Yoa. 18
18
Akikamuno a Yesu
(Mat. 26:47-56; Mar. 14:43-50; Luk. 22:47-53)
1Kedau Yesu akilip ŋin, toloto iŋes ka ŋikeekasyomak ekekwaye aŋolol Kidron. Ayai nen emanikor ŋolo apotu Yesu ka ŋikeekasyomak tolomasi. 2Ayeni Yuda ŋolo alukinon akibois ŋin, anerae eryamunun Yesu ka ŋikasyomak keŋ nen ŋarwa ŋuna alalak. 3Toriko Yuda ŋasigarya ŋuna a Ŋiromanin ka ŋiketeok Akai ka Akuj lomanikor. Eakito ŋisacaradotin ŋulu apolok ka Ŋiparisayon ikes. Atiŋito ikes ŋiboro ŋulu ke ejiye ka ŋitaae ta ŋagilae. 4Ayeni Yesu ŋakiro daadaŋ ŋuna itiyakinio neni keŋ, kikomau kiŋaren kec, kiŋit tema, “Ŋae iwarito iyes?” 5Toboŋokis ikes temasi, “Yesu ŋolo a Nasaret.”
Tolimok Yesu ikes tema, “Ayoŋ lo!”
Awuasi Yuda ŋolo alukinon ka ikes. 6Ani kedau Yesu alimun ebe, “Ayoŋ lo,” kikutukutoosi ikes, kibusokinos kwap. 7Kiŋit Yesu ikes nabo tema, “Ŋae iwarito iyes?” Temasi ikes, “Yesu ŋolo a Nasaret.”
8Tolimok Yesu ikes tema, “Adau ayoŋ alimokin iyes atemar ayoŋ lo. Ani nai kerae ayoŋ ikiwarito iyes, kimyekisi ŋikilyok lu toloto.” 9(Arae ŋun akisiyookinio ŋakiro ŋuna sek alimunit iŋes ebala, “Papa, mam alokidiŋ ŋulu ibu iyoŋ ikiinak ayoŋ ŋini etooliyo ayoŋ.”)
10Abu Simoni Petero ŋolo ayakar atum, kitel epito ŋolo ke Esacaradoti a ŋolo Apolon nooi nakit ŋina aloteten, totubo. (Arae ekiro ke epito a ŋol Maliko.) 11Tolimok Yesu Petero tema, “Kinyakak atum kon nakuraro! Itami iyoŋ atemar nyamasi ayoŋ ekopo ŋolo a ŋican ŋolo akainaki ayoŋ Papa kaŋ lo a?”
Yesu alokiŋaren Anas
12Apotu ŋasigarya ŋuna a Ŋiromanin ka ekapolon kec ta ŋiketeok Akai ka Akuj ŋulu a Ŋiyudayan kikamut Yesu toena. 13Torikosi mono iŋes neni ka Anas, anerae arae Anas ekamuran a Kaipa a ŋolo arae Esacaradoti ŋolo Apolon nooi alokaru a ŋol. 14Arae Kaipa sek aris kicoco ŋikarikok ŋulu a Ŋiyudayan atemar, ejok epeikile totwan aŋuna a ŋituŋa.
Topeg Petero apeget ŋina ka apei atemar ayeni Yesu
(Mat. 26:69-70; Mar. 14:66-68; Luk. 22:55-57)
15Kiwuapakis Simoni Petero ka ecekasyoman Yesu. Ayeni Esacaradoti ŋolo Apolon nooi ekasyoman ŋol; aŋun, abu iŋes torukosi ka Yesu tari nenilapat ka akai a ŋina ke Esacaradoti a ŋol, 16towuoi Petero alokiŋa alodiye epuke. Toboŋo nai ekasyoman ŋolo ayenen ka Esacaradoti ŋolo Apolon nooi, kisirwor apese ŋina eten epuke, ido yau Petero tooma. 17Kiŋit apese ŋin Petero tema, “Meere iyoŋ daŋ epei alokasyomak ke ekile a ŋol a?”
Toboŋok Petero tema, “Meere.”
18Aŋuna alilimyo akwap, kinokakis ŋiketiyak ka ŋiketeok akim, towua kirikaut. Kiyoto nai Petero akiwuaŋar ka ikes.
Kiŋitiŋit esacaradoti ŋolo apolon Yesu ŋakiro
(Mat. 26:59-66; Mar. 14:55-64; Luk. 22:66-71)
19Kiŋitiŋit esacaradoti ŋolo apolon Yesu ŋuna a ŋikasyomak keŋ ka ŋuna ka akitatam keŋ. 20Toboŋok Yesu iŋes tema, “Erwor ayoŋ lotuŋa daadaŋ, emam ŋakiro ŋuna abu ewua; abu ayoŋ jwi jwi etatam alosinagogae ka alo Kai ka Akuj, aneni ecunanakin Ŋiyudayan daadaŋ. Emam akirot alimu ayoŋ ewuait. 21Nyo nai tokona ikiŋisiŋisitor iyoŋ ayoŋ? Kiŋit ŋituŋa ŋulu apotu kiirasi ŋuna abu ayoŋ erwor; eyenete ikes ŋakiro ŋuna abu ayoŋ erwor.”
