Yoa. 6
6
Kisimuj Yesu ŋituŋa ŋalipyo ŋakan
(Mat. 14:13-21; Mar. 6:30-44; Luk. 9:10-17)
1Kedau ŋun, tolot Yesu tolunyar ekekwaye anam ŋina a Galileya, anam ŋina anyaritae Tiberia. 2Totupakis ŋituŋa ŋulu alalak Yesu, anerae keris ikes kiŋolikis ŋakujuwuanisya ŋuna etaŋaleunio Yesu ŋituŋa ŋulu adyakasi. 3Apotu Yesu ka ŋikeekasyomak todokasi kidiama emukura, kiboikinos. 4Aapuunit apaki ŋina a ŋasuban a Ŋiyudayan ŋina enyaritae Paska. 5Kireo Yesu, kiŋolik ŋituŋa ŋulu alalak eponito neni keŋ. Kiŋit iŋes Pilipo tema, “Ai mono tokona ikipedorya iwon agyelunia ŋamugati ŋadi, ikotere ŋituŋa lu daadaŋ kimuja?” 6(Eŋisit iŋes Pilipo ŋakiro ŋun aŋuna ka arosya iŋes, anerae ayeni Yesu elope ŋuna itiyakini.)
7Toboŋok Pilipo tema, “Kerae tari toyakas ŋidinari ŋamiae ŋaarei, pa kitemokin akigyel ŋamugati ŋuna eryamuni ŋinituŋanan adio cici”
8Abu epei alokasyomak keŋ, ŋolo anyaritae Anderia, lokaato a Simoni Petero, tolimok Yesu tema, 9“Eyai nege edya ŋolo eyakar ŋamugati ŋakan ka ŋikolya ŋiarei. Nai epedori mono akimuj ŋin akiryam ŋituŋa lu daadaŋ a?”
10Tolimok Yesu ŋikasyomak tema, “Kisiboikisi ŋituŋa!” (Alibit nen asebuk ŋinya.) Kiboikinos ŋituŋa daadaŋ; arae ŋikilyok ŋalipyo ŋakan. 11Tolemu nai Yesu ŋamugati, tolakar neni ka Akuj, tokorak ŋituŋa ŋulu eboiyete, tokorarae ŋikolya daŋ; toryamu a ŋinituŋanan etyae ŋolo eitanit iŋes. 12Ani kimwoko ŋituŋa, tolimok Yesu ŋikasyomak keŋ tema, “Tocunutu ŋapiyanunet daadaŋ, ikotere nyicanicanaar.” 13Kiriraut nai ikes ŋapiyanunet ŋuna apotu kilelebun ŋaditae ŋatomon ka ŋaarei, anamugati a ŋunakan a ŋuna emujete ŋituŋa.
14Ani iŋolikinete ŋituŋa akujuwuanut ŋina abu Yesu kitiya, kisyakis atemar, “Kire erae lo ekadwaran ŋolo itemokino bu nakwap!” 15Ayeni Yesu atemar acamito ŋituŋa areikin iŋes ka agogoŋu aruwor erwosit kec, aŋun abu tosi tolot lokamukumukui.
Torotok Yesu alokidiama nakipi
(Mat. 14:22-33; Mar. 6:45-52)
16Ani ewari, toloto ŋikasyomak a Yesu nanam, 17todoka ataker toloto ekekwaye tari lotaun a Kaperenaum. Kiryoniar akwap eriŋa Yesu nyebuno neni kec. 18Tokut ekuwuam ŋoloti agogoŋon ananam, kilolik ŋakipi. 19Kedaut ŋikasyomak amiar ataker ŋakilomitae ŋuna aapiyarito ŋakan kori ŋakanikapei, apotu kiŋolikis Yesu elosi alokidiama nakipi, ebunit keapuu nataker, ido tobul ikes nooi. 20Nai tolimok Yesu ikes tema, “Nyikibul, erae ayoŋ.” 21Tocamut nai ikes, kitodokut iŋes nataker, todolo atipei neni alosete.
Kiwara ŋituŋa Yesu
22Taparacu keŋ, apotu ŋituŋa ŋulu aya ekekwaye anam toanyut atemar apeitaker bon ayai nen. Ayenete ikes atemar pa abu Yesu todoka nataker, nai ŋikeekasyomak bon adokarito. 23Kepotu ŋatakerin ŋuna alo Tiberia todolut diyete neni emuja asepic ŋina a ŋituŋa ŋamugati, kedau Yesu alakar neni ka Akuj. 24Ani iŋolikinete ŋituŋa emam Yesu ka ŋikeekasyomak a nen, todoka ŋatakerin ŋun, toloto Kaperenaum akiwarit Yesu.
