Karikani B'aai 4
4
Taari mm'aane aika uoman
1Ao e bootaki ma buuna Atam ao e bikoukou neierei. E bungiia te nati te mm'aane ao e taku, “E riki natiu te mm'aane aei man ana buobuoki te UEA.” Ma ngaia are, e arana natina b'a Kain. #4.1 Kain: N te koroboki n Ebera nanona “reke.” 2Ao i mwiin te tai ae e aki maan, ao e a manga bungia riki natina te mm'aane temanna ae Abera. E riki Abera b'a te tia kaawakin tiibu, ao Kain b'a te tia ununiki. 3N te bongina, ao e uoti uaan arokana tabeua Kain, ao e anga b'a ana karea nakon te UEA. 4Ao e a manga uota ana tiibuteteei ae te moani bungiaki teuare Abera, ao e tiringnga, ao e anga m'akorona ake a raraoi b'a ana karea. Ao E kukurei te UEA iroun Abera i bukin ana karea, 5ma E aki butim'aea ana karea Kain. Ao e maraki nanon Kain iai, ao e moanoku. 6Ao E a manga taku te UEA nakoni Kain, “E aera ngkai e maraki nanom? E aera ngkai ko a moanoku? 7Tiaki ko na boni kukurei ngke ko boni karaoa ae e raoiroi? Ma i bukina ngke ko a tia ni karaoa ae buakaka, ao e aoraia te bure i matan am mataroa. E kan tautaekaniko, ma ko riai n tokanikai i aona.”
8Ao e taku Kain nakon tarina are Abera, “Ti a nako nakon te tawaana.” Ao ngke a roko i nanon te tawaana, ao e eweka tarina Kain n tiringnga.” 9Ao E titiraki te UEA nakon Kain, “E ngaa tarim are Abera?” Ao e kaeka ni kaangai, “I aki ataia, e aera ngkai Ko a titirakinai; kai tiaki ngai te tia tararuaia!” 10Ao E a manga taku te UEA, “E aera ngkai ko karaoa te m'akuri ae rangi ni buakaka aei? E tang raraan tarim mai buakon te tano, b'a kaanga ai aron te b'anaa ae e tangira irantangaakina.
11E na roko te tekebuaka i aom man te tano are e a tia n nima raraan tarim ngke ko tiringnga. 12Ngkana ko ribana, ao e na aki anga te maiu te tano nakon arokam, ao ko na riki b'a te aomata ae akea mwengana, ae tiotio nako n te aonnaba.”
13Ao e taku Kain nakon te UEA, “E rangi n rawaawata nako iu katuaaeau aei. 14Ko kanakoai man te aba, ao mai matam naba. N nang riki b'a te aomata ae akea mwengana, ae tiotio nako n te aonnaba, ao e na tiringai ane I reke i rouna.”
15Ma E kaeka te Atua ao E taku, “Tiaki ngaia anne. Ngkana iai ae e tiringko, ao a na manga mate itiman mai buakoia ana utu.” Ma ngaia are, E kanikinaea Kain, ao E tuangiia aomata b'a akea ae na tiringnga ngkana a kaitibo ma ngaia. 16Ao E nako Kain mai matan te UEA, ao e maeka n te aba ae e aranaki b'a Tiotionako, #4.16 Tiotionako: N te koroboki n Ebera ao e nanonaki b'a “Nota,” ae nanona “tiotionako.” are e mena i mainikun Eten.
Ana Kariki Atam I m'aain te Ieka
17Ao e reke natiia te mm'aane Kain ma buuna, ao a aranna b'a Enoka. Ao E katea te kaawa ae e buubura Kain, ao e aranna n aran natina te mm'aane. 18Ao e riki natin Enoka te mm'aane ae arana Irata, ao Irata e karika Meuiaera, ao Meuiaera e karika natina te mm'aane ae Metutiaera, ao Metutiaera e karika natina te mm'aane ae Rameka. 19Uoman buun Rameka b'a, Nei Ata, ao Nei Tiira. 20Ao Nei Ata e karika Iabara, are boni ngaia te moan aomata ni karaoa te kawakini man, ma ni mamaeka n auti n rianna. 21Ao tarin Iabara bon Iubara, are aia bakatibu taani kakatangitang n te aabi ma te kaib'ab'aa. 22Ao Nei Tiira, e karika Tubara Kain, are boni ngaia ae moani karaoi aekaki ni b'ai ni m'akuri ni kabane ake a karaoaki man te buraonti ao te biti. Ao m'anen Tubara Kain bon Nei Naama.
23Ao e taku Rameka nakoia buuna,
“Nei Ata, ao Nei Tiira, ongora irou.
Kakauongo raoi nakon te b'ai ae N na tuangngkami.
I a tia n tiringa te aomata are e kaikoakai, ao I a tia naba n tiringa te ataei are e kammarakai.
24Ngkana arona b'a a tiringaki itiman te aomata ngkana e tiringaki Kain, ao Ngai, ngkana I tiringaki, ao a na manga tiringaki itingaun ma itiman.”
Mairoun Atam Nakon Teeta Ni Karokoa Enoti
25Ao e a manga riki natiia Atam ma Nei Ewa temanna te mm'aane. Ao e taku Nei Ewa, “E a tia n anganai natiu te mm'aane te Atua b'a oneani mwiin Abera, are e tiringnga ngkoa Kain.” Ma ngaia are, e arana te nati te mm'aane arei b'a Teeta. 26Ao e riki natin Teeta te mm'aane, ao e aranna b'a Enoti. Ao n taai akanne are a moanna iai aomata n taromauriia te Atua ma n taekina ae e kaangai, “Ti neboiko te UEA.”
