Lucas 3
3
Hanu tsua hiweabumanushũ Naximanika Joãonẽ hatu yusĩnikiaki, na hãtxarã
(Mt 3.1-12; Mc 1.1-8; Jo 1.19-28)
1Hanua bari itxapa kaya Romano shanẽ ibuhaira betsa Tibério César ma 15 bari shanẽ ibukĩ dasibi hatu yunukubainaya Judéia anu Pôncio Pilatos Romano shanẽ ibu beshmasaya Galiléia anuri hawẽ tsuma Herodes Romanoma shanẽ ibu beshmasriaya Ituréia inũ Traconites anuri hawẽ tsuma Herodesĩ betsa Filipe shanẽ ibu beshmasriaya Abilene anuri hawẽ tsuma Lisânias shanẽ ibu beshmasriaya 2ha haskaibũ Jerusalém anuari judeubu Anás inũ Caifás Deusbe hawenabu hãtxashunika shanẽ ibuhaira dabe inibukiaki.
Ha haskaibu betsatiã Zacariasĩ bake João hanu tsua hiweabumanua ewaima hiwea Deusũ yunua 3tashnikirã Jordão hene ketãkubaũkĩ hiweabu tibi hatu yusĩ taewakĩ yurabu yuikĩ: “Matũ xinã betsa watã matũ txakabu Deusũ hau matu buashũshanũ nĩkatã hawara txakabuwẽ mã benua hiwea henerikãwẽ. Matũ xinã maewatã mã ea uĩmaya ẽ matu naximashanaii”, iwanã, hatu yusĩkubainikiaki. 4Haska Deusũ hãtxa yuishunika Isaíasĩ hakiri kenekĩ yuini keska ashuĩ João haskanikiaki:
“Hari tsua hiweabumanua hui kuxipawẽ txanikĩ hatu yuikĩ:
‘Nukũ Shanẽ Ibu nai anua matuki bayui ma kemaikiki.
Matũ huĩtinĩ xinã pewarikãwẽ, bai kayatapia keska wakinã.
5Napaku tibi buakĩ mata washũ
mati tibiri pewakĩ pãpa washũ
shãtu shãtupari keyu buakĩ pãpa washũ
hawẽ bai pewashuna keska wakĩ hatũ hiwea pewatã
6hanushũ Deusũ merabewati hua dasibibũ uĩshãkanikiki’ ”,
akĩ haska yuini keska wakĩ Joãonẽ akĩ hatũ txakabu Deusũ hau ana xinãyamakubaĩshanũ txakabu henekĩ hatũ xinã betsa watã hawenabu hawẽ unãmati João yukakĩ: “Ea naximawe”, hau ea anũbũ ishũ Joãonẽ hatu yusĩkubainikiaki.
7-8Hanua Joãonẽ hau ea naximanũ ika bebirã bebiranaibu hatu yuikĩ:
—Maturã mã paranã dunu pianã keskabuki. Mã haska keska matuki Deus sinatakĩ matu kupihairashanaiwẽ taea matũ xinã betsa wakãwẽ. Haska washũ matũ txakabu mã ma beshtekea shabakabi mã ea uĩmaya ẽ matu naximashanaii. Hamẽ haskama ibubis keĩ xinã betsa wakatsi ikama: “Nukũ shenipabu Abraão Deusbe haibunameniwẽ taea nũ hawẽ bababu nuku kupiama ishanikiki”, ikĩ, ana xinãyamakãwẽ. Hakia Abraãonẽ bababu dasibi matu yamawakĩ keyutã na mixki manibauna Deusũ damiwakĩ Abraãonẽ bababu benawashũtiruki. 9Haskakẽ matu yuinũ nĩkakãwẽ. Hi tibi bimi pepa hayama deratã mã kuamis keska wakĩ bestibu Deusũ matu kupishanikiki. Hamẽ tsuabura Abraãonẽ baba kayabibũ hawẽ yusĩa hau txibãkubainũbũwẽ. Hakia mã haska wamakẽ matu kupinũ, iwanã, duewẽ matu dera keska watã txi anu matu urenũ ishũ manaikiki— hatu waya