22Ani kedau Yesu alimun ŋakiro ŋun, abu epei alokidiŋ ŋiketeok kibap iŋes tema, “Ikokini iyoŋ irworo neni ke esacaradoti a ŋolo apolon ikoŋina ai?”
23Toboŋok Yesu tema, “Ani kalimunit ayoŋ ŋuna aronok, kiteyenik ŋituŋa lu daadaŋ neni abala ayoŋ. Ani kerworit ayoŋ ejok, kaanukiro bo ikibapya iyoŋ ayoŋ?”
24Kiyakiya nai Anas Yesu eroko erocitae neni a Kaipa, a ŋolo arae Esacaradoti ŋolo Apolon nooi.
Topeg nabo Petero atemar ayeni Yesu
(Mat. 26:71-75; Mar. 14:69-72; Luk. 22:58-62)
25Ariŋa Petero ewuoi iwuaŋa. Kiŋita ŋuluce iŋes temasi, “Meere iyoŋ daŋ epei alokidiŋ ŋikasyomak keŋ a?”
Nai topeg Petero ŋun tema, “Meere.”
26Abu epito epei ŋolo ke Esacaradoti a ŋolo Apolon nooi, ŋolo arae eyenet ke ekile a ŋolo atubori Petero akit, kiŋit Petero tema, “Pa ekeŋolikinit ayoŋ iyoŋ ka iŋes alomanikor a?”
27Topeg nabo Petero ŋun. Ŋinapeipaki toruuni ekokoroit.
Yesu alokiŋaren Pilato
(Mat. 27:1-2, 11-14; Mar. 15:1-5; Luk. 23:1-5)
28Ani taparacu iwali akwap, torikosi ikes Yesu alokai a Kaipa tari kai ŋina apolon ŋina ke ekapolon a Ŋiromanin, a ŋolo anyaritae Pilato. Nyelomasi ŋikarikok ŋulu a Ŋiyudayan tooma akai ŋin, anerae pa acamito ikes amunaar asegis kec aŋuna ka akimuja ŋasuban ŋuna a Paska. 29Aŋun, abu Pilato toloma neni ayakasi ikes, kiŋit tema, “Anukiro isitakinitotor iyes ekile lo?”
30Toboŋokis ikes temasi, “Kerae nyitiyat ekile lo ŋuna aronok, pa kikipotokinit isua iŋes neni kon.”
31Tolimok Pilato ikes tema, “Yaasi iyes ŋilopeyek iŋes, totubokis a Lokisila kus.” Toboŋokis Ŋiyudayan iŋes temasi, “Nyikicamakinit apukan a Ŋiromanin isua akiar ituŋanan.” 32(Etiyakinosi ŋun, ikotere kiyookinotor ŋakiro ŋuna alimunit Yesu, itoodiunit epite ŋolo etwania iŋes.)
33Toboŋo Pilato kai keŋ ŋina apolon, tonyarau iŋes Yesu, kiŋit tema, “Irae iyoŋ erwosit a Ŋiyudayan a?”
34Toboŋok Yesu iŋes tema, “Ilimunit iyoŋ elope ŋakiro ŋun, kori ŋicetuŋa ikilimokinito iyoŋ ŋakiro kaŋ?”
35Toboŋok Pilato iŋes tema, “Arae mono ayoŋ Eyudayat ŋolo ayeni ŋun a? Erae ŋikonituŋa ka ŋikonisacaradotin ŋulu apolok ikipotunito iyoŋ neni kaŋ. Nyo isecit iyoŋ?”
36Toboŋok Yesu iŋes tema, “Nyerae apukan kaŋ ŋina ka akwap a na. Kerae torae apukan kaŋ ŋina ka akwap a na, kejito ŋikewuapak kaŋ, ikotere nyekepotokinere ayoŋ neni a ŋikarikok a Ŋiyudayan. Nai nyerae apukan kaŋ ŋina a ne.”
37Kiŋit Pilato iŋes tema, “Iŋes atemar irae iyoŋ erwosit a?”
Toboŋok Yesu iŋes tema, “Iyoŋ ilimu atemar arae ayoŋ erwosit. Aponi ekedoun ayoŋ ka abunit ayoŋ nakwap na aŋuna a ipeibore: akiteyenun ŋuna a kire. Ituŋanan daadaŋ ŋini eyai tooma ŋuna a kire, epupi ŋakiro kaŋ.”
38Kiŋit Pilato Yesu tema, “Nyo erae ŋuna a kire?”
Totubokinae Yesu atwanare
(Mat. 27:15-31; Mar. 15:6-20; Luk. 23:13-25)
Kedau Pilato alimun ŋun, toboŋo kiŋa, tolimok Ŋiyudayan tema, “Nyeryamuna ayoŋ asecit ŋina tubokinet iŋes. 39Nai erae etal kus alacakin iyes epeimabus ŋolo iitanete iyes apaki ŋina a ŋasuban a ŋuna a Paska. Icamito nai tokona olacak ayoŋ erwosit a Ŋiyudayan a?”
40Tocelut ikes temasi, “Mam, meere lo! Ikicamit isua Baraba!” (Arae Baraba ekademanaran.)
Ngakarimojong Interconfessional Bible © Bible Society of Uganda, 2008.