Tahawa, ma tô wa norĩ hã Izaraéu nhihudu norĩ hã te te 're wa'apawapto, wa te tãma 're iromhuri za'ra mono hã. Simizawi pese wa, ma tô Abra'ãhã ãma 're pẽ'ẽzé u'âsi. Tiwi simani õ di. Duré isihudu sidâpâsi, ma tô ãma 're pẽ'ẽzé u'âsi za'ra. Tiwi simani za'ra õ di.
56Tawamhã Izabéhé 'rata sãmra ré, ma tô a'amo hã si'ubdatõ ãma ai'utõ. Taha pari, te apâ mo Maria hã, tinhorõwa u.
Zuwã Batistaha waptã'ãzé wasu'u
57Tawamhã Izabéhé ãma i'ra hã isépu'uzé hã ma tô bâdâ hã oto iwa waptãrã. Tawamhã ma tô tãma podo, 'watébrémi na. 58Poto wamhã, i'rata 're isõrõwa za'ra mono norĩ hã ma tô iwasu'u hã wapari za'ra. Isisãnawã norĩ zama, ma tô iwasu'u hã wapari za'ra, 'Re ihâimana u'âsi mono hã iwẽ te te tãma isõmri na hã. Tahawa, te uburé isabâdâ 're to za'ra. 59Tawamhã bâdâ hã iwaptã'ãzém na hã, 7 na ma tô ãma ai'utõ. Tahawa, awẽm na ma oto sihâiwata nhizâri ni. 'Re ihâimana u'âsi mono nhib'a'uwẽ 're morĩ da, ipibui pese zéb da, ma sihâiwata nhizâri ni. Tawamhã imama nhisi na, te aré sisi za'ra ai'uté hã, Zacaria na, isisãnawã norĩ hã. 60Tazahã, te ina hã tãma nharĩ za'ra, ãne:
— Maze di. Zuwã na, te za tinhisi.
61Tawamhã asa ma te duré ãma tãma hã wa'rãmi ni, ãne:
— E mahãta tawamhã imama sisãnawã, ãma isisizéb da hã, isisi na. E Zuwã na hã, ma tô ti'manhisi. Mare di. Imama sisãnawã hã ãma 'manhisi õ di, Zuwã na.
62Tawamhã Zacaria te sadanharĩ za'ra, i'ra nhisi na. 63Tawamhã tinhiptõmo na si, ma tô dama ti'ru, ibaihâ te te tãma âri za'ra da, ti'ra nhisi na te te rob'ui'éré da. Tawamhã wedepo'ore hã ma tô tãma âri ni, isurure hã. Tawamhã ãne ma tô rob'ui'éré: “Zuwã na isisi hã za.” Ãne ma tô tãma waihu'u za'ra. Tawamhã isisãnawã norĩ hã ma te ãma titob'uzu za'ra, tinhisi na te te sisi õ wa. 64Tawamhã ti'ra nhisi na te te rob'ui'éré pari, ma oto mreme watobro apâ, Zacaria hã. Tawamhã 'Re ihâimana u'âsi mono ãma te tiwata, sõpru wa. 65Tawamhã 'ri 'rata 're isi'ubumroi mono norĩ hã iwasu'u te te wapari za'ra wamhã, ma tô tãma tipahi za'ra, õne hã tãma sa'rese za'ra õ wa. Tawamhã sa'a ãma, ma tô iwasu'u wapari za'ra ni, daro mono bâ, Zudéa ãma. 66Tawamhã da te wapari za'ra wamhã, iwasu'u hã wẽ wa, te ãma rosa'rata u'âsi za'ra ni. Te duré ãma tasisadanharĩ za'ra ni, ãne:
— Prédu wamhã, e marĩ na te za 're hâimana, 'watébrémi hã. — Ãne te dasima nharĩ za'ra ni, iwẽ na te te sada 'manharĩ wa, Zuwãhã zada, 'Re ihâimana u'âsi mono hã.