Yesu iŋes erae akimuj ŋina ka akiyar
25Ani eryamunete ŋituŋa Yesu alokekwaye anam, kiŋita iŋes temasi, “Eketataman, ori idolunio iyoŋ nege?”
26Toboŋok Yesu ikes tema, “Akalimokini ayoŋ iyes kire atemar, ikiwarito iyes ayoŋ meere aŋuna iponiata toyenut apolou a ŋakujuwuanisya, nai erae aŋuna iponiata kimuja ŋamugati, kimwoko. 27Nyitiyata aŋuna ka akimuj a ŋina ebosiyari, nai kitiyata toryamut akimuj ŋina eropari tari nakiyar ŋina nyedaun, ŋina ikiini iyes Lokoku a Ituŋanan. Anerae neni keŋ iwuakinit Akuj Papa emacar ŋolo eminar iŋes.”
28Kiŋita nai ikes Yesu temasi, “Ikikokini isua ai, ikotere kitiyaere etic ŋolo ka Akuj?”
29Toboŋok nai Yesu ikes tema, “Etic ŋolo ka Akuj iŋes lo: itemokino tonupa ŋolo iyakuunit iŋes.”
30Kiŋita ŋituŋa Yesu temasi, “Anikujuwuanut ibuni iyoŋ akitiyakin, eŋolikisi isua, ido onupa ŋakiro kon? 31Apotu koloŋ atapapaa kosi kimuja Manna analoŋisat ikwapei igiritere Nakigireta ebe, ‘Abu iŋes inak ikes akimuj ŋina anakuj kimuja.’ ”
32Tolimok Yesu ikes tema, “Akalimokini ayoŋ iyes kire atemar, pa arae Moses ikiini iyes akimuj ŋina anakuj, nai Papa kaŋ ikiinakini iyes akimuj ŋina a kire ŋina anakuj. 33Anerae akimuj ŋina ka Akuj iŋes ŋina ebunit anakuj ainakin akwap akiyar.”
34Temasi ikes iŋes, “Ekapolon, inanakinetei isua jwi jwi akimuj ŋin.”
35Tolimok Yesu ikes tema, “Arae Ayoŋ akimuj ŋina ka akiyar. Ŋini enyami akimuj ŋin, nyenyami akoro jik ka ŋini akanupi ayoŋ, nyenyami akure jik. 36Aris ayoŋ kakalimok iyes atemar tari daŋ kikianyunito ayoŋ, nyenupa iyes ayoŋ. 37Ituŋanan daadaŋ ŋini akainit ayoŋ Papa kaŋ ebuni neni kaŋ, nyeritari jik ayoŋ iŋes ebuni neni kaŋ; 38anerae nyabunit ayoŋ anakuj akitiya acamit kaŋ, nai akitiya acamit a ŋolo ekeyakuunit ayoŋ. 39Acamit a ŋolo ekeyakuunit ayoŋ, iŋes na: nyitemokino ayoŋ etooliyo idiotuŋanan ŋini akainaki iŋes ayoŋ; nai akilo, eteyaru ikes Akoloŋit ŋina esidyon. 40Ŋuna ecamit Papa kaŋ ikes nu: ŋini eanyuni ka tonup Lokoku, eryamuni akiyar ŋina nyedaun. Eteyaruni ayoŋ iŋes Akoloŋit ŋina esidyon.”
41Kisyakis Ŋiyudayan akiŋuruŋura aŋuna a Yesu, anerae abu iŋes tema, “Arae Ayoŋ akimuj ŋina abuni anakuj.” 42Kirworikinos ikes make temasi, “Meere lo lokoku a Yosepu a? Nyikiyeni mono iwon papa keŋ ka toto keŋ a? Ikokini iŋes elimuni ebe ebunit iŋes anakuj ai?”
43Tolimok Yesu ikes tema, “Tojoŋoto alokidiŋ kus akiŋuruŋura. 44Emam idiotuŋanan ŋini ebuni neni kaŋ, mati keyau Papa ŋolo ekeyakuunit ayoŋ iŋes neni kaŋ, eteyaru iŋes Akoloŋit ŋina esidyon. 45Igirit ekadwaran epei ebe, ‘Ebuni Akuj akitatam ŋituŋa daadaŋ.’ Ŋulu iirarete Papa, toyenut aneni kaŋ, epote neni kaŋ. 46Nyabala ayoŋ aanyu idiotuŋanan Papa, nai ŋolo ebunit aneni ka Akuj, iŋes bon aanyu Papa. 47Akalimokini ayoŋ iyes kire atemar, ŋini enupi, eryamuni akiyar ŋina nyedaun. 48Arae Ayoŋ akimuj ŋina ka akiyar. 49Tari koloŋ kimujito atapapaa kus Manna analoŋisat, apotu totwaka ekaku. 50Nai ŋini imuji akimuj ŋina ebunit anakuj, nyetwani. 51Arae Ayoŋ akimuj ŋina ka akiyar a ŋina ebunit anakuj; ŋini imuji akimuj ŋin, eyari iŋes jik. Akimuj ŋina ainakini ayoŋ toyarya akwap, erae akuwan kaŋ.”
