Piilimka 20
20
1Abrayam yaa basi Mamre ale bo Yebron tiib kpieŋsaŋa jigini ale cheŋ a ga jo Negev tɛŋka a kali Kades ale Sur suŋsuŋ. Wa jam kali Gerar ka magadega. 2Dula jigini ale Abrayam weeni ayen, wa powa Saara ka wa toa la. Gerar naawa Abimelek yaa tom ate ba ta Saara jam ate wa tuesi.
3Alege Wen yaa jam Abimelek jigi gɔdaasima po yok kunyi a yaa weeni wa ayen, <<Fi a nye ase ka kpio la, dii nyiŋla nipowa ate fi ta la ka nipok waai ale yali.>>
4Abimelek an jam tiri nipowa, dila nyiŋ wa weeni ayen, <<M Nyɔnɔ, fi le kaasi tɛŋ kaai ale kan nye wari kaasi ya? 5Abrayam a weeni mi ayen, <Wa ka mi toa.> Saara mɛ abe m weeni ayen, <Wa ka m toa.> Mi nye kude ale ka popola naliŋsa ale nisin naliŋsa.>>
6Wen yaa weeni Abimelek wa gɔdaasimaŋa po ayen, <<Mi sebi fi le nye kude ale ka popola naliŋsa la kama, dila ale soa ate mi kasi fu ate fi an tom kaasi mu. Dila ale soa ate mi an basi ate fi tiri wa. 7Yɔgyɔgla de basi ate nuruwa powa a ŋmani wa jigi, diila wa ka biisiteerɔ. Wa le puusi a te fu ate fi boro. Alege fi dan kan te ate wa ŋmani ya seba ayen fi ale fi nuruma meena ale kpi.
8Vari ale veenti la saluik yokyokwa Abimelek yaa wi wa nisɔmma meena. Wa le weeni ba dii meena ale nye la ba yaa jam a chali yɔgsum nna yegayega. 9Abimelek yaa wi Abrayam ate wa jo a weeni wa ayen, ka boan jaab ate fi nye ti dila? Mi kaasi fu ka sɛ ate fi ta kaasuŋku de jam mi ale m tɛŋka zuwa? Fi nye mu ka wie ŋaai ale kan magsi fi nye. 10Ate Abimelek a bek Abrayam ayen, <<Ka boan jaab nyiŋ ale soa ate fi nye dila?
11Abrayam yaa tulisi ayen, <<Mi weeni m dek kama ayen, <Nuruba sum kan chali Wen yɔgsum dela, ate ba ko mu m powa nyiŋ.> 12A ŋman gum du, wa sum ka m toa, m kowa lie, wa daa m mawa lie ate wa yaa chim m pok. 13Wen be le te ate mi basi m kowa yenni ale a nyiem la mi yaa weeni wa ayen, <Fi le fi a sak fi yaalika ale mi diila ale nna. Ti dan cheŋ jigi meena weeni ayen m ka fi toa.> >>
14Abimelek yaa ta piisa ale niiga ale yɔm nipooba ale yɔm nidoaba a jam te Abrayam. A pai wa powa Saara mɛ a te wa. 15Abimelek yaa weeni ayen, <<Mi tɛŋka ale la a doa fi niŋ, kali fi le a yaali kauk kuui la.>>
16Abimelek yaa weeni Saara mɛ ayen, <<Mi a te fi toawa ka kpana tusidi a magsi ti le kaasi fu diila, baai ale bo le fu la niŋ. Fi ka kaasuŋŋoa.
17Abrayam yaa a puusi Wen te Abimelek ale wa powa ale nipokbili sii ale ka yɔm la ayen Wen a lak ba biamu luitaŋa ate ba ŋman biak bisa. 18Naawen a nye kama ate Abimelek yenni nipooma meena a kan biagi, Abrayam powa Saara nyiŋ.
© 2023, Ghana Institute of Linguistics, Literacy and Bible Translation