10hanushũ yurabũ João haskai nĩkatã yuka ikĩ:
—Haskakenã, Deus daewakinã, haska washãpa?— akeakeabu 11Joãonẽ hatu yuikĩ:
—Deus daewakinã, mĩ tari dabeyarã, ha nuitapai tariuma mã betsa inãtiruki. Ha inũ, mĩ pitiyarã, yura betsa piti hayama mã betsa inãtiruki— iwanã, hatu yuikubainaya
12habũ Romano governo pei bishũmisburi hau eari naximanũ ika beshũ yukakĩ:
—Yusĩnaã, nukukaĩ, nũ haskatirumẽ?— akabu
13Joãonẽ haburi yuikĩ:
—Governo pei bishũkĩ mã itxawashũmisrã, hanu kesua besti shanẽ ibũ matu yunua bishũkubaĩshãkãwẽ, ana hatu parãmarã— hatu waya
14hanushũri soldadobũri yukakĩ:
—Nukukaĩ, yusĩnaã, xinã betsa watã mia unãmakatsirã, nũ haskashanai?— akabu Joãonẽ haburi yuikĩ:
—Maturã, matũ xinãnẽ itxakanikakĩ hatũ hamapai mebĩyamakubaĩshãkãwẽ. Ha inũ, txani txakakĩ yura betsã pei parãtã mebĩyamakãwẽ. Hakia matũ daya pei besti bi benimakubaĩshãkãwẽ— hatu waya
15nĩkatã itxapabu hawẽ hãtxawẽ benimakĩ habũ merabenã manakĩ Joãokiri xinaĩ yuka iki yuinamekĩ: “Deusũ yubani nukũ Messias Cristorã, hamẽkaĩ?” ikaibu 16haskaibu Joãonẽ hatũ xinã unãkĩ dasibi hatu nemakĩ yuikĩ:
—Txanima, eãnã hawẽ matu unãmati wakĩ henewẽ besti ẽ matu naximakubainaii. Hakia ha mã hakiri xinaĩnã, kuxipahairatũ ea binũa txipu huikiki. Kuxipahaira mesetũ ea binuhairawẽ taeshũ ẽ hawẽ hawaumahairatũ haska washũ hawẽ bitxi tae meshpũ pekakĩ merabewakĩ hawẽ dayaru itsakĩ kuxipa mirĩtũ ẽ ashũtirumaki. Hakia hatũ matu pepawakĩ Deusũ Yushĩ Pepa matu inãtã bika matu tenemakĩ matũ txakabu buakĩ yamawa keska washanikiki, hawara txakabu abuama txiwẽ kua keska wakinã. 17Haska inũ, shekiwã bimi ta keyushũ pepa aruti anu arutã hawẽ shepa mã kuamis keska wakĩ dasibi hawenabuma danãkĩ hawa txi nukaisma anu urẽshũ kuanũ, iwanã, manakubainikiki— iwanã,
18hanushũ hãtxa itxapawẽ hatu nemakĩ yusĩkĩ hatũ xinã hatu betsa wamakĩ kakape Joãonẽ hatu yusĩkubainaya 19hanushũ judeubũ shanẽ ibu Herodesĩ hawẽ betsa Filipẽ aĩ Herodias mebĩxina inũ txakabu betsa betsapa wakubainai nĩkakubaĩkĩ uĩtã yurabu hakiri yuixĩshũ Joãonẽ nemakĩ hawẽ txakabu henemanũ, iwanã, betsabũ nĩkaibũ Joãonẽ Herodes nemakĩ ha axiãwẽ taeshũ 20Herodes haki sinatakĩ João hau ana hakiri hãtxayamanũ, iwanã, hawẽ soldadobu hatu bitximanikiaki.
Joãonẽ Jesus naximanikiaki, na hãtxarã
(Mt 3.13-17; Mc 1.9-11)
21João bitxiriabuma yura itxapabu naximakubaĩkĩ Jesusri Joãonẽ naxima hawẽ Epa Deusbe hãtxaya nai bashnei 22Deusũ Yushĩ Pepa deiwã keska hui hamamaki butuaya nai anushũ hawẽ Epã yuikĩ:
—Miarã, mĩ ẽ bakeki. Ẽ mia abuhairakĩ katunirã, ẽ miwẽ benimahairaii— anikiaki.