Zacaria, 'Re ihâimana u'âsi mono ãma iwatazé wasu'u
67Tawamhã Zacaria hã 'Re ihâimana u'âsi mono pẽ'ẽzani nhimipawaptom na, ma tô mre, 'Re ihâimana u'âsi mono zadawa wasu'u na, ãne:
68— 'Re ihâimana u'âsi mono hã wẽ di, Wanhib'apito hã. Wẽ wa, wa za ãma 're wawata u'âsi za'ra. Wa norĩ hã Izaraéu nhihudu, te za we oto wapawaptob za'ra, wanhitob'ru nhimiwada'uri hã wama wapu za'ra da, rowẽ na 're wasi'ubumroi mono da.
69Ma tô we oto watẽme satõ iwaihu'u pe hã, Wanho'reptui'wa da hã, apito Dawihi nhihudu hã. Tãma iromhuri'wa, Dawi hã.
70Ãne duréihã, ma tô romhâ ré rowa'õtõ za'ra dama, 'Re ihâimana u'âsi mono zadawa 'mahârâ 'rata 'wa norĩ hã, te te sima ipisutu za'ra norĩ hã. Wẽ uptabi za'ra di.
71Wazawi'õ'wa norĩ wi, ma tô wama ãma ropisutu, 'Re ihâimana u'âsi mono hã, te te 're wa'anho'reptui mono da, wawẽ'õ'wa norĩ, te te 're wawada'uri tõ za'ra mono da.
72Te za tô te te dama 're ab'manharĩ wẽ u'âsi, wahi'rata norĩ ma, te te iropisutuzéb uwaibaba. Tô sena te te tãma iropisutuzé hã, te za te te ãma 're a'uwaimrami u'âsi. Tiwi simani õ di za.
73-75Duréihã ma tô Abra'ãhã ma tinha, tô sena isihudu te te 're wa'apawapto mono da, wawẽ'õ'wa norĩ wi, te te 're wa'anho'reptui mono da, wapahi ãna, wa te tãma 're romhuri za'ra mono da, duré ti'ai ãma ré, isõ'a 're wanomro mono da, wawẽ uptabi na.
76'Re ihâimana u'âsi mono hã, danhipai u ipire uptabi. A hã isadawa wasu'u'wa, te za 're aimo. Isadawa wasu'u'wa na, te za aiwaihu'u za'ra ni. Datẽme te za 're aimo, Wanhib'apito wana, asimiroti na 're da'apawapto mono da, Wanhib'apito zô danhimipari za'ra sina 're danomro wẽ mono da.
77Datẽme 're aimorĩ wamhã, te za 're ida'apo're pu'u mo, ãne: “'Re ihâimana u'âsi mono hã te za te te aima 're apari 'wa, marĩ hã 're i'manharĩ wasété za'ra wa'aba mono zé hã. Ãne te za te te 're asõ'reptu za'ra wa'wa.” Ãne te za 're ida'apo're pu'u mo.
78Wahuré te tãma 're hâimana, ipẽ'ẽzézé hã, duré isimizawi pese zé hã. Ãne 'Re ihâimana u'âsi mono hã, Wanhib'apito hã. Tahawa, te za oto te te 're wa'anho'reptu, rowẽ na 're wanomro mono da. Bâdâ 'rãi watobro wamhã, tâibâ oto robra hã. Tawamhã dama 're rowẽ za'ra mono di za. Tane, Wanho'reptui'wa hã te te wama 're apari mono wamhã, marĩ, wa te 're i'manharĩ wasété za'ra mono zé hã, tahawa, wama 're rowẽ za'ra mono di za.
79Tawamhã ab're pipa te, robzei'õ u'âsi, 're wanomro mono õ di za. Te za oto te te 're wa'anhimroi wẽ, rowẽ na 're iwanomro mono zém na.
80Tawamhã 'watébrémi hã ma tô tiprédu. Duré ihâiba hã siptete di, prédu wamhã. Tiwasété wi 're siptete mono wa, 're morĩ wẽ di. A'ubuni wi, te ãhã wamhã oto 're sãmra. Bâdâ iwa waptã'ã wapsi, te za datẽme 're mo, te te dama 're sadawa wasu'u mono da, Izaraéu nhihudu norĩ ma hã.
Àwon tá yàn lọ́wọ́lọ́wọ́ báyìí:
Luca 1: xavBP
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2011, Wycliffe Bible Translators, Inc.All rights reserved.