Jenexi 5
5
Atão pakomotyamo
(1 Koronika 1.1-4)
1Ynara mã Atão pakomotyã esetykomo. Ahno tyrise ahtao Ritonõpo a tysã tyrise toto eya. 2Orutua te, nohpo roropa tyrise toto eya, kure rokẽ tyrise toto eya, mame “ahnome” tosehpase toto eya.
3Mame 130me jeimamyry taropose Atão ahtao toemũkuase ynororo tysã exiketyme, esety Sete. 4Moromeĩpo 800me jeimamyry taropose Atão a. Toemũkuase ropa imehnõ mũkuru tomo, ẽxiry tõ roropa. 5Mame toorihse ynororo 930me jeimamyry taropose ahtao.
6Mame 105me jeimamyry taropose Sete ahtao toemũkuase Enome. 7Moromeĩpo 807me jeimamyry taropose Sete a. Toemũkuase ynororo imũkuru tomo te, ẽxiry tomo, enara. 8Mame toorihse ynororo 912me jeimamyry taropose ahtao.
9Mame 90me jeimamyry Eno nae ahtao toemũkuase ynororo Kainãme. 10Moromeĩpo 815me jeimamyry taropose eya, toemũkuase orutua kõme, nohpo tõme, enara. 11Mame toorihse ynororo 905me jeimamyry taropose ahtao eya.
12Mame 70me jeimamyry nae Kainã ahtao toemũkuase Maarareume. 13Morotoino 840me jeimamyry taropose Kainã a. Toemũkuase ropa orutua kõme nohpo tõme, enara. 14Mame toorihse ynororo 910me jeimamyry taropose ahtao eya.
15Mame 65me jeimamyry Maarareu nae ahtao toemũkuase Jareteme. 16Morotoino 830me jeimamyry taropose Maarareu a. Toemũkuase orutua kõme nohpo tõme, enara. 17Mame toorihse ynororo 895me jeimamyry taropose ahtao eya.
18Mame 162me jeimamyry taropose Jarete a ahtao toemũkuase Enokeme. 19Morotoino 800me jeimamyry taropose eya. Toemũkuase ropa ipoenõme. 20Mame toorihse ynororo 962me jeimamyry taropose ahtao eya.
21Mame 65me jeimamyry taropose Enoke a ahtao toemũkuase Matuzarẽme. 22Morotoino 300me jeimamyry taropose eya Ritonõpo omipona yronymyryme, toemũkuase ropa ynororo orutua komo, nohpo tomo, enara. 23365me jeimamyry isene kynexine. 24Ritonõpo maro osepeme exikehpyra kynexine, imaro oturũko kynexine. Mame osenepyra toehse ynororo, tarose Ritonõpo a exiryke.
25Morarame 187me jeimamyry taropose Matuzarẽ a ahtao toemũkuase Ramekeme. 26Morotoino 782me jeimamyry taropose ahtao eya, toemũkuase ropa ynororo orutua komo, nohpo tomo, enara. 27Mame toorihse ynororo 969me jeimamyry taropose ahtao eya.
28Mame 182me jeimamyry taropose Rameke a ahtao toemũkuase ynororo. 29Mame ynara tykase ynororo:
— Sero nono popyra tyripose Ritonõpo a, morara exiryke kuerohtohkõ tupime toehse kyya xine; yrome mose, aimo oserematoh enehnõko ropa mana kyya xine.
Tumũkuru tosehpase Rameke a Noeme. 30Moromeĩpo 595me jeimamyry taropose eya, toemũkuase imehnõ mũkuru tomo, ẽxiry tomo, enara. 31Mame toorihse ynororo 777me jeimamyry taropose ahtao eya.
32Mame 500me jeimamyry taropose ahtao Noe a toemũkuase ynororo oseruao: Sem te, Kam te, Jape, enara.
Àwon tá yàn lọ́wọ́lọ́wọ́ báyìí:
Jenexi 5: apy
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©2017, Wycliffe Bible Translators, Inc.