Jesusũ shenipabu eska tana keyunibukiaki, na hãtxarã
(Mt 1.1-17)
23Habiatiãri Jesus 30 bariya hawẽ Epa Deus dayashũkĩ taewaya Josẽ yumewaimawẽ taeshũ yurabũ yuikĩ: “Jesusũ eparã, Joséki”, iwanã, yuikubainibukiaki. Hawẽ shenipabukiri mia yuinũ nĩkawe.
Josẽ eparã, Elikiaki.
24Elĩ eparã, Matate inikiaki.
Matatẽ eparã, Levi inikiaki.
Levĩ eparã, Melqui inikiaki.
Melquĩ eparã, Janai inikiaki.
Janaĩ eparã, José inikiaki.
25Josẽ eparã, Matatias inikiaki.
Matatiasĩ eparã, Amós inikiaki.
Amósĩ eparã, Naum inikiaki.
Naumĩ eparã, Esli inikiaki.
Eslĩ eparã, Nagai inikiaki.
26Nagaĩ eparã, Maate inikiaki.
Maatẽ eparã, Matatias inikiaki.
Matatiasĩ eparã, Semei inikiaki.
Semeĩ eparã, José inikiaki.
Josẽ eparã, Jodá inikiaki.
27Jodã eparã, Joanã inikiaki.
Joanãnẽ eparã, Resa inikiaki.
Resã eparã, Zorobabel inikiaki.
Zorobabelĩ eparã, Salatiel inikiaki.
Salatielĩ eparã, Neri inikiaki.
28Nerĩ eparã, Melqui inikiaki.
Melquĩ eparã, Adi inikiaki.
Adĩ eparã, Cosã inikiaki.
Cosãnẽ eparã, Elmadã inikiaki.
Elmadãnẽ eparã, Er inikiaki.
29Erĩ eparã, Josué inikiaki.
Josuẽ eparã, Eliézer inikiaki.
Eliézerĩ eparã, Jorim inikiaki.
Jorimĩ eparã, Matate inikiaki.
Matatẽ eparã, Levi inikiaki.
30Levĩ eparã, Simeão inikiaki.
Simeãonẽ eparã, Judá inikiaki.
Judã eparã, José inikiaki.
Josẽ eparã, Jonã inikiaki.
Jonãnẽ eparã, Eliaquim inikiaki.
31Eliaquimĩ eparã, Meleá inikiaki.
Meleã eparã, Mená inikiaki.
Menã eparã, Matatá inikiaki.
Matatã eparã, Natã inikiaki.
Natãnẽ eparã, Davi inikiaki.
32Davĩ eparã, Jessé inikiaki.
Jessẽ eparã, Obede inikiaki.
Obedẽ eparã, Boaz inikiaki.
Boazĩ eparã, Salá inikiaki.
Salã eparã, Naassom inikiaki.
33Naassomĩ eparã, Aminadabe inikiaki.
Aminadabẽ eparã, Admim inikiaki.
Admimĩ eparã, Arni inikiaki.
Arnĩ eparã, Esrom inikiaki.
Esromĩ eparã Perez inikiaki.
Perezĩ eparã, Judá inikiaki.
34Judã eparã, Jacó inikiaki.
Jacõ eparã, Isaque inikiaki.
Isaquẽ eparã, Abraão inikiaki
Abraãonẽ eparã, Tera inikiaki.
Terã eparã, Naor inikiaki.
35Naorĩ eparã, Serugue inikiaki.
Seruguẽ eparã, Ragaú inikiaki.
Ragaũ eparã, Faleque inikiaki.
Falequẽ eparã, Éber inikiaki.
Éberĩ eparã, Salá inikiaki.
36Salã eparã, Cainã inikiaki.
Cainãnẽ eparã, Arfaxade inikiaki.
Arfaxadẽ eparã, Sem inikiaki.
Semĩ eparã, Noé inikiaki.
Noẽ eparã, Lameque inikiaki.
37Lamaquẽ eparã, Matusalém inikiaki.
Matusalémĩ eparã, Enoque inikiaki
Enoquẽ eparã Jarede inikiaki.
Jaredẽ eparã Maalalel inikiaki.
Maalalelĩ eparã, Cainã inikiaki.
38Cainãnẽ eparã, Enos inikiaki.
Enosĩ eparã, Sete inikiaki.
Setẽ eparã, Adão inikiaki.
Adãonẽ eparã, Deus inikiaki.
Haskakẽ Jesus huni kayabi irianiki, nuku keskarã.
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.