52Topegakinos nai Ŋiyudayan make temasi, “Ikokini ekile lo ikiinakini iwon akuwan keŋ kimujae ai?”
53Aŋun, tolimok Yesu ikes tema, “Akalimokini ayoŋ iyes kire atemar, ani pa kimuja iyes akuwan a Lokoku a Ituŋanan ka tomata ŋaokot keŋ, nyiyakaunotor akiyar tooma kus. 54Ŋini imuji akaakuwan, tomat ŋaokot kaŋ, eyakar iŋes akiyar ŋina nyedaun, abuni ayoŋ akiteyarun iŋes Akoloŋit ŋina esidyon. 55Anerae erae akaakuwan akimuj kire ka ŋaokot kaŋ ŋamatan kire. 56Ŋini imuji akaakuwan ka tomat ŋaokot kaŋ, iboi alotooma kaŋ, ayoŋ daŋ eboi alotooma keŋ. 57Ikwaŋinapei ekeyakuunia ayoŋ Papa ŋolo eyari, nabo ayoŋ daŋ oyari aŋuna a Papa, ikwaŋinapei, ŋini ekemuji ayoŋ, eyari aŋuna kaŋ. 58Erae ŋin akimuj ŋina ebunit anakuj; nyikoni iŋes akimuj ŋina apotu atapapaa kus kimuja, nai apotu totwaka ekaku. Kire, ŋini imuji akimuj ŋin, eyari jik.”
59Alimuni Yesu ŋakiro ŋun alosinagoga itatami ŋituŋa alo Kaperenaum.
Ŋakiro ŋuna ka akiyar a ŋina nyedaun
60Ani iirarete ŋikasyomak a Yesu ŋulu alalak ŋakiro ŋun, temasi, “Egogoŋ ekitatame lo! Ŋae epedori akiirar?”
61Ikwaŋina ayenia Yesu elope atemar eŋuruŋurasi ikes aŋuna a ŋakiro a ŋun, abu kiŋit ikes tema, “Ekoto ŋakiro ŋun akiteesikin iyes etic lo a? 62Ani bo nai kiŋolikis iyes Lokoku a Ituŋanan edokari neni ebunitor iŋes? 63Erae Etau ŋolo ka Akuj iŋes ikiini akiyar; ecaryono apedor ŋina a ituŋanan. Ŋuna akalimok ayoŋ iyes erae ŋuna ileleba Etau tooma kec ka eyaunete akiyar. 64Nai alokidiŋ kus eyakasi ŋulu nyenupito.” (Anakisyakinet, ayeni Yesu ŋulu pa anupito iŋes ka ayeni daŋ ekalukinon keŋ.) 65Tolimu nabo Yesu tema, “Ikes ŋakiro ŋuna abunio ayoŋ okolimok iyes atemar, emam ŋini ebuni neni kaŋ, mati kecamaki Papa iŋes.”
66Ani iirarete ikes ŋun, apotu ŋikasyomak keŋ ŋulu alalak tojamakis, tojoŋoto arukit ka iŋes. 67Kiŋit Yesu ŋikasyomak ŋulutomon ka ŋiarei tema, “Icamito iyes daŋ arotokin a?”
68Toboŋok Simoni Petero iŋes tema, “Ekapolon, neni a ŋae ikilosi? Iyakar iyoŋ ŋakiro ŋuna ka akiyar a ŋina nyedaun. 69Ikinup ka ikiyenu daŋ atemar irae iyoŋ ŋolo donupei, ŋolo ka Akuj.”
70Toboŋok Yesu ikes tema, “Nyeseuna ayoŋ iyes ŋulutomon ka ŋiarei a? Nai, eyai kidiŋ kus ŋolo erae ŋolo a Satan!” 71Erworo iŋes aŋuna a Yuda, alokoku a Simoni Isikariot. Anerae, tari ŋina araakar epei alokidiŋ ŋulutomon ka ŋiarei, aapi iŋes alukin Yesu.
Ngakarimojong Interconfessional Bible © Bible Society of Uganda, 